Arugon an Kaigutan ni Jesus sa Paghuhulit

1. Huli sa anong kuwalidad napapalain an mga lingkod ni Jehova sa kinaban?

AN SARONG bagay na napapalain an mga lingkod ni Jehova sa bakong tunay na mga Kristiyano iyo an saindang kaigutana sa ministeryo. (Tito 2:14) Pero kun minsan, tibaad nasasakitan kang magin ganado sa paghuhulit. Tibaad namamatian mo man an namatian kan sarong mahigos na elder na nagsabi, “May mga pagkakataon na mayo talaga akong ganang maghulit.”

2. Ano kun minsan an puwedeng makapadipisil na mapagdanay niyato an satong kaigutan sa ministeryo?

² Tibaad mas ganado kitang makikabtang sa iba pang mga porma nin sagradong paglilingkod kisa sa gibuhon na paghuhulit sa publiko. Taano? Huling pag nagtutugdok asin nagmementenar kita nin teokratikong mga pasilidad, nagtatabang sa gibuhon na pag-ayuda, o nagpapakusog sa satong mga tugang tibaad may mga nahihiling tulos kitang resulta asin namamati tang may naisasagibo kita. Gustong-gusto ta an katuninungan asin pagkamuot na naeeksperyensiyahan ta pag nagtatrabaho kita kaiba kan satong mga tugang, asin aram niyato na naaapresyar ninda an mga ginigibo ta para sa sainda. Sa ibong na lado, tibaad dakul na taon na kitang naghuhulit sa iyo man sanang teritoryo pero dikiton sana an nag-aako kan satong mensahe. O tibaad makanumpong kita nin mga tawo na negatibong marhay an reaksiyon. Aram ta man na mantang paparani na an katapusan, magkakaigwa nin urog na pagkontra sa satong mensahe. (Mat. 10:22) Ano an makakatabang sa sato na mapagdanay o madagdagan pa ngani an satong kaigutan sa gibuhon na paghuhulit?

3. Sa anong paagi iinilustrar kan Lucas 13:6-9 an kaigutan ni Jesus?

³ May manunudan kita sa halimbawa ni Jesus manungod sa pagpahiling nin kaigutan sa satong gibuhon na paghuhulit. Nungkang nabawasan an kaigutan niya durante kan saiyang ministeryo. Sa katunayan, lalong nagdakul an mga ginigibo niya sa paglihis nin panahon. (Basahon an Lucas 13:6-9.) Arog kan nag-aataman kan ubasan na tulong taon na naghinguwang patalubuon an sarong puon nin higera na dai lamang namunga, mga tulong taon na naghulit si Jesus sa mga Judio, na an kadaklan dai man nagin mga disipulo niya. Alagad, kun paanong an nag-aataman kan ubasan dai nagpundo sa pag-ataman sa puon nin higera, dai man nagpundo si Jesus sa paghulit sa mga tawo asin dai man nabawasan an saiyang kaigutan sa ministeryo. Sa kabaliktaran, lalo pa siyang nagmaigot na maabot an saindang puso.

4. Anong apat na aspekto kan halimbawa ni Jesus an pag-uulayan niyato?

⁴ Sa artikulong ini, pag-uulayan ta kun paano nagpahiling si Jesus nin kaigutan lalo na kan huring anom na bulan kan saiyang ministeryo. (Hilingon an study note na “Pagkatapos nito” sa Lucas 10:1, nwtsty-TG.) Kun pag-aadalan ta an mga itinukdo niya asin aarugon an mga ginibo niya, makakatabang iyan sa sato na magdanay na maigot ngunyan. Pag-ulayan ta an apat na aspekto kan halimbawa ni Jesus: (1) Nagpokus siya sa kabutan ni Jehova, (2) nagtao nin atensiyon sa mga propesiya sa Bibliya, (3) nagsarig ki Jehova para sa tabang, asin (4) nagdanay na positibo na may mga madangog sa saiya.

NAGPOKUS SIYA SA KABUTAN NI JEHOVA

5. Paano ipinahiling ni Jesus na nakapokus siya sa paggibo kan kabutan nin Diyos?

⁵ Maigot na ihinulit ni Jesus “an maugmang bareta kan Kahadian” huling aram niya na iyan an gibuhon na buot nin Diyos na ipagibo sa saiya. (Luc. 4:43) Ipinokus ni Jesus sa ministeryo an saiyang buhay. Dawa kan huring mga bulan kan saiyang ministeryo, nagbaklay siya sa “mga siyudad saka sa mga baryo” para magtukdo. (Luc. 13:22) Nagsanay man siya nin dugang pang mga disipulo para maghulit arog niya.—Luc. 10:1.

6. Paano konektado an gibuhon na paghuhulit sa iba pang mga asignasyon na tibaad igwa kita? (Hilingon man an ritrato.)

⁶ Sa ngunyan man, an paghuhulit kan maugmang bareta iyo an panginot na gibuhon na gusto ni Jehova asin ni Jesus na ipagibo sa sato. (Mat. 24:14; 28:19, 20) An gibuhon na paghuhulit direktang konektado sa iba pang teokratikong mga asignasyon. Halimbawa, nagtutugdok kita nin teokratikong mga pasilidad o naglilingkod sa Bethel tanganing suportaran an mga pangangaipo sa langtad. Nagtatao kita nin ayuda pag may kalamidad bako lang tanganing tabangan an satong mga tugang kundi pati man para tabangan sindang maipagpadagos an saindang espirituwal na rutina, kaiba na diyan an paghuhulit. Kun isinasaisip ta an kahalagahan kan gibuhon na paghuhulit asin na iyan an panginot na gibuhon na gustong ipagibo sa sato ni Jehova, makakamotibar iyan sa sato na regular na makikabtang sa ministeryo. Si János, sarong elder sa Hungary, nagsabi, “Ipinapagirumdom ko sa sadiri ko na mayo nin iba pang teokratikong aktibidad na makakaribay sa gibuhon na paghuhulit; iyan an panginot tang asignasyon.”

7. Taano ta gusto ni Jehova na padagos kitang maghulit? (1 Timoteo 2:3, 4)

⁷ Madadagdagan niyato an satong kaigutan sa ministeryo paagi sa pag-arog sa pagmansay ni Jehova sa mga tawo. Gusto ni Jehova na madangog kan pinakadakul na tawong posible an maugmang bareta asin akuon ninda iyan. (Basahon an 1 Timoteo 2:3, 4.) Tanganing magibo iyan, sinasanay niya kita na magin mas epektibo sa paghiras kan nagliligtas-buhay na mensaheng ini. Halimbawa, an brosyur na Mamutan an mga Tawo—Gumibo nin mga Disipulo nagtatao nin praktikal na mga suhestiyon na makakatabang sa sato na makapuon nin mga pakikipag-ulay para sa pasuhan na gumibo nin mga disipulo. Dawa kun dai iyan akuon kan mga tawo ngunyan, tibaad magkaoportunidad sinda na gibuhon iyan bago an katapusan kan panahon kan dakulang kasakitan. An sinasabi ta sa sainda ngunyan posibleng marhay na iyo an magpahiro sa sainda na akuon iyan sa maabot na panahon. Pero mangyayari sana iyan kun padagos kitang maghuhulit.

NAGTAO SIYA NIN ATENSIYON SA MGA PROPESIYA SA BIBLIYA

8. Huli sa mga aram ni Jesus manungod sa mga propesiya sa Bibliya, paano niya ginamit an saiyang panahon?

⁸ Aram ni Jesus kun paano mauutob an mga propesiya sa Bibliya. Aram niya na an saiyang ministeryo malawig lang nin tulo may kabangang taon. (Dan. 9:26, 27) Aram niya man kun ano an iprinopesiya manungod sa kun nuarin asin kun paano siya magagadan. (Luc. 18:31-34) Huli sa mga aram niyang iyan, ginamit ni Jesus an saiyang panahon sa pinakamarahay na paaging posible. Bilang resulta, naghulit siya nin may kaigutan tanganing matapos an gibuhon na itinao sa saiya.

9. Taano ta napapahiro kita kan mga propesiya sa Bibliya na maghulit nin may kaigutan?

⁹ An satong pakasabot sa mga propesiya sa Bibliya makakapahiro sa sato na maghulit nin may kaigutan. Aram niyato na dikit na panahon na sana an natatada sa sistemang ini. Aram ta man na an mga pangyayari asin an mga ugali kan mga tawo ngunyan kautuban kan ihinula kan Bibliya manungod sa magigin tanda kan huring mga aldaw. Nasasabutan niyato na an pagdinaugan kan Anglo-Amerikanong pambilog na kinaban na kapangyarihan asin kan Russia saka mga kaalyado kaiyan kautuban kan propesiya manungod sa hadi kan timog asin sa hadi kan norte “sa panahon kan katapusan.” (Dan. 11:40) Nasasabutan ta man na an pambilog na kinaban na kapangyarihan na Anglo-Amerikano isinisimbolisar kan mga bitis kan imahen na ilinadawan sa Daniel 2:43-45. Kumbinsido kita na arog kan ipinaparisa kan propesiya, madali nang marhay na laglagon kan Kahadian nin Diyos an mga gobyerno nin tawo. An gabos na propesiyang ini naghahayag kun sain na kitang peryodo nin panahon asin pinapahiro kita kaiyan na maghulit nin may pagkaapurado.

10. Sa ano pang mga paagi kita namomotibar kan mga propesiya sa Bibliya na magin maigot?

¹⁰ An mga propesiya sa Bibliya nagtatao man sa sato nin sarong mensahe na gustong-gusto tang ihiras. “An nakakaugmang mga panuga ni Jehova para sa sarong mas marahay na puturo nakakamotibar sako na ihiras sa iba an katotoohan,” an sabi ni Carrie, sarong sister na naglilingkod sa Dominican Republic. Sinabi niya pa: “Pag nahihiling ko an mga inaagihan kan mga tawo ngunyan, naiisip ko na an mga panugang ini bako lang para sa sako kundi para man sa sainda.” Naaraman ta sa mga propesiya sa Bibliya na tinatabangan kita ni Jehova na maisagibo an gibuhon na ini, asin nakakamotibar iyan sa sato na padagos lang na maghulit. Si Leila, na nakaistar sa Hungary, nagsabi: “Nakakamotibar sako an Isaias 11:6-9 na ihiras an maugmang bareta dawa sa mga garo baga dai maako kaiyan. Aram ko na puwedeng magbago an siisay man sa tabang ni Jehova.” Asin si Christopher, sarong brother sa Zambia, nagsabi: “Arog kan ihinula sa Marcos 13:10, an maugmang bareta naglalakop sa bilog na kinaban, asin sarong onra para sako na tumabang sa pag-utob kan propesiyang iyan.” Anong mga propesiya sa Bibliya an nakakamotibar saimo na padagos na maghulit?

NAGSARIG SIYA KI JEHOVA PARA SA TABANG

11. Taano ta kinaipuhan ni Jesus na magsarig ki Jehova para sa tabang tanganing padagos na makapaghulit nin may kaigutan? (Lucas 12:49, 53)

¹¹ Nagsarig si Jesus ki Jehova para sa tabang tanganing padagos na makapaghulit nin may kaigutan. Dawa ngani mataktika si Jesus, aram niya na an maugmang bareta kan Kahadian magkakawsa nin mainit na kontrobersiya asin grabeng pagkontra. (Basahon an Lucas 12:49, 53.) Huli sa paghuhulit ni Jesus, pauruutro siyang pinurbaran na gadanon kan mga lider nin relihiyon. (Juan 8:59; 10:31, 39) Pero padagos na naghulit si Jesus huling aram niyang nasa kaibanan niya si Jehova. Sinabi niya: “Kaiba ko an Ama na nagsugo sa sako. . . . Asin Siya na nagsugo sa sako nasa kaibanan ko; dai niya ako pinabayaan na nagsosolo, huli ta pirmi kong ginigibo an mga bagay na nakakapaugma sa saiya.”—Juan 8:16, 29.

12. Paano inandam ni Jesus an saiyang mga disipulo na padagos na maghulit dawa pag may pagkontra?

¹² Ipinagirumdom ni Jesus sa saiyang mga disipulo na puwede sindang magsarig ki Jehova para sa tabang. Pauruutro niya sindang inasigurar na tatabangan sinda ni Jehova dawa pag mapaatubang sinda sa persekusyon. (Mat. 10:18-20; Luc. 12:11, 12) Huli kaiyan, sinadol niya sinda na magin maingat. (Mat. 10:16; Luc. 10:3) Ininstruksiyunan niya sinda na dai ipirit an saindang mensahe sa mga habong magdangog. (Luc. 10:10, 11) Asin sinabi niya sa sainda na magdulag kun persegiron sinda. (Mat. 10:23) Dawa ngani si Jesus maigot asin nagtitiwala ki Jehova, ilinilikay niya an saiyang sadiri sa peligro pag kaipuhan.—Juan 11:53, 54.

13. Taano ta makakasigurado ka na tatabangan ka ni Jehova?

¹³ Kaipuhan ta an tabang ni Jehova tanganing padagos na makapaghulit nin may kaigutan ngunyan dawa pag may pagkontra. (Kap. 12:17) Taano ta makakasigurado ka na tatabangan ka ni Jehova? Pag-isipan an pamibi ni Jesus na mababasa sa Juan kapitulo 17. Nakiulay si Jesus ki Jehova na bantayan an mga apostol, asin sinimbag ni Jehova an pakiulay na iyan. Mahihiling sa libro nin Mga Gibo kun paano tinabangan ni Jehova an mga apostol na maghulit nin may kaigutan sa ibong nin persekusyon. Sa saiyang pamibi, nakiulay man si Jesus ki Jehova na bantayan idtong mga mapahiling nin pagtubod sa ihinuhulit kan mga apostol. Kaiba ka diyan. Si Jehova dai nagpundo sa pagsimbag sa pamibi ni Jesus; kaya tatabangan ka Niya kun paanong tinabangan Niya an mga apostol.—Juan 17:11, 15, 20.

14. Taano ta sigurado kita na padagos kitang makakapaghulit nin may kaigutan? (Hilingon man an ritrato.)

¹⁴ Mantang paparani na an katapusan, tibaad lalong magin dipisil para sa sato na maghulit kan maugmang bareta nin may kaigutan. Alagad makakasigurado kita na magkakaigwa kita kan gabos na tabang na kaipuhan ta. (Luc. 21:12-15) Arog ni Jesus asin kan saiyang mga disipulo, ipinapabaya ta sa mga tawo an desisyon kun baga madangog sinda o dai, asin linilikayan niyato na makiargumento. Dawa pag may restriksiyon an satong gibuhon, nagigibo kan satong mga tugang na padagos na ibalangibog an maugmang bareta huling nagsasarig sinda ki Jehova bako sa sadiri nindang kusog. Kun paanong tinawan ni Jehova nin kusog an saiyang mga lingkod kan inot na siglo, tinatawan man kita ngunyan ni Jehova nin kusog para “lubos na maisagibo an paghuhulit” sagkod na sabihon niyang tapos na an gibuhon. (2 Tim. 4:17) Makakasigurado ka na kun magsasarig ka ki Jehova, padagos kang makakapaghulit nin may kaigutan.

NAGDANAY SIYANG POSITIBO

15. Ano an nagpapahiling na positibo si Jesus manungod sa ministeryo?

¹⁵ Nagdanay si Jesus na positibo manungod sa gibuhon na paghuhulit. Nakatabang iyan sa saiya na padagos na magin entusiyastiko manungod sa saiyang ministeryo. Halimbawa, sa huring parte kan 30 C.E., nahiling ni Jesus na dakul an andam na magdangog sa maugmang bareta, asin iinagid niya sinda sa sarong uma na puwede nang anihon. (Juan 4:35) Pakalihis nin mga sarong taon, sinabi niya sa saiyang mga disipulo: “Dakulon an aanihon.” (Mat. 9:37, 38) Asin kan huri idinuon niya giraray: “Dakulon an aanihon . . . Makimahirak kamo sa Kagurangnan kan pag-ani na magsugo nin mga trabahador sa saiyang pagpaani.” (Luc. 10:2) Pirming isinasaisip ni Jesus na may mga tawong mag-aako kan maugmang bareta, asin nag-uugma siya pag may mga nag-aako.—Luc. 10:21.

16. Paano nakatabang an mga ilustrasyon ni Jesus na magin positibo sa ministeryo an mga disipulo niya? (Lucas 13:18-21) (Hilingon man an ritrato.)

¹⁶ Tinukduan ni Jesus an saiyang mga disipulo na magdanay na positibo sa saindang mensahe. Makakatabang iyan sa sainda na mapagdanay an saindang kaigutan. Halimbawa, pag-isipan an duwa sa saiyang mga ilustrasyon. (Basahon an Lucas 13:18-21.) Ginamit ni Jesus an sarong pisog nin mustasa para itukdo na an mensahe kan Kahadian malakop sa makangangalas na paagi asin dai mapupugulan an pagtalubo kaiyan. Asin ginamit niya an lebadura para iilustrar kun paano an mensahe kan Kahadian malakop na marhay asin magigin dahilan nin mga pagbabago na tibaad dai tulos marisa. Bilang resulta, natabangan ni Jesus an saiyang mga disipulo na masabutan na magigin epektibo nanggad an mensaheng ihinuhulit ninda.

17. Taano ta dapat kitang magdanay na positibo manungod sa satong ministeryo?

¹⁷ Mapapahiro kita na padagos na maghulit nin may kaigutan kun iisip-isipon ta an mga naisasagibo ngunyan sa bilog na kinaban. Kada taon, minilyon na interesado an nag-aatender sa Memoryal asin nakikipag-adal nin Bibliya sa sato. Ginatos na ribo an nababawtismuhan asin nag-iiba sa sato sa gibuhon na paghuhulit. Dai ta aram kun gurano pa kadakul an mahimati sa satong paghuhulit, pero aram niyato na si Jehova nagtitipon nin sarong dakulang kadaklan na makakaligtas sa maabot na dakulang kasakitan. (Kap. 7:9, 14) An Kagurangnan kan pag-ani padagos na nagtitiwala na dakul pa an potensiyal na maaani sa uma, kaya may marahay kitang dahilan na padagos na maghulit.

18. Ano an gusto tang mahiling sa sato kan iba?

¹⁸ Kaidto pa, midbid na an mga disipulo ni Jesus sa saindang paghuhulit nin may kaigutan. Kan mahiling kan mga tawo an kusog nin buot kan mga apostol, “narealisar ninda na an mga ini nagin kaiba-iba ni Jesus.” (Gibo 4:13) Mantang inoobserbaran kita kan mga tawo sa ministeryo, lugod na mahiling ninda sa sato an kaigutan na ipinahiling kaidto ni Jesus.