Sarong Mahalagang Pasohan Para sa Bagong Taon nin Paglilingkod
1. Anong pasohan an puede niatong isip-isipon para sa bagong taon nin paglilingkod?
1 Dapat kitang gumibo nin mga pasohan kun gusto niatong umoswag sa espirituwal. Anong personal na mga pasohan an nagibo na nindo para sa bagong taon nin paglilingkod? An sarong marahayon na pasohan iyo an pag-auxiliary payunir sa laog nin sarong bulan o labi pa. Huling an nakakagayagayang aktibidad na ini parateng nangangaipo nin patienot na pagpaplano, ngonyan na an marahay na panahon na pumoon sa pagplano. Taano ta dapat na isip-isipon an pag-auxiliary payunir bilang pasohan?
2. Taano ta dapat na isip-isipon an pag-auxiliary payunir bilang pasohan?
2 Mga Dahelan na Mag-auxiliary Payunir: An pag-auxiliary payunir nagpapangyari sa sato na mapaogma nin “mas lubos pa” an satong langitnon na Ama paagi sa paggamit nin mas dakol na panahon sa ministeryo. (1 Tes. 4:1) Mantang iniisip niato an gabos na ginibo ni Jehova para sa sato, pinapahiro kita kan satong puso na sabihon sa iba an manongod sa saiya. (Sal. 34:1, 2) Inoobserbaran asin pinapahalagahan ni Jehova an personal na mga sakripisyo niato tanganing gumibo nin orog pa sa ministeryo. (Heb. 6:10) An pakaaram na napapaogma niato si Jehova paagi sa satong pagpapagal nagtatao sa sato nin dakulang kagayagayahan.—1 Cron. 29:9.
3, 4. Paano kita nakikinabang sa pag-auxiliary payunir?
3 Sa parate, mantang orog na ginigibo nindo an sarong bagay, iyan nagigin mas pasil asin mas nakakagayagaya. An paggamit nin mas dakol na panahon sa ministeryo gigibohon kamong mas komportable kun naghuhulit sa harong-harong. Magigin mas eksperto kamo sa pagpoon nin mga pakikipag-olay asin sa paggamit kan Biblia. Mantang mas ipinapakipag-olay nindo an saindong pagtubod, iyan magigin mas makosog. Dakol na mayo kaidtong inaadalan sa Biblia an nakapoon nin saro mantang nag-o-auxiliary payunir.
4 An pag-auxiliary payunir tibaad iyo man an pagparigon sa boot na kaipuhan tanganing itanos an dai nag-ooswag na kinaugalean sa Kristianong rutina. Sarong dating regular payunir an nakarealisar na kadakol na panahon an ginagamit nia sa sekular na trabaho kaya nagdesisyon sia na mag-auxiliary payunir nin sarong bulan. Sia nagsabi: “Nagngalas nanggad ako kun gurano ako napakosog sa espirituwal kan sarong bulan na iyan! Inareglo ko na mag-auxiliary payunir nin dagos-dagos, na huli kaiyan nagin regular payunir giraray ako.”
5. Paano niato puedeng madaog an pakamate na kita daing kakayahan?
5 Daogon an mga Olang: An nagkapira tibaad mag-alangan na mag-aplay huli ta naghohona sinda na kulang an saindang abilidad bilang mga parahulit. Kun ini an nakakapugol sa saindo, matatabangan kamo ni Jehova siring kan ginibo nia ki Jeremias. (Jer. 1:6-10) Minsan ngani si Moises “maluway sa ngoso asin maluway sa dila,” ginamit sia ni Jehova tanganing gibohon an Saiyang kabotan. (Ex. 4:10-12) Kun sa pagmate nindo kamo daing kakayahan, makimaherak ki Jehova na tawan logod kamo nin kosog nin boot.
6. Paano tibaad posibleng mag-auxiliary payunir sa ibong nin mga problema sa salud o sibot na iskedyul?
6 Nag-aalangan daw kamong mag-aplay huli sa mga problema sa salud o sibot na iskedyul? Kun kamo herelangon, makakapag-auxiliary payunir kamo paagi sa paggibo kaiyan sa rikas na komportable sa saindo. Kun kamo may sibot na iskedyul, tibaad puede nindong gibohon na sana sa ibang bulan an nagkapirang aktibidad na bakong gayong mahalaga. An nagkapirang may bilog na panahon na trabaho nahimong tuboson an panahon tanganing mag-auxiliary payunir paagi sa paggamit nin saro o duwang aldaw na bakasyon.—Col. 4:5.
7. Taano ta kapakipakinabang na ipamibi an pag-auxiliary payunir?
7 Kun Paano Gigibohon Iyan: Ipamibi an saindong kamawotan. Hagadon ki Jehova na bendisyonan logod an mga paghihingoa nindo na pahiwason an saindong ministeryo. (Roma 12:11, 12) Makakatabang sia sa saindo na gumibo nin madonong na mga desisyon kun paano liliwaton an saindong iskedyul. (Sant. 1:5) Kun mayo kamong pagmawot, hagadon nindo ki Jehova na tabangan logod kamong magkaigwa nin kawilihan sa paghuhulit.—Luc. 10:1, 17.
8. Sa paanong paagi na an pag-aplikar kan Talinhaga 15:22 puedeng makatabang sa saindo na mag-auxiliary payunir?
8 Pag-olayan nindo bilang pamilya an pasohan na pag-auxiliary payunir. (Tal. 15:22) Tibaad puedeng mag-auxiliary payunir an sarong miembro nin pamilya paagi sa tabang kan ibang kapamilya. Ipakipag-olay nindo sa iba sa kongregasyon an saindong pagmawot na magpayunir, nangorogna sa mga tugang na an kamugtakan kaagid kan saindo. Puede ining magresulta sa mas makosog na entusiasmo na mag-auxiliary payunir.
9. Arin na mga bulan an puede nindong pilion tanganing mag-auxiliary payunir?
9 Mantang rinerepaso nindo an saindong iskedyul para sa ministeryo sa bagong taon nin paglilingkod, noarin kamo puedeng mag-auxiliary payunir? Kun kamo nagtatrabaho nin bilog na panahon o nag-eeskuela, tibaad gusto nindong konsideraron an mga bulan na may piesta opisyal o may limang Sabado o limang Domingo. Halimbawa, an Setyembre, Disyembre, Marso, asin Agosto may limang Sabado asin limang Domingo. An bulan nin Mayo igwa nin limang Sabado, asin an Hunyo may limang Domingo. Kun kamo may mga problema sa salud, isip-isipon an mga bulan na parateng marahay an kamugtakan kan panahon. Puede man nindong isip-isipon an pagpapayunir durante kan bulan na nakaiskedyul na maglingkod sa saindong kongregasyon an paraataman sa sirkito. Durante kan saiyang pagsongko, magkakaigwa kamo kan dagdag na pribilehio na umatender sa enot na kabangaan kan pagtiripon na ginigibo kaiba kan mga regular payunir. Huling an Memorial natangod sa Marso 22 sa sunod na taon, an Marso, Abril, asin Mayo marahayon na mga pagpipilian. Oras na makapili na kamo kan bulan o mga bulan na gusto nindong mag-auxiliary payunir, ponan nindo an pagsurat nin iskedyul na magpapangyari na maabot nindo an kahagadan na oras.
10. Ano an magigibo nindo kun bakong posible na mag-auxiliary payunir?
10 Dawa kun sa paghona nindo dai kamo makakapag-auxiliary payunir sa maabot na taon nin paglilingkod, mapapagdanay pa man giraray nindo an espiritu nin pagpapayunir. Padagos na gibohon an bilog nindong makakaya sa ministeryo, na may kompiansa na si Jehova naoogma sa saindong bilog na kalag na paghihingoa na itao sa saiya an pinakamakakaya nindo. (Gal. 6:4) Magin mapagsuportar kamo, asin parigonon an boot kan mga makakapag-auxiliary payunir. Tibaad puede nindong liwaton an saindong iskedyul tanganing gamiton an saro pang aldaw kan semana sa pakikikabtang sa ministeryo kaiba kan mga nagpapayunir.
11. Taano ta maninigo kitang magkaigwa nin pakamate na mag-apura?
11 An banwaan ni Jehova may pakamate na mag-apura. May gibohon na kaipuhan taposon—an paghuhulit kan maogmang bareta. Kalabot an buhay nin mga tawo, asin nainaan na an panahon na natatada. (1 Cor. 7:29-31) An pagkamoot sa Dios asin sa kapwa mapahiro sa sato na gibohon an bilog niatong makakaya sa ministeryo. Paagi sa paghihingoa asin marahay na pagplano, makakapag-auxiliary payunir kita nin kisuerra sarong bulan durante kan bagong taon nin paglilingkod—sarong mahalagang pasohan nanggad!