Puwede daw Kamong Magin Auxiliary Payunir sa Marso Asin Abril?
1 Pinonan ni Jesus an gibohon na paghuhulit na may siring na sanang importansia na an ngapit kan bilog na katawohan depende sa resulta kaini. (Mat. 4:17) An gibohon na ini maabot sa kulminasyon kaini bago “an katapusan,“ kun an mensahe kan Kahadean natapos nang “ihulit sa bilog na ineerokan na daga para sa pagpatotoo sa gabos na nasyon.” —Mat. 24:14.
2 An gibohon na ini mas apurahan ngonyan kisa kasuarin man. An areglo sa pag-auxiliary payunir nagpakosog sa dakol na magin mas aktibo sa paghaman kan gibohon na ini. Puwede daw kamong mag-auxiliary payunir sa Marso asin Abril?
MARAHAY NA MGA OPORTUNIDAD SA MARSO ASIN ABRIL
3 Mantang an Marso may limang Sabado asin an Abril may limang Domingo, ekselenteng mga bulan ini para sa pag-auxiliary payunir. Minsan an ibang may panbilog na panahon na empleo puwedeng magibo ini. An ibang nagpayunir kan nakaaging taon binendisyonan nin dakol asin mawot na maglingkod liwat sa taon na ini. Taano ta dai ini ipakipag-olay sa mga nombrado na asin maghagad nin nagkapirang praktikal na suhestion sainda? Siring man, puwede kamong mag-atender sa pagtiripon sa Pebrero 18 sa mga naglalaom na magin auxiliary payunir asin makakua nin dugang na pankosog duman.
4 Minsan siring na an pagpahiwas kan satong paglilingkod mangangaipo nin pagsasakripisyo nin ibang personal na interes paagi sa pagtatanom nin abunda, mag-aani kita nin dugang na espirituwal na mga bendisyon. (2 Cor. 9:6) Idtong mga naglilingkod ki Jehova nin bilog na kalag “napano nin kaogmahan” sa abundang pag-aani nin bagong mga disipulo.—Gibo 13:48, 52.
SARONG TEOKRATIKONG TANGGA
5 An dakol na nakanamit mag-auxiliary payunir kan enot nagin mga regular payunir. Kaya an pagigin auxiliary payunir nagseserbeng tangga pasiring sa mas dakulang kaogmahan. Kun puwede kamong mag-auxiliary payunir sa Marso asin Abril, puwede kamong magkaigwa nin mga pagdalaw liwat asin mga pag-adal sa Biblia na makatatabang saindong makagibo nin pasil na pagbalyo sa paglilingkod bilang regular payunir sa Setyembre o maski bago kaiyan.
6 Taano ta an dakol nagpapahiwas kan saindang ministeryo sa panahon na ini imbes na magmawot nin orog na materyal na mga pakinabang sa sistemang ini? Ini huli ta aram nindang “an kinaban maagi sana asin an hoiot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:17) Naghihiro sindang kaoyon kan saindang pamibi na an Kagurangnan kan pag-aani “masobol nin mga paraani sa saiyang anihon.”—Mat. 9:37, 38.
7 An paggibo kan gabos na maka-kaya niato sa paglilingkod ki Jehova nagrerekomendar sato bilang idtong mga ‘nagpapagal asin naghihingoa sa pagtabang sa gabos na klase nin mga tawo tanganing makaligtas.’—1 Tim. 4:10.