Padagos Nindong Pakosogon an Lambang Saro
1 Ginibo ni apostol Pablo an bilog niang makakaya tanganing pakosogon an mga kapagtubod. (2 Cor. 11:28, 29) Siring man, nahahadit kita kun an satong mga tugang napapaatubang sa depisil na mga situwasyon, asin gusto niato sindang tabangan. Ipinaparisa kan Biblia na an gabos, bako sanang an kamagurangan, maninigong magpaheling nin interes sa iba. (Roma 15:1, 2) Isipon nindo an duwang paagi na puede niatong himateon an mamomoton na konseho: “Padagos nindong rangahon asin pakosogon an lambang saro.”—1 Tes. 5:11.
2 Aramon an mga Pangangaipo nin Iba: Sinasabi kan Tataramon nin Dios na si Dorcas “pano nin marahay na mga gibo asin mga balaog nin pagkaherak.” (Gibo 9:36, 39) Sia nagtao nin atension sa mga nangangaipo asin naggibo kan makakaya nia tanganing tabangan sinda. Marahayon nanggad na halimbawa an itinao nia sa sato! Tibaad maaraman nindo na nangangaipo an sarong may edad na nin malulunadan pasiring sa pagtiripon. O tibaad may payunir na mayo nin makakaibanan sa paglilingkod sa hapon nin sarong ordinaryong aldaw. Kun maaraman nindo an siring na pangangaipo asin magtao kamo nin praktikal na tabang, isip-isipa kun guranong pagparigon sa boot an aakoon nia.
3 Mga Orolay Dapit sa Espirituwal na mga Bagay: Mapapakosog man niato an iba paagi sa satong pagtaram. (Efe. 4:29) An sarong eksperyensiadong magurang sa kongregasyon nagkomento: “Kun gusto nindong magin nakakaparigon sa boot, magtaram manongod sa espirituwal na mga bagay. Tanganing makapoon nin nakakapakosog na orolay, puede kamong gumamit nin simpleng hapot arog baga nin, ‘Paano nindo nanodan an katotoohan?’” Magpaheling nin sinserong interes sa mga hoben sa kongregasyon. Magpaheling nin pagmakolog sa mga nanluluya an boot asin sa mga tibaad masusupgon. (Tal. 12:25) Kun kaibanan an mga kapagtubod, dai pagtogotan na mawaran nin lugar an mga orolay dapit sa espirituwal na mga bagay huli sa orolay manongod sa pag-aling-aling.—Roma 1:11, 12.
4 Pero, ano an puede nindong sabihon tanganing pakosogon an iba? Sa saindong personal na pagbasa asin pag-adal sa Biblia, may nanompongan daw kamong prinsipyo kasuarin pa sana na nagpararom kan saindong pag-apresyar ki Jehova? Naparigon daw an boot nindo huli sa nadangog nindo sa pampublikong pahayag o Pag-adal sa Torrengbantayan? O napahiro daw an saindong puso huli sa eksperyensia na nakakapakosog sa pagtubod? Kun iniingatan niato an siring na espirituwal na mga kayamanan, pirme kitang may nakakaparigon sa boot na masasabi sa iba.—Tal. 2:1; Luc. 6:45.
5 Paagi sa pagtao nin praktikal na tabang asin madonong na paggamit kan satong dila, logod na padagos niatong pakosogon an lambang saro.—Tal. 12:18.