Pakosogon an Iba na Magbasa kan An Torrengbantayan
1 Sa Mayo, boot niatong pakosogon an mga mamomoton sa katotoohan na regular na magbasa kan An Torrengbantayan. Sa gabos na magasin na ipinupublikar ngonyan, iyan sana an nagtatao nin mahalagang espirituwal na pagkakan na kaipuhan kan mga nag-aaragagha asin nag-aaragrangay huli sa gabos na makamomondong kamugtakan sa daga.—Ezeq. 9:4.
2 An Torrengbantayan nakatabang sato na masabotan an hula kan Biblia na nagpapatunay na kita nabubuhay sa panahon nin katapusan asin na an Kahadean nin Dios dai na mahahaloy pangyayarihon an katoninongan sa daga. An satong tunay na pagmakolog sa buhay kan iba nagpapahiro sato na ihiras an makangangalas na paglaom na ini sa sainda. Asin napakokosog kita na maheling na an kadakol na sadiosan an puso tinitipon para sa kaligtasan.—Juan 10:16.
3 An Mayo 1 Torrengbantayan nagtatampok kan temang “Pag-atubang sa Krimen sa Maribok na Kinaban.” An Mayo 15 luwas sa Ingles nagtatampok kan “Put God First in Your Family Life!” An mga artikulong ini madali sanang ikakokonektar sa satong presenteng Topikong Mapag-oolayan manongod sa Kahadean nin Dios. Mag-andam nin marhay tanganing ikapaheling nindo kun paanong an mga artikulo makatatabang sa kagharong na mapaoswag an saiyang pakasabot sa temang pinag-oolayan.
4 Girumdomon na an satong gibohon iyo an paghulit kan maogmang bareta asin paggibo nin mga disipulo. Kun an tawo habong sumuskriber pero boot na magbasa nin nagkapirang artikulo sa panapanahon, tibaad pinakamarahay na itala an saiyang ngaran sa saindong ruta nin magasin asin regular na dumalaw tanganing ihatod an mga magasin. Ini magpapangyari saindong mapatalubo an saiyang interes na may pasohan na makapoon nin pag-adal sa Biblia sa katapustapusi.
5 An Mayo mag-aalok nin dakol na oportunidad na makipag-olay manongod sa Kahadean sa harong-harong asin sa impormal na paagi. Kita makasasarig na bibendisyonan ni Jehova an satong mga paghihingoa na magtao nin espirituwal na pagkakan sa mga mahoyo sa satong teritoryo.