Pag-aatubang kan Maogmang Bareta—Sa Mapagngayongayong Paagi
1 Si apostol Pablo nakapagpapakosog na nagsurat: “Igwa ako kan kosog para sa gabos na bagay huli sa saiya na nagtatao nin kapangyarihan sa sako.” (Fil. 4:13) Kaipuhan man kitang lubos na manarig ki Jehova tanganing mapusong ikaatubang an maogmang bareta. Paano daw niato magigibo ini?
2 Idinoon ni Jesus an pangangaipo na kita “danay na mamibi asin dai manluya.” (Luc. 18:1) Si Pablo nagsadol: “Mamibi nin daing ontok.” (1 Tes. 5:17) Iyo, an kosog naggigikan sa pamibi. Puwede niatong ipamibi an mga oportunidad na makapagpatotoo sa iba, an kadonongan asin pagmansay sa pagharongharong, asin an kapangganahan sa pagtaros sa puso kan satong mga inaadalan sa Biblia. Kaipuhan na ipamibi niato an pag-oswag kan intereses kan Kahadean sa bilog na kinaban. (Mat. 24:14) Kaipuhan kitang ‘magpuka’ sa pamimibi tanganing malikayan an espirituwal na pagtungka asin madugangan an satong apresasyon sa pribilehiyo na magtaram manongod sa mga katuyohan ni Jehova.—Col. 4:2.
SA MGA PAG-ADAL SA BIBLIA
3 Taano ta napakahalaga nin pamibi sa pag-adal sa Biblia? An pagpopoon paagi sa pamibi ibinubugtak kita sa tamang kaisipan asin natatabangan kaiyan an inaadalan na marealisar an halaga kan sinasabi. An inaadalan nakakanood man kun paano mamimibi paagi sa satong halimbawa.—Luc. 11:1.
4 Ano an nagkapira sa mga bagay na puwede niatong iiba sa mga pamibi sa pag-adal sa Biblia? An modelong pamibi ni Jesus asin an pamibi ni Pablo para sa mga taga-Filipos ekselenteng mga halimbawa. (Mat. 6:9-13; Fil. 1:9-11) An satong pamibi dai man kaipuhan na magin halabaon, pero iyan maninigong manongod sa espisipikong mga bagay. Maninigong iiba niato an mga kapahayagan nin pag-omaw ki Jehova. (Sal. 145:3-5) An pagsambit sa ngaran kan inaadalan sa Biblia, tibaad sinasabi pa an saiyang kamugtakan, asin pag-arang na sia umoswag sa espirituwal magigin kapakipakinabang. Mantang sia nag-ooswag, puwede niatong arangon an bendisyon ni Jehova sa saiyang mga paghihingoa na umatender sa mga pagtiripon asin ihiras sa iba an katotoohan. Iiba an mga pag-arang sa bendisyon ni Jehova sa lakop sa kinaban na paghuhulit.
PARA SA SATONG MGA TUGANG NA LALAKI ASIN BABAE
5 An bilog na banwaan ni Jehova mga katrabaho niato. (1 Cor. 3:9) Kaya, kun an sekular na mga kapangyarihan naghihingoa na olangon an paghuhulit, kita napahihirong mamibi “manongod sa mga hade asin sa gabos na nasa halangkaw na katongdan.” Sa anong katuyohan? “Tangani kitang makapamuhay nin tiwasay asin toninong na may lubos na diosnon na debosyon asin kahusayan.” (1 Tim. 2:1, 2) An siring na mga pamibi sa aktuwal apabor sa satong mga tugang sa bilog na kinaban.
6 Paagi sa pamibi, makaaarang kita nin kosog para sa satong mga tugang na naghuhulit sa masakit na mga kamugtakan asin sa mga may helang sa espirituwal. (2 Tes. 3:1, 2) Marahay man na ipamibi an kamagurangan, nagbibiyaheng mga paraataman, asin an Namamahalang Grupo—an gabos na “nagpapagal dian sa saindo.”—1 Tes. 5:12.
7 Kaipuhan na itao niato ki Jehova an satong mga kahaditan. (Sal. 55:22; 1 Ped. 5:7) Sinisierto sato na ano man an hagadon niato kaoyon sa saiyang kabotan, dadangogon nia kita. (1 Juan 5:14) Kun siring, kun aarangon niato an tabang ni Jehova sa satong ministeryo, maninigo kitang manarig na sia maghihinanyog asin gigibohon na mapanggana an satong dalan.—2 Tim. 4:5.