Kaipuhan—20,000 na Auxiliary Payunir
Puede daw Kamong Mag-auxiliary Payunir sa Marso? Abril? Mayo?
1 “Kaipuhan an 1,000 Parahulit” an titulo nin sarong artikulo na ipinublikar sa Abril 1881 luwas kan Watch Tower. Nakiolay iyan sa gabos na nagdusay na lalaki asin babae, “na pinagkatiwalaan kan Kagurangnan nin kaaraman manongod sa Saiyang katotoohan,” na gamiton an ano man na panahon na kaya ninda na makikabtang sa pagpalakop kan katotoohan sa Biblia. Idtong mga makatatao nin kabanga o labi pa kan saindang panahon na esklusibo sa gibohon kan Kagurangnan inenkaminar na magboluntaryo bilang colporteur na mga ebanghelisador—an mga naenot sa mga payunir ngonyan.
2 Minsan ngani nagbago na an mga panahon poon kan ika-19 siglo, sarong bagay an nagdadanay na pareho—boot kan nagdusay na mga lingkod nin Dios na padagos na gamiton an pinakadakol na panahon na mapupuede sa pagpalakop kan maogmang bareta. An paglilingkod bilang auxiliary payunir nakatatabang sa mga parahayag sa kongregasyon na paoswagon an saindang pagigin epektibo mantang nagtatao sinda nin dagdag na panahon sa pan-Kahadean na ministeryo.—Col. 4:17; 2 Tim. 4:5.
3 Kaidto pang kapinonan kaiyan, ikinaoogma na kan rinibong tugang na lalaki asin babae an pag-auxiliary payunir. Tuminalubo an entusiasmo digdi sagkod na naabot an pinakahalangkaw na kabilangan na 21,567 auxiliary payunir sa Pilipinas kan Abril 1987! Poon kaidto, dai pa kita nakapagreport nin 20,000 na auxiliary payunir sa laog nin sarong bulan. Bako daw marahay na otrohon an marahay na paghihingoang ini paagi sa pag-aabot sa labing 20,000 na auxiliary payunir durante kan Marso, Abril, asin Mayo, 1997?
4 Pinaririgon niamo an boot nindo na magkaigwa nin pasohan na namitan an pag-auxiliary payunir durante kan saro o labi pa sa bulan na Marso, Abril, asin Mayo. Taano ta kabale an Marso? Huli ta ngonyan na taon an Memorial kan kagadanan ni Cristo natangod sa Domingo, Marso 23. Mayo nang mas marahay na paagi na magagamit niato an mga semana bago kan Memorial kisa sa pakikabtang nin maigot sa paghuhulit kan Kahadean na pinonan kan satong Kagurangnan asin Paraligtas, si Jesu-Cristo. Paagi sa dakulang tambak nin patotoo na ikatatao sa Marso, puede niatong imbitaran an dakol na interesadong tawo na umiba sa sato sa pagselebrar kan kagadanan ni Cristo. Magigin man espesyal an Marso huli ta, sa kaenot-enote, itatampok niato an bagong librong, An Sekreto sa Kaogmahan nin Pamilya. Dugang pa, an bulan na Marso igwang limang Sabado asin limang Domingo, na nagtotogot sa sigidong aktibidad sa poro kan semana sa paglilingkod sa langtad. Siempre, durante kan bulan na Abril asin Mayo, an padagos na maigot na paghihingoa sa ministeryo matogot sa sato na kultibaron an interes na nanompongan asin makapoon nin bagong mga pag-adal sa Biblia sa harong, na ginagamit an brosyur na Ano an Kahagadan sa Sato nin Dios? Kokobrehan ta man nin sirot an satong teritoryo, partikularmente sa mga Sabado asin Domingo, na dara an bagong napapanahon na mga luwas kan An Torrengbantayan asin Awake!
5 Siisay an Kualipikadong Mag-auxiliary Payunir?: An Organized to Accomplish Our Ministry, pahina 114, nagpapaliwanag: “Ano man an saindong personal na mga kamugtakan, kun bautisado kamo, may marahay na moral, kayang iareglo na aboton an kahagadan na gumamit nin 60 oras sa sarong bulan sa ministeryo sa langtad asin naniniwala na kamo makapaglilingkod nin sarong bulan o labi pa bilang auxiliary payunir, maoogma an kamagurangan sa kongregasyon na siyasaton an saindong aplikasyon para sa pribilehiong ini nin paglilingkod.” Ikaaareglo daw nindo an saindong mga aktibidad tangani na makamtan an pribilehiong ini sa Marso? Abril? Mayo?
6 An positibong kaisipan sa kabtang kan mga grupo nin kamagurangan, kaiba an bilog na pusong pagsuportar kan iba pang mga parahayag, siertong pangyayarihon na magin lubos na kapangganahan an paghimate sa pangapodan na ini para sa 20,000 na auxiliary payunir. (Heb. 13:7) Ineenkaminar an gabos na payo nin pamilya na siertohon kun pira sa saindang kairiba sa harong an makaiiba sa grupo kan mga auxiliary payunir durante nin saro o labi pa kan maabot na mga bulan.—Sal. 148:12, 13; ikomparar an Gibo 21:8, 9.
7 Dai tolos magkonklusyon na dai nindo kaya an pag-auxiliary payunir huli sa saindong bilog na panahon na sekular na trabaho, iskedyul sa eskuelahan, mga paninimbagan sa pamilya, asin iba pang Makakasuratan na mga obligasyon. Para sa iba tibaad bakong pasil na makikabtang; minsan siring, paagi sa marahay na pag-organisar asin bendisyon ni Jehova, puede sindang magin mapanggana. (Sal. 37:5; Tal. 16:3) Togotan na kontrolon kan pagmawot na makikabtang sa paglilingkod bilang payunir an saindong mga kamugtakan; dai pagtogotan na kontrolon kan saindong mga kamugtakan an saindong pagmawot na magpayunir. (Tal. 13:19a) Huli kaini, paagi sa makosog na pagkamoot ki Jehova asin sa kapwa, dakol an nakaliwat kan saindang semanal na rutina sa buhay tangani na mapahiwas an saindang ministeryo sa laog nin sarong bulan o labi pa. (Luc. 10:27, 28) Dakol na bendisyon an nakatagama para sa mga maigot na naghihingoa sa paglilingkod sa Kahadean.—1 Tim. 4:10.
8 Kun Ano an Nagigibo nin Pag-auxiliary Payunir: An bilog na kalag na paghihingoa kan rinibo sa mga lingkod nin Dios tangani na makapag-auxiliary payunir nagreresulta sa sarong makosog na kurahaw nin pag-omaw ki Jehova. Mantang naghihingoa an mga parabalangibog na ini kan Kahadean na palakopon an maogmang bareta sa dakol pang tawo, mas nagigin dayupot sinda personalmente ki Jehova huli ta nanonodan ninda na orog na dumepende sa saiya para sa saiyang espiritu asin bendisyon.
9 An pagkaigwa nin mga auxiliary, regular, asin espesyal payunir na aktibo sa tahaw niato nagpapaluwas nin sarong panibagong espiritu nin kakosogan sa kongregasyon. Nakaoolakit an saindang entusiasmo mantang iineestorya ninda an saindang mga eksperyensia sa langtad. Minomotibar kaini an iba na siyasaton giraray an sainda mismong situwasyon tangani na magkaigwa nin pinahiwas na pakikikabtang sa ministeryo. An sarong tugang na babae na nabautismohan sa edad na 70 tolos na pinonan an dagos-dagos na pag-auxiliary payunir. Kan hapoton pakalihis nin nagkapirang taon kun taano ta, sa edad nia, naghihingoa pa siang gayo sa ministeryo bilang auxiliary payunir kada bulan, nagsabi sia na namatean nia na garo nasayang an enot na 70 taon kan saiyang buhay, asin habo niang sayangon an arin man sa natatada pa niang mga taon nin buhay!
10 An kada partisipante sa pag-auxiliary payunir nakapatatalubo nin mas marahay na abilidad sa ministeryo. Inadmitir nin sarong hoben na saksi: ‘Kaidtong aki pa ako permi na akong minaiba sa sakong mga magurang sa saindang mga aktibidad sa paghuhulit. Tunay na maogma an paglilingkod sa langtad. Minsan siring, pag-abot nin panahon namansayan ko na sa eskuelahan napalalaen ako sa ibang kadaklan. Dangan nagin alangan akong ipakipag-olay sa mga kapwa estudyante an manongod sa katotoohan. Kun naghaharongharong, nagpoon akong matakot na marhay sa pag-isip-isip na makatupar nin saro na kamidbid ko sa eskuelahan. Sa sakong situwasyon naisip ko na pagkatakot sa tawo an problema. [Tal. 29:25] Pagkagraduwar sa eskuelahan, nagdesisyon akong probaran an temporaryong pagpapayunir. Bilang resulta, nagin kaakit-akit an paghuhulit na dai pa noarin man nangyari kaidto. Dai ko na iyan minansay na maogma sanang aktibidad, ni na iyan sarong magabat na pasan. An pakaheling na nagpoprogreso sa katotoohan an sakong mga estudyante sa Biblia, nakakamtan ko an pakamate nin hararom na satispaksion sa ebidensia na sinusuportaran ni Jehova Dios an sakong mga paghihingoa.’ An hoben na ini padagos na naglingkod bilang regular payunir.
11 Kun dakol an naglilingkod sa kongregasyon bilang auxiliary payunir, an bunga sirot na pagkobre sa teritoryo. An tugang na lalaki na nag-aasikaso kan pag-asignar nin mga teritoryo puedeng humagad nin tabang sa mga auxiliary payunir sa pagkobre kan bihirang mahulitan na mga lugar. An pagbalon asin paglilingkod nin bilog na aldaw pangyayarihon an mga auxiliary payunir na hulitan pati an pinakahararayong lugar kan teritoryo.
12 Kaipuhan kan Kamagurangan na Gumibo nin Patienot na mga Pag-andam: Sa bilog na masunod na tolong bulan, maninigong gumibo nin mga areglo na mag-iskedyul nin laen-laen na klase nin aktibidad na pagpatotoo sa manlaenlaen na panahon kan semana, kabale na an mga oras bago sumolnop an saldang asin amay na banggi, tangani na makapakikabtang an pinakadakol na mapupuede. Iiba an mga peryodo para sa pagpatotoo sa tinampo asin paghuhulit sa komersial na teritoryo, bilang dagdag sa dayaday na pagharongharong. Paagi sa paggibo kaiyan, tinatabangan kan kamagurangan an mga nagpapayunir na makikabtang sa paglilingkod kaiba kan kongregasyon sa panahon na pinakapraktikal asin kombenyente para sa saindang iskedyul. Maninigong impormaran na marhay an kongregasyon manongod sa gabos na areglo nin paglilingkod sa langtad. An pangengenot sa mga pagtiripon bago maglingkod maninigong magin organisadong marhay. Dagdag pa, maninigong magkaigwa nin bastanteng teritoryo asin tolos-tolos na magpedido nin supisyenteng mga magasin asin iba pang mga suplay na literatura.
13 Planohon an Saindong Personal na Iskedyul sa Paglilingkod: An sarong tugang na lalaki, na kan primero ninenerbios dapit sa pag-auxiliary payunir, nagsabi: “Tunay na iyan mas pasil nanggad kisa sa pinaghona ko na magigin kamugtakan kaiyan. Kaipuhan sana kaiyan an sarong marahay na iskedyul.” Sa likod na pahina kan suplementong ini, naheheling daw nindo an sarong sampol nin iskedyul sa pag-auxiliary payunir na magigin praktikal para sa saindo? An pag-iskedyul nin 15 oras kada semana para sa ministeryo iyo sana an panahon na hinahagad sa mga auxiliary payunir.
14 Tanganing makapaglingkod bilang mga auxiliary payunir, an mga agom na babae na nasa harong asin an mga nagtatrabaho sa mga hapon asin banggi parateng ikaiiskedyul an saindang mga aga para sa paglilingkod sa langtad. An mga aking nag-eeskuela asin an mga nagtatrabaho sa pag-oltanan nin matanga asin amay na aga sa kadaklan ikadudusay sa paghuhulit an mga oras bago sumolnop an saldang. An mga bilog na panahon na nagtatrabaho nin sekular nanompongan na posible na magsalang magbakasyon nin sarong aldaw sa trabaho sa sarong semana o idusay sa ministeryo an bilog na Sabado asin Domingo, bilang dagdag sa pagpatotoo sa banggi. An dakol na an paglilingkod sa langtad haros limitado sa aktibidad sa Sabado asin Domingo pinipili an mga bulan na igwang limang Sabado asin Domingo. Totoo iyan sa Marso, siring man sa Agosto asin Nobyembre 1997. Ginagamit an blangkong iskedyul sa pahina 6 na itinatao bilang giya, maingat asin mapagngayongayong horophoropon kun ano an magigin praktikal na personal na iskedyul sa paglilingkod para sa saindong indibiduwal na situwasyon.
15 An sarong bentaha kan probisyon na pag-auxiliary payunir iyo an pagigin madali kaiyan na makabagay sa kamugtakan. Puede nindong pilion an mga bulan na mapayunir kamo, asin puede kamong maglingkod nin parate sagkod na gusto nindo. Kun gusto nindong dagos-dagos na mag-auxiliary payunir alagad ta dai nindo kayang gibohon iyan, napaghorophorop na daw nindo an pagpalista kada ikaduwang bulan sa bilog na taon? Sa ibong na lado, an nagkapira nakapaglingkod na dagos-dagos bilang mga auxiliary payunir sa laog nin haralawig na panahon.
16 Sarong Tangga Pasiring sa Bilog na Panahon na Pagpapayunir: An dakol na igwa kan espiritu nin pagpapayunir boot na maglingkod bilang mga regular payunir, alagad naghohorophorop sinda kun baga igwa sinda nin panahon, mga kamugtakan, o kosog para dian. Daing duwa-duwa na kadaklan sa mga nagreregular payunir ngonyan ginamit nguna an pag-auxiliary payunir bilang tangga pasiring sa bilog na panahon na gibohon. Paagi sa pagdugang nin saro sanang oras kada aldaw, o sarong bilog na aldaw kada semana sa iskedyul nin saro sa pag-auxiliary payunir, posibleng magibo an iskedyul nin regular payunir. Tangani na maaraman kun posible iyan para saindo, taano ta dai probaran na magdusay nin 90 oras sa ministeryo durante nin sarong bulan o labi pa sa pag-auxiliary payunir? Kadungan kaiyan, makagigibo kamo nin mga pagdalaw liwat asin pag-adal sa Biblia, na matogot sa saindo na magkaigwa nin sarong balanseng ministeryo bilang payunir.
17 An sarong tugang na babae nanamitan an anom na taon na dagos-dagos na pag-auxiliary payunir. Sa bilog na panahon na idto nagin pasohan nia na lumaog sa paglilingkod bilang regular payunir. Sa katuyohan na iyan, prinobaran nia an apat na laen-laen na sekular na trabaho na naglalaom na makadiskobre nin sarong situwasyon na matabang sa saiya na maabot an 90 oras na kahagadan para sa mga regular payunir. Kada bulan, nagsusurat sia nin saro o duwang iskedyul tangani na karkulohon kun baga magigin posible iyan. Alagad sa pagsiyasat kaiyan, namatean nia na dai nia kayang aboton an bilog na panahon na ministeryo. Pero, padagos na inarang nia ki Jehova an paggiya kaini. Dangan, sarong aldaw mientras na nag-aandam para sa Pagtiripon sa Paglilingkod, nabasa nia an sarong artikulo sa Oktubre 1991 An Satong Ministeryo sa Kahadean (km-E 9/91) na nagsabi: “Imbes na idoon nin sobra an kahagadan sa oras, taano ta dai isentro an atension sa orog na oportunidad na makikabtang sa gibong pagtitipon? (Juan 4:35, 36)” Nagsaysay sia: “Lima o anom na beses na paorootro kong binasa an mga tataramon na ini, asin nakaseseguro nanggad ako na ini an simbag ni Jehova. Kaidto mismo nagdesisyon akong lumaog sa paglilingkod bilang regular payunir.” Dawa ngani an saiyang por orang iskedyul sa sekular na trabaho bakong iyo an pinakamarahay, isinumitir nia an saiyang aplikasyon sa pagregular payunir. Pakalihis nin sarong semana naliwat an saiyang iskedyul, asin tinawan sia nin mga oras sa sekular na trabaho na tamang-tama sa saiya. Nagkonklusyon sia, “Dai daw kamo maoyon na bendisyon ini ni Jehova?,” asin idinugang pa nia: “Kun naghahagad kamo nin giya ki Jehova asin akoon nindo iyan, dai iyan pagdulagan—akoon iyan.” Kun odok sa boot na nagmamawot kamong magregular payunir, tibaad sa katapusan kan tolong bulan na pag-auxiliary payunir sa Marso, Abril, asin Mayo, makokombensir kamo na magigin mapanggana man kamo sa bilog na panahon na ministeryo.
18 Nasisierto niamo na bebendisyonan ni Jehova an kaigotan asin susuportaran an mga paghihingoa kan saiyang banwaan mantang ipinahahayag ninda an maogmang bareta nin kaligtasan durante kaining espesyal na aktibidad sa panahon nin tigsoli. (Isa. 52:7; Roma 10:15) Masimbag daw kamo sa pangapodan para sa 20,000 na auxiliary payunir paagi sa pakikikabtang sa Marso? Abril? Mayo?
[Kahon sa pahina 3]
Kun Paano Magigin Mapanggana Bilang Auxiliary Payunir
■ Magin kompiado na magigin kamong mapanggana
■ Mamibi ki Jehova na bendisyonan an saindong mga paghihingoa
■ Imbitaran an saro pang parahayag na magpayunir kaiba nindo
■ Magplano nin praktikal na iskedyul sa paglilingkod
■ Magpedido nin supisyenteng suplay nin mga magasin
■ Suportaran an mga areglo kan kongregasyon sa paglilingkod
■ Humanap nin mga oportunidad para sa impormal na pagpatotoo