Mga Manunudan sa Propesiya ni Jacob kan Siya Magagadan Na—Kabtang 2

1. Ano an pag-uulayan ta sa artikulong ini?

NAGKAKATIRIPON sa palibot ni Jacob an saiyang mga aking lalaki, asin nagdadangog sindang marhay mantang an kada saro sa sainda tinatawan nin bendisyon kan saindang may edad nang ama. Arog kan pinag-ulayan sa sinundan na artikulo, an mga sinabi ni Jacob ki Ruben, Simeon, Levi, asin Juda nakapaisip na marhay sa mga aki niya, asin tibaad ikinabigla pa ngani ninda. Kaya siguradong gusto na nindang maaraman kun ano an sasabihon ni Jacob sa walo niya pang aking lalaki. Aramon niyato kun ano an mga manunudan ta sa sinabi niya ki Zebulon, Isacar, Dan, Gad, Aser, Neftali, Jose, asin Benjamin.a

ZEBULON

2. Anong bendisyon an itinao ki Zebulon asin paano iyan nautob? (Genesis 49:13) (Hilingon man an kahon.)

² Basahon an Genesis 49:13. Ipinarisa ni Jacob na an mga gikan ni Zebulon maistar sa may baybayon, sa norteng parte kan Dagang Panuga. Pakalihis nin labing 200 na taon, an minanang teritoryo kan mga Zebulonita, dawa ngani dai man direktang minasagkod sa dagat, harani man giraray sa mga dagat—sa pag-ultanan kan Dagat nin Galilea asin kan Mediteraneo. Iprinopesiya ni Moises: “O Zebulon, sa saimong pagluwas mag-ugma ka.” (Deu. 33:18) Posibleng huli iyan ta magigin pasil kaya sa tribo ni Zebulon na magsagibo nin mga transaksiyon sa komersiyo dahil yaon sinda sa pag-ultanan kan duwang dagat na iyan. Ano man an kamugtakan, may dahilan an mga Zebulonita para mag-ugma.

3. Ano an makakatabang sa sato na magin kontento?

³ Ano an manunudan ta? May dahilan kita na mag-ugma, sain man kita nakaistar o ano man an satong kamugtakan. Tanganing magdanay na maugma, dapat na magin kontento kita sa kun ano an igwa kita. (Sal. 16:6; 24:5) Kun minsan, mas madaling magpokus sa kun ano an mayo kita imbes na sa marahay na mga bagay na igwa kita na ikinakaugma ta. Kaya hinguwahon na maghiling sa positibong mga bagay sa saimong kamugtakan.—Gal. 6:4.

ISACAR

4. Anong bendisyon an itinao ki Isacar asin paano iyan nautob? (Genesis 49:14, 15) (Hilingon man an kahon.)

⁴ Basahon an Genesis 49:14, 15. Kinomendaran ni Jacob si Isacar sa kahigusan niya paagi sa pagkumparar sa saiya sa asnong masarig an mga tulang—sarong hayop na kayang magpasan nin magagabat na pasanon. Sinabi man ni Jacob na an dagang itatao ki Isacar marahay asin nakakaugma. Kauyon kan mga tataramon ni Jacob, an minanang daga kan mga gikan ni Isacar produktibo saka mataba, asin yaon iyan sa may Salog nin Jordan. (Jos. 19:22) Daing duda na mahigos nindang pigkultibar an saindang daga, pero nagmaigot man sinda para sa kapakinabangan kan iba. (1 Ha. 4:7, 17) Halimbawa, andam an tribo ni Isacar na tumabang sa mga pakikipaglaban kan nasyon, arog kaidto kan panahon ni Hukom Barak asin ni propetisa Debora.—Huk. 5:15.

5. Taano ta dapat tang hinguwahon na magin maigot?

⁵ Ano an manunudan ta? Pinapahalagahan ni Jehova an satong maigot na paglilingkod sa saiya arog kan pagpapahalaga niya kaidto sa kahigusan kan tribo ni Isacar. (Ecl. 2:24) Bilang halimbawa, pag-isipan an mga brother na nagmamaigot sa pangangataman sa kongregasyon. (1 Tim. 3:1) An mga brother na ini dai man kaipuhan na literal na makipaglaban, alagad dapat sindang magmaigot tanganing protektaran an banwaan nin Diyos sa mga peligro sa saindang espirituwalidad. (1 Cor. 5:1, 5; Jud. 17-23) Nagmamaigot man sindang mag-andam asin magtao nin mga pahayag na makakapakusog sa kongregasyon.—1 Tim. 5:17.

DAN

6. Anong asignasyon an itinao sa tribo ni Dan? (Genesis 49:17, 18) (Hilingon man an kahon.)

⁶ Basahon an Genesis 49:17, 18. Ikinumparar ni Jacob si Dan sa sarong halas na nang-aatake sa mas dakulang marhay na mga kalaban, arog kan kabayong panggiyera asin parakabayo. An tribo ni Dan makusog an buot asin andam na umatake sa mga kaiwal kan Israel. Durante kan pagbaklay ninda pasiring sa Dagang Panuga, prinotektaran kan tribo ni Dan an nasyon paagi sa ‘pagserbi nindang depensa sa likudan.’ (Bil. 10:25) Mahalagang asignasyon iyan, dawa ngani dai nahiling kan gabos na iba pang mga tawo sa nasyon kun paano iyan isinagibo kan tribo ni Dan.

7. Ano an dapat niyatong tandaan manungod sa ano man na teokratikong asignasyon na igwa kita?

⁷ Ano an manunudan ta? Natawan ka na daw nin sarong asignasyon na garo baga dai naririsa kan iba? Tibaad nagtatabang ka sa paglinig saka pagmentenar kan Kingdom Hall, nagboboluntaryo sa asembleya o kumbensiyon, o kaya nag-aasikaso nin iba pang gibuhon. Kun iyo, angay ka nanggad na komendaran! Pirming tandaan na naririsa asin pinapahalagahan ni Jehova an gabos na ginigibo mo para sa saiya. Naaapresyar niyang marhay pag naglilingkod ka sa saiya bakong huli ta mawot mong umawon ka kan iba kundi dahil gusto mong ipahiling an saimong udok na pagkamuot sa saiya.—Mat. 6:1-4.

GAD

8. Taano ta madali sanang atakihon nin mga kaiwal an tribo ni Gad sa Dagang Panuga? (Genesis 49:19) (Hilingon man an kahon.)

⁸ Basahon an Genesis 49:19. Ihinula ni Jacob na igwa nin sarong grupo nin mga parasamsam na masalakay ki Gad. Pakalihis nin labing duwang siglo, nag-istar an tribo ni Gad sa sarong kadagaan sa sirangan kan Salog nin Jordan, asin mga kaiwal na nasyon an kataraid kan kadagaan na iyan. Huli sa lokasyon kan tribo ni Gad, madali sana sindang atakihon kan saindang mga kaiwal. Alagad, gusto kan mga Gadita na mag-istar diyan huling dakul diyan nin magagayon na pasabsaban para sa saindang mga ataman na hayop. (Bil. 32:1, 5) Minalataw na an mga Gadita makukusog an buot. Urog pa diyan, tiwala sinda na tatabangan sinda ni Jehova na protektaran an itinao niya sa saindang daga laban sa ano man na grupo nin mga parasamsam. Sa laog nin dakul na taon, nagsugo pa ngani sinda nin mga parapakilaban tanganing tabangan an iba pang mga tribo na masakop an natatada pang mga parte kan Dagang Panuga sa may sulnupan kan Jordan. (Bil. 32:16-19) Tiwala sinda na poprotektaran ni Jehova an saindang mga agom asin mga aki mantang harayo an mga parapakilaban. Binendisyunan sinda ni Jehova huli sa saindang kusog nin buot asin pagigin mapagsakripisyo.—Jos. 22:1-4.

9. Paano ta maipapahiling sa mga desisyon ta sa buhay na nagtitiwala kita ki Jehova?

⁹ Ano an manunudan ta? Tanganing makapaglingkod ki Jehova dawa napapaatubang sa mga kadipisilan, dapat na padagos kitang magtiwala sa saiya. (Sal. 37:3) Ipinapahiling kan dakul ngunyan na nagtitiwala sinda ki Jehova paagi sa pagsasakripisyo tanganing makasuportar sa mga proyekto sa pagtugdok kan organisasyon, makapaglingkod bilang need-greater, o makatabang sa organisasyon sa iba pang mga paagi. Ginigibo ninda iyan huling may kumpiyansa sinda na pirmi sindang aatamanon ni Jehova.—Sal. 23:1.

ASER

10. Ano an dai ginibo kan tribo ni Aser? (Genesis 49:20) (Hilingon man an kahon.)

¹⁰ Basahon an Genesis 49:20. Ihinula ni Jacob na magigin mayaman an tribo ni Aser, asin iyan mismo an nangyari. Kaiba sa teritoryong itinao sa tribo ni Aser an nagkapira sa pinakamatatabang kadagaan sa bilog na Israel. (Deu. 33:24) Kataid kan teritoryo ninda an Dagat Mediteraneo asin kaiba man diyan an mayaman na duungan na siyudad nin Sidon sa Fenicia. Alagad, dai pinalayas kan tribo ni Aser an mga Canaanita na nakaistar sa kadagaan. (Huk. 1:31, 32) Posibleng huli sa maraot na impluwensiya kan mga Canaanita asin huli sa prosperidad kan tribo ni Aser kaya dai na sinda gayong nagin maigot sa dalisay na pagsamba. Dai nag-alok nin tabang an tribo ni Aser kan naghahanap nin mga boluntaryo si Hukom Barak para labanan an sarong koalisyon nin mga Canaanita. Bilang resulta, napalampas kan tribo ni Aser an oportunidad na makikabtang sa milagrosong kapangganahan “harani sa katubigan kan Megido.” (Huk. 5:19-21) Siguradong napasupog an tribo ni Aser kan madangog ninda an ipinasabong na kanta nin kapangganahan ni Barak asin Debora, na diyan kaiba an liriko na: “An Aser nagparaturukaw-tukaw sana sa may baybayon.”—Huk. 5:17.

11. Taano ta kaipuhan niyatong pagdanayon na balanse an satong pagmansay sa materyal na mga bagay?

¹¹ Ano an manunudan ta? Gusto niyatong itao ki Jehova an pinakamakakaya ta. Tanganing magibo iyan, kaipuhan tang isikwal an pagmansay kan kinaban manungod sa materyal na mga bagay asin sa kaginhawahan na itinatao kaiyan. (Tal. 18:11) Hinihinguwa tang pagdanayon na balanse an pagmansay ta sa kuwarta. (Ecl. 7:12; Heb. 13:5) Dai ta tinutugutan na makaulang sa paglilingkod niyato sa Diyos an pagparahinguwang magkaigwa kan materyal na mga bagay na dai ta man kaipuhan. Imbes, hinihinguwa ta ngunyan na gamiton sa pinakamarahay na paaging posible an satong panahon asin kusog para ki Jehova, huling aram niyato na sarong tunay na maginhawa asin tiwasay na buhay an naghahalat sa sato sa maabot na panahon.—Sal. 4:8.

NEFTALI

12. Paano posibleng nagkatotoo an bendisyon na itinao ki Neftali? (Genesis 49:21) (Hilingon man an kahon.)

¹² Basahon an Genesis 49:21. An “magagayon na mga tataramon” na sinambit ni Jacob posibleng marhay na nanunungod sa paagi nin pagtaram ni Jesus durante kan saiyang ministeryo. Si Jesus, na midbid sa saiyang epektibong pagtutukdo, ginibong “sadiri niyang siyudad” an Capernaum na yaon sa teritoryo kan Neftali. (Mat. 4:13; 9:1; Juan 7:46) Manungod ki Jesus, iprinopesiya ni Isaias na an tribo ni Zebulon asin ni Neftali makakahiling “nin dakulang liwanag.” (Isa. 9:1, 2) Si Jesus “an tunay na ilaw na nagtatao nin liwanag sa gabos na klase nin tawo” paagi kan saiyang pagtutukdo.—Juan 1:9.

13. Paano ta masisiyerto na nakakapaugma ki Jehova an satong pananaram?

¹³ Ano an manunudan ta? Mahalaga ki Jehova an satong mga sinasabi asin kun paano ta iyan sinasabi. Paano kita makakataram nin “magagayon na mga tataramon” na nakakapaugma ki Jehova? Magigibo ta iyan paagi sa pagtaram nin totoo. (Sal. 15:1, 2) Mapapakusog ta an iba paagi kan satong mga sinasabi kun andam tulos niyato sindang tatawan nin komendasyon imbes na kritikaron tulos sinda o magreklamo sa sainda. (Efe. 4:29) Asin puwede tang gibuhon na pasuhan na magin mas mahusay sa pagpuon nin mga pakikipag-ulay na makakatabang na makapagpatotoo kita.

JOSE

14. Ipaliwanag kun paano nagkatotoo an bendisyon na itinao ki Jose. (Genesis 49:22, 26) (Hilingon man an kahon.)

¹⁴ Basahon an Genesis 49:22, 26. Siguradong ugmahon nanggad si Jacob ki Jose—“pinili [siya] sa saiyang mga tugang.” Inapod siya ni Jacob na “an supang nin sarong mabungang kahoy.” Si Jacob mismo an kahoy, asin si Jose an sarong supang niya. Si Jose an panganay kan namumutan na marhay na agom ni Jacob na si Raquel. Sinabi ni Jacob na ki Jose itatao an dobleng kahirasan na dai itinao ki Ruben—an panganay ni Jacob sa agom niyang si Lea. (Gen. 48:5, 6; 1 Cron. 5:1, 2) Bilang kautuban kan propesiyang iyan, an mga gikan kan mga aki ni Jose na si Efraim asin Manases tinawan nin kahirasan na daga bilang magkalain na tribo.—Gen. 49:25; Jos. 14:4.

15. Ano an nagin reaksiyon ni Jose sa mga inhustisyang napaatubang saiya?

¹⁵ May sinambit man si Jacob na mga parapanang “pinapana [si Jose] asin padagos [na] naaanggot sa saiya.” (Gen. 49:23) An mga ini iyo an mga tugang niyang nauri sa saiya kaidto, na nagin dahilan kan dakul sa mga inhustisyang naeksperyensiyahan niya. Pero, dai naghinanakit si Jose sa saiyang mga tugang o ki Jehova. Arog kan sinabi ni Jacob: “An [pana ni Jose] pirming nasa kinamumugtakan kaiyan, asin an saiyang mga kamot nagdanay na makusog saka maliksi.” (Gen. 49:24) Nagsarig si Jose ki Jehova mantang nag-aagi nin mga pagbalo, asin dai niya lang pinatawad an saiyang mga tugang kundi mabuot niya man sindang trinatar. (Gen. 47:11, 12) Tinugutan ni Jose na dalisayon siya kan mga pagbalong napaatubang sa saiya. (Sal. 105:17-19) Bilang resulta, ginamit siya ni Jehova sa pambihirang paagi.

16. Pag nag-aagi nin mga pagbalo, paano sato makakatabang an halimbawa ni Jose?

¹⁶ Ano an manunudan ta? Lugod na nungka niyatong tugutan an mga pagbalo na irayo kita ki Jehova o sa satong mga kapwa parasamba. Tandaan na puwedeng tugutan ni Jehova na mapaatubang kita sa mga pagbalo sa satong pagtubod bilang parte kan satong pagsasanay. (Heb. 12:7, nota sa ibaba) An pagsasanay na ini makakatabang sa sato na urog pa niyatong maipahiling an Kristiyanong mga kuwalidad, arog kan pagkahirak asin pagpapatawad. (Heb. 12:11) Babalusan kita ni Jehova huli sa satong pakatagal, arog kan ginibo niya ki Jose.

BENJAMIN

17. Paano nautob an propetikong bendisyon na itinao ki Benjamin? (Genesis 49:27) (Hilingon man an kahon.)

¹⁷ Basahon an Genesis 49:27. Ihinula ni Jacob na an mga Benjaminita magkakaigwa nin pambihirang kakayahan sa pakikipaglaban siring sa lobo. (Huk. 20:15, 16; 1 Cron. 12:2) Kaidtong “pagkaaga” kan kahadian nin Israel, si Saul na hali sa tribo ni Benjamin nagin an inot na hadi kan Israel. Nagin siyang makusog an buot na parapakilaban tumang sa mga Filisteo. (1 Sam. 9:15-17, 21) Kan “pagkabanggi” kan kasaysayan kan kahadian nin Israel, an duwang Benjaminitang si Reyna Esther asin Primer Ministro Mardokeo ilinigtas an mga Israelita sa biyong pagkapuho sa irarom kan pamamahala kan Imperyo nin Persia.—Est. 2:5-7; 8:3; 10:3.

18. Paano ta maaarog an kaimbudan kan mga Benjaminita sa mga areglo ni Jehova?

¹⁸ Ano an manunudan ta? Daing duda na naugmang marhay an mga Benjaminita na mahiling na an saro sa sainda nagin hadi bilang kautuban kan ihinulang bendisyon. Pero, kan an pagkahadi ilinipat ni Jehova ki David na hali sa tribo ni Juda, sinuportaran kan mga Benjaminita an pagbabagong iyan pag-abot nin panahon. (2 Sam. 3:17-19) Pakalihis nin mga dekada kan magrebelde an ibang mga tribo, nagdanay na maimbod an mga Benjaminita sa Juda asin sa hading ninombrahan ni Jehova. (1 Ha. 11:31, 32; 12:19, 21) Lugod na maimbod ta man na suportaran an mga pinipili ni Jehova na manginot sa saiyang mga lingkod ngunyan.—1 Tes. 5:12.

19. Paano kita makikinabang sa propesiya ni Jacob kan magagadan na siya?

¹⁹ Makikinabang kita sa propesiya ni Jacob kan siya magagadan na. An pagrepaso niyato sa kun paano iyan nautob nakakapakusog kan satong pagtitiwala na masasarigan an iba pang mga propesiya sa Tataramon ni Jehova. Asin an pag-isip-isip sa kun paano binendisyunan an mga aking lalaki ni Jacob nakakatabang sa sato na urog pang masabutan kun paano ta mapapaugma si Jehova.