Lubos na Paggamit sa Satong mga Pandepensa
1 Sinasalakay ni Satanas an mga pamilya ngonyan, na ginigibo an bilog niang makakaya na laglagon sinda. Makamomondo nanggad kun an mga aki maholog sa seksuwal na inmoralidad, pagbuburat, pag-abuso sa droga, o iba pang kasalan! An iba aktuwal na naheling an saindang mga aking lalaki o babae na minarayo ki Jehova, na nababangkag sa kinabanon na kaisipan asin mga horot. (Tal. 10:1; 17:21) Kadungan kaiyan, dakol na hobenes an nagdanay na malinig asin sibot sa paglilingkod ki Jehova. (3 Juan 3, 4) Ano an dahelan kan kalaenan? Sa dakol na kaso iyan an determinasyon kan mga magurang saka mga aki na lubos na gamiton an mga pandepensang itinatao.
MGA PANINIMBAGAN KAN MGA MAGURANG
2 An sarong mahalagang pandepensa lubos na masabotan nin mga ama an mga kahagadan ni Jehova para sa payo nin pamilya asin midbidon an pangangaipo na manarig ki Jehova para sa giya. An sarong nagdusay na ama maninigong pangenotan an pamilya sa espirituwal na programa nin pamibi, pag-adal, asin banal na paglilingkod. (1 Tim. 5:8) Tanganing malaoman nia an saiyang agom na babae asin mga aki na igalang an saiyang autoridad, kaipuhan na magpaheling sia nin pagkaogma sa pagkuyog nia sa Dios asin sa Saiyang organisasyon. (1 Juan 5:3) Kun inaarog nin sarong ama si Jehova paagi sa pagtratar sa saiyang pamilya sa mainit, mamomoton, asin dai nagpapabarobagong paagi, nakakamtan nia an saindang paggalang, asin mas mamomotibar sindang arogon an saiyang halimbawa. Ini magtatao nin kaomawan asin onra ki Jehova.
3 Nagigirumdoman daw nindo an parte sa kombension na “Mga Magurang—Iangay an Pagtotokdo Tanganing Maabot an Saindong mga Aki”? Idto may kaibang demonstrasyon na nagpapaheling nin sarong pamilya na nag-aadal sa sarong artikulo sa Torrengbantayan. Kinonsiderar kan mga magurang an kada aki asin an grado kan saiyang abilidad na makanood. Idto bakong mekanikal na hapot-simbagan, kundi hiningoa kan mga magurang na maabot an puso kan saindang mga aki kan katotoohan. Tibaad partikularmenteng magigirumdoman nindo na mga tugang na babae kun paano an ina mapagsuportar sa saiyang agom, na nagpaparisa nin pagpapasakop asin sa siring nagtatao nin marahay na halimbawa sa mga aki.—Efe. 5:21-24.
MGA AKI—ANO AN LINALAOMAN SA SAINDO NI JEHOVA?
4 Kun paanong an saindong mga magurang sinasalakay ni Satanas, iyo man kamo. Ano an pandepensa nindo? An pagkuyog ki Jehova asin sa saindong mga magurang. Pinakakakan asin sinusustentohan kamo kan saindong mga magurang. Iyan ginigibo ninda sa dakol nang taon. Alagad mantang kamo nagdadakula, linalaoman na kamo umako nin espirituwal na mga paninimbagan. Kaipuhan na isapuso nindo an katotoohan. Linalaoman kamo ni Jehova na gibohon an aram nindong tama. (Ecl. 11:9) Kun nanodan nindo na an dalan ni Jehova tama, kun siring nasa saindo na an pagigin madonong na kuyogon iyan.
5 Mantang kamo nagkakaedad, an angat na magdanay na malinig sa moral orog na dai minapondo. Igwa nin lakop sa kinaban na epidemya nin maating impluwensia, asin napapaatubang kamo dian aroaldaw. An pandepensa nindo nasa pagkamoot sa marahay asin pagkaongis sa maraot. (Sal. 52:3; 97:10) Makiasosyar sa mga namomoot ki Jehova. Basahon an nakapakokosog. An helingon sanang mga pasale iyo an mga marahay. (Fil. 4:8) Kun nasusugotan, girumdomon an resulta kan barobata na kulang nin puso. (Tal. 7:6-27) Pagiya ki Jehova sa saindong mga pag-isip asin hiro, asin magdadanay kamong ligtas sa saiyang lado.
6 Iyo, an mga magurang asin aki kaipuhan na magdanay na alisto sa mga peligro na nakapalibot sa sato gabos. Paagi sa lubos na paggamit kan satong mga pandepensa, puwede kitang magin mapanggana sa pakikilaban asin magkapribilehiyo na mag-omaw ki Jehova sagkod lamang.