Magin Progresibong Ministro
1 Naoogma an satong langitnon na Ama kun an saiyang mga lingkod nag-ooswag sa espirituwal. Kaiba dian an pag-oswag bilang sarong maygurang asin epektibong ministro kan maogmang bareta. Dinagka ni Pablo an paraataman na si Timoteo na padagos ining magmaigot tanganing an saiyang pag-oswag mahayag. (1 Tim. 4:13-15) Maninigo na kita gabos maghingoang paoswagon an kualidad kan satong ministeryo, dawa kita na eksperyensiado nang mga parahayag.
2 Magkaigwa nin Personal na mga Pasohan: Kaipuhan na magkaigwa nin personal na mga pasohan tanganing umoswag. Ano an nagkapirang pasohan na puede niatong gibohon para sa satong sadiri? Puede niatong pagmaigotan na magin mas eksperto sa paggamit kan satong espirituwal na espada, an Biblia. (Efe. 6:17) Tibaad may aspekto kan ministeryo na dian kaipuhan niatong umoswag, arog baga nin paghuhulit sa tinampo, pagpapatotoo paagi sa telepono, o paghuhulit sa komersial na teritoryo. Tibaad puede kitang maghingoa na gumibo nin mas epektibong mga pagdalaw liwat. Tibaad an saro pang marahayon na pasohan iyo an pagpaoswag kan satong abilidad na makapoon asin makapagkondukta nin mga pag-adal sa Biblia.
3 Mga Probisyon: An mga pagtiripon kan kongregasyon, nangorogna an Teokratikong Paadalan sa Pagmiministro asin Pagtiripon sa Paglilingkod, dinisenyo tanganing tabangan kitang umoswag bilang mga ministro. Mantang mas naghihingoa kitang mag-andam para sa mga pagtiripon asin mag-atender sa mga ini saka iaplikar an itinataong mga suhestion, seguradong maako kita nin orog na mga pakinabang.—2 Cor. 9:6.
4 Kaipuhan man niatong tabangan an lambang saro na umoswag. (Tal. 27:17) An maingat na paghinanyog sa presentasyon kan mga nakakaibanan niato sa ministeryo matabang sa sato na umoswag. Dugang pa, tibaad iareglo kan satong paraataman sa pag-adal sa libro na mag-ako kita nin personal na tabang. Sarong bendisyon nanggad na may eksperyensiadong payunir o iba pang parahayag na matabang sa sato na magin mas epektibo asin magkamit nin orog na kagayagayahan sa ministeryo! Igwa daw nin bagong parahayag sa satong pag-adal sa libro? Tibaad puede kitang magsadiring boot na imbitaran sia na ibanan kita sa ministeryo.
5 An pinakamahalagang gibohon ngonyan iyo an Kristianong ministeryo. Mantang idinodolot niato ki Jehova an satong “atang nin pag-omaw,” gusto niatong itao sa saiya an satong pinakamakakaya. (Heb. 13:15) Kun naghihingoa kitang magin progresibo sa ministeryo, kita magigin mga trabahador “na mayo nin dapat na ikasupog, na ginagamit an tataramon kan katotoohan sa tamang paagi.”—2 Tim. 2:15.