“Ihulit nin Lubos an Tataramon nin Dios”
1 Kun sinsero nindong inaapresyar an pag-ako nin sarong bagay na marahay, dai daw nindo iyan ipinaheheling paagi sa saindong aktitud asin hiro-hiro? Siempre iyo! Mapadapit sa karahayan asin mamomoton na kabootan na itinatao ni Jehova sa katawohan, mangnoha kun ano an reaksion ni apostol Pablo. Sia nagkagsing: “Salamat sa Dios sa saiyang dai ikaladawan na daing bayad na balaog”! Ano an kaiba sa “daing bayad na balaog” na iyan? An gabos na “nakalalabing marhay na dai na kutana maninigong kabootan nin Dios” na ipinaheling sa sato, an pinakadakulang kapahayagan na iyo an balaog kan saiya mismong Aki bilang sarong pantubos para sa satong mga kasalan.—2 Cor. 9:14, 15; Juan 3:16.
2 An kapahayagan daw nin pagpasalamat ni Pablo sa tataramon sana? Dai nanggad! Sa dakol na paagi ipinaheling nia an saiyang hararom na pag-apresyar. Sia nahadit na marhay manongod sa espirituwal na ikararahay kan saiyang mga kapwa Kristiano asin gustong gibohon an makakaya nia na tabangan sindang makinabang nin lubos sa mamomoton na kabootan nin Dios. May labot sa mga siring, si Pablo nagsabi: “Huli sa pagkaigwa nin mamomoton na kapadangatan sa saindo, kami naogmang gayo na itao sa saindo, bako sanang an maogmang bareta nin Dios, kundi siring man an samong kalag, huli ta kamo nagin mahal sa samo.” (1 Tes. 2:8) Dugang pa sa pagtabang sa mga kabtang na kan kongregasyon na seguradohon an saindang kaligtasan, daing kapagalan na ihinulit ni Pablo an maogmang bareta, na nagbibiahe nin rinibong kilometro sa daga asin dagat tangani na hanapon an mga “may tamang tendensia sa buhay na daing katapusan.” (Gibo 13:48) An hararom na pag-apresyar ni Pablo sa gabos na ginibo ni Jehova para sa saiya nakapahiro sa saiya na “ihulit nin lubos an tataramon nin Dios.”—Col. 1:25.
3 Bako daw na an satong pag-apresyar sa gabos na ginibo ni Jehova para sa sato nakapahihiro sa sato na magtao nin espirituwal na tabang sa mga nangangaipo nin tabang sa satong kongregasyon? (Gal. 6:10) Asin dai daw kita napahihirong magkaigwa nin lubos na pakikikabtang sagkod sa mapupuede sa paghuhulit kan maogmang bareta kan Kahadean sa bilog na teritoryo niato?—Mat. 24:14.
4 Oportunidad na Magpaheling nin Pag-apresyar: Kada taon an Memorial kan kagadanan ni Cristo nagtatao sato nin espesyal na oportunidad na ipaheling an pag-apresyar sa ginibo para sa sato ni Jehova asin ni Jesus. Ini bako sanang saro pang pagtiripon o saro sanang paggirumdom sa sarong pangyayari. Si Jesus nagsabi: “Padagos na gibohon nindo ini sa paggirumdom sa sako.” (Luc. 22:19) An Memorial kan kagadanan ni Cristo sarong okasyon tangani na horophoropon an pagkatawo ni Jesus. Iyan panahon na rekonoseron na sia buhay asin aktibo ngonyan, na may kamurawayan asin pagkahade na itinao sa saiya huli sa saiyang fiel na pamumuhay asin atang. An selebrasyon na ini oportunidad man na ipaheling an satong pagpapasakop sa pagkapayo ni Cristo mantang ginigiyahan nia an mga gibo-gibo asin aktibidad kan Kristianong kongregasyon. (Col. 1:17-20) An bilog na banwaan nin Dios maninigong may paggalang na magin presente sa Memorial kan kagadanan ni Cristo. Ngonyan na taon iyan gigibohon pagkasolnop kan saldang sa Huebes, Marso 28, 2002.
5 Huli sa utitok na paghihingoang ginibo bago kan selebrasyon kan Memorial kan nakaaging taon, nagkaigwa kita nin pinakahalangkaw kasuarin pa man na kabilangan nin mga nag-atender na 424,306 sa sangang opisina sa Pilipinas. Ano daw an kabilangan nin mga maatender ngonyan na taon? An kadaklan madepende sa satong ‘pagpapagal asin paghihingoa,’ na tinatabangan an pinakadakol na mapupuede na umatender.—1 Tim. 4:10.
6 Dugang pa sa pag-atender sa Pamanggihan nin Kagurangnan, tibaad mahimo niatong madugangan an satong aktibidad sa paglilingkod sa langtad. Daing duwa-duwa na ginatos na ribong tugang na lalaki asin babae an ma-auxiliary payunir sa laog nin sarong bulan o labi pa. Kada taon sa nakaaging limang taon, nagkaigwa kita nin promedyong 41,618 auxiliary payunir durante kan panahon nin Memorial, Marso sagkod Mayo. Kan 2001 an kabilangan 33,802, na hababa kisa sa promedyo. Puede daw nindong areglaron an saindong mga aktibidad tangani na ikaogma an pribilehiong pag-auxiliary payunir ngonyan na taon? Iyan marahay na paagi na ikapaheling an saindong sinserong pag-apresyar sa mamomoton na probisyon nin Dios na atang ni Cristo. Makasisierto kamo sa bendisyon ni Jehova, siring sa ipinaheheling kan minasunod na mga eksperyensia.
7 An sarong tugang na babae na igwa nin bilog na panahon na sekular na trabaho nagsurat manongod sa saiyang eksperyensia sa pag-auxiliary payunir kan nakaaging Marso: “An Pebrero 2001 An Satong Ministeryo sa Kahadean inenkaminar an gabos na an kamugtakan nagtotogot sa sainda na mag-auxiliary payunir durante kan panahon nin Memorial. Mantang an Marso may limang Sabado, ini bagay na marhay sa iskedyul ko. Kaya nagdesisyon akong isumitir an aplikasyon ko.” Sa pagpoon nia kan bulan, nagbugtak sia nin pasohan para sa saiyang sadiri na hingoahon na makapoon nin pag-adal sa Biblia. Nagin mapanggana daw sia? Iyo, sa saiyang ika-52 na oras nin pagpapatotoo kan bulan na iyan! An saiyang konklusyon? “Igwa nin makangangalas na mga bendisyon kun kita naggigibo nin dagdag na paghihingoa.”
8 Ano an mga pakinabang para sa sarong pamilya na iribang nagpapayunir? An sarong pamilya na may apat na miembro na naggibo kaiyan kan nakaaging Abril nanompongan na an bulan na iyan pirmeng magigirumdoman. Nagsabi an ina: “Positibo nanggad an pagmansay niamo sa kada aldaw, huling kami nagkakasararo sa ministeryo! An mga pag-orolay manongod sa samong aroaldaw na mga aktibidad sa paglilingkod an naggibo sa pamanggihan na nakaoogmang marhay.” An aking lalaki nagsabi: “Ikinaoogma ko an paglilingkod sa langtad kaiba ni Tatay durante kan semana, sa panahon na sia sa parate nagtatrabaho nin sekular.” Dagdag pa kan ama: “Bilang payo nin pamilya, nakamate ako nin satispaksion sa pakaaram na kami nagtitinabangan sa pinakaimportanteng aktibidad sa satong panahon.” Puede daw na iribang magpayunir an pamilya nindo? Taano ta dai mag-orolay bilang pamilya asin helingon kun posible para sa bilog na pamilya nindo na mag-auxiliary payunir durante kan panahon na ini nin Memorial?
9 Magigibo daw Niato an Marso na Mani Satong Pinakamarahay na Bulan Kasuarin Man? An suplemento kan Marso 2000 na An Satong Ministeryo sa Kahadean nag-atubang kan hapot na: “Magigibo daw Niato an Abril 2000 na Mani Satong Pinakamarahay na Bulan Kasuarin Man?” Ano daw an nagin simbag? Nalampasan niato an satong nakaaging pinakahalangkaw na kabilangan nin mga parahayag asin nag-atender sa Memorial, asin 19,704 auxiliary payunir an nakikabtang sa bulan na iyan. Nakadagdag man ini sa kabilangan nin oras, ikinapasakamot na mga magasin, asin pagdalaw liwat, asin an satong mga pag-adal sa Biblia nakaabot sa 100,156. Nagigirumdoman daw nindo an entusiasmo na napatalubo sa saindong kongregasyon huli sa nagsosopay na espirituwal na aktibidad durante kan espesyal na bulan na iyan? Mapapantayan daw o malalabihan pa ngani niato an mga nagibo ngonyan na taon? Paagi sa durungan na paghihingoa kan gabos, an Marso 2002 puedeng magin “Satong Pinakamarahay na Bulan Kasuarin Man.” Taano ta Marso?
10 Igwa nin duwang dahelan kun taano an Marso ta maninigong magin espesyal na bulan nin aktibidad. Enot, gigibohon an Memorial sa pagtatapos kan Marso, na nagtatao sa sato nin bastanteng oportunidad sa kapinonan kan bulan na mag-imbitar nin pinakadakol na mapupuede na umatender. Ikaduwa, ngonyan na taon an Marso may limang bilog na katapusan kan semana, na ginigibong mas pasil para sa mga nagtatrabaho nin sekular o nag-eeskuela na mag-auxiliary payunir. Taano ta dai tumukaw ngonyan asin magplano nin praktikal na iskedyul, na ginagamit an kalendaryo na itinao sa suplementong ini? An pag-auxiliary payunir tibaad mas pasil kisa sa iniisip nindo. Halimbawa, paagi sa pag-iskedyul nin walong oras sa paglilingkod sa langtad sa kada saro kan limang katapusan kan semana, kaipuhan na sana nindong mag-iskedyul nin 10 dagdag na oras durante kan iba pang aldaw kan bulan tangani na maabot an kahagadan na 50 oras.
11 Ano daw an magigibo nin kamagurangan tangani na matabangan an gabos sa kongregasyon na “ihulit nin lubos an tataramon nin Dios”? Pataluboon an entusiasmo paagi sa mga kabtang sa pagtiripon asin personal na mga pakikipag-olay. An mga paraataman sa Pag-adal sa Libro kan Kongregasyon asin an saindang mga katabang puedeng magsadiring boot na kaolayon an lambang saro na nakaasignar sa saindang grupo asin magtao nin personal na tabang. An pira sanang maboot na tataramon na pamparigon sa boot o nagkapirang praktikal na suhestion tibaad iyo sana an kaipuhan. (Tal. 25:11) Maheheling nin dakol na huli sa nagkapirang saradit na pagliliwat sa saindang iskedyul, ikaoogma ninda an pribilehio nin paglilingkod bilang auxiliary payunir. Sa dakol na kongregasyon, an kadaklan, kun bakong gabos, sa kamagurangan asin ministeryal na lingkod asin an saindang agom nagtatao nin marahay na halimbawa paagi sa pag-auxiliary payunir na magkaibanan durante kan panahon nin Memorial. Nakaenkaminar ini nin dakol na parahayag na umiba man sa sainda. Huli sa mga limitasyon sa pisikal o iba pang kamugtakan, an nagkapirang parahayag tibaad mayo sa kamugtakan na magpayunir, alagad puede sindang enkaminaron na ipaheling an saindang pag-apresyar paagi sa paggibo kan pinakamakakaya ninda sa ministeryo kaiba kan iba pa sa kongregasyon.
12 An kapangganahan depende sa maingat na pagplano kan kamagurangan. An mga pagtiripon bago lumuwas sa paglilingkod sa langtad maninigong iiskedyul sa kombenyenteng mga panahon sa bilog na semana. Kun posible, iaasignar nin patienot kan paraataman sa paglilingkod an kualipikadong mga tugang na lalaki na mamamayo sa gabos na pagtiripon bago lumuwas sa paglilingkod. Kaipuhan an marahay na pag-andam tanganing an mga pagtiripon na ini dai sumobra sa 10 sagkod 15 minutos, kabale an pag-organisar nin mga grupo, pag-asignar nin teritoryo, asin pamimibi. (Helingon an “Hapot” sa Setyembre 2001 An Satong Ministeryo sa Kahadean.) An iskedyul nin aktibidad para sa bulan maninigong magin malinaw na ipaliwanag sa kongregasyon asin ipaskil sa information board.
13 Maninigong magkaigwa nin bastanteng teritoryo. Maninigong kaolayon kan paraataman sa paglilingkod an tugang na lalaki na nag-aasikaso kan mga teritoryo na gumibo nin mga areglo para sa paghuhulit sa mga dai parateng nakokobrehan. Maninigong tawan nin pagdodoon an paghuhulit sa mga harong na mayong tawo, paghuhulit sa mga tinampo asin tindahan, asin paghuhulit sa banggi. Kun angay, puedeng tabangan an nagkapirang parahayag na magpatotoo paagi sa telepono.
14 Tabangan Sinda na Maglingkod Giraray: Igwa daw sa teritoryo kan saindong kongregasyon na bako nang aktibo sa paghuhulit kan maogmang bareta? An mga siring kabtang pa man giraray kan kongregasyon asin sinda nangangaipo nin tabang. (Sal. 119:176) Mantang an katapusan kan kinaban na ini harani nang marhay asin an bagong kinaban haranihon na, may marahay kitang dahelan na gibohon an gabos na paghihingoa na tabangan an mga nagin inaktibo. (Roma 13:11, 12) Digdi sa Pilipinas kan nakaaging limang taon, labing 3,150 katawo kada taon an nagsimbag sa tabang asin nareaktibar. Ano daw an magigibo niato tangani na matabangan an dakol pa na pukawon liwat an pagkamoot asin kompiansa ninda kan enot?—Heb. 3:12-14.
15 Bobooton kan grupo nin kamagurangan na pag-olayan kun paano ninda matatabangan an mga nagin inaktibo durante kan nakaaging pirang taon. (Mat. 18:12-14) Maninigong siyasaton kan sekretaryo an mga Congregation’s Publisher Record card asin isurat an gabos na nagin inaktibo. Maninigong gumibo nin espesyal na paghihingoa na makatabang paagi sa areglo nin pagsongko sa pagpastor. Tibaad boot na pakiolayan nin sarong magurang sa kongregasyon an sarong parahayag huli sa pagigin kamidbid asin kaibaiba kan sarong iyan kan nakaagi, o tibaad hagadon sa ibang parahayag na tumabang. Tibaad an mga parahayag na iyan nakipag-adal sa saro na ngonyan inaktibo asin aakoon an oportunidad na tumao nin espesyal na tabang sa panahon na ini nin pangangaipo. Logod na an dakol sa mga nagin inaktibo mapahiro na pumoon giraray sa paghuhulit kan tataramon nin Dios. Kun sinda kualipikado, mayo na nin mas marahay na panahon para sa sainda na pumoon kisa durante kan panahon nin Memorial!—Helingon an “Hapot” sa Nobyembre 2000 na An Satong Ministeryo sa Kahadean para sa dugang pang mga detalye.
16 Kualipikado daw an Iba na Maghulit? Padagos na binebendisyonan ni Jehova an saiyang banwaan paagi sa pagtipon kan “kawiliwiling mga bagay kan gabos na nasyon.” (Hag. 2:7) Kada taon rinibo an nagigin kualipikado bilang dai pa bautisadong mga parahayag. Sairisay sinda? An mga aki kan mga Saksi ni Jehova siring man an progresibong mga inaadalan sa Biblia. Paano niato maaaraman kun sinda kualipikado na magin mga parahayag kan maogmang bareta?
17 Mga Aki kan mga Saksi ni Jehova: An dakol na aki nag-iiba sa saindang mga magurang sa pagharongharong sa laog nin dakol na taon, minsan ngani sinda dai pa naglilingkod bilang dai pa bautisadong mga parahayag. An Marso puedeng magin marahay na panahon na sinda magpoon. Paano daw nindo maaaraman kun kualipikado na an aki nindo? An pahina 100 sa Organized to Accomplish Our Ministry nagsasabi na “kun an aki arogan sa saiyang gawe-gawe asin kaya nang gumibo nin personal na kapahayagan kan saiyang pagtubod paagi sa pagpahayag sa iba manongod kan maogmang bareta, na pinahihiro gikan sa puso na gibohon iyan.” Kun sa paghona nindo kualipikado na an saindong aki, makipag-olay sa saro sa kamagurangan na miembro kan Komite sa Paglilingkod kan Kongregasyon.
18 Kualipikadong mga Inaadalan sa Biblia: Pakatapos kan inaadalan sa Biblia na kumua nin kaaraman asin umatender sa mga pagtiripon sa laog nin pirang panahon, tibaad gusto na niang magin parahayag kan Kahadean. Kun pinamamayohan nindo an pag-adal sa siring na inaadalan, estudyaran an mga hapot na ini: Sia daw naggigibo nin pag-oswag, na kabagay sa saiyang edad asin abilidad? Pinonan na daw niang ihiras sa iba sa impormal na paagi an saiyang pagtubod? Isinosolog daw nia an “bagong personalidad”? (Col. 3:10) Naaabot daw nia an mga kualipikasyon para sa dai pa bautisadong mga parahayag, na itinao sa pahina 97-9 sa librong Our Ministry? Kun iyo, maninigo nindong kaolayon an Komite sa Paglilingkod kan Kongregasyon tangani na magibo an mga areglo para sa duwang kamagurangan na makikipag-olay sa saindo asin sa inaadalan. Kun sia kualipikado na, iimpormaran sia kan duwang magurang sa kongregasyon na puede na siang magpoon na makikabtang sa pampublikong ministeryo.
19 Kumusta Man an Abril Asin Mayo? Ini espesyal man na mga bulan para sa dinugangan na aktibidad sa ministeryo sa langtad. An dakol na ma-auxiliary payunir sa Marso tibaad magibo giraray iyan sa Abril asin/o Mayo. Durante kan Abril asin Mayo, tatawan niato nin prioridad an pagtampok kan mga magasin na Torrengbantayan asin Awake! sa ministeryo. Ano an nagin kapakipakinabang na mga epekto kaiyan sa buhay kan mga nagbabasa kaiyan? An mga magasin na ini may dakulang kabtang sa pagkaigwa kan makangangalas na pag-oswag na naeksperyensiahan sa bilog na kinaban. Magibo nin espesyal na paghihingoa durante kan Abril asin Mayo na ialok an mga magasin sa pinakadakol na mapupuede. Magplano na ngonyan na magkaigwa nin lubos na pakikikabtang.
20 Huli sa plinanong dinugangan na aktibidad sa paghuhulit, kaipuhan daw nindong dagdagan an kabilangan nin mga magasin na kinukua nindo paagi sa kongregasyon? Sa bilog na taon nin paglilingkod, itinatampok niato An Torrengbantayan asin Awake! kada Sabado, an satong designadong Aldaw nin Pagmamagasin. Minsan siring, huling dakol an makikikabtang sa paglilingkod bilang auxiliary payunir asin itatampok niato gabos an mga magasin sa bilog na duwang bulan, tibaad kaipuhan na dugangan an saindong pedidong magasin sa kongregasyon. Kun iyo, paisihon tabi tolos-tolos an naglilingkod sa magasin sa saindong kongregasyon. Kadungan kaiyan, maninigong seguradohon kan naglilingkod sa literatura na igwa nin bastanteng suplay kan pulyetong Ano Gusto Nindong Makaaram Pa nin Orog Manongod sa Biblia? na magagamit nin gabos.
21 Dakol an nagpahayag nin pag-apresyar sa kabtang sa An Satong Ministeryo sa Kahadean na may temang “Kun Ano an Sasabihon Manongod sa mga Magasin.” Inaprobetsaran na daw nindo an probisyon na ini paagi sa pag-adal kan sampol na mga pag-atubang kan magasin? Taano ta dai gamiton an sarong kabtang kan saindong pampamilyang pag-adal sa Biblia kada semana sa pag-ensayo kan mga pag-atubang na ini?
22 Lubos na Aprobetsaran an Panahon na Ini nin Memorial: Siring ki apostol Pablo, ipaheling niato ki Jehova kun gurano kadakula kan satong pag-apresyar sa “saiyang dai ikaladawan na daing bayad na balaog” paagi sa satong lubos na pakikikabtang sa espirituwal na mga aktibidad na plinano para sa panahon na ini nin Memorial. Kabale digdi (1) an pag-atender sa pinakaimportanteng okasyon kan taon, an selebrasyon kan Pamanggihan nin Kagurangnan sa Huebes, Marso 28, 2002; (2) pagtabang sa mga nagin inaktibo na pukawon liwat an “pagkamoot [ninda] kan enot” (Kap. 2:4; Roma 12:11); (3) pagtabang sa satong mga aki asin siisay man na inaadalan sa Biblia na kualipikadong magin dai pa bautisadong parahayag; asin (4) pag-iba sa gibohon na pag-ebanghelyo sa pinakalubos na mapupuede, patin mag-auxiliary payunir sa Marso, Abril, asin Mayo kun itinotogot kan saindong mga kamugtakan.—2 Tim. 4:5.
23 Odok niamong ipinamimibi na kita logod gabos magkaigwa nin lubos na pakikikabtang sa paghuhulit kan maogmang bareta kan Kahadean sa panahon na ini nin Memorial, sa siring ipinaheheling an rarom kan satong pag-apresyar sa gabos na ginibo ni Jehova para sa sato.
[Kahon sa pahina 6]
Personal na Iskedyul sa Paglilingkod sa Langtad Para sa Marso 2002
Domingo Lunes Martes Mierkoles Huebes Biernes Sabado
1 2
Aldaw nin Pagmamagasin
3 4 5 6 7 8 9
Aldaw nin Pagmamagasin
10 11 12 13 14 15 16
Aldaw nin Pagmamagasin
17 18 19 20 21 22 23
Aldaw nin Pagmamagasin
24 25 26 27 28 29 30
MEMORIAL Aldaw nin Pagmamagasin
PAGKASOLNOP
31 KAN SALDANG
Makapag-iiskedyul daw kamo nin total na 50 oras sa pag-auxiliary payunir sa Marso?