Pirme Mong Atenderan an Saimong Pagtotokdo

“Pirme mong atenderan an saimo man sana asin an saimong pagtotokdo. Magdanay ka sa mga bagay na ini, huli ta sa paggibo mo kaini ililigtas mo an saimo man sana sagkod idtong naghihinanyog sa saimo.”—1 TIMOTEO 4:16.

1, 2. Taano ta kaipuhan na marhay ngonyan an maigot na mga paratokdo?

“PADUMAN kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.” (Mateo 28:19, 20) Huli sa pagboot na ini ni Jesu-Cristo, an gabos na Kristiano maninigo na maghingoa na magin paratokdo. Kaipuhan an maigot na mga paratokdo tanganing tabangan an mga sadiosan an puso na magkaigwa nin kaaraman dapit sa Dios bago magin huri nang marhay. (Roma 13:11) Si apostol Pablo nagsadol: “Ihulit mo an tataramon, gibohon iyan na may pagkasibot sa marahay na panahon, sa masakit na panahon.” (2 Timoteo 4:2) Nagkakaipo ini nin pagtotokdo kapwa sa laog asin luwas kan kongregasyon. Sa katunayan, labi pa sa pagpaisi sana kan mensahe nin Dios an kalabot sa mismong sugo na paghuhulit. Kaipuhan an epektibong pagtotokdo tanganing an mga interesado magin disipulo.

² Nabubuhay kita sa “delikadong mga panahon na masakit pakibagayan.” (2 Timoteo 3:1) An mga tawo nadoktrinahan nin sekular na mga pilosopiya asin falsong katokdoan. Dakol an “nasa kadikloman sa isip” asin “nawaran na kan gabos na pagmate sa moral.” (Efeso 4:18, 19) An nagkapira may makolog na mga lugad sa emosyon. Iyo, an mga tawo talagang “naanitan asin nagkakaralagalag siring sa mga karnero na mayong pastor.” (Mateo 9:36) Minsan siring, paagi sa paggamit kan abilidad sa pagtotokdo, matatabangan ta an mga sadiosan an puso na gibohon an kinakaipuhan na mga pagbabago.

Mga Paratokdo sa Laog kan Kongregasyon

3. (a) Ano an kabale sa sugo ni Jesus na magtokdo? (b) Siisay an may pangenot na paninimbagan na magtokdo sa laog kan kongregasyon?

³ Paagi sa areglong pag-adal sa Biblia sa harong, minilyon an nag-aako nin personal na pagtotokdo. Pero pakatapos kan bautismo ninda, an mga bagohan nangangaipo nin dugang pang tabang tanganing “makagamot asin mapatindog sa pundasyon.” (Efeso 3:17) Mantang ginigibo ta an sugo ni Jesus na nasusurat sa Mateo 28:19, 20 asin ginigiyahan an mga bagohan pasiring sa organisasyon ni Jehova, sinda nakikinabang sa pagigin tinotokdoan sa laog kan kongregasyon mismo. Segun sa Efeso 4:11-13, may mga lalaki na ninombrahan na maglingkod “bilang mga pastor asin paratokdo, manongod sa pagpakarhay giraray kan mga banal, manongod sa gibohon nin paglingkod, manongod sa pagpakosog kan hawak ni Cristo.” Kun beses, kalabot sa saindang abilidad sa pagtotokdo an pangangaipo na “magsagwe, magtuyaw, magsadol, sa bilog na pakatios.” (2 Timoteo 4:2) Mahalagang marhay an gibohon kan mga paratokdo kaya, kan magsurat sa mga taga Corinto, ilinista ni Pablo an mga paratokdo kasunod tolos kan mga apostol asin propeta.—1 Corinto 12:28.

4. Paano kita tinatabangan kan kakayahan sa pagtotokdo na makuyog an sadol ni Pablo na nasusurat sa Hebreo 10:24, 25?

⁴ Totoo, bakong gabos na Kristiano naglilingkod bilang kamagurangan, o paraataman. Minsan siring, an gabos ineenkaminar na dagkahon an lambang saro “sa pagkamoot asin sa marahay na mga gibo.” (Hebreo 10:24, 25) Kalabot sa paggibo kaiyan sa mga pagtiripon an inandam na marhay, odok sa pusong mga komento na puedeng makapakosog asin makaparigon sa boot nin iba. An may kabatidan na mga parahayag kan Kahadean puede man na ‘mandagka sa marahay na mga gibo’ paagi sa paghiras kan saindang kaaraman asin eksperyensia sa mga bagohan kun magkaibanan sinda sa ministeryo sa langtad. Sa siring na mga panahon asin sa impormal na mga kamugtakan, an mahalagang pagtotokdo puede man na itao. Halimbawa, an maygurang na mga babae sinasadol na magin “paratokdo nin karahayan.”—Tito 2:3.

Nakombensir na Maniwala

5, 6. (a) Ano an kalaenan kan tunay na Kristianismo sa falsong pagsamba? (b) Paano tinatabangan kan kamagurangan an mga bagohan na gumibo nin madonong na mga desisyon?

⁵ Sa siring an tunay na Kristianismo biyong kabaliktaran kan falsong mga relihion, na an dakol sa sainda naghihingoang kontrolon an pag-iisip kan saindang mga miembro. Kan si Jesus yaon digdi sa daga, hiningoa kan mga namomoon sa relihion na kontrolon an haros gabos na aspekto kan buhay nin mga tawo paagi sa sobra kanakapagagabat na gibo nin tawong mga tradisyon. (Lucas 11:46) Sa parate arog kaiyan an ginibo kan klero nin Kakristianohan.

⁶ Minsan siring, an tunay na pagsamba “sagradong paglilingkod” na itinatao ta paagi sa satong “kakayahan na mangatanosan.” (Roma 12:1) An mga lingkod ni Jehova ‘nakombensir na maniwala.’ (2 Timoteo 3:14) Kun minsan, an mga nangengenot tibaad kaipuhan na gumibo nin nagkapirang giya asin prosedimiento para sa aregladong pagpunsionar kan kongregasyon. Minsan siring, imbes na hingoahon na magdesisyon para sa mga kapwa Kristiano, tinotokdoan sinda kan kamagurangan na “mamidbid kun ano an tama asin sala.” (Hebreo 5:14) Sa pangenot ginigibo ini kan kamagurangan paagi sa pagpakakan sa kongregasyon nin “mga tataramon kan pagtubod asin kan marahay na katokdoan.”—1 Timoteo 4:6.

Pag-atender sa Saindong Pagtotokdo

7, 8. (a) Paano nahihimo kan mga tawong kakadikit an kakayahan na makapaglingkod bilang mga paratokdo? (b) Ano an nagpaparisa na kaipuhan an personal na paghihingoa tanganing magin epektibong paratokdo?

⁷ Pero bumalik kita sa pankagabsan na sugo sa sato na magtokdo. Nagkakaipo daw nin ano man na partikular na mga abilidad, edukasyon, o kakayahan tanganing makapakikabtang sa gibohon na ini? Dai man. Sa kadaklan, an pambilog na kinaban na pagtotokdong ini ginigibo nin ordinaryong mga indibiduwal na kakadikit an mga kakayahan. (1 Corinto 1:26-29) Si Pablo nagpapaliwanag: “Igwa kami kan kayamanan na ini [an ministeryo] sa mga lalagan na gibo sa dalipay [bakong sangkap na mga hawak], tanganing an kosog na lihis sa ordinaryo magin sa Dios asin bakong an gikan mismo sa samo.” (2 Corinto 4:7) An dakulaon na kapangganahan kan lakop sa globong paghuhulit kan Kahadean sarong patotoo kan kapangyarihan kan espiritu ni Jehova!

⁸ Minsan siring, kinakaipuhan an odok na personal na paghihingoa tanganing magin “paragibo na mayo nin maninigong ikasopog, na ginagamit an tataramon kan katotoohan sa tamang paagi.” (2 Timoteo 2:15) Sinadol ni Pablo si Timoteo: “Pirme mong atenderan an saimo man sana asin an saimong pagtotokdo. Magdanay ka sa mga bagay na ini, huli ta sa paggibo mo kaini ililigtas mo an saimo man sana sagkod idtong naghihinanyog sa saimo.” (1 Timoteo 4:16) Paano man nanggad inaatenderan nin saro an saiyang pagtotokdo, baga man sa laog o luwas kan kongregasyon? Pirme daw na kalabot sa paggibo kaiyan an pagigin mahusay sa nagkapirang abilidad o pamamaagi nin pagtotokdo?

9. Ano an mas mahalaga kisa sa natural na mga kakayahan?

⁹ Si Jesus siertong nagpaheling nin pambihirang paggamit nin mga pamamaagi nin pagtotokdo sa saiyang bantog na Sermon sa Bukid. Kan matapos na siang magtaram, “an mga kadaklan napangalas nin makuri sa saiyang paagi nin pagtotokdo.” (Mateo 7:28) Siempre, mayo sa sato na makapagtotokdo nin siring kahusay ki Jesus. Minsan siring, dai kaipuhan na kita magin matibay magtaram tanganing magin epektibong paratokdo. Tara, segun sa Job 12:7, maski an “magarong mga hayop” asin “mga gamgam” puedeng magtokdo na dai nagtataram! Kaiba kan ano man na natural na mga kakayahan o abilidad na tibaad yaon sa sato, an nangorognang mahalaga iyo an kun anong “klaseng mga tawo” kita—kun anong mga kualidad an yaon sa sato asin kun anong espirituwal na mga ugale an pinatalubo niato na puedeng arogon kan mga inaadalan.—2 Pedro 3:11; Lucas 6:40.

Mga Estudyante kan Tataramon nin Dios

10. Paano si Jesus nagtao nin marahay na halimbawa bilang estudyante kan Tataramon nin Dios?

¹⁰ An epektibong paratokdo kan mga katotoohan sa Kasuratan dapat na magin estudyante kan Tataramon nin Dios. (Roma 2:21) Si Jesu-Cristo nagtao nin pambihirang halimbawa sa bagay na ini. Durante kan saiyang ministeryo, si Jesus nagsambit o nagpahayag nin mga ideya na may pagkakaagid sa mga teksto na nasa mga kabanga kan mga libro sa Hebreong Kasuratan.a An saiyang pagigin pamilyar sa Tataramon nin Dios nahayag sa edad na 12, kan sia manompongan na “nagtutukaw sa tahaw kan mga paratokdo asin naghihinanyog sa sainda asin naghahapot sa sainda.” (Lucas 2:46) Bilang adulto, nagin ugale ni Jesus an magduman sa sinagoga, kun saen binabasa an Tataramon nin Dios.—Lucas 4:16.

11. Anong marahay na mga ugale sa pag-adal an maninigong pataluboon nin sarong paratokdo?

¹¹ Kamo daw galagang parabasa kan Tataramon nin Dios? An pagkotkot dian iyo an paagi na dian “masasabotan mo an pagkatakot ki Jehova, asin makukua mo an mismong kaaraman nin Dios.” (Talinhaga 2:4, 5) Kaya pataluboon nindo an marahay na ugale sa pag-adal. Hingoahon na magbasa nin sarong kabtang kan Tataramon nin Dios kada aldaw. (Salmo 1:2) Ugaleon na basahon an kada luwas kan An Torrengbantayan asin Awake! pakaresibi tolos kaiyan. Mag-atentong marhay sa mga pagtiripon sa kongregasyon. Pag-adalan na gumibo nin maingat na pagsiyasat. Paagi sa pakanood na ‘susogon nin eksakto an gabos na bagay,’ malilikayan nindo an mga pagpalabi asin mga sala kun kamo nagtotokdo.—Lucas 1:3.

Pagkamoot Asin Paggalang sa mga Tinotokdoan

12. Ano an nagin saboot ni Jesus manongod sa saiyang mga disipulo?

¹² An saro pang mahalagang kualidad iyo an tamang saboot manongod sa mga tinotokdoan nindo. Dinuhagi kan mga Fariseo an mga naghinanyog ki Jesus. “An kadaklan na ini na dai tatao kan Ley mga tawong isinumpa,” an sabi ninda. (Juan 7:49) Alagad si Jesus igwa nin hararom na pagkamoot asin paggalang sa saiyang mga disipulo. Sia nagsabi: “Dai ko na kamo inaapod na mga oripon, huli ta an oripon dai nakakaaram kan ginigibo kan saiyang kagurangnan. Kundi inapod ko kamong mga katood, huli ta an gabos na bagay na nadangog ko sa sakong Ama ipinaaram ko sa saindo.” (Juan 15:15) Ipinarisa kaini kun paano maninigong gibohon kan mga disipulo ni Jesus an saindang pagtotokdo.

13. Ano an namatean ni Pablo manongod duman sa mga tinokdoan nia?

¹³ Halimbawa, si Pablo dai nagpadanay nin indiperente, garo trabaho sanang relasyon sa saiyang mga tinotokdoan. Sinabihan nia an mga taga Corinto: “Minsan pa kamo may sampulong ribong paratokdo dian ki Cristo, talagang dai kamo nin dakol na ama; huli ta dian ki Cristo Jesus ako nagin an saindong ama paagi kan maogmang bareta.” (1 Corinto 4:15) Kun minsan, naghibi pa ngani si Pablo mantang nagsasadol sa mga tinotokdoan nia! (Gibo 20:31) Nagpaheling man sia nin pambihirang pasensia asin kabootan. Kun siring masasabi nia sa mga taga Tesalonica: “Kami nagin maboot sa tahaw nindo, arog kan pagmamahal nin nagpapasusong ina sa saiyang sadiring mga aki.”—1 Tesalonica 2:7.

14. Taano ta mahalagang marhay an personal na interes sa satong mga inaadalan sa Biblia? Iilustrar.

¹⁴ Inaarog daw nindo si Jesus asin si Pablo? An sinserong pagkamoot sa satong mga inaadalan makahihipno nang marhay sa ano man na tibaad satong kakulangan sa natural na mga kakayahan. Namamatean daw kan satong mga inaadalan sa Biblia na kita personalmenteng igwa nin sinserong interes sa sainda? Nagtatao daw kita nin panahon na mamidbid sinda? Kan an sarong Kristiana nadedepisilan sa pagtabang sa sarong inaadalan na umoswag sa espirituwal, sia maboot na naghapot: “May ikinahahadit ka?” An babae nagpoon na magpahayag kan saiyang mga namamatean, na iinestorya an balakid na kapurisawan asin kahaditan. An mamomoton na pag-oolay na idto iyo an nagin panahon nin dakulang pagbago kan babae. Sa siring na mga kamugtakan angay sana an mga ideya hale sa Kasuratan asin pamparigon sa boot. (Roma 15:4) Pero mag-ingat: An sarong inaadalan sa Biblia tibaad marikas an pag-oswag alagad tibaad igwa pa nin nagkapirang bakong sa Kristianong mga ugale na dapat haleon. Kaya tibaad bakong madonong na magin sobra kadayupot sa pakiibaiba sa sosyal na paagi sa indibiduwal na iyan. Maninigo na papagdanayon an tamang Kristianong mga limitasyon.—1 Corinto 15:33.

15. Paano niato ikapaheheling an paggalang sa satong mga inaadalan sa Biblia?

¹⁵ Kabale sa paggalang sa satong mga inaadalan iyo na dai kita maghingoang kontrolon an saindang personal na buhay. (1 Tesalonica 4:11) Halimbawa, tibaad may inaadalan kitang babae na may kasaroan na lalaki na bakong kasal. Tibaad may mga aki na sinda. Huling nagkaigwa na nin tamang kaaraman dapit sa Dios, gusto kan babae na makipaghusay ki Jehova. (Hebreo 13:4) Maninigo daw niang pakasalan an lalaki o bulagan sia? Tibaad makosog an paniniwala niato na makaoolang sa saiyang pag-oswag sa ngapit an pagpakasal sa sarong lalaki na kakadikit an o mayo nin interes sa espirituwal. Sa ibong na kampi, tibaad ikahandal ta an manongod sa ikararahay kan saiyang mga aki asin isipon niato na mas mapaparahay sia sa pagpakasal sa saiya. Maski paano, daing galang asin bakong mamomoton an mag-entremeter sa buhay kan inaadalan asin maghingoang ipirit an satong sadiring mga opinyon sa siring na bagay. Total, sia an magdadara kan mga resulta kan desisyon. Kun siring, bako daw na pinakamarahay na sanayon an inaadalan na iyan na gamiton an saiyang sadiring “kakayahan nin pagmansay” asin magdesisyon sa sadiri kun ano an saiyang maninigong gibohon?—Hebreo 5:14.

16. Paano ikapaheheling kan kamagurangan an pagkamoot asin paggalang sa aripompon nin Dios?

¹⁶ Partikularmenteng mahalaga para sa kamagurangan sa kongregasyon na trataron na may pagkamoot asin paggalang an aripompon. Kan sumurat ki Filemon, si Pablo nagsabi: “Minsan ngani ako may dakulang katalingkasan sa pagtaram may koneksion ki Cristo na pagbotan ka na gibohon an tama, imbes pinakasasadol taka basado sa pagkamoot.” (Filemon 8, 9) Kun beses, puedeng lumataw sa kongregasyon an nakapanluluya sa boot na mga situwasyon. Tibaad kaipuhan ngani an karigonan. Sinadol ni Pablo si Tito na “magpadagos ka sa pagsagwe [sa mga napapasala] nin estrikto, tangani na sinda magin marahay an salud sa pagtubod.” (Tito 1:13) Dawa siring, an mga paraataman dapat na mag-ingat na nungkang magtaram na daing kabootan sa kongregasyon. “An oripon kan Kagurangnan dai kaipuhan na makiiwal,” an isinurat ni Pablo, “kundi kaipuhan na magin maboot sa gabos, kualipikadong magtokdo, padagos na nagpopogol sa irarom nin karatan.”—2 Timoteo 2:24; Salmo 141:3.

17. Anong sala an nagibo ni Moises, asin ano an manonodan dian kan kamagurangan?

¹⁷ Dapat na dayaday na girumdomon kan mga paraataman na an tinatratar ninda “aripompon nin Dios.” (1 Pedro 5:2) Si Moises, minsan ngani sia mapakumbaba, paramientras na nawaran kan pagmansay na ini. “Pinapait [kan mga Israelita] an saiyang espiritu asin sia nagpoon na magtaram nin ragap sa saiyang mga ngabil.” (Salmo 106:33) Ikinaanggot na marhay nin Dios an pagmaltratong ini sa Saiyang aripompon, maski ngani bakong dai sinda mababasol. (Bilang 20:2-12) Kun napapaatubang sa kaparehong mga angat ngonyan, an kamagurangan maninigong magmaigot na magtokdo asin magtao nin instruksion na may pakarorop asin kabootan. Marahayon an paghimate kan satong mga tugang kun sinda tinatratar na may konsiderasyon asin bilang mga indibiduwal na nangangaipo nin tabang, bakong bilang nungka nang mababakle. Kaipuhan na papagdanayon kan kamagurangan an positibong punto de vista na yaon kaidto ki Pablo kan sia magsabi: “Kami may kompiansa sa Kagurangnan mapadapit sa saindo, na ginigibo nindo asin padagos na gigibohon an mga bagay na samuyang ipinagboot.”—2 Tesalonica 3:4.

Inaasikaso an Saindang mga Pangangaipo

18, 19. (a) Paano niato maninigong asikasohon an mga pangangaipo kan mga inaadalan sa Biblia na limitado an mga kakayahan? (b) Paano ta matatabangan an mga inaadalan na nadedepisilan sa espesipikong mga bagay?

¹⁸ An epektibong paratokdo andam na makibagay sa mga kakayahan asin limitasyon kan saiyang mga inaadalan. (Ikomparar an Juan 16:12.) Sa ilustrasyon ni Jesus kan mga talento, an kagurangnan nagtao nin mga pribilehio “sa lambang saro segun sa saiyang kakayanan.” (Mateo 25:15) Puede niatong arogon an paaging iyan kun nagkokondukta nin mga pag-adal sa Biblia. Naturalmente, marahayon na makobrehan an sarong basado sa Bibliang publikasyon sa rasonableng halipot na panahon. Pero dapat admitiron na bakong gabos may marahay na abilidad sa pagbasa o kakayahan na ikalaog tolos sa isip an bagong mga ideya. Kun siring, kaipuhan an pakamansay mapadapit sa kun noarin mabalyo hale sa sarong punto pasiring sa saro pa sa pag-adal kun an naghihimateng mga indibiduwal nasasakitan na magin marikas. An mas mahalaga kisa sa pagkobre sa materyal sa sarong itinalaan na rikas iyo an pagtabang sa mga inaadalan na masabotan an saindang nanonodan.—Mateo 13:51.

¹⁹ Iyan man an masasabi dapit sa mga inaadalan sa Biblia na nadedepisilan sa espesipikong mga bagay, arog baga kan Trinidad o relihiosong mga piesta. Minsan ngani sa pankagabsan dai kaipuhan na iiba sa satong mga pag-adal an mga materyal na siniyasat basado sa Biblia, puede niatong gibohon iyan paminsanminsan kun iyan malinaw na magigin kapakipakinabang. Dapat na gumibo nin marahay na paghusgar tanganing malikayan an dai kaipuhan na pagpaluwayluway sa pag-oswag kan inaadalan.

Magin Entusiastiko!

20. Paano si Pablo nagtao nin halimbawa sa pagpaheling nin entusiasmo asin kombiksion sa saiyang pagtotokdo?

²⁰ “Magin malaad sa espiritu,” an sabi ni Pablo. (Roma 12:11) Iyo, baga man kita nagkokondukta nin pag-adal sa Biblia sa harong o kita may kabtang sa sarong pagtiripon sa kongregasyon, maninigo na gibohon ta iyan na may kaigotan asin entusiasmo. Sinabihan ni Pablo an mga taga Tesalonica: “An maogmang bareta na samong ihinuhulit dai nagdatong sa saindo sa tataramon sana kundi siring man sa kapangyarihan asin banal na espiritu patin makosog na pagtubod.” (1 Tesalonica 1:5) Sa siring itinao ni Pablo asin kan saiyang kairiba “bako sanang an maogmang bareta nin Dios, kundi siring man an [saindang] kalag.”—1 Tesalonica 2:8.

21. Paano ta mapagdadanay an entusiastikong saboot manongod sa satong mga asignasyon na pagtotokdo?

²¹ An tunay na entusiasmo naggigikan sa pagigin makosog na kombensido na kaipuhan na madangog kan satong mga inaadalan sa Biblia an satong sasabihon. Dai niato noarin man ibilang na rutina an ano man na asignasyon na pagtotokdo. Siertong inatenderan kan sekretaryong si Esdras an saiyang pagtotokdo sa bagay na ini. “Inandam [nia] an saiyang puso na siyasaton an ley ni Jehova asin gibohon iyan patin magtokdo sa Israel.” (Esdras 7:10) Iyan man an maninigo niatong gibohon paagi sa lubos na pag-andam asin paghorophorop sa kahalagahan kan materyal. Ipamibi ta ki Jehova na logod tawan kita nin pagtubod asin kombiksion. (Lucas 17:5) An satong entusiasmo puedeng makatabang sa mga inaadalan sa Biblia na pataluboon an tunay na pagkamoot sa katotoohan. Siempre, puedeng kalabot sa pag-atender sa satong pagtotokdo an paggamit nin espesipikong mga pamamaagi nin pagtotokdo. Ipaliliwanag kan satong sunod na artikulo an nagkapira kaini.

[Nota sa ibaba]

Nagigirumdoman daw Nindo?

◻ Taano ta kaipuhan ngonyan an may abilidad na Kristianong mga paratokdo?

◻ Anong marahay na mga ugale sa pag-adal an puede niatong pataluboon?

◻ Taano ta mahalagang marhay an pagkamoot asin paggalang sa mga tinotokdoan niato?

◻ Paano niato maaasikaso an mga pangangaipo kan satong mga inaadalan sa Biblia?

◻ Taano ta mahalagang marhay an entusiasmo asin kombiksion kun nagtotokdo sa iba?

[Retrato sa pahina 10]

An marahay na mga paratokdo estudyante man mismo kan Tataramon nin Dios

[Retrato sa pahina 13]

Magkaigwa nin personal na interes sa mga inaadalan sa Biblia