Ipahayag nin Mahiwas an mga Kamurawayan ni Jehova
1. Ano an nagpapahiro sa sato na ipahayag nin mahiwas an mga kamurawayan ni Jehova?
1 “Saimo, O Jehova, an kadakulaan asin an pagkamakakamhan asin an kagayonan asin an kamahalan patin an dignidad; huli ta an gabos na bagay sa kalangitan asin sa daga saimo.” (1 Cron. 29:11) Paano kita naaapektaran kan pagkamoot asin pag-apresyar niato ki Jehova? Pinapahiro kita kaiyan na ‘ipahayag nin mahiwas an mga kamurawayan kan saro na nag-apod sa sato hale sa kadikloman pasiring sa saiyang makangangalas na liwanag.’ (1 Ped. 2:9) Dai kita puedeng umontok sa pagsabi sa iba manongod sa satong dakulang Dios! Magkakaigwa kita nin pambihirang mga oportunidad na ibalangibog an mga kamurawayan ni Jehova durante kan mga bulan nin Marso, Abril, asin Mayo.
2. Ano an iplinanong espesyal na kampanya sa pagpaisi kan Memorial, asin sairisay an puedeng makikabtang?
2 Espesyal na Kampanya sa Pagpaisi kan Memorial: Sa Lunes, Abril 2, itatampok niato an mga kamurawayan ni Jehova paagi sa pagselebrar kan Pamanggihan nin Kagurangnan. Ididistribwir sa bilog na kinaban an espesyal na imbitasyon sa importanteng okasyon na ini poon sa Marso 17 sagkod Abril 2. Ineenkaminar an gabos na lubos na makikabtang. Ini magigin marahayon na panahon para sa mga bagohan na pumoon na magpahayag kan maogmang bareta kun kualipikado na sinda. Kun igwa kamo nin mga inaadalan sa Biblia o mga aki na puedeng makualipikar, kamo na an mangenot na makipag-olay sa kamagurangan.
3. Ano an puede niatong sabihon sa pag-imbitar sa mga tawo na umatender sa Memorial?
3 Magigin kaagid kan kampanyang ini an ginibo may koneksion sa “Harani Na an Kaligtasan!” na mga Pandistritong Kombension. Papadarahan nin igong imbitasyon an mga kongregasyon tanganing an lambang parahayag magkaigwa nin 50 kopya. Papagdanayon na halipot an pag-atubang nindo, na tibaad nagsasabing: “Para sa saindo an imbitasyon na ini sa nagdadangadang na importanteng taonan na okasyon. Mainit kamong aakoon. Nasa imbitasyon an mga detalye.” Siempre, kun may mga hapot an kagharong, magtao nin panahon na simbagon iyan. Puedeng makatabang sa bagay na ini an materyales sa artikulo sa apendise manongod sa Pamanggihan kan Kagurangnan sa librong Itinotokdo kan Biblia na nagpoon sa pahina 206. Sa mga katapusan kan semana, iaalok niato an bagong mga magasin kaiba an espesyal na imbitasyon. Balikan an siisay man na nanompongan na interesado, asin iareglo na dumalaw liwat.
4. Paano ididistribwir an espesyal na mga imbitasyon sa Memorial?
4 Kun posible, maninigong itao an espesyal na imbitasyon na ini nin personal sa lambang kagharong. Kun limitado an teritoryo nindo, magkaigwa nin rekord nin mga mayo sa harong asin pagmaigotan na dumalaw liwat pakalihis nin pirang aldaw. Kun dakula an iinasignar na teritoryo sa kongregasyon nindo, puedeng determinaran kan kamagurangan kun maninigo na may diskresion na magwalat nin kopya sa mga mayo sa harong. Seguradohon na matawan man nin kopya an saindong mga dinadalaw liwat, inaadalan sa Biblia, paryente, katrabaho, kataed, asin iba pang kamidbid.
5. Taano ta maninigo kitang magpoon na ngonyan na gumibo nin mga plano niato sa pag-auxiliary payunir?
5 Pag-auxiliary Payunir: Puede daw nindong ipahayag nin mas lubos an mga kamurawayan ni Jehova paagi sa pag-auxiliary payunir durante kan Marso, Abril, asin Mayo? An paggibo kaiyan posibleng marhay na magkakaipo nin nagkapirang pagliliwat sa saindong aroaldaw na iskedyul. (Efe. 5:15-17) Makakasierto kamo na an paghihingoa na gumibo nin orog pa sa paglilingkod ki Jehova magtatao nin kagayagayahan asin magbubunga nin bendisyon ni Jehova. (Tal. 10:22) Mantang nagdadangadang na an panahon kan Memorial, ngonyan na an panahon na magpoon nang gumibo nin mga plano.—Tal. 21:5.
6. Ano an manonodan niato sa eksperyensia nin sarong 90 anyos na tugang na babae na nag-auxiliary payunir kan nakaaging taon?
6 An sarong 90 anyos na tugang na babae nagkaigwa kan pribilehio na mag-auxiliary payunir kan nakaaging taon. Sia nagsabi: “Minsan ngani talagang ikinakaogma ko an paghardin asin gusto ko nang ponan an pagtanom, narealisar ko na kaipuhan kong magbugtak nin tamang mga prioridad. Huli sa kamawotan na enoton an intereses kan Kahadean, nagdesisyon ako na mag-auxiliary payunir kan Marso.” Binendisyonan daw an saiyang mga paghihingoa? Sia nagsabi, “Orog akong nagin dayupot sa kongregasyon, asin orog akong irinani kaini ki Jehova.” Puede daw niatong analisaron an satong mga prioridad asin gumibo nin kaagid na mga pagliliwat kun kaipuhan?
7. Depisil daw na maglingkod bilang auxiliary payunir?
7 Tibaad bako man depisil arog kan iniisip nindo an pag-abot sa 50 oras na kahagadan sa pag-auxiliary payunir. Mapagngayongayong estudyaran an saindong aroaldaw na mga aktibidad, gumibo nin iskedyul, dangan isurat iyan sa saindong kalendaryo para sa teokratikong mga aktibidad. Kamo an nakakaaram na marhay kan saindong personal na mga kamugtakan. Kun maluya an saindong salud asin kulang kamo nin kosog na makaagwanta, tibaad puede kamong makikabtang sa ministeryo sa laog nin duwang oras kada aldaw. Kun kamo nagtatrabaho nin bilog na panahon o nag-eeskuela, puede kamong makapag-auxiliary payunir paagi sa pakikikabtang sa ministeryo kun banggi o sa mga katapusan kan semana.
8. Ano an nagpangyari sa sarong mag-agom na makapag-auxiliary payunir?
8 Dakol an nakapag-auxiliary payunir bilang pamilya. Kan nakaaging mga taon, sarong mag-agom an nag-alangan na mag-aplay huli ta namatean ninda na an saindang mga kamugtakan dai nagtotogot sa sainda na mag-auxiliary payunir. Ano an ginibo ninda manongod dian? “Namibi kami ki Jehova na logod tabangan kaming magibo an haloy nang panahon na gusto niamong gibohon na magkaibanan.” Paagi sa tamang pagplano naabot ninda an saindang pasohan. Idinugang pa ninda: “Marahayon idto. Nakamtan mi nin magkaibanan an dakol na bendisyon. An suhestion niamo iyo na, probaran nindo iyan. Kun nagibo niamo iyan, magigibo man nindo iyan.”
9. Ano an puede nindong gibohon sa masunod nindong pampamilyang pag-adal tangani na mag-andam para sa maabot na mga bulan nin espesyal na aktibidad?
9 Taano ta dai kamo magtagama nin oras durante kan masunod nindong pampamilyang pag-adal tangani na pag-olayan kun paano madudugangan kan gabos an saindang aktibidad durante kan maabot na mga bulan? Dawa kun an bilog nindong pamilya dai makakapag-auxiliary payunir, tibaad puedeng magibo iyan nin sarong miembro paagi sa tabang asin kooperasyon kan ibang miembro kan pamilya. Kun dai, posibleng magbugtak nin mga pasohan an saindong pamilya na gumamit nin dagdag na panahon sa ministeryo durante kan espesyal na mga bulan na ini nin aktibidad.
10. Taano ta maninigo niatong ipakipag-olay sa iba an manongod sa satong pagmawot na mag-auxiliary payunir durante kan panahon na ini kan Memorial?
10 Magtinabangan: Nakakaolakit an entusiasmo. Ipakipag-olay an saindong kamawotan na mag-auxiliary payunir. Puedeng enkaminaron kaini an iba na mag-aplay man. Dugang pa, an mga nagpayunir kan nakaagi makakapagtao sa saindo nin mga suhestion na matabang sa saindo na iareglo an saindong mga aktibidad asin iskedyul tanganing maabot an pasohan nindo. (Tal. 15:22) Kun makakapag-auxiliary payunir kamo, taano ta dai imbitaran an saro pang parahayag, tibaad saro na may kaagid na mga kamugtakan, na umiba sa saindo sa nakakagayagayang aktibidad na ini?
11. Paano mapapatalubo kan kamagurangan an entusiasmo para sa pag-auxiliary payunir sa maabot na mga bulan?
11 Dakol na magurang sa kongregasyon an naggigibo nin kinakaipuhan na mga areglo tangani na makapakikabtang sa espesyal na paaging ini nin paglilingkod. (Heb. 13:7) Ini tunay nanggad na nakakaparigon sa kongregasyon! Napapatalubo man kan kamagurangan an entusiasmo paagi sa saindang mga pakikipag-olay sa iba. Tibaad an kaipuhan sana pirang maboot na tataramon nin pagparigon sa boot o praktikal na mga suhestion tangani na mamotibar an nagkapira na mag-auxiliary payunir. An paraataman sa paglilingkod posibleng marhay na maareglo nin dugang pang pagtiripon bago lumuwas sa paglilingkod sa langtad tangani na an gabos makapakikabtang sa paghuhulit bilang grupo, dawa pagkatapos nin trabaho o pagretira sa klase. An mga areglong ini maninigong ipaisi nin regular. Seseguradohon man nia na an gabos igwa nin supisyenteng teritoryo asin literatura.
12. Ano an puede nindong gibohon kun kamo dai makakapag-auxiliary payunir?
12 Dawa kun an mga kamugtakan nakakaolang sa saindo sa pag-auxiliary payunir, makakatao kamo nin pamparigon sa boot sa mga nag-aplay, asin puede nindo sindang ipamibi. (Tal. 25:11; Col. 4:12) Tibaad puede kamong gumibo nin mga areglo na makaibanan sinda sa ministeryo nin saro pang aldaw durante kan semana o maghulit nin mas halawig kisa sa parate na nindong ginigibo.
13. Anong pasohan an ibinugtak para sa Pilipinas, asin paano makakakontribwir an kongregasyon nindo sa pag-abot kaiyan?
13 Pasohan na 25,000 na Auxiliary Payunir sa Abril: An pinakahalangkaw na kabilangan kasuarin man nin auxiliary payunir para sa sangang opisina sa Pilipinas 22,410, na naabot kan 1997. Kun siring, an realistikong pasohan para sa maabot na Abril 25,000 na auxiliary payunir. Kaya niatong aboton iyan kun may promedyo sana na 1 sa lambang 6 na parahayag sa kada kongregasyon na makikikabtang sa pag-auxiliary payunir. Siempre, may mga kongregasyon na magkakaigwa nin mas dakol pa nganing parahayag na an mga kamugtakan nagtotogot sa sainda na mag-auxiliary payunir. An siring na pasohan kan kongregasyon madali sanang maabot para sa kadaklan na kongregasyon. Imahinara an kaogmahan na ibubunga kaini sa saindong kongregasyon asin an magigin positibong epekto kaiyan sa paghuhulit sa saindong teritoryo!
14. Taano an Abril ta marahayon na bulan na mag-auxiliary payunir?
14 Taano an Abril ta marahayon na bulan na mag-auxiliary payunir? An Memorial gigibohon sa kapinonan kan bulan na iyan, na nagtatao sa sato nin bastanteng oportunidad na dalawon liwat an mga nag-atender. Iaalok niato an mga magasin, na may katuyohan na makapasakamot kan librong Itinotokdo kan Biblia sa mga dinadalaw liwat asin makapoon nin mga pag-adal sa Biblia. Kun siring, an pag-auxiliary payunir sa Abril matao nin dakol na oportunidad na makapoon nin mga pag-adal sa Biblia. Sa nasyon na ini, mas halawig an mga aldaw sa mga bulan na ini asin tamang-tama sana an kamugtakan nin panahon. Dugang pa, an bulan nin Abril may limang Domingo asin sarong kinabanon na piesta opisyal, na pinapagin mas pasil na mag-aplay an mga may sekular na trabaho asin an mga nag-eeskuela.
15. Taano ta maninigo kitang magkaigwa nin pakamate nin pag-apura mantang nagdadangadang na an panahon na ini kan Memorial?
15 An kada pag-agi kan panahon kan Memorial mas irinarani kita nin sarong taon sa katapusan kan sistemang ini nin mga bagay. Nainaan na an natatadang oras sa pagsabi sa iba manongod sa satong dakulang Dios. (1 Cor. 7:29) Kun tapos na an panahon na ini kan Memorial, mawawara na sagkod lamang an mahalagang marhay na mga oportunidad na itinao kaiyan sa sato tangani na omawon an satong langitnon na Ama. Logod na gumibo na kita ngonyan nin mga preparasyon na gibohon an bilog na makakaya niato durante kan Marso, Abril, asin Mayo na ipahayag nin mahiwas an mga kamurawayan ni Jehova!
[Kahon sa pahina 4]
Puede daw Kitang Magkaigwa nin 25,000 na Auxiliary Payunir sa Abril?
◼ Analisaron an mga prioridad nindo
◼ Pag-olayan an mga pasohan bilang pamilya
◼ Ipakipag-olay sa iba an manongod sa saindong mga plano