Pagselebrar kan Memorial sa 1990
1 An Martes, Abril 10, 1990, matanda sa ika-1,957 anibersaryo kan Memorial kan kagadanan ni Cristo. Kun ginigibo an satong mga plano sa pag-atender, kaipuhan na isipon niato an iba na tibaad nagkakaipo nin imbitasyon o kan satong personal na tabang. Ngonyan na an panahon na pumoon sa pag-andam para sa Memorial asin sa pag-isip-isip manongod sa pag-imbitar sa iba.—Tabi helingon an “Mga Bagay na Dapat Andamon Para sa Memorial” sa pahina 3.
2 Ano an punto-de-vista niato manongod sa pag-atender sa Memorial? Maninigong ibilang niato iyan na pribilehiyo asin oportunidad na ipaheling an pag-apresyar sa atang ni Cristo. Kun aram nindo na mayo kamo sa saindong sadiring kongregasyon, seguradohon na nasa saindo an adres kan Kingdom Hall sa saindong dudumanan tanganing makaatender kamo duman.
GAMITON AN ESPESYAL NA MGA IMBITASYON
3 Puwede nindong ponan na gamiton an espesyal na imbitasyon sa Memorial sa mga panahon kan espesyal na pahayag-publiko sa Marso 25. Girumdoma na iyan dai gagamiton na handbill kundi maninigong itao nin personal sa mga interesado. Mantang parateng nalilingawan nin mga tawo an petsa asin oras, isinusuherir na isurat niato nin malinaw o imakinilya an adres kan Kingdom Hall asin an oras kan Memorial sa ibaba kan imbitasyon. An mga bagong interesado tibaad mag-alangan na magsolong paduman sa Kingdom Hall. Puwede daw kamong magpresentar na ibanan sinda o sabaton sinda sa luwas kan tiriponan? Saro pa, maninigong gibohon an espesyal na paghihingoa na tabangan an mga nahaloyhaloy nang nakamidbid kan katotoohan pero dai nag-aatender sa mga pagtiripon nin regular.—Luc. 11:23; Juan 18:37b.
KAIPUHAN NA MGA PAG-ANDAM
4 Bobooton nin kamagurangan sa kongregasyon na seguradohon na an gabos na areglo para sa Memorial maingat nang ginibo bago pa. Siertohon na pumili nin kuwalipikadong mga tugang na magdodolot kan mga emblema. An mga tugang na ini maninigong mga magurang o ministeryal na lingkod, kun igwa. Magkaigwa nin bastanteng mga tugang na andam na gumibo kaini tanganing dai mahaloy na gayo an pagdolot kan mga emblema. Pakatapos na mapaglingkodan kan mga serbidor an mga nagdadangog, an mga serbidor matukaw sa enotan asin seserbihan sinda kan espiker. Ultimo, an saro sa sainda maserbi sa espiker.
5 Sa pag-agi kan kada taon, napaparani kita sa aldaw na dai na seselebraron an Pamanggihan kan Kagurangnan. Ipinagboot ni Jesus na girumdomon an saiyang kagadanan sagkod na an gabos niang tugang kaiba na nia sa Kahadean. (Luc. 22:19; 1 Cor. 11:25) Sagkod sa panahon na iyan kita makinuyog asin maimbod na magtitiripon kada taon para sa pagselebrar kan Memorial na may dakulaon na kagayagayahan asin pag-apresyar.