Mapakumbabang Akuon na May mga Bagay na Dai Mo Aram

1. Anong kakayahan an itinao sa sato ni Jehova, asin taano?

LINALANG kita ni Jehova na igwa kan kakayahan na mag-isip, magkua nin kaaraman, magkaigwa nin pakasabot, asin magpahiling nin kadunungan. Taano ta arog kaiyan an pagkalalang niya sa sato? Gusto niyang ‘manumpungan ta an kaaraman manungod sa Diyos’ asin paglingkudan siya gamit an satong kakayahan sa pangangatanusan.—Tal. 2:1-5; Roma 12:1.

2. (a) Anong mga limitasyon an igwa kita? (Job 37:23, 24) (Hilingon man an ritrato.) (b) Paano kita nakikinabang pag mapakumbaba niyatong inaako an satong mga limitasyon?

² Dawa ngani igwa kita kan kakayahan na makanuod, may mga limitasyon sa kun ano an mga naaaraman ta. (Basahon an Job 37:23, 24.) Pag-isipan an halimbawa ni Job. Dahil sa sunod-sunod na hapot sa saiya, nahayag kun gurano nanggad kadakul kan dai niya aram. An eksperyensiyang iyan nakaparealisar sa saiya na kaipuhan niyang magin mapakumbaba asin nakatabang iyan na maitanos an saiyang kaisipan. (Job 42:3-6) Nakikinabang man kita pag mapakumbaba niyatong inaako na dai ta aram an gabos. An siring na kapakumbabaan nakakatabang sa sato na magtiwala na ihahayag ni Jehova sa sato kun ano talaga an kaipuhan tang maaraman tanganing makagibo kita nin madunong na mga desisyon.—Tal. 2:6.

3. Ano an pag-uulayan ta sa artikulong ini?

³ Sa artikulong ini, pag-uulayan ta an nagkapirang bagay na dai ta aram asin an mga kadipisilan na tibaad mapaatubang sa sato huli kaiyan. Sisiyasaton ta man kun taano ta marahay na may partikular na mga bagay na dai niyato aram. An pagtukar sa mga puntong ini makakapakusog kan satong pagtitiwala na si Jehova, an “Saro na perpekto sa kaaraman,” sinasabi sa sato kun ano talaga an kaipuhan tang maaraman.—Job 37:16.

DAI TA ARAM KUN NUARIN MAABOT AN KATAPUSAN

4. Uyon sa Mateo 24:36, ano an sarong bagay na dai ta aram?

⁴ Basahon an Mateo 24:36. Dai ta aram kun nuarin maabot an katapusan kan sistemang ini nin mga bagay. Dawa si Jesus, kan yaon siya digdi sa daga, dai niya aram an “aldaw asin oras.”a Kan huri, sinabi niya sa mga apostol na si Jehova, an Dakulang Paratalaan nin Panahon, iyo an nagdedesisyon kun nuarin mangyayari an partikular na mga pangyayari, asin siya “sana an may awtoridad,” o hurisdiksiyon, sa bagay na iyan. (Gibo 1:6, 7) Itinalaan ni Jehova kun nuarin matatapos an sistemang ini, pero mayo kita sa posisyon na aramon kun nuarin iyan eksaktong mangyayari.

5. Huling dai ta aram kun nuarin maabot an katapusan, ano an tibaad magin epekto kaiyan sa sato?

⁵ Kauyon kan sinabi ni Jesus, dai ta aram kun gurano kita kalawig na maghahalat sagkod na mag-abot an katapusan. Huli kaiyan, tibaad mawaran kita nin pasensiya o madisganar, lalo na kun haloy-haloy na kitang naghahalat kan aldaw ni Jehova. O tibaad masakitan kitang tagalan an mga pagtuya sa sato kan mga kapamilya niyato o kan iba. (2 Ped. 3:3, 4) Posibleng maisip niyato na magigin mas mapasensiya kita asin mas pasil sa sato na tagalan an mga pagtuya kun aram ta an eksaktong aldaw kan pag-abot kan katapusan.

6. Taano ta marahay na dai ta aram kun nuarin maabot an katapusan?

⁶ An totoo, paagi sa dai paghayag kan petsa kan pag-abot kan katapusan, tinatawan kita ni Jehova kan oportunidad na ipahiling na naglilingkod kita sa saiya huling namumutan ta siya asin nagtitiwala kita sa saiya. Dai kita naglilingkod ki Jehova na may isinasaisip na deadline, na garo baga may expiration date an pagtubod ta sa saiya. Imbes na magparapokus sa kun nuarin maabot an “aldaw ni Jehova,” mas marahay na magpokus kita sa mga maisasagibo pag nag-abot na iyan. Kun gigibuhon ta iyan, padagos tang mapapakusog an debosyon ta sa Diyos asin gigibuhon an gabos niyatong makakaya na mapaugma siya.—2 Ped. 3:11, 12.

7. Ano an aram ta?

⁷ Marahay na magpokus kita sa aram niyato—na an huring mga aldaw nagpuon kan 1914. Nagtao si Jehova nin mga propesiya sa Bibliya na dai lang eksaktong nagtutukdo sa taon na iyan kundi nagtatao man nin detalyadong paglaladawan manungod sa mga nagin kamugtakan sa kinaban puon kaidto. Huli kaiyan, kumbinsido kita na “harani na an dakulang aldaw ni Jehova!” (Sof. 1:14) Aram ta man an gibuhón na gusto ni Jehova na gibuhon ta: Sabihon sa pinakadakul na tawong posible an manungod sa ‘maugmang bareta kan Kahadian.’ (Mat. 24:14) An mensaheng ini ihinahayag sa mga 240 kadagaan asin sa labing 1,000 lengguwahe. Dai ta kaipuhan na maaraman an “aldaw asin oras” tanganing makikabtang kita nin may kaigutan sa mahalagang gibuhon na ini.

DAI TA ARAM KUN SA ANONG PAAGI TIBAAD HUMIRO SI JEHOVA

8. Sa ano nanunungod “an gibo kan tunay na Diyos”? (Eclesiastes 11:5)

⁸ Dai ta pirming aram “an gibo kan tunay na Diyos.” (Basahon an Eclesiastes 11:5.) An ekspresyon na iyan nanunungod sa mga bagay na pinapangyari o itinutugot ni Jehova na mangyari tanganing mautob an saiyang kabutan. Dai ta kayang lubos na maaraman kun taano ta tibaad itugot ni Jehova na mangyari an sarong bagay o kun paano siya mahiro alang-alang sa sato. (Sal. 37:5) An siring na kaaraman dai ta nanggad lubos na masasabutan arog kan pagdakula nin sarong dai pa namumundag na umboy sa matris kan ina, sarong bagay na maski an mga siyentista dai pa man giraray lubos na nasasabutan.

9. Dahil dai ta aram kun paano si Jehova mahiro, anong mga kadipisilan an puwedeng mapaatubang sa sato?

⁹ Dahil dai ta aram kun paano si Jehova mahiro alang-alang sa sato, tibaad mag-alangan kitang gibuhon an nagkapirang desisyon. Tibaad mag-alangan kitang gumibo nin mga pagsasakripisyo tanganing mapahiwas an satong ministeryo, arog kan pagpasimple kan satong buhay o pagbalyo kun sain mas dakula an pangangaipo para sa mga parahayag kan Kahadian. O tibaad magduda kita kun baga inuuyunan kita nin Diyos pag dai ta naaabot an satong teokratikong mga pasuhan, o pag mayo kitang nahihiling na marahayon na mga resulta sa ibong kan mga pagmamaigot ta sa ministeryo, o pag napapaatubang kita sa mga ulang sa sarong teokratikong proyekto.

10. Dahil dai ta aram kun paano si Jehova mahiro, natatabangan kita kaiyan na mapauswag an anong mahalagang marhay na mga kuwalidad?

¹⁰ Dahil dai ta aram kun paano si Jehova mahiro, natatabangan pa ngani kita kaiyan na mapauswag an mahalagang marhay na mga kuwalidad arog kan kapakumbabaan asin kababaan nin buot. Nanunudan tang akuon na an kaisipan ni Jehova asin an mga pamamaagi niya mas halangkaw kisa kan sa sato. (Isa. 55:8, 9) Nanunudan ta man na mas lubos na magtiwala ki Jehova asin magsarig sa saiya para magin mapanggana. Pag nagkaigwa nin marahay na mga resulta sa satong ministeryo o sa sarong teokratikong proyekto, tama sanang itao ta ki Jehova an pag-umaw. (Sal. 127:1; 1 Cor. 3:7) Kun an mga bagay-bagay dai nangyayari sigun sa inaasahan ta, kaipuhan tang tandaan na lubos pa man giraray iyan na kontrolado ni Jehova. (Isa. 26:12) Ginigibo ta an satong kabtang, asin padagos kitang nagtitiwala na gigibuhon ni Jehova an saiyang kabtang. May kumpiyansa kita na tatawan niya kita kan paggiyang kaipuhan ta, dawa kun bako sa milagrosong paagi arog kan ginigibo niya kaidto kun minsan.—Gibo 16:6-10.

11. Anong katotoohan na aram niyato an makakatabang sa sato?

¹¹ Hurop-hurupon an katotoohan na aram niyatong si Jehova pirming mamumuton, makatanusan, asin madunong. Aram niyato na pinapahalagahan niyang marhay an mga ginigibo ta para sa saiya asin para sa satong mga kapwa parasamba. Saka aram niyato na pirming binabalusan ni Jehova an mga maimbod sa saiya.—Heb. 11:6.

DAI TA ARAM KUN ANO AN MANGYAYARI SA AGA

12. Uyon sa Santiago 4:13, 14, ano an dai ta aram?

¹² Basahon an Santiago 4:13, 14. Dai ta aram kun ano an magigin buhay ta sa aga—sarong pundamental na katotoohan iyan. Sa sistemang ini nin mga bagay, apektado kita kan “panahon asin [kan] dai linalauman na mga pangyayari.” (Ecl. 9:11) Huli kaiyan, dai ta aram kun baga magigin mapanggana an satong mga plano o kun baga buhay pa ngani kita sagkod na maisagibo an mga plano niyato.

13. Paano puwedeng makaapektar sa sato an mga bagay sa buhay na mayong kasiguruhan?

¹³ Puwedeng magin dipisil na tagalan an mga bagay sa buhay na mayong kasiguruhan. Sa anong paagi? Tibaad mahadit kita manungod sa mga posibleng mangyari, asin puwede iyan na makawara kan satong kaugmahan. Pag biglang nagkaigwa nin mga trahedya o nin dai linalauman na mga pangyayari, puwede iyan na makapamundo asin makapurisaw na marhay sa sato. Asin pag dai nangyayari an mga inaasahan ta, puwede iyan na makapadisganar sa sato o magin dahilan na pangluyahan kita nin buot.—Tal. 13:12.

14. Sa ano nakadepende an pagkaigwa niyato nin nagdadanay na kaugmahan? (Hilingon man an mga ritrato.)

¹⁴ Pag tinatagalan ta an mga kadipisilan, napapatunayan niyato na ano man an mangyari, naglilingkod kita sa satong Ama sa langit huli sa pagkamuot, bako huli sa makasadiring pakinabang. Ipinapahiling kan mga salaysay sa Bibliya na dai ta dapat asahan na poprotektaran kita ni Jehova sa gabos na kadipisilan. Ipinapahiling man kaiyan na dai niya patiinot na itinatalaga an mga mangyayari sa satong buhay. Aram niya na an satong kaugmahan dai nakadepende sa kun baga aram niyato o dai an mga mangyayari sa sato sa maabot. Imbes, nakadepende iyan sa paghagad niyato sa saiya nin paggiya asin pagkuyog sa saiya. (Jer. 10:23) Paagi sa pagsarig ki Jehova pag naggigibo kita nin mga desisyon, garo ta man sana sinasabi: “Kun bubuuton ni Jehova, mabubuhay kami asin gigibuhon mi ini o iyan.”—Sant. 4:15.

15. Ano an aram ta manungod sa maabot?

¹⁵ Dawa ngani dai ta aram kun ano an mangyayari sa sato sa kada aldaw, aram niyato na nanuga sa sato si Jehova nin buhay na daing katapusan—iyan man sa langit o digdi sa daga. Aram tang dai siya makakapagputik asin na mayo nin ano man na makakaulang sa saiya sa pag-utob kan gabos niyang panuga. (Tito 1:2) Siya sana an ‘patiinot na makakapagsabi kan mangyayari, asin puon kan suanoy na panahon patiinot niya nang sinasabi an mga bagay na dai pa nagigibo.’ Nagin totoo iyan sa mga pangyayari kaidto, asin magigin totoo man iyan sa maabot na mga pangyayari. (Isa. 46:10) Sigurado nanggad kita na mayo nin ano man na makakapugol sa pagkamuot ni Jehova sa sato. (Roma 8:35-39) Tatawan niya kita kan kadunungan, karangahan, asin kusog na kaipuhan ta tanganing matagalan an ano man na mapaatubang sa sato. Makakasigurado kita na tatabangan asin bebendisyunan kita ni Jehova.—Jer. 17:7, 8.

DAI TA LUBOS NA MASASABUTAN KUN GURANO KITA KAMIDBID NI JEHOVA

16. Arog kan ihinahayag sa Salmo 139:1-6, anong kaaraman an igwa si Jehova na dai ta lubos na masasabutan?

¹⁶ Basahon an Salmo 139:1-6. Aram kan satong Kaglalang kun paano kita ginibo asin kun ano an nagmolde sa satong pagkatawo—sa pisikal, emosyonal, asin mental. Pirmi siyang interesado sa sato. Aram niya kun ano an mga sinasabi ta asin kun ano talaga an nasa buot ta, kun ano an mga ginigibo ta asin kun taano ta ginigibo ta iyan. Kauyon kan sinabi ni Hading David, pinapalibutan kita ni Jehova kan Saiyang mamumuton na pag-ataman asin nungka nanggad kitang magigin harayuon para maabot kan Saiyang kamot. Nakakaugma nanggad maaraman na an Soberanong Kagurangnan kan uniberso, an makakamhan na Kaglalang kan langit asin daga, nagpapahiling nin siring na interes sa sato! Sinabi ni David: “An siring na kaaraman makangangalas na marhay para sa sako. Halangkaw na marhay iyan para maabot ko.”—Sal. 139:6, nota sa ibaba.

17. Taano ta tibaad madipisilan kitang akuon na midbid kitang marhay ni Jehova?

¹⁷ Dahil sa dinakulaan tang pamilya, kultura, o dating mga paniniwala, tibaad madipisilan kitang ibilang si Jehova na sarong mamumuton na Ama na interesado sa sato. O tibaad mamatian niyato na grabe karaot kan mga nagibo tang sala kaidto kaya nungkang gugustuhon ni Jehova na mamidbid niya kita asin na harayuon siya sa sato. Maski si David may mga pagkakataon na nakamati man nin arog kaiyan. (Sal. 38:18, 21) O sarong tawo na sinserong naghihinguwang baguhon an saiyang pamumuhay asin iuyon iyan sa matanos na mga pamantayan nin Diyos an tibaad mag-isip, ‘Kun talagang midbid ako nin Diyos, taano ta gusto niyang magbago ako imbes na akuon na sana kun ano ako?’

18. Paano kita nakikinabang kun aakuon tang mas midbid kita ni Jehova kisa sa pakamidbid ta sa satong sadiri? (Hilingon man an mga ritrato.)

¹⁸ Manunudan tang akuon na mas midbid kita ni Jehova kisa sa pakamidbid ta sa satong sadiri asin na kaya niyang mahiling an marahay sa sato na dai ta mahiling sa sadiri ta. Dawa nahihiling niya an mga kaluyahan ta asin nasasabutan kun taano ta namamatian ta an sarong partikular na emosyon o kun taano ta minagawi kita sa sarong partikular na paagi, namumutan niya kita. (Roma 7:15) Pag malinaw na niyatong nasasabutan na hinihiling ni Jehova an satong potensiyal, urog kitang magkakaigwa kan kinakaipuhan tang kumpiyansa tanganing maimbod kitang makapaglingkod sa saiya asin gibuhon iyan nin may kaugmahan.

19. Ano an aram niyato manungod ki Jehova na siguradong-sigurado kita?

¹⁹ Aram niyato na si Jehova pagkamuot. Mayong kuwestiyon diyan. (1 Juan 4:8) Aram niyato na ipinapabanaag kan saiyang matanos na mga pamantayan an saiyang pagkamuot sa sato asin na pirming an pinakaikakarahay ta an gusto niya para sa sato. Aram niyato na buot ni Jehova na magkamit kita nin buhay na daing katapusan. Itinao niya an pantubos tanganing magin posible iyan. An regalong pantubos asigurasyon sa sato na puwede kitang magin mapanggana sa ibong kan satong mga kaluyahan. (Roma 7:24, 25) Asin aram niyato na “an Diyos mas urog kisa sa satuyang puso asin nakakaaram kan gabos na bagay.” (1 Juan 3:19, 20) Nahihiling ni Jehova an gabos manungod sa sato, asin tiwala siya na kaya tang magibo an saiyang kabutan.

20. Ano an makakatabang sa sato na malikayan an dai kinakaipuhan na paghadit?

²⁰ Dai ipinapanguri sa sato ni Jehova an ano man na impormasyon na kaipuhan talaga niyatong maaraman. Kun mapakumbaba tang aakuon an katotoohan na iyan, malilikayan ta an dai kinakaipuhan na paghadit manungod sa mga bagay na mayo kitang kontrol asin makakapagpokus kita sa kun ano talaga an mahalaga. Paagi sa paggibo kaiyan, ipinapahiling tang lubos kitang nagtitiwala ki Jehova, “an Saro na perpekto sa kaaraman.” (Job 36:4) Dawa ngani limitado sa ngunyan an pakasabot ta sa nagkapirang bagay, hinahalat-halat tang umabot an panahon na daing sagkod kitang tutukduan kan satong Pinakanangungurog na Diyos nin bagong mga bagay manungod sa saiya.—Ecl. 3:11.