Pagpakosog sa Lambang Saro Mantang Nasa Ministeryo
1 Inaapresyar niato gabos an pag-ako niato nin nakakaparigon sa boot na “tataramon na sinabi sa tamang panahon.” (Tal. 25:11) Kun nasa ministeryo kita kaibanan nin iba, paano niato masisierto na an satong orolay nakakaparigon sa boot?
2 Nakakapakosog na Orolay: Nakakapakosog nanggad na iiba sa orolay niato an espirituwal na mga bagay mantang naghuhulit! (Sal. 37:30) Puede niatong ipakipag-olay an satong presentasyon o isaysay an nakakaparigon sa boot na mga eksperyensia sa paglilingkod sa langtad kasuarin pa sana. (Gibo 15:3) May nanodan daw kitang interesanteng punto sa satong personal na pagbasa sa Biblia, sa bagong mga magasin, o sa sarong pagtiripon kan kongregasyon? Puede niatong ipakipag-olay an mga puntong iprinesentar sa sarong pampublikong pahayag na nadangog niato kasuarin pa sana sa Kingdom Hall.
3 Tibaad panluyahan kita nin boot kun an sarong kagharong magbangon nin pagkontra na dai niato masimbag. Pakatapos kan pakikipag-olay sa kagharong, magigin kapakipakinabang na sa laog nin pirang minuto pag-olayan niato kan satong kapartner kun paano niato sisimbagon sa ngapit an siring na pagkontra, tibaad paagi sa pagkonsulta sa librong Reasoning. Asin kun may napahalagahan kita sa presentasyon kan satong kapartner, an pagtao niato nin sinserong komendasyon puedeng makaparigon sa saiyang boot.
4 Magsadiring Boot: May nagkapira daw na tugang sa satong grupo nin pag-adal sa libro na dai niato nakaibanan sa ministeryo kasuarin pa sana? An personal na pag-imbitar sa sainda na umiba sa sato sa ministeryo puedeng magresulta sa “pagparinigonan nin boot.” (Roma 1:12) Inaapresyar nin mga regular asin auxiliary payunir na may makaibanan sinda sa paglilingkod, nangorogna sa amay na aga o kun pabanggi na, na sa panahon na iyan tibaad mas dikit na parahayag an naghuhulit. Masusuportaran niato an mga payunir paagi sa pag-iba sa sainda sa ministeryo. Igwa daw nin parahayag na limitado na an kayang gibohon sa ministeryo huli sa maluyang hawak? An pag-areglo na ibanan kita nin siring na parahayag, tibaad sa pagkondukta nin pag-adal sa Biblia, puedeng magin kapakipakinabang.—Tal. 27:17.
5 An komendasyon asin mga kapahayagan nin pag-apresyar pirmeng nakakaparigon sa boot, dawa sa saradit na bagay. Maninigo na isaisip niato iyan kun nasa ministeryo kaibanan nin iba, huling gusto niato na ‘padagos na pakosogon an lambang saro.’—1 Tes. 5:11.