Tabangan an Iba na Magin Eksperto sa Paggamit kan Tataramon nin Dios
1 Si Jehova guminibo nin dakol na probisyon sa pagtotokdo sato na magin epektibo sa satong personal na ministeryo. Bilang halimbawa, sa laog nin haros 50 taon an Teokratikong Paadalan sa Pagmiministro nagtao nin progresibong pagtotokdo sa pagtaram asin pagtotokdo. Ini tinabangan kan Pagtiripon sa Paglilingkod, na may mga praktikal na pahayag, demonstrasyon asin orolay.
2 Nakikinabang kita sa regular na mga pagsongko kan paraataman sa sirkito. An paraataman sa paglilingkod nagsosongko sa kada grupo sa pag-adal sa libro asin nagtatao nin mamomoton na tabang tanganing mapaoswag an satong mga abilidad sa ministeryo. Kada magtaragbuan kita sa pagluwas sa langtad nag-aako kita nin dies minutos na praktikal na pagtotokdo asin kapakipakinabang na mga suhestion para sa aldaw na iyan.—Heb. 10:23-25.
TABANGAN AN MGA HOBENES ASIN AN MGA INAADALAN SA BIBLIA
3 An hoben na mga parahayag asin bagohan nagkakaipo nin regular na tabang sa pampublikong ministeryo. An pangenot na paninimbagan digdi nasa abaga nin mga magurang asin kan mga nakikipag-adal sainda sa Biblia. (Gal. 6:6; Efe. 6:4) An pagigin epektibo dai automatikong minaabot kundi kaipuhan an sistematikong mamomoton na personal na tabang asin pagtotokdo.
4 An personal na tabang maninigong pumoon bago an tawo aktuwal na makikabtang sa ministeryo. Repasohon an Topikong Mapag-oolayan. Tabangan siang makabilog nin simpleng pag-aatubang, tibaad sa primero saro sanang teksto an ginagamit. Mantang nag-iiba tawan nin panahon an pagtao nin komendasyon asin maboot na mga suhestion para sa pag-oswag. Idoon an pangangaipo na papagdanayon an mapagngayongayong kaisipan sa gabos na panahon.—Efe. 6:18, 19.
5 Marahay kun an eksperyensiadong mga parahayag asin regular payunir makapag-iiskedyul kan saindang panahon tanganing sumuportar sa paglilingkod sa langtad kun Sabado asin Domingo tanganing matabangan an mga bagohan na ini paagi sa pag-iba sa sainda. An siring na personal na pagsasakripisyo ninda pasasalamatan na gayo kan mga boot na umoswag paagi sa pag-iba sa mga eksperyensiado.—Ecl. 4:9, 10.
6 May panahon na kita gabos bagohan asin daing kabatidan pero kita nag-ako nin pampakosog asin pagtotokdo hale sa mga mas eksperyensiado. (Tal. 27:17; Gibo 20:35) An pag-apresyar logod kaini magpahiro sato na tabangan an iba na magin mas eksperto sa paggamit kan Tataramon ni Jehova.