Magtokdo na May Pagkaeksperto Asin Kaigotan

“Kaya paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.”—MATEO 28:19, 20.

1. Ano an isinasadol kan Talinhaga 22:29, asin paano?

AN TATARAMON ni Jehova nagsasadol nin pagkaeksperto asin kahigosan. Halimbawa, iyan nagsasabi: “Nakaheling ka nin tawong eksperto sa saiyang trabaho? Sa atubang nin mga hade sia mamumugtak; dai sia mamumugtak sa atubang nin mga tawong ordinaryo.” (Talinhaga 22:29) Siyempre, mayo man nin dapat na ikasopog dapit sa pagtrabaho para sa “mga tawong ordinaryo.” Alagad an marahay na trabaho kan ekspertong trabahador dai magdadanay na hilom. Tara, an bareta manongod sa saiyang abilidad tibaad makaabot sa pagdangog nin sarong hade, na tibaad maghagad kan saiyang paglilingkod!

2. (a) Tanganing magkaabilidad sa ano man na propesyon, ano an kaipuhan? (b) Taano ta napakahalaga kan pagigin epektibo bilang paratokdo nin sarong Kristianong ministro?

² An kaaraman asin abilidad kaipuhan sa ano man na propesyon. An sarong tawo tibaad mag-adal nin pagpanday asin tibaad dakol man an manodan sa pagmamasid sa mga eksperto na sa trabahong iyan. Alagad tanganing magin eksperto sia mismo, kaipuhan na gamiton nia sa trabaho an nakua niang kaaraman. An sarong doktor nagkakaipong mag-eskuwela. Alagad tanganing magin matibay, kaipuhan na gamiton nia an saiyang kaaraman sa kuwarto de operasyon. Asin sa propesyon na iyan kaipuhan an abilidad, ta an pagkaeksperto parateng iyo an nagdedeterminar sa buhay o kagadanan para sa pasyente. Alagad ta, mas importante pa an pagkaeksperto bilang sarong ministro. Taano? Huli ta an pagigin epektibo kan ministro bilang paratokdo puwedeng makaapektar sa pag-ako nin mga tawo sa maogmang bareta. Siring man, an saindang reaksion puwedeng iyo an magdeterminar sa buhay na daing katapusan o daing sagkod na kagadanan para sa sainda.—Deuteronomio 30:19, 20; Juan 17:3.

3. An paggibo nin mga disipulo nagkakaipo nin ano?

³ An isinugo ni Jesu-Cristo sa saiyang mga parasunod may kalabot na pagtotokdo. Sia nagsabi: “Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo. Asin, uya! ako danay na nasa saindo sagkod sa pagtatapos kan palakaw nin mga bagay.” (Mateo 28:19, 20) Siyempre, kaipuhan an abilidad tanganing tokdoan an mga may sadiosan na puso kan gabos na bagay na ipinagboot ni Jesus.

4. (a) An ekspertong pagtotokdo maninigong gibohon na may anong kaisipan? (b) Paano si Apolos nakinabang sa pakikiiba ki Aquila asin Priscila?

⁴ An ekspertong pagtotokdo maninigong gibohon na may kaigotan. Iyo, an mga Kristiano maninigong magin “maigot sa marahay na mga gibo,” asin tunay na kaibanan digdi an pagtao nin espirituwal na pagtotokdo sa ministeryo asin sa kongregasyon. (Tito 2:14) Bilang ekspertong mga paratokdo, si Aquila asin Priscila “kinua [si Apolos] na mani kaibaiba ninda [sa Efeso] asin ipinaliwanag an dalan nin Dios nin mas tama sa saiya.” Ini pinakinabangan na gayo ni Apolos, ta paghaloyhaloy sa Acaya “may kakosogan na biyo niang pinatunayan sa publiko na an mga Judio sala, na pinatunayan sa mga Kasuratan na si Jesus iyo an Cristo.” (Gibo 18:24-28) Malinaw na si Apolos nagtokdo na may pagkaeksperto asin kaigotan.

‘Mag-ingat sa Saindong Pagtotokdo’

5. Sono sa 1 Timoteo 4:16, taano ta maninigo kitang magtokdo na may pagkaeksperto asin kaigotan?

⁵ Sinabihan ni apostol Pablo an saiyang Kristianong kaibaiba na si Timoteo: “Mag-ingat ka sa saimo man sana asin sa saimong pagtokdo. Magdanay ka sa mga bagay na ini, huli ta sa paggibo mo kaini ililigtas mo an saimo man sana asin idtong naghihinanyog sa saimo.” (1 Timoteo 4:16) Mantang natataya an kaligtasan mismo pareho kan nagtotokdo asin tinotokdoan, tunay na an siring na pagtotokdo maninigong itao na may pagkaeksperto asin kaigotan.

6. Paano daw kamo puwedeng magin eksperto sa pagkapot kan Kasuratan, asin anong angay na mga hapot an mahohorophorop?

⁶ An mga panday asin doktor dapat nanggad na mag-ingat sa saindang sadiri. Kaipuhan na magamit ninda an saindang mga kasangkapan o instrumento nin may kabatidan. Iyo man an Kristianong ministro, na an pangenot na kasangkapan iyo an ‘minasbad kan espiritu, an tataramon nin Dios.’ (Efeso 6:17) Paano daw kamo puwedeng magin eksperto sa pagkapot kan Kasuratan? Siyempre paagi sa regular na pag-adal asin paggamit. Kaya, nabasa na daw nindo an Biblia poon sa kapinonan sagkod sa katapusan, na nagtatao nin panahon na horophoropon an marahayon na hatol kaiyan? Binabasa daw nindo iyan sa aroaldaw? Regular daw nindong ginagamit iyan sa ministeryo sa langtad? Asin biyo daw nindong inaaprobetsaran an masustansiang espirituwal na kakanon na itinatao ni Jehova paagi sa “maimbod asin madonong na oripon”?—Mateo 24:45-47.

7. Anong mga suhestion an itinatao manongod sa oras nin pag-adal, asin paano mapatutunayan sa Kasuratan an pangangaipo na mag-adal?

⁷ Seguradohon na magtagama nin panahon para sa pag-adal sa Tataramon nin Dios asin sa tunay na Kristianong mga publikasyon. Papanoon kaini an saindong isip nin marahay na impormasyon na magtatao nin pakinabang sa saindo asin magagamit sa pagsimbag sa odok na mga hapot. (1 Pedro 3:15; Colosas 4:6) Laen-laen man an oras sa pag-adal asin paghorophorop para sa mga pamilya asin indibiduwal. An iba tibaad makuang kapakipakinabang an pag-adal sa katapusan kan aldaw. An iba man tibaad mas alisto an isip pagmata. An iba pa tibaad makua na an pinakaangay para sa sainda iyo an oras sa odto. Ano man an kamugtakan, an pagigin regular asin an paghihingoa napakahalaga. Si Josue asin an mga hade sa Israel kaidto kaipuhan na basahon aroaldaw an Tataramon nin Dios.—Josue 1:7, 8; Deuteronomio 17:18-20.

Maghingoa na Magin Mas Marahay na Paratokdo

8. Paano an paggamit nin mental na pag-asosyar makakapaoswag sa saindong abilidad sa pagtotokdo?

⁸ An pagpaoswag sa abilidad sa pagtotokdo nagkakaipo nin pagpapagal. An sarong paagi na mapaoswag an saindong kakayahan bilang paratokdo iyo an paggamit nin mental na pag-asosyar kun nag-aadal sa Biblia o Kristianong mga publikasyon. Iasosyar an bagong mga ideya sa dating mga aram na nindo. Ini matabang saindo na mapagsunodsunod an impormasyon sa saindong isip tanganing ikapaliwanag nindo nin malinaw an mga bagay kun nagtotokdo sa iba. Sierto na nakagamit na kamo nin pag-asosyar kan nag-aadal kamo sa mga nakaagi. Halimbawa, tibaad may panahon na dai pa nindo narealisar na an mga Kristiano kaipuhan na magpasakop nin limitado sa “haralangkaw na kapangyarihan” kan gobyerno. Alagad ngonyan aram na nindo na kaipuhan na enoton an pagkuyog sa Dios. (Roma 13:1-8; Marcos 12:17; Gibo 5:29) Nasabotan nindo ini ta iinasosyar nindo an bagong mga punto sa dati na nindong aram.

9. Iilustrar kun paano nindo ikakaladawan sa isip an sarong pangyayari na nasusurat sa Biblia.

⁹ An saro pang paagi na mapaoswag an saindong abilidad sa pagtotokdo iyo an pagladawan sa isip kan mga pangyayari na nasusurat sa Biblia. Taano ta dai gibohon ini ngonyan sa Hokom 7:19-22? Sa kadikloman, si Gideon asin an 300 na lalaki pinalibotan an sarong kampong Midianita na duman bago pa sanang ibugtak an mga guwardia. Sa panale, nadangog nindo na pinatanog kan grupo ni Gideon nin 100 an saindang mga amodyong, asin naheling nindo na pinaparasa ninda an darakulang dulay na dara ninda. Arog man kaiyan an ginibo kan 200 na iba pang Israelitas. Asin pag-itaas ninda gabos kan naglalaad na karaba, nadangog nindo sindang nagkurahaw: “Minasbad ni Jehova asin ni Gideon!” Kan nagdurulagan na an natakot na mga Midianita, padagos na pinatanog kan tolong grupo ni Gideon an saindang mga amodyong, asin maheheling nindo na ibinugtak ni Jehova an minasbad kan nagdudurulag na kaiwal tumang sa lambang saro. Huling ilinadawan nindo sa isip an pangyayaring ini, daing duwa-duwa na magigirumdoman nindo iyan asin magagamit iyan sa pagtotokdo sa iba. Tunay na an sarong leksion na itinotokdo kaiyan iyo na kaya ni Jehova na iligtas an saiyang banwaan na mayo nin makosog na puwersa militar na tawo.—Salmo 94:14.

10. Sa pagtotokdo, paano nindo puwedeng gamiton an ilustrasyon na yaon sa Hokom 9:8-15?

¹⁰ An marahay na mga ilustrasyon, pati an mga yaon sa Kasuratan, puwede man na magpaoswag sa saindong abilidad bilang paratokdo. Bilang ilustrasyon, horophoropa an Hokom 9:8-15. An aki ni Gideon na si Jotam nagtaram manongod sa sarong panahon na an mga kahoy nagnombra nin hade sa sainda. Minsan ngani an olibo, an higuerra, asin an ubas nagsayuma sa katongdan na pagkahade, an ordinaryong binit galagang inako iyan. An mahahalagang tinanom nagrepresentar sa mga tawong maninigo na dai naghingoang magin hade sa saindang mga kapwa Israelitas. Pero, an binit, na napakikinabangan sana bilang songo, nagrepresentar sa pagkahade kan mapaabhaw, paragadan na si Abimelec, na boot na dominaron an iba alagad nagin maraot an kasagkodan bilang kaotoban kan hula ni Jotam. (Hokom 9:50-57) An ilustrasyon na ini puwedeng gamiton sa pagdoon kan pangangaipo na gibohon an tama asin magin mapakumbaba, bakong mapaabhaw.—Salmo 18:26, 27; 1 Pedro 5:5.

11. (a) Anong mga punto an idinodoon kan ilustrasyon ni Jesus na nasusurat sa Mateo 13:45, 46? (b) An klase kan ilustrasyon na iyan nagsusuherir nin ano manongod sa mga ilustrasyon na ginagamit nin Kristianong mga paratokdo?

¹¹ An Dakulang Paratokdo, si Jesu-Cristo, midbid na gayo para sa saiyang marahayon na mga ilustrasyon. Halimbawa, horophoropa an saiyang mga tataramon: “An kahadean nin kalangitan nakakaagid sa sarong parabariwas na naghahanap nin magagayon na perlas. Kan sia makakua na nin sarong perlas na dakulaon an halaga, napaduman sia asin ipinabakal tolos an gabos niang sadiri asin binakal iyan.” (Mateo 13:45, 46) Paagi kaiyan ipinag-ilustrar ni Jesus an pagigin mahalaga kan Kahadean asin ipinaheling na an saro na may pag-apresyar sa tunay na halaga kan pagkakamit kaiyan andam na mawaran nin ano man tanganing makamit iyan. Mayo nin ano man na komplikado dapit sa ilustrasyon na iyan, asin marahay na girumdomon nin Kristianong mga paratokdo an pamantayan na iyan kun naggagamit nin mga ilustrasyon bilang pantabang sa pagtotokdo.

An Pagtiripon Puwedeng Gumibo sa Sato na Mas Eksperto

12. Paano an pag-atender sa mga pahayag sa publiko makakatabang saindo na mapaoswag an saindong kakayahan sa pagtotokdo?

¹² An Kristianong pagtiripon may dakulang kabtang sa paggibo sa mga lingkod ni Jehova na eksperto asin maigot na mga paratokdo. Arog kan ipinaheheling kan Sermon sa Bukid ni Jesus, an mga pahayag sa publiko marahay na mga paagi nin pagtatao nin espirituwal na pagtotokdo. (Mateo 5:1–7:29) Kaya, an mga pahayag sa publiko kabilang sa pagtiripon kan mga Saksi ni Jehova ngonyan. Kamo daw regular na nag-aatender? Kamo daw atentibong paradangog? Hiniheling daw nindo an saindong Biblia kun may mga tekstong binabasa kan nagpapahayag? Kaugalean daw nindong kumua nin nota? Ini mga paagi na mapaoswag an saindong abilidad bilang paratokdo, asin an marahay na pagtotokdo sa Kasuratan maninigong makapaoswag kan saindong abilidad asin kan saindong kaigotan bilang paragibo nin disipulo.

13, 14. (a) Kasuarin nagkaigwa nin partikular na kahulogan an paggibo nin disipulo sa tahaw kan mga lingkod ni Jehova? (b) Ano an puwedeng ihapot manongod sa Pag-adal sa Torrengbantayan asin sa Pag-adal sa Libro kan Kongregasyon?

¹³ An paggibo nin disipulo nagkaigwa nin partikular na kahulogan sa tahaw kan mga lingkod ni Jehova paagi sa pag-apod na ‘Ipaisi an Hade asin Kahadean,’ na enot na ipinadangog sa saindang kombension sa Cedar Point, Ohio, kan 1922. Siring man kan taon na idto, enot na inorganisar an mga grupo sa pag-adal kan Torrengbantayan. An magasin na ini tunay na ginibong prominente an pagtotokdo kan Biblia asin paghuhulit kan Kahadean, ta an mismong ngaran kaiyan An Torrengbantayan Nagpapahayag kan Kahadean ni Jehova. Kamo daw maigot na parabasa kan Tataramon nin Dios kaiba an Torrengbantayan bilang pantabang? Kamo daw aktibong nakikikabtang sa semanal na Pag-adal sa Torrengbantayan?

¹⁴ An semanal na Pag-adal sa Libro kan Kongregasyon nagtatao man nin mga oportunidad na mapaoswag an saindong abilidad bilang paratokdo kan maogmang bareta. Kun nagsisimbag sa mas saradit na pagtiripon na ini, saka sa Pag-adal kan Torrengbantayan, ipinahahayag daw nindo an mga bagay sa sadiri nindong pananaram? An saindo daw na komento nagpaparisa kan saindong tinutubod sa saindong puso?

15. Ano an katuyohan kan Pagtiripon sa Paglilingkod, asin paano itinatao an paggiya para dian?

¹⁵ Bago kan 1922, an mga lingkod ni Jehova pinagkatodan na magtiripon para sa Miting sa Pamibi, Pag-omaw, asin Testimonyo sa tahaw kan semana. Idto okasyon para sa pag-awit, pagtao nin mga testimonyo, asin pamimibi. Alagad huli sa orog na pagdodoon sa pagbalangibog kan Kahadean sa harong-harong, an pagtiripon na ini nagin an Pagtiripon sa Paglilingkod, na nagdodoon kan paghuhulit. Nakatabang partikularmente an Bulletin, na igwa nin mga instruksion sa paglilingkod sa langtad asin nin mga “canvass,” o testimonyo, na magagamit sa ministeryo. Ngonyan, an An Satong Ministeryo sa Kahadean nagtatao nin kaagid na tabang, saka nin giya para sa semanal na “Pagtiripon na Matabang Sato na Gumibo nin mga Disipulo.” Kamo daw regular na nakikikabtang sa siring na pagtiripon? Ginigibo daw nindo an hatol na sinadya tanganing tumabang saindo na makapagtokdo na may pagkaeksperto asin kaigotan?

16. Arog kan isinabi sa pagpopoon kaiyan, ano an katuyohan kan Teokratikong Paadalan sa Pagmiministro?

¹⁶ Tanganing mapaoswag an ekspertong pagtotokdo, an Teokratikong Paadalan sa Pagmiministro pinonan sa mga kongregasyon nin mga Saksi ni Jehova kan 1943. Mapadapit sa pangenot na katuyohan kan paadalan, an enot na librong giya kaiyan nagsasabi: “An kursong ini dai itinao tanganing makaina sa saindong panahon sa paglilingkod sa langtad, kundi ginibo tanganing gibohon kamong mas tuod dian. Kun sasabihon sa mas espisipikong pananaram, an katuyohan kaining ‘Kurso sa Teokratikong Pagmiministro’ andamon an gabos na ‘maimbod’, an mga nakadangog kan Tataramon nin Dios asin pinatunayan an saindang pagtubod dian, na ‘makapagtokdo sa iba’ paagi sa pagharongharong, pagsongko liwat [pagdalaw liwat], pagkondukta nin modelong mga pag-adal asin pag-adal sa libro, asin, sa halipot, sa pakikikabtang sa gabos na kabtang kan paglilingkod sa Kahadean. Iyan para sa sarong katuyohan na gibohon an lambang saro na mas matibay na Teokratikong ministro sa ikaoomaw kan ngaran kan Kagurangnan; tangani na sia mas masangkapan na iatubang sa publiko an paglaom na nasa saiya; tangani na sia magin ‘andam na magtokdo, mapasensia, na nagtotokdo sa kahoyoan’. (2 Tim. 2:24, 25) Dai logod malingawan nin siisay man an pangenot na katuyohan na ini kan kurso.” (Course in Theocratic Ministry, pahina 4) Ini man giraray an pangenot na katuyohan kan Teokratikong Paadalan sa Pagmiministro. Iinaaplikar daw nindo an marahay na impormasyon dapit sa pagtotokdo, pagbasa, pagpahayag sa publiko, asin iba pa, na yaon sa mga libro kan paadalan na ini?a Kamo daw nalilista sa paadalan? May pagpasalamat daw na inaako nindo asin inootob an saindong mga asignasyon sa programa kan paadalan? An probisyon na ini ni Jehova paagi sa saiyang organisasyon makatatabang na gibohon kamong eksperto asin maigot na ministro.

Pagpatood Para sa Maigot na Pagtotokdo

17. Anong espirituwal na mga probisyon an itinao ni Jehova para sa mga nagtotokdo sa iba kan saiyang banal na katotoohan?

¹⁷ Si Jehova nagtatao nin abundang espirituwal na mga probisyon para sa may pribilehiyo na magtokdo sa iba kan saiyang banal na katotoohan. Kabilang sa ibang bagay, sia nagtatagama nin babasahon sa Biblia, semanal na mga pagtiripon, asin mas darakulang asamblea. An mararahay na probisyon na arog kaiyan nagpapangyari sa saiyang nagdusay na mga Saksi na magin eksperto asin maigot na mga paratokdo.

18. Sa pag-arog sa halimbawa ni Jesus asin Pablo, anong mga areglo an puwedeng gibohon nin kamagurangan tanganing mapaoswag an ministeryo sa langtad ngonyan?

¹⁸ Alagad ano kun kita nombradong kamagurangan o mas eksperyensiadong mga saksi ni Jehova? Kun siring an pagkamoot sa iba maninigong magpahiro sato na tumabang sa mga bagohan asin daing gayong eksperyensiang mga Kristiano na magin mas eksperto asin maigot na paratokdo. Tunay na ini tama sana, ta isinugo sana ni Jesus an 70 disipulo pakatapos na matawan sinda nin instruksion para sa saindang ministeryo. (Lucas 10:1-24) Tinokdoan ni Pablo an mga paraataman sa Efeso “sa publiko asin sa harong-harong,” asin kalabot digdi an pagtotokdo sa sainda na magpatotoo sa mga daing pagtubod mantang naghaharongharong sa ministeryo sa langtad. (Gibo 20:20, 21) Kaagid kaiyan, an kamagurangan, mga payunir, asin iba pa puwedeng maogmang tokdoan an mga kapwa Saksi sa ministeryo sa langtad ngonyan. Nakakamate daw kamo nin pangangaipo para sa siring na pagpatood? Kun siring hagadon iyan asin akoon iyan. Kamo daw saro sa kamagurangan? Kun siring gumibo nin mga areglo sa pagpatood sa iba sa ministeryo mantang kamo mismo maigot na nangengenot sa paglilingkod sa langtad.

Padagos na Pataluboon an Abilidad

19. Taano ta maninigo niatong ipamibi an satong ministeryo?

¹⁹ An mga doktor, panday, asin iba pa puwedeng magin mas eksperto paagi sa padagos na pag-adal asin pag-aplikar nin nakukuang kaaraman. Totoo man iyan sa Kristianong mga ministro. Kun siring, napakahalaga nanggad na an lambang nagdusay na saksi ni Jehova maghingoa na paoswagon an saiyang abilidad bilang paratokdo kan maogmang bareta! Asin mantang ini gibohon ni Jehova, iyan maninigong magin tema kan satong odok na mga pagngayongayo. Kun hahagadon niato an tabang asin paggiya nin Dios, makakasarig kita na bebendisyonan nia an satong maigot na ministeryo. Arog kan sabi ni apostol Juan: “Ano man an satong hagadon inaako niato gikan [ki Jehova Dios], huli ta kinukuyog niato an saiyang mga pagboot asin ginigibo niato an mga bagay na nakakapaogma sa saiyang mga mata.”—1 Juan 3:22.

20. Bilang mga Saksi ni Jehova, ano an maninigong magin determinasyon niato mantang nagdadangadang sa katapusan kaiyan an palakaw na ini?

²⁰ Kaya mantang naghaharani sa katapusan kaiyan an presenteng maraot na palakaw nin mga bagay, kita logod magmaigot sa ministeryo. Kita logod ‘mag-ingat sa satong sadiri asin sa satong pagtotokdo,’ para sa satong kaligtasan asin sa kaligtasan kan mga nagdadangog sa mensahe kan Kahadean. Iyo, gibohon niato an gabos na paghihingoa na magtokdo na may pagkaeksperto asin kaigotan.

[Mga Nota sa Ibaba]

Ano an Sasabihon Nindo?

◻ Apuwera sa paghuhulit, ano an kaipuhan sa paggibo nin disipulo?

◻ Taano ta napakahalaga na ‘mag-ingat sa saindong pagtotokdo’?

◻ Ano an pirang paagi na mapaoswag an abilidad sa pagtotokdo?

◻ Paano daw an Kristianong pagtiripon makakatabang sato na magin eksperto asin maigot na mga paratokdo kan Tataramon nin Dios?

◻ Ano an puwedeng gibohon nin kamagurangan asin iba pang eksperyensiadong Saksi kun dapit sa ministeryo sa langtad?

[Ritrato sa pahina 15]

An pagladawan sa isip kan mga pangyayari sa Biblia makatatabang saindo na magin mas marahay na paratokdo

[Ritrato sa pahina 17]

An instruktor sa Teokratikong Paadalan sa Pagmiministro nagtatabang sa mga estudyante na magin eksperto sa paglilingkod sa Kahadean