Magigibo daw Niato an Abril 2000 na Mani Satong Pinakamarahay na Bulan Kasuarin Man?
1 Mierkoles na banggi, Abril 19, an magigin tampok na kabtang kan satong taon nin paglilingkod. Sa aldaw na iyan, mantang an saldang luway-luway na nagsosolnop sa bilog na daga, gigibohon kan lambang kongregasyon asin grupo nin Mga Saksi ni Jehova sa bilog na kinaban an Memorial kan kagadanan ni Cristo. Saen man kitang lugar nag-iistar sa kinaban, an paggirumdom kan atang ni Jesu-Cristo magigin pinakamakahulogan na pangyayari kan taon. An petsa kan Memorial minarkahan sa kaibang “Teokratikong Kalendaryo Para sa Abril 2000,” na yaon sa pahina 6 kan suplementong ini.
2 An enterong bulan nin Abril nagtatao sato nin marahayon na oportunidad na ipaheling nin bilog na kalag an satong pagpahalaga sa dai na kutana maninigong kabootan ni Jehova na ipinahayag paagi sa atang kan saiyang Aki. Taano man? Si apostol Pablo nagsurat: “Itinutulod kami kan pagkamoot na yaon sa Cristo, huli ta iyo ini an samuyang paghusgar, na an sarong tawo nagadan para sa gabos; kaya, kun siring, an gabos nagadan; asin sia nagadan para sa gabos tanganing idtong mga nabubuhay dai na mabuhay para sa sainda man sana, kundi para sa saiya na nagadan para sa sainda asin binuhay liwat.” (2 Cor. 5:14, 15) Iyo, durante kan Abril ikapaheheling niato na kita nabubuhay, bakong para sa satong sadiri, kundi para sa saiya na nagadan para sa sato, na ginigibo ini na mani satong pinakamarahay na bulan kasuarin man bilang mga ministro kan Kahadean!
3 Magpalista sa Pag-auxiliary Payunir sa Abril: Si apostol Pablo nagtao sa sato nin nakapupukaw sa boot na halimbawa kan sia magsabi: “Dai ko ibinibilang na mahal sa sako an sakong kalag sa ano man na paagi, tangani sanang matapos ko an sakong gibohon asin an ministeryo na inako ko sa Kagurangnan na Jesus, na lubos na magpatotoo sa maogmang bareta manongod sa dai na kutana maninigong kabootan nin Dios.” (Gibo 20:24) Igwa kita nin kaparehong pribilehio na lubos na magpatotoo dapit ki Jehova Dios. Sa katuyohan na iyan, boot niatong gibohon an Abril na mani satong pinakamarahay na bulan kasuarin man sa pag-auxiliary payunir!
4 Huli sa limang kompletong Sabado asin Domingo kaiyan, an Abril 2000 ekselenteng bulan para sa dakol na magpayunir. Kaidtong Abril 1997, kan maabot niato an satong pinakahalangkaw na kabilangan kasuarin pa man nin auxiliary payunir, an 22,410 na nakikabtang nagrepresentar sa 18 porsiento kan total na parahayag. Pakalihis nin duwa may kabangang taon, an total na kabilangan nin mga parahayag na nagreport kan Okubre1999 nag-aumento nin haros 6 na porsiento. Ini nangangahulogan na igwa kita nin tunay na potensial na malabihan an satong nakaaging pinakahalangkaw na kabilangan nin auxiliary payunir. Saro pa, an kahagadan na oras ininaan na poon kaidto, na pinangyayari an kabtang na ini nin paglilingkod na madaling maabot nin dakol pa sa kongregasyon. An balang bautisadong parahayag dapat na mapagngayongayong konsideraron kun baga kaya niang mag-auxiliary payunir sa Abril.
5 Ginagamit an “Teokratikong Kalendaryo Para sa Abril 2000” sa suplementong ini, planohon na ngonyan an saindong iskedyul para sa masunod na bulan. Magdesisyon kun sa arin na mga aldaw nindo mahihimong makikabtang sa paglilingkod sa langtad, asin sumahon an gabos na oras na iniisip nindo na kaya nindong idusay sa paghuhulit durante kan bulan na iyan. Iiba an oras na magagamit nindo sa paghuhulit sa iba sa pormal sagkod impormal na paagi. Harani na daw an total sa kahagadan na 50 oras sa mga auxiliary payunir? Kun kulang kamo kan kinakaipuhan na oras, makagigibo daw kamo nin ano man na iba pang pagliliwat sa saindong iskedyul tangani na matubos an panahon sa pag-auxiliary payunir? Kaipuhan sana nindong magpromedyo nin sarong oras may 40 minutos kada aldaw tangani na maabot an 50 oras para sa bulan na iyan.
6 Ngonyan na nainaan na man an kahagadan na oras sa mga regular payunir, pinaplano na daw nindong lumaog sa bilog na panahon na ministeryo? Taano ta mahalat pa sagkod sa sunod na Setyembre tangani na pumoon? An Abril marahayon na bulan na pumoon! Kun dai kamo nakasisierto dapit sa saindong abilidad na maabot an 70 oras na kahagadan sa mga regular payunir, taano ta dai mag-auxiliary payunir sa Abril asin magbugtak nin 70 oras bilang saindong pasohan? Oras na maheling nindo na kaya nindong gibohon iyan, tibaad mas ganahan kamo na mag-aplay na makabilang sa mga regular payunir sa pinakamadaling panahon na mapupuede.—Helingon an Our Ministry, pahina 113-14.
7 Lubos na Makikabtang Bilang Parahayag kan Maogmang Bareta: Para sa sato gabos, mga parahayag asin payunir man, an satong tunay na pagkamoot sa Dios asin sa kataed nagpapahiro sa sato na magin bilog na kalag sa paggibo kan pinakamakakaya niato sa paglilingkod ki Jehova sono sa satong personal na mga kamugtakan. (Luc. 10:27) Sa siring, ipinaheheling niato na “kita nagpapagal asin naghihingoa, huli ta ibinugtak niato an satong paglaom sa nabubuhay na Dios, na Paraligtas sa gabos na klase nin mga tawo, orog na sa mga fiel.” (1 Tim. 4:10) Iyan an dahelan na maninigo niatong antisiparon na maheling an 100 porsientong pakikikabtang sa Abril, na an gabos igwa nin lubos na pakikikabtang sa gibohon na pan-Kahadean.
8 Dai niato paglingawan an sadol ni Jesus: “An anihon mahiwas, alagad an mga paraani kakadikit. Kun siring, makimaherak kamo sa Kagurangnan kan anihon na magsobol nin mga paraani sa saiyang anihon.” Tolos-tolos pakasabi kaiyan, inapod ni Jesus an saiyang 12 apostol asin isinugo sinda na maghulit. (Mat. 9:37, 38; 10:1, 5, 7) Pakalihis nin mga sarong taon, pakatapos na nasanay nang marhay an 12 sa paghuhulit, si Jesus “puminili pa nin pitong polo asin isinugo sinda,” na itinatao sa sainda an iyo man sanang mga instruksion: “Totoong gayo na kadakol kan anihon . . . Kun siring makimaherak kamo sa Kagurangnan kan anihon na magsobol nin mga paraani sa saiyang anihon.” (Luc. 10:1, 2) Ibinabareta kan libro sa Biblia na Mga Gibo kun paano sinimbag ni Jehova an mga pamibing iyan. Pag-abot kan Pentecostes 33 C.E., an kabilangan nin mga disipulo duminakol sagkod sa mga 120. Dangan, naabot an sunod-sunod na pinakahalangkaw na kabilangan na 3,000 asin 5,000 na disipulo. (Gibo 1:15; 2:41; 4:4) Pakatapos kaiyan, “an kabilangan nin mga disipulo padagos na nagdakol.” (Gibo 6:7) Kaagid kaiyan, sa presenteng kapanahonan, kaipuhan kitang padagos na makimaherak sa Kagurangnan para sa dakol pang parahulit kan Kahadean! Kaoyon kan satong mga pamibi, an balang parahayag sa kongregasyon maninigong gumibo nin depinidong mga areglo na makikabtang sa ministeryo kada bulan.
9 Tabi helingon liwat an kaibang “Teokratikong Kalendaryo Para sa Abril 2000.” Mantang an enot na duwang aldaw kan bulan Sabado asin Domingo, puede daw kamong magplano na makikabtang sa paglilingkod sa katapusan kan semanang iyan, na pinoponan nin amay an bulan na iyan? Masusuportaran daw nindo an gabos na “Aldaw nin Pagmamagasin” durante kan bulan na iyan kaiba an saindong grupo nin Pag-adal sa Libro kan Kongregasyon? Kumusta man an paggamit nin sarong oras o labi pa sa ministeryo kada Domingo? Ikaaareglo daw nindo na makikabtang sa paghuhulit sa banggi? Asin dai paglingawan na aprobetsaran an gabos na oportunidad nindo na makapatotoo nin impormal sa trabaho, sa eskuelahan, o mientras na nasa iba pang mga gibohon sa aroaldaw. Markahan an mga aldaw na kamo makapagtatao nin panahon sa ministeryo, asin gamiton an kalendaryo sa pagrekord kan saindong oras sa paglilingkod para sa bulan na iyan.
10 An Abril tamang-tamang panahon para sa gabos na kualipikado asin aprobado kan kamagurangan na magpoon na maglingkod bilang dai pa bautisadong mga parahayag. Kun may inaadalan kamo sa Biblia, supisyente na daw an saiyang pag-oswag tangani na kaolayon an nangengenot na paraataman kun puede na siang ibilang na parahayag kan maogmang bareta? Kun kamo may dai pa bautisadong mga aki, ipinakipag-olay na daw nindo sa kamagurangan an saindang espirituwal na pag-oswag? Bako daw na marahay na panahon ini na pumoon sinda na magpahayag?—Helingon an Our Ministry, pahina 97-100.
11 Sa satong paghihingoa na gibohon an Abril 2000 na mani satong pinakamarahay na bulan kasuarin man, kita gabos kaipuhan na makikabtang sa ministeryo dangan itao an satong report nin paglilingkod sa langtad sa katapusan kan bulan. (Ikomparar an Marcos 6:30.) Maninigong parigonon an boot kan bagong dai pa bautisadong mga parahayag na nakikikabtang sa paglilingkod sa langtad sa kaenot-enote na ireport tolos-tolos an saindang aktibidad. Paagi sa paggibo kan satong kabtang, makakokontribwir kita nin marahay sa report sa Abril asin sa dakulang kurahaw nin pag-omaw na itatao ki Jehova paagi sa satong mga paghihingoa na makapaghulit.
12 Ipag-iba Nindo an Iba Pa sa Memorial: Dai daw kita maoogmang maheling an bagong pinakahalangkaw na kabilangan nin maatender sa 2000 na Memorial kan kagadanan ni Cristo? Iyo! Iyan mangangahulogan na an pinakadakol na tawo kasuarin man magkakatiripon tangani na ipaheling an saindang pagpahalaga sa pinakadakulang kapahayagan nin pagkamoot na ginibo ni Jehova Dios asin ni Jesu-Cristo sa satong kapakanan! (Juan 3:16; 15:13) Gumibo nin ano man na mga areglong kinakaipuhan tanganing mayo nin ano man na makaolang sa saindo asin sa saindong pamilya sa pag-atender sa Memorial.
13 Panahon na man ngonyan na magpoon na imbitaran an iba sa Memorial. Gumibo nin lista nin gabos na gusto nindong maheling na mag-atender. Iiba an siisay man na nakipag-adal sa Biblia kan nakaagi, an mga nag-aadal ngonyan, asin an gabos na dinadalaw nindo liwat. Idugang sa lista an saindong mga kamidbid sa trabaho, sa eskuelahan, asin sa kataraed, siring man an siisay man na kanegosyo nindo. Dai paglingawan na iiba an iba pang kamidbid asin an saindong mga paryente. Pakatapos na magibo an lista, pumoon na magpaabot nin odok sa boot, personal na imbitasyon sa balang saro. Liwanagon kun noarin asin kun saen gigibohon an Memorial. Mantang nagrarani an Abril 19, pagirumdomon an mga nasa lista nindo, magsalang nin personal o sa telepono. Alokon na umiba sinda saindo pasiring sa Memorial sa bangging iyan.
14 Kaoyon kan nakaaging instruksion hale sa Sosyedad, an grupo nin kamagurangan magibo nin espesyal na paghihingoa na enkaminaron an gabos na inaktibong parahayag sa teritoryo na umatender sa Memorial. (Mat. 18:12-14) Bobooton kan kamagurangan na repasohon an surat kan Sosyedad na may petsang Pebrero 2, 1999. Magibo nin lista an sekretaryo kan kongregasyon kan gabos na inaktibong parahayag, asin iaasignar kan paraataman sa paglilingkod an kamagurangan na masongko sa sainda asin maimbitar sa sainda sa Memorial. Tibaad paagi sa pag-ako nin nakaparirigon sa boot na pagdalaw para sa pagpastor sa pinakamadaling panahon na mapupuede, an mga inaktibong ini puedeng matabangan na magin aktibo giraray sa ministeryo sa langtad, dawa durante kan Abril. Makaparirigon para sa sainda na maimbitaran na makaiba an eksperyensiadong parahayag sa paglilingkod sa langtad.
15 Mag-enkaminar nin Marahay na Suporta Para sa Abril! Mangangaipo nin marahay na koordinasyon an gabos na kamagurangan, ministeryal na lingkod, asin payo nin pamilya tanganing magibo an Abril 2000 na mani satong pinakamarahay na bulan kasuarin man. An kamagurangan magigin mahigos sa pag-organisar na marhay kan gabos na bagay asin sa pangengenot. (Heb. 13:7) Kaipuhan na gumibo nin praktikal na mga areglo para sa mga pagtiripon bago lumuwas sa paglilingkod sa langtad sa ordinaryong mga aldaw nin semana asin sa Sabado patin Domingo. Puedeng mag-areglo nin dagdag na mga pagtiripon bago lumuwas sa paglilingkod para sa aktibidad sa huring mga oras sa hapon asin amay na mga oras sa banggi. Maninigong ipaskil sa information board an kompletong iskedyul nin gabos na plinano para sa Abril. Kaipuhan na mag-asignar nin saro na mangengenot sa kada nakaiskedyul na pagtiripon bago lumuwas sa paglilingkod. Maninigo na magtao nin supisyenteng teritoryo tangani na maasikaso an mga pangangaipo kan kada grupo.
16 Itatampok sa Abril an mga magasin na An Torrengbantayan asin Awake! Sa paghihingoang makapoon nin mga pag-adal sa Biblia, iaalok an brosyur na Kahagadan sa gabos na nagpapaheling nin interes. Huli kaini, kaipuhan na magtao nin bastanteng suplay nin mga magasin asin brosyur.
17 Sa katapusan kan bulan, bobooton kan gabos na namamayo sa pag-adal sa libro asin kan saindang mga katabang na enkaminaron an balang saro sa saindang grupo na itao an report nin paglilingkod tolos-tolos pakatapos kan bulan. Tibaad puede pa ngani ining gibohon sa Domingo, Abril 30. Dangan, kun kuentahon na kan sekretaryo an mga report, kun mariparo nia na an nagkapirang parahayag dai pa nakapagtatao kan saindang report, puede niang maboot na pagirumdomon sinda na gibohon iyan bago Mayo 6, an panahon na dapat na niang isumitir sa Sosyedad an report kan kongregasyon. Puede siang patabang sa mga namamayo sa pag-adal sa libro sa pagkontak sa indibiduwal na mga parahayag.
18 An panahon kan Memorial iyo an pinakaimportanteng peryodo kan taon para sa banwaan nin Dios. Iyan siertong pinakasibot na panahon para sa sato gabos na naglilingkod ki Jehova. Mangyayari iyan kun an gabos makikikabtang nin lubos sagkod sa mapupuede bilang parahayag kan maogmang bareta, kun gigibohon iyan kan mga may kakayanan na magpalista sa pag-auxiliary payunir, asin kun kita mahigos na ipag-iba an iba pa sa Memorial kan kagadanan ni Cristo. Odok sa boot na mamibi kita para sa mayaman na bendisyon ni Jehova mantang hinihingoa niatong gibohon an Abril 2000 na mani satong pinakamarahay na bulan kasuarin man, na an gabos para sa ikaoomaw asin ikamumuraway nin Dios!—Heb. 13:15.
[Kahon sa pahina 3]
Auxiliary Payunir
An Satong Pinakahalangkaw na Kabilangan Kasuarin Pa Man: 22,410
(Abril 1997)
[Kahon sa pahina 4]
Total na Parahayag
An Satong Pinakahalangkaw na Kabilangan Kasuarin Pa Man: 133,297
(Nobyembre 1999)
[Kahon sa pahina 5]
Nag-atender sa Memorial
An Satong Pinakahalangkaw na Kabilangan Kasuarin Pa Man: 407,094
(1999)