Mag-andam Para sa Aktibidad na Pagmamagasin sa Abril
Siring sa ipinaheling sa satong 1996 Calendar, iseselebrar an Pamanggihan kan Kagurangnan ngonyan na taon sa Abril 2. Naparirigon an boot kan dakulang okasyon na ini, an gabos makikabtang sa maigot na pagwaras nin magasin sa bilog na Abril. Kanigoan kanapapanahon na mga magasin an satong gagamiton! Makonsentrar An Torrengbantayan para sa Abril 1 sa pahayag-publiko kan nakaaging taon na pandistritong kombension, “Omawon an Hade na Daing Sagkod!” Pasusundan kan Abril 15 Torrengbantayan an tema kan espesyal na pahayag-publiko kan nakaaging Abril, “Harani Na an Katapusan kan Falsong Relihion.” Dangan an espesyal na pahayag ngonyan na taon sa Abril 21, “Pagdadanay na Daing Kanawayan sa Tahaw nin Sarong Bikong Kapag-arakian,” maninigong magtao nin dugang pang pag-animar sa satong aktibidad sa Kahadean. Dangan itatampok niato an Abril 22 na Awake! sa temang “When Wars Will Be No More.”
Kasunod kan kampanyang Kingdom News kan nakaaging Abril, ngonyan na Abril maninigong magin ekselenteng bulan para sa pagwaras nin magasin. Ngonyan na an panahon na gumibo nin mga plano. Dakol an magmamawot na magpalista bilang auxiliary payunir. Inaantisipar ini, maninigong pedidohon an ekstrang mga kopya kan Abril na magasin. Puedeng gumibo nin mga plano para sa mga Aldaw nin Pagmamagasin, na an gabos nakikakabtang kun mapupuede, sa aga, odto, asin/o banggi. Kita gabos ‘magin paragibo kan tataramon.’ Siring sa pagkahula mapadapit sa Mesiyas sa Salmo 69:9, makapagsabi man logod kita: “Hinalon ako kan kaigotan para sa saimong harong.”—Sant. 1:22; Juan 2:17.