Magin Eksperto sa Saindong Ministeryo
1 Sinadol kita ni apostol Pablo na pataluboon an abilidad sa ministeryo. Sia nagsurat: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasopog, na ginagamit an tataramon kan katotoohan sa tamang paagi.”—2 Tim. 2:15.
2 An abilidad sa ministeryo kinukultibar. Kun siring, kaipuhan na ‘gibohon niato an bilog niatong makakaya’ tangani kitang magin ekspertong mga ministro. Alagad ta ano an makatatabang sato?
MAKANOOD SA TATARAMON NIN DIOS
3 Mientras na mas aram niato an itinotokdo kan Biblia, magigin man kitang mas epektibo sa ‘paggamit kan tataramon kan katotoohan sa tamang paagi.’ Kaya kaipuhan na magtagama nin panahon para sa personal na pag-adal.—1 Tim. 4:15, 16.
4 Kaipuhan man kitang “magtao nin orog kisa dating atension” sa pagtotokdong inaako sa mga pagtiripon kan kongregasyon. (Heb. 2:1) An ekselenteng mga puntong ipakikipag-olay sa ministeryo pinag-oolayan sa mga pahayag-publiko o sa Pag-adal sa Libro kan Kongregasyon. An Teokratikong Paadalan sa Pagmiministro nagtatao sato nin napakahalagang pagtotokdo tanganing magin ekspertong mga paratokdo, asin an Pagtiripon sa Paglilingkod nagtatao nin mga suhestion asin demonstrasyon na makatatabang sato na magin mas matibay na mga ministro.
IAPLIKAR AN MGA SUHESTION
5 Sinabihan ni Pablo an kongregasyon nin Filipos na gibohon an saindang nanodan mapadapit sa saiya. (Fil. 4:9) Kaipuhan man na gibohon niato an mga nanonodan niato paagi sa organisasyon ni Jehova. Halimbawa, sa Agosto 1, 1988 na Torrengbantayan, pahina 13-18 (sa Ingles, Hulyo 15, 1988, pahina 15-20), nanodan niato an mga paagi na kita makagigibo nin “bagong” teritoryo sa mga lugar na parateng nahuhulitan. Apuwera sa pagdodoon kan pangangaipo nin bago, nakaaagyat na pagdolok, sinadol kita kan artikulo na patoodon an kagharong na maglaom na kita regular na masongko. Itinao man an hatol na magin desidido sa paghanap sa laen-laen na indibiduwal na iriba sa sarong harong. Paagi sa pag-aplikar kan mga suhestion na ini, mapaooswag niato an satong abilidad sa ministeryo.
6 Regular daw niatong ginagamit an librong Reasoning sa ministeryo? An isinusuherir na mga introduksion asin an kabtang manongod sa pagsimbag sa mga pagtumang puwedeng makapaoswag sa satong abilidad. Dugang pa, an pagpraktis kan Topikong Mapag-oolayan asin kan satong mga pag-alok makakokontribuwir sa satong kapangganahan sa ministeryo.
7 Kun gusto nindo nin dugang pang mga suhestion, dumolok sa paraataman sa paglilingkod o sa nangengenot sa saindong pag-adal sa libro asin humagad nin tabang. Kita gabos makapaooswag kan satong abilidad bilang mga ministro, na “ginagamit an tataramon kan katotoohan sa tamang paagi,” sa siring nagtatao nin onra sa satong Dios na si Jehova.—Juan 15:8.