Papagdanayon an Saimong Kaigutan sa Ministeryo

AN PAGHUHULIT kan maugmang bareta an pinakaimportanteng gibuhon ngunyan sa daga. Bilang saro sa mga lingkod ni Jehova, siguradong sarong pribilehiyo para sa saimo na makikabtang sa paggibo nin disipulo. Pero daing duda na mauyon ka na kun minsan nadidipisilan an mga payunir asin parahayag na mapagdanay an kaigutan ninda sa ministeryo.

May mga parahayag na nasasakitan na makanumpong nin makakaulay pag naghaharong-harong. An totoo, tibaad mayo sa harong an kadaklan sa mga nakaistar sa teritoryo. Pag nakaulay man an mga kagharong, tibaad bako sindang interesado o anggot pa ngani sa dara tang mensahe kan Kahadian. An ibang mga parahayag ugmahon ta mahiwas asin mabunga an teritoryo ninda pero nahahadit ta tibaad dai ninda iyan matapos. An ibang mga miyembro kan kongregasyon dakul na taon nang naghuhulit​—mas haloy kisa inaasahan ninda​—asin huli kaiyan nawawaran na nin gana.

Dapat daw kitang magngalas na gabos na lingkod ni Jehova may pig-aagihan na kadipisilan na puwedeng magpaluya kan kaigutan ninda sa paghuhulit? Dai. Tutal, aasahan daw kan siisay man sa sato na magigin madali an pagbalangibog kan nagliligtas buhay na mensahe nin katotoohan hali sa Diyos digdi sa kinaban na kontrolado kan “maraot,” si Satanas na Diyablo?​—1 Juan 5:19.

Ano man na mga kadipisilan an inaagihan mo sa pagpahayag kan maugmang bareta, makakasiyerto ka na kaya kang tabangan ni Jehova na mapangganahan an mga iyan. Pero, ano an magigibo mo tanganing lalo kang magin maigot sa ministeryo? Hilingon ta an nagkapirang suhestiyon.

TABANGAN AN BAGONG MGA PARAHAYAG

Kada taon, rinibo an nababawtismuhan bilang bagong Saksi ni Jehova. Kun dai ka pa sana nahahaloy na mabawtismuhan, siguradong magpapasalamat ka sa mga pakinabang na makukua mo sa mga eksperyensiya kan mga parahayag na mas haloy nang naghuhulit kisa saimo. Asin kun dakul na taon ka nang parahayag kan Kahadian, bako daw na tama sana asin sulit nanggad kun sasanayon mo an mga baguhan?

Aram ni Jesus na kaipuhan kan saiyang mga disipulo nin paggiya tanganing magin epektibong mga ebanghelisador, asin ipinahiling niya kun paano maghulit. (Luc. 8:1) Ngunyan, kaipuhan man na sanayon an iba na magin epektibong mga ministro.

Dai ta dapat pag-isipon na pag nakikikabtang na sa ministeryo an sarong bagong parahayag, nakakanuod na siyang magtukdo. Kaipuhan niya nin personal na pagsasanay hali sa mabuot asin mamumuton na eksperyensiyadong parahayag. Puwedeng kaiba sa pagsasanay na iyan an pagtutukdo sa bagong parahayag kun paano (1) mag-andam asin magpraktis nin presentasyon, (2) makipag-ulay sa kagharong o mga nag-aagi, (3) mag-alok nin literatura, (4) magdalaw liwat sa mga nagpahiling nin interes, asin (5) makapuon nin pag-adal sa Bibliya. Posibleng marhay na magayon an magigin resulta kun oobserbaran asin aarugon kan sinasanay an mga pamamaaging ginagamit sa ministeryo kan nagtatabang sa saiya. (Luc. 6:40) Siguradong mas magkakaigwa nin kusog nin buot an bagong parahayag huling aram niya na may kaiba siya na madangog sa saiya asin andam na magtabang kun kaipuhan. Makikinabang man an baguhan kun tatawan siya nin komendasyon asin nakakatabang na mga suhestiyon.​—Par. 4:9, 10.

MAKIPAG-ULAY SA SAIMONG KAPARTNER

Sa ibong kan paghihinguwa mong makipag-ulay sa mga kagharong, may mga panahon na an pinakamagayon na nagin pakipag-ulay mo iyo idtong sa kapartner mo sa paghuhulit. Tandaan na isinugo ni Jesus an saiyang mga disipulo na maghulit na ‘manduwa-duwa.’ (Luc. 10:1) Mantang magkaibanan sindang naglilingkod, mapapakusog asin mamomotibar ninda an kada saro. Kaya an panahon na kaiba sa ministeryo an sarong kapagtubod marahayon na pagkakataon na “magpakinurusog-kusugan.”​—Roma 1:12, NW.

Ano an nagkapirang bagay na puwede nindong pag-ulayan? Igwa daw sa saindo an may bagong nakakaparigon na eksperyensiya sa ministeryo? May nanudan daw kamong sarong interesanteng punto sa saindong personal o pampamilyang pag-adal? May nadangog daw kamo sa pagtiripon na nakapakusog sa saindo? Kun minsan, nakakapartner mo an mga tugang na bihira mong makapartner. Aram mo daw kun paano niya naaraman an katotoohan? Ano an nakakumbinsir sa saiya na ini an organisasyon ni Jehova? Ano an nagin mga pribilehiyo o mga eksperyensiya niya? Tibaad puwede mo man iistorya an saimong mga eksperyensiya sa paglilingkod ki Jehova. Ano man an reaksiyon kan mga tawo sa teritoryo, marahay na oportunidad an paglilingkod na may kapartner tanganing ‘magparinigunan.’​—1 Tes. 5:11.

PAPAGDANAYON AN MARAHAY NA RUTINA SA PAG-ADAL

Importanteng marhay na magkaigwa nin marahay na rutina sa pag-adal asin mapagdanay iyan tanganing dai mawara an kaigutan sa ministeryo. Nagpupublikar “an maimbod asin mapagmansay na uripon” nin mga impormasyon dapit sa lain-lain na tema. (Mat. 24:45, NW) Kaya dakulon nanggad na tema an puwede mong pag-adalan tanganing makakakan nin espirituwal na kakanon. Pag-ulayan ta an sarong halimbawa nin magayon na tema para sa personal na pag-adal: Taano ta importanteng marhay an paghuhulit kan Kahadian? Mahihiling sa kahon sa pahina 16 an nagkapira sa mga dahilan.

An pagkonsiderar sa mga puntong nakalista sa kahon makakamotibar sa saimo na magin maigot pirmi sa paghuhulit. Taano ta dai gamiton ini sa saimong pag-adal asin maglista pa nin ibang mga dahilan? Dangan hurop-hurupon an mga dahilan na ini asin an mga teksto na nagsusuportar diyan. Kun gigibuhon mo iyan siguradong magigin mas maigot ka sa ministeryo.

MAGIN BUKAS AN ISIP SA MGA SUHESTIYON

Regular na nagtatao an organisasyon ni Jehova nin mga suhestiyon tanganing tabangan kita na mas mapauswag an satong ministeryo. Halimbawa, apuwera sa pagharong-harong, puwede kitang magpatotoo paagi sa pagsurat o sa telepono, sa tinampo o sa iba pang pampublikong lugar, asin sa impormal na paagi saka sa mga lugar nin negosyo. Tibaad puwede man kitang magplanong maghulit sa mga teritoryong bihirang magibo.

Bukas daw an saimong isip sa mga suhestiyon na ini? Napurbaran mo na daw an iba kaiyan? An dakul na nagpurbar sa mga suhestiyon na ini naugmang marhay sa mga resulta. Hilingon an tulong halimbawa.

An inot na halimbawa iyo an manungod sa nagin epekto kan suhestiyon sa sarong artikulo sa Ministeryo sa Kahadian dapit sa kun paano makakapuon nin mga pag-adal sa Bibliya. Pinahiro kaiyan an sister na si April na mag-alok nin pag-adal sa tulong katrabaho niya. Nabigla siya asin naugmang marhay kan akuon kan tulo an alok niya asin nag-aatender na sinda sa mga pagtiripon kan kongregasyon.

An ikaduwang halimbawa iyo an manungod sa pagpapasakamot nin magasin. Dinadagka kita na ialok an espesipikong mga artikulo sa satong mga magasin sa mga tawong posibleng magin interesado diyan. Sarong paraataman nin sirkito sa Estados Unidos an nagreport na iinalok niya sa mga manedyer kan gabos na tindahan nin ruweda sa sarong lugar an artikulo sa Awake! manungod sa mga ruweda. Dinara man niya saka kan agom niya an serye kan Awake! na “Understanding Your Doctor” sa labing 100 na klinika nin doktor sa sirkito. Sinabi niya: “Nakatabang na marhay an mga pagdalaw na iyan tanganing magin pamilyar sinda sa gibuhon saka sa mga babasahon ta. Pag komportable na samo an mga tawo sa lugar na iyan, mas nadadalaw mi na sinda.”

An ikatulong halimbawa may koneksiyon sa pagpapatotoo paagi sa telepono. Nagsurat sa pambilog na kinaban na headquarters an sister na si Judy tanganing magpasalamat sa pagparigon nin buot na magpatotoo paagi sa telepono. Sinabi niya na an saiyang 86 anyos na ina, na dakul na an hilang, regular na nakikikabtang sa klaseng ini nin sagradong paglilingkod asin nauugmang marhay sa pagkondukta nin pag-adal sa Bibliya sa telepono sa sarong 92 anyos na babayi!

Talagang epektibo an mga suhestiyon sa pagpapatotoo na nasa satong mga publikasyon. Purbaran an mga iyan! Makakatabang iyan na mapagdanay mo an saimong kaugmahan asin kaigutan sa ministeryo.

MAGKAIGWA NIN RASONABLENG MGA PASUHAN

An pagigin mapanggana kan satong paghuhulit dai nakadepende sa bilang kan mga publikasyon na naipasakamot ta, mga tinutukduan sa Bibliya, o mga tawong natabangan ta na magin mga lingkod ni Jehova. Si Noe ngani, apuwera sa mga kapamilya niya, mayo siyang ibang natabangan na magin parasamba ni Jehova. Pero talagang nagin mapanggana siyang parahulit. An mahalaga iyo na maimbod kitang naglilingkod ki Jehova.​—1 Cor. 4:2.

Narisa kan dakul na parahayag kan Kahadian na kaipuhan nindang magkaigwa nin rasonableng mga pasuhan para magin mas entusiyastiko sa paghuhulit. Ano an nagkapira sa mga ini? Mahihiling sa kahon sa pahinang ini an pira sa mga puwedeng magin pasuhan.

Mamibi ki Jehova na tabangan kang makagibo nin mga paagi tanganing magin nakakaugma asin mabunga an saimong ministeryo. Pag naabot mo an saimong mga pasuhan, magigin maugma ka asin kontento ta aram mong ginigibo mo an gabos tanganing ihulit an maugmang bareta.

Totoo, tibaad bakong pasil na maghulit kan maugmang bareta. Pero, may magigibo ka tanganing magin maigot sa saimong ministeryo. Makipag-ulay sa saimong kapartner kan mga bagay na nakakapakusog, magkaigwa asin papagdanayon an marahay na rutina sa pag-adal, purbaran an mga suhestiyon kan maimbod na uripon, saka magkaigwa nin rasonableng mga pasuhan. Urog sa gabos, tandaan na tinawan ka nin Diyos nin dakulaon na pribilehiyo na maghayag kan maugmang bareta bilang saro sa saiyang mga Saksi. (Isa. 43:10) Talagang magigin maugma ka mantang padagos mong pinagdadanay an saimong kaigutan sa ministeryo!