Kun Paano Mas Magigin Maugma sa Ministeryo

1. Ano an namamatian kan nagkapira manungod sa pakikipag-ulay sa iba sa ministeryo? (Hilingon man an ritrato.)

BILANG mga lingkod ni Jehova, naghuhulit kita sa iba huling namumutan ta an satong Ama sa langit asin gusto tang tabangan an satong kapwa na mamidbid siya. Dakul na parahayag an talagang ikinakaugma an paghuhulit. Pero may mga nasasakitan na ikaugma an gibuhon na iyan. Taano? Huling an iba tibaad masusupgon na marhay asin mayo nin kumpiyansa sa sadiri. An iba nag-aalangan na magtuktok sa mga harong ta dai man inaasahan kan kagharong an pagbisita ninda. An iba natatakot na tibaad sayumahan sinda kan kagharong. An iba man naglilikay na makakua nin kaiwal. Dawa namumutan nindang marhay si Jehova, an mga tugang na ini nadidipisilan na ipakipag-ulay an maugmang bareta sa mga tawo na dai ninda kabisto. Alagad, aram ninda kun gurano kaimportante kan gibuhon na ini, kaya regular sindang nakikikabtang diyan. Siguradong nauugmang marhay sa sainda si Jehova!

2. Kun nasasakitan kang ikaugma an ministeryo, taano ta dai ka dapat madisganar?

² Nasasakitan ka man daw kun minsan na ikaugma an ministeryo huli sa arog kaiyan na mga pagmati? Kun iyo, dai madisganar. An kawaran nin kumpiyansa sa sadiri nagpaparisa na mapakumbaba ka ta habo mong mapasaimo an atensiyon asin na habo mong makipag-argumento. Saka mayo nin gustong sinasayumahan kan iba lalo na pag hinihinguwa mong gumibo nin marahay sa sainda. Aram na marhay kan saimong Ama sa langit an mga kadipisilan na inaatubang mo asin gusto niyang tawan ka kan tabang na kinakaipuhan mo. (Isa. 41:13) Sa artikulong ini, pag-uulayan ta an limang suhestiyon kun paano aatubangon an siring na mga pagmati asin kun paano mas magigin maugma sa ministeryo.

TUGUTAN NA PAKUSUGON KA KAN TATARAMON NIN DIYOS

3. Ano an nakatabang ki propeta Jeremias na maghulit sa iba?

³ Puon pa kaidto, an mensahe hali sa Diyos nagpakusog sa saiyang mga lingkod kan magkaigwa sinda nin masakit na asignasyon. Pag-isipan an halimbawa ni propeta Jeremias. Nahadit siya kan tawan siya ni Jehova nin asignasyon na maghulit. Sinabi ni Jeremias: “Dai ako tataong magtaram, ta aki pa ako.” (Jer. 1:6) Paano niya napaglabanan an kawaran niya nin kumpiyansa sa sadiri? Nagkua siya nin kusog sa mga tataramon ni Jehova. Sinabi ni Jeremias: “Nagin siring iyan sa naglalaad na kalayo na nalalaom sa sakong mga tulang, asin pagal na ako sa kakapugol kaiyan.” (Jer. 20:​8, 9) Dawa ngani matagas an nagin teritoryo ni Jeremias, an mensaheng ibabalangibog niya nagtao saiya nin kusog na kaipuhan niya para magibo an saiyang asignasyon.

4. Ano an nangyayari pag binabasa ta an Tataramon nin Diyos asin hinuhurop-hurop iyan? (Colosas 1:​9, 10)

⁴ An mga Kristiyano nagkukua nin kusog sa Tataramon nin Diyos. Kan magsurat si apostol Pablo sa kongregasyon nin Colosas, sinabi niya na an pagkua nin tamang kaaraman makakamotibar sa saiyang mga tugang na ‘maglakaw nin maninigo para ki Jehova’ mantang padagos sindang “namumunga sa lambang marahay na gibo.” (Basahon an Colosas 1:​9, 10.) Kaiba sa marahay na gibong iyan an paghuhulit kan maugmang bareta. Kaya pag binabasa ta an Tataramon nin Diyos asin hinuhurop-hurop iyan, mas nagkukusog an satong pagtubod ki Jehova asin mas nagigin malinaw sato kun taano ta kaipuhan tang ihiras an mensahe kan Kahadian.

5. Paano kita lubos na makikinabang sa satong pagbasa nin Bibliya asin pag-adal?

⁵ Para lubos na makinabang sa Tataramon nin Diyos, dai ta dapat paghidalion an satong pagbasa, pag-adal, asin paghurop-hurop. Sabuton na marhay an binabasa. Pag may nabasa kang sarong teksto na dai mong gayo nasasabutan, dai iyan paglaktawan. Imbes, gamiton an Watch Tower Publications Index o an Giya sa Pag-research Para sa Mga Saksi ni Jehova para makahanap nin paliwanag manungod sa tekstong iyan. Kun gagamiton mong marhay an saimong panahon pag nag-aadal, mapapakusog mo an saimong pagtitiwala sa pagigin totoo kan Tataramon nin Diyos. (1 Tes. 5:21) Mantang mas nagigin kumbinsido ka, mas ikakaugma mo man na ihiras sa iba an saimong mga nanunudan.

MAG-ANDAM NA MARHAY SA MINISTERYO

6. Taano ta dapat kitang mag-andam na marhay para sa ministeryo?

⁶ Kun mag-aandam kang marhay sa ministeryo, posibleng mas magin komportable kang makipag-ulay sa iba. Tinabangan ni Jesus an saiyang mga disipulo na mag-andam bago niya sinda isugo sa ministeryo. (Luc. 10:​1-11) Huling sinunod kan mga disipulo an itinukdo sa sainda ni Jesus, nakamati sinda nin dakulang kaugmahan sa mga nagibo ninda.​—Luc. 10:17.

7. Paano kita makakapag-andam para sa ministeryo? (Hilingon man an ritrato.)

⁷ Paano kita maandam sa ministeryo? Dapat tang pag-isipan kun paano ta epektibong maipapaabot sa iba an katotoohan sa sadiri tang mga tataramon. Makakatabang man kun aantisiparon ta an duwa o tulong komun na reaksiyon kan mga tawo sa teritoryo asin pag-isipan kun paano ta iyan sisimbagon. Dangan sa pagdulok sa mga tawo, hinguwahon tang magin relaks, magngirit, asin magin mainamigo.

8. Sa paanong paagi an mga Kristiyano kapareho kan mga lalagan na dalipay na sinambit ni apostol Pablo sa saiyang ilustrasyon?

⁸ Iinilustrar ni apostol Pablo an satong papel sa gibuhon na paghuhulit kan siya magsabi: “Igwa kami kaining kayamanan na yaon sa mga lalagan.” (2 Cor. 4:7) Ano an kayamanan na iyan? Iyan an nagliligtas-buhay na gibuhon na paghuhulit kan mensahe kan Kahadian. (2 Cor. 4:1) Ano an mga lalagan na dalipay? Nagrerepresentar an mga iyan sa mga lingkod nin Diyos na nagpapaabot kan maugmang bareta sa iba. Kan panahon ni Pablo, naggagamit an mga negosyante nin mga lalagan na dalipay sa pagbiyahe ninda nin mahalagang mga bagay na arog kan pagkakan, arak, asin kuwarta. Sa kaparehong paagi, pinagkatiwalaan kita ni Jehova nin mahalagang mensahe kan maugmang bareta. Sa tabang niya, puwede kitang magkaigwa kan kusog na kaipuhan para padagos na maipaabot an satong mensahe.

MAMIBI PARA SA KUSOG NIN BUOT

9. Paano ta mapapangganahan an pagkatakot sa tawo o pagkatakot na sayumahan? (Hilingon man an ritrato.)

⁹ Kun minsan, tibaad makamati kita nin pagkatakot sa tawo o pagkatakot na sayumahan. Paano ta iyan mapapangganahan? Pag-isipan an pamibi kan mga apostol kan pagbutan sinda na dai maghulit. Imbes na magpadara sa takot, nakiulay sinda ki Jehova na tabangan sindang “padagos na ipahayag an [saiyang] tataramon na daing takot.” Sinimbag tulos ni Jehova an saindang pamibi. (Gibo 4:​18, 29, 31) Kun nakakamati man kita kun minsan nin pagkatakot sa tawo, ipamibi ta man na tabangan kita ni Jehova. Hagadon ki Jehova na tabangan kang pakusugon an pagkamuot mo sa mga tawo para malabanan mo an takot na ihiras sa sainda an maugmang bareta.

10. Paano kita tinatabangan ni Jehova na magibo an satong papel bilang saiyang mga Saksi? (Isaias 43:​10-12)

¹⁰ Isinugo kita ni Jehova na magin saiyang mga Saksi asin nanunuga siya na tatabangan niya kitang magin makusog an buot. (Basahon an Isaias 43:​10-12.) Pag-isipan an apat sana sa dakul na paagi na ginigibo niya iyan. Inot, kaibanan ta si Jesus sa kada pagkakataon na naghuhulit kita kan maugmang bareta. (Mat. 28:​18-20) Ikaduwa, nagsusugo si Jehova nin mga anghel para tabangan kita. (Kap. 14:6) Ikatulo, tinatawan kita ni Jehova kan saiyang banal na espiritu bilang paratabang para ipagirumdom sa sato an mga bagay na nanudan ta. (Juan 14:​25, 26) Ikaapat, tinawan kita ni Jehova nin mga tugang para makaibanan ta. Sa tabang ni Jehova asin sa suporta kan satong mamumuton na mga tugang, igwa kita kan gabos na kaipuhan ta para magin mapanggana.

MAGIN FLEXIBLE ASIN MAGKAIGWA NIN TAMANG PAGMANSAY

11. Sa ministeryo, paano ka makakanumpong nin mas dakul na tawo? (Hilingon man an ritrato.)

¹¹ Nadidisganar ka daw pag dikit an nakakaulay mo pag naghaharong-harong? Haputon an sadiri: ‘Hain daw ngunyan an mga tawo sa teritoryo mi?’ (Gibo 16:13) ‘Nasa trabaho daw sinda o namamakal?’ Kun arog kaiyan an sitwasyon, mas dakul daw na tawo an makakaulay mo kun magpapatotoo ka sa tinampo? Sinabi kan brother na si Joshua, “Nagkakaigwa ako nin pagkakataon na maghulit mantang naglalakaw sa mga lugar na dakul nin namamakal asin sa iba pang pampublikong lugar na dakul nin tawo.” Dakul sindang nakakaulay kan agom niyang si Bridget pag naghaharong-harong sinda pag pabanggi na saka pag Domingong hapon.​—Efe. 5:​15, 16.

12. Paano ta maaaraman kun ano an tinutubod o ikinakahadit kan mga tawo?

¹² Kun bakong gayong interesado an mga tawo, hinguwahon na aramon kun ano an tinutubod ninda o mga ikinakahadit. Ginagamit ni Joshua asin Bridget an hapot sa atubangan kan sarong tract bilang introduksiyon. Halimbawa, gamit an tract na Ano an Opinyon Mo sa Bibliya? sinasabi ninda: “May mga tawong nagtutubod na an Bibliya sarong libro hali sa Diyos, pero an iba dai sigurado. Ano an opinyon mo?” Sa parati, nakakapuon ini nin pag-uulay.

13. Taano ta masasabi ta na mapanggana an satong ministeryo dawa pa mayong magdangog sa sato? (Talinhaga 27:11)

¹³ An satong kapangganahan sa ministeryo dai nakadepende sa reaksiyon kan mga tawo, magdangog man sinda o dai. Taano? Huling ginibo ta kun ano an ipinapagibo sa sato ni Jehova saka kan saiyang Aki—nakapagpatotoo kita. (Gibo 10:42) Dawa pag mayo kitang nakaulay o sinayumahan an satong mensahe, puwede kitang magin maugma ta aram tang napapaugma ta an satong Ama sa langit.​—Basahon an Talinhaga 27:11.

14. Taano ta dapat tang ikaugma pag may parahayag na nakanumpong nin interesado sa teritoryo?

¹⁴ Puwede ta man na ikaugma pag may sarong parahayag na nakanumpong nin interesado sa teritoryo. Iinagid kan An Torrengbantayan an satong gibuhon sa paghanap nin sarong nawawarang aki. Dakul an nagtarabang sa paghanap sa lambang lugar na posibleng dinumanan kan aki. Kan manumpungan an aki, nag-urugma an gabos bako lang su saro na nakahanap sa aki. Kaagid kaiyan, an paggibo nin disipulo pagtitinarabangan kan bilog na kongregasyon. Kaipuhan an gabos para mahulitan an bilog na teritoryo, asin nag-uugma an gabos pag may sarong baguhan na nagpuon nang mag-atender sa mga pagtiripon.

MAGPOKUS SA SAIMONG PAGKAMUOT KI JEHOVA SAKA SA SAIMONG KAPWA

15. Paano an pag-aplikar sa Mateo 22:​37-39 makakatabang sa sato na mas magin ganado sa ministeryo? (Hilingon man an ritrato.)

¹⁵ Puwede kitang magin mas ganado sa paghuhulit paagi sa pagpokus kan satong pagkamuot ki Jehova saka sa satong kapwa. (Basahon an Mateo 22:​37-39.) Imahinara na sana kun gurano kaugma si Jehova pag nahihiling niya kitang naghuhulit asin kun gurano kaugma an mga tawo pag nagpuon na sindang mag-adal nin Bibliya! Isipon man an buhay na daing katapusan na naghahalat sa mga mahimati sa satong mensahe.​—Juan 6:40; 1 Tim. 4:16.

16. Paano ta ikakaugma an ministeryo pag dai na kita nakakahali sa harong? Magtao nin mga halimbawa.

¹⁶ Dai ka na daw makahali sa saindong harong huli sa ano man na dahilan? Kun iyo, magpokus sa kun ano an magigibo mo para ipahiling an pagkamuot ki Jehova asin sa saimong kapwa. Kan COVID-19 na pandemya, dai basta-basta makaluwas sa saindang harong si Samuel asin Dania. Sa masakit na mga panahon na iyan, regular sindang nagpapatotoo paagi sa telepono, sa surat, asin nagkokondukta nin mga pag-adal sa Bibliya paagi sa Zoom. Nagpapatotoo si Samuel sa mga nakakabisto niya sa klinika na pigpapabulungan niya kan saiyang kanser. Sinabi niya: “An mga kasakitan nakakapaluya kan satong mental, pisikal, asin espirituwal na kusog. Kaipuhan tang humanap nin paagi para ikaugma an satong paglilingkod ki Jehova.” Nakadagdag pa sa saindang kasakitan an pagkatumba ni Dania asin tulong bulan siyang yaon lang pirmi sa higdaan. Dangan kinaipuhan na niyang mag-wheelchair sa laog nin anom na bulan. Sinabi niya: “Hininguwa kong gibuhon an ano man na makakaya ko sa itinutugot kan sitwasyon ko. Nakakapaghulit ako sa nars na nagbibisita sako asin nakakaulay ko su mga nagde-deliver sa harong mi. Nagkaigwa man ako nin magayon na pakikipag-ulay sa telepono sa sarong babayi na nagtatrabaho sa sarong kompanya na nagpapabakal nin mga medical equipment.” Nagin limitado an nagigibo ni Samuel asin Dania huli sa saindang kamugtakan, pero ginibo ninda an magigibo ninda asin nakamati sinda nin kaugmahan huli kaiyan.

17. Paano ka lubos na makikinabang sa mga suhestiyon sa artikulong ini?

¹⁷ An itinaong mga suhestiyon sa artikulong ini mas epektibo kun iaaplikar gabos. An kada suhestiyon garo sarong inggrediyente na ginagamit sa sarong resipe. Pag pigsaralak an gabos na inggrediyente, masiramon an kaluluwasan kaiyan. Paagi sa pag-aplikar kan gabos na suhestiyon, malalabanan ta an negatibong mga pagmati asin mas ikakaugma ta an ministeryo.