‘Iligtas Mo an Saimo Man Sana Sagkod Idtong Naghihinanyog sa Saimo’
“Pirme mong atenderan an saimo man sana asin an saimong pagtotokdo. . . . Sa paggibo mo kaini ililigtas mo an saimo man sana sagkod idtong naghihinanyog sa saimo.”—1 TIMOTEO 4:16.
1, 2. Ano an nagmomotibar sa tunay na mga Kristiano na magpadagos sa saindang gibong panligtas-buhay?
SA SARONG napapasuway na baryo sa amihanan na Tailandia, an sarong mag-agom na Saksi ni Jehova pinoprobaran na gamiton sa mga kabilang sa sarong tribong taga bolod an lenguaheng bago nindang manodan. Tangani na ikahiras an maogmang bareta kan Kahadean nin Dios sa mga taga baryo, bago pa sanang pag-adalan kan mag-agom an lenguaheng Lahu.
2 “Masakit na iladawan an kagayagayahan asin pagkakontento niamo, sa paghuhulit sa tahaw kan interesanteng mga tawong ini,” an paliwanag kan agom na lalaki. “Talagang namamatean niamo na kami kalabot sa kaotoban kan Kapahayagan 14:6, 7, na nagpapahayag nin nakaoogmang notisya ‘sa lambang nasyon asin tribo asin tataramon.’ Kadikit na sana an bagong langtad nin paghuhulit na dai pa naaabot kan maogmang bareta, asin ini tunay na saro dian. Haros sobra na sa kaya niamo an samong inaadalan sa Biblia.” Malinaw nanggad, an mag-agom na ini naglalaom na iligtas bako sanang an sainda man sana kundi pati an mga naghihinanyog sa sainda. Bilang mga Kristiano, bako daw na kita gabos naglalaom na magibo man iyan?
“Pirme Mong Atenderan an Saimo Man Sana”
3. Tanganing ikaligtas an iba, ano an dapat na gibohon nguna niato?
3 Hinatolan ni apostol Pablo si Timoteo, “Pirme mong atenderan an saimo man sana asin an saimong pagtotokdo,” asin ini aplikado sa gabos na Kristiano. (1 Timoteo 4:16) Tunay nanggad, tanganing matabangan an iba na magkamit nin kaligtasan, dapat na atenderan nguna niato an sato man sana. Paano niato magigibo ini? Sarong bagay, dapat na kita magdanay na mapagbantay sa mga panahon na nabubuhayan niato. Si Jesus nagtao nin tanda na kompuesto nin laen-laen na kabtang tangani na maaraman kan saiyang mga parasunod kun kasuarin nagdatong an “pagtatapos kan sistema nin mga bagay.” Pero, sinabi man ni Jesus na dai niato maaaraman nin eksakto kun noarin madatong an katapusan. (Mateo 24:3, 36) Ano an maninigong magin reaksion niato sa katotoohan na iyan?
4. (a) Ano an maninigong magin aktitud niato manongod sa panahon na natatada sa sistemang ini? (b) Anong aktitud an maninigo niatong likayan?
4 An lambang saro sa sato puedeng maghapot, ‘Ginagamit ko daw an ano man na panahon na natatada para sa sistemang ini tanganing iligtas an sako man sana asin an mga naghihinanyog sa sako? O iniisip ko daw, “Mantang dai niamo aram nin eksakto kun noarin madatong an katapusan, dai akong labot dian”?’ Peligroso an ikaduwang aktitud. Iyan direktang kontra sa sadol ni Jesus: “Kamo man magin andam, huli ta sa oras na dai nindo pinaghohona, an Aki nin tawo madatong.” (Mateo 24:44) Daing duwa-duwa na bako ini an panahon na mawaran kan satong entusiasmo para sa paglilingkod ki Jehova o umasa sa kinaban para sa katiwasayan o pagkakontento.—Lucas 21:34-36.
5. Anong mga halimbawa an itinao kan mga saksi ni Jehova bago kan mga Kristiano?
5 An saro pang paagi na ikapaheheling niato na inaatenderan niato an sato man sana iyo an fiel na pagtagal bilang mga Kristiano. An mga lingkod nin Dios kan nakaagi nagpadagos na magtagal, baga man naghahalat sinda nin ensegidang pagkalda o dai. Pakasitara kan mga halimbawa nin mga saksi bago kan mga Kristiano na arog ni Abel, Enoc, Noe, Abraham, asin Sara, sinabi ni Pablo: “Dai ninda nakamtan an kaotoban kan mga panuga, alagad an mga iyan natanaw ninda sa harayo asin galagang inako an mga iyan patin ipinahayag sa publiko na sinda mga nakihihimanwa asin nakiiistar nin temporaryo sa daga.” Dai sinda napadara sa ano man na mga pagmawot nin maginhawang buhay, ni napadaog man sinda sa inmoral na mga impluwensia sa palibot ninda, kundi galaga nindang inantisipar an “kaotoban kan mga panuga.”—Hebreo 11:13; 12:1.
6. Paano an punto de vista kan mga Kristiano kan enot na siglo manongod sa kaligtasan nakaapektar sa saindang pamumuhay?
6 Ibinilang man nin mga Kristiano kan enot na siglo an saindang sadiri na “mga dayo” sa kinaban na ini. (1 Pedro 2:11) Dawa kan ikaligtas na sa pagkalaglag nin Jerusalem kan 70 C.E., an tunay na mga Kristiano dai nag-ontok sa paghuhulit o nagbuelta sa kinabanon na pamumuhay. Aram ninda na may naghahalat na pangenot na kaligtasan sa mga nagdanay na fiel. Sa katunayan, dawa kaidtong 98 C.E., nagsurat si apostol Juan: “An kinaban maagi sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.”—1 Juan 2:17, 28.
7. Paano nagpaheling nin pakatagal an Mga Saksi ni Jehova sa presenteng mga panahon?
7 Sa presenteng mga panahon an Mga Saksi ni Jehova nagmamaigot man sa gibohon na Kristiano, dawa ngani sinda nag-aagi nin maisog na paglamag. Basang sana daw an saindang pagtagal? Dai nanggad, ta sinierto sa sato ni Jesus: “An nakatagal sagkod sa katapusan iyo an maliligtas,” baga man iyan an katapusan kan daan na sistema o an katapusan kan buhay nin saro sa presente. Sa pagkabuhay liwat, gigirumdomon asin babalosan ni Jehova an gabos niang fiel na lingkod na nagadan.—Mateo 24:13; Hebreo 6:10.
8. Paano niato ikapaheheling na inaapresyar niato an pakatagal nin mga Kristiano kan nakaagi?
8 Dugang pa, naoogma kita na an fiel na mga Kristiano kan nakaagi bako sanang sadiri nindang kaligtasan an pinagmalasakitan. Daing duwa-duwa na kita na nakanood manongod sa Kahadean nin Dios huli sa saindang mga paghihingoa nagpapasalamat na sinda nagtagal sa pag-otob sa sugo ni Jesus: “Kun siring paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.” (Mateo 28:19, 20) Sagkod na bukas para sa sato an oportunidad, ikapaheheling niato an satong pagpasalamat paagi sa paghuhulit sa iba na dai pa nakadangog kan maogmang bareta. Minsan siring, an paghuhulit iyo sana an enot na tangga sa paggibo nin mga disipulo.
‘Atenderan an Saimong Pagtotokdo’
9. Paano kita matatabangan nin positibong aktitud na makapoon nin mga pag-adal sa Biblia?
9 An kaiba sa asignasyon sa sato bako sanang paghuhulit kundi pati pagtotokdo. Isinugo kita ni Jesus na tokdoan an mga tawo na otobon an gabos na bagay na ipinagboot nia. Totoo, sa nagkapirang teritoryo, pira sana an garo gustong makanood manongod ki Jehova. Alagad an pagkaigwa nin negatibong punto de vista manongod sa teritoryo puedeng makaolang sa satong mga paghihingoa na makapoon nin mga pag-adal sa Biblia. Narisa ni Yvette, sarong payunir sa sarong teritoryo na inapod nin nagkapira na daing bunga, na an mga bisita sa lugar na idto, na mayo kan siring na negatibong aktitud, nakapoon nin mga pag-adal sa Biblia. Kan arogon nia an mas positibong punto de vista, nakanompong man si Yvette nin mga tawo na gustong mag-adal kan Biblia.
10. Ano an pundamental na katongdan niato bilang mga paratokdo kan Biblia?
10 An nagkapirang Kristiano tibaad mag-alangan na alokan nin pag-adal sa Biblia an mga interesado ta sa paghona ninda dai ninda kayang pamayohan an sarong pag-adal. Totoo, magkakalaen an grado kan satong abilidad. Alagad dai kita kaipuhan na magin ekspertong marhay tangani na magin mapanggana bilang mga paratokdo kan Tataramon nin Dios. An dalisay na mensahe kan Biblia mapuersa, asin sinabi ni Jesus na midbid nin mga arog-karnero an tingog kan tunay na Pastor pagkadangog ninda kaiyan. Kun siring, an trabaho niato ipahayag sana an mensahe kan Marahay na Pastor, si Jesus, sa pinakamalinaw na makakaya niato.—Juan 10:4, 14.
11. Paano kamo puedeng magin mas epektibo sa pagtabang sa inaadalan sa Biblia?
11 Paano nindo mas epektibong ikapahahayag an mensahe ni Jesus? Primero, magin kamong pamilyar sa sinasabi kan Biblia manongod sa topikong pinag-oolayan. Kaipuhan na masabotan mismo nindo an sarong tema bago nindo iyan ikatokdo sa iba. Siring man, pagmaigotan na mapagdanay an may dignidad alagad makikatood na kamugtakan durante kan pag-adal. An mga inaadalan, pati an mga akion pa, mas nakakanood kun sinda pamugtak an boot asin pinahehelingan sinda nin paggalang saka kabootan kan nagtotokdo.—Talinhaga 16:21.
12. Paano nindo masisierto na nasasabotan kan inaadalan an itinotokdo nindo sa saiya?
12 Bilang paratokdo, habo nindo na magtao sana nin mga detalye na tutuomon kan inaadalan. Tabangan sia na masabotan an saiyang nanonodan. An inadalan, eksperyensia sa buhay, asin pakaaram sa Biblia nin sarong inaadalan makaaapektar sa saiyang pakasabot sa sinasabi nindo. Kun siring, puede nindong ihapot sa saindo man sana, ‘Nasasabotan daw nia an kahulogan kan mga tekstong sinitar sa pinag-aadalan?’ Maeenganyar sia nindong magtaram paagi sa mga hapot na dai sana masisimbag nin iyo o dai kundi naghahagad nin esplikasyon. (Lucas 9:18-20) Sa ibong na lado, may mga inaadalan na nag-aalangan na maghapot sa paratokdo. Sa siring, tibaad magpadagos sinda na dai lubos na nasasabotan an itinotokdo sa sainda. Enkaminaron an inaadalan na maghapot asin magsabi sa saindo kun dai nia lubos na nasasabotan an sarong punto.—Marcos 4:10; 9:32, 33.
13. Paano nindo matatabangan an inaadalan na magin paratokdo?
13 An sarong mahalagang katuyohan sa pamamayo sa pag-adal sa Biblia tabangan an inaadalan na magin paratokdo. (Galacia 6:6) Sa katuyohan na iyan, bilang repaso sa saindong pag-adal, puede nindong hagadon sa saiya na ipaliwanag sa saindo an sarong punto sa simpleng pananaram, na garo baga ipinaliliwanag nia iyan sa saro na iyan pa sana an primerong pakadangog kaiyan. Sa huri, kun kualipikado na siang makikabtang sa ministeryo, sia puede nindong agdahon na umiba sa saindo sa langtad. Posibleng marhay na sia magigin komportable sa pag-iba sa saindo, asin an eksperyensia matabang sa saiya na tumalubo an kompiansa sagkod na andam na siang magsolong lumuwas sa ministeryo.
Tabangan an Inaadalan na Magin Katood ni Jehova
14. Ano an saindong pangenot na pasohan bilang paratokdo, asin ano an makakokontribwir sa pakaabot dian?
14 An pangenot na pasohan nin lambang Kristianong paratokdo tabangan an inaadalan na kamtan an pakikikatood ni Jehova. Magigibo nindo ini bako sanang paagi sa saindong mga tataramon kundi paagi man sa saindong halimbawa. An pagtotokdo paagi sa halimbawa may mapuersang epekto sa puso nin mga inaadalan. An mga gawe-gawe talagang puedeng magin mas epektibo kisa sinasabi, nangorogna pag-abot sa pagtadom nin moral na mga kualidad asin pagpukaw nin kaigotan sa inaadalan. Kun naheheling nia na an saindong mga sinasabi asin gawe-gawe gikan sa marahay na relasyon ki Jehova, tibaad mas mamotibar sia na kultibaron nia mismo an siring na relasyon.
15. (a) Taano ta mahalaga na an inaadalan magkaigwa kan tamang motibo sa paglilingkod ki Jehova? (b) Paano nindo matatabangan an inaadalan na padagos na umoswag sa espirituwal?
15 Gusto nindo na an inaadalan maglingkod ki Jehova bako sanang huli ta habo niang malaglag sa Armagedon kundi huli ta namomotan nia sia. Paagi sa pagtabang sa saiya na magkaigwa nin siring kadalisay na motibo, kamo magtotogdok nin dai nasosolo an materyales na makatatagal sa mga pagbalo sa saiyang pagtubod. (1 Corinto 3:10-15) An salang motibo, arog baga kan ngana-nganang kamawotan na arogon kamo o an siisay man na ibang tawo, dai matao sa saiya kan kosog na labanan an mga impluwensiang bakong sa Kristiano ni kan kosog nin boot na gibohon an tama. Girumdoma, dai kamo magigin paratokdo nia sagkod lamang. Mantang may oportunidad kamo, sia maeenkaminar nindo na paorog nang paorog na magin dayupot ki Jehova paagi sa pagbasa kan Tataramon nin Dios aroaldaw asin paghorophorop manongod kaiyan. Sa paaging ini padagos niang ilalaog sa isip “an arogan nin ikararahay na mga tataramon” hale sa Biblia asin sa mga publikasyon na basado sa Biblia dawa haloy nang natapos an pakipag-adal nindo sa saiya.—2 Timoteo 1:13.
16. Paano nindo matotokdoan an inaadalan na mamibi gikan sa puso?
16 Matatabangan man nindo an inaadalan na magin mas dayupot ki Jehova paagi sa pagtotokdo sa saiya na mamibi gikan sa puso. Paano nindo magigibo ini? Tibaad puede nindong itokdo sa saiya an modelong pamibi ni Jesus, saka an dakol na bilog na pusong pamibi na nasusurat sa Biblia, arog baga kan mga yaon sa mga salmo. (Salmo 17, 86, 143; Mateo 6:9, 10) Saro pa, kun nadadangog kan saindong inaadalan an pamibi nindo sa pagpoon asin pagtapos kan pag-adal, mamamatean nia an saindong saboot para ki Jehova. Sa siring, maninigo na an saindong mga pamibi pirmeng magpabanaag nin sinseridad asin pagigin prangka, saka nin espirituwal asin emosyonal na pagkatimbang.
Paghihingoa na Iligtas an Saindong mga Aki
17. Paano matatabangan nin mga magurang an saindang mga aki na magdanay sa dana pasiring sa kaligtasan?
17 Siempre, kabilang sa mga gusto niatong iligtas an mga miembro kan satong pamilya. An dakol na aki nin Kristianong mga magurang sinsero asin “marigon sa pagtubod.” Pero an iba tibaad bakong hararom an pakagamot kan katotoohan sa saindang puso. (1 Pedro 5:9; Efeso 3:17; Colosas 2:7) An dakol sa mga hoben na ini tinatalikdan an Kristianong dalan kun sinda harani na o nakaabot na sa pagkanasa edad na. Kun kamo magurang, ano an magigibo nindo tangani na mainaan an posibilidad nin siring na resulta? Enot, puede nindong hingoahon na magkaigwa nin nakararahay na kamugtakan sa laog kan pamilya. An marahay na buhay pampamilya nagbubugtak kan pundasyon para sa tamang punto de vista sa autoridad, pag-apresyar sa tamang mga prinsipyo sa buhay, asin maogmang relasyon sa iba. (Hebreo 12:9) Sa siring, an dayupot na relasyon sa laog kan pamilya puedeng magin pinakasabogan na dian puedeng tumubo an pakikikatood nin aki ki Jehova. (Salmo 22:10) An marigon na mga pamilya iribaiba sa mga aktibidad—dawa kun kaipuhan na isakripisyo nin mga magurang an panahon na magagamit sa personal na pakinabang. Sa paaging ini matotokdoan nindo an saindong mga aki paagi sa halimbawa na gumibo nin tamang mga desisyon sa buhay. Mga magurang, an pinakakaipuhan sa saindo kan saindong mga aki, bakong materyal na mga bentaha, kundi kamo—an saindong panahon, kosog, asin pagkamoot. Itinatao daw nindo sa saindong mga aki an mga bagay na ini?
18. Anong klaseng mga hapot an dapat na tabangan nin mga magurang an saindang mga aki na maresolberan?
18 Dapat na nungka na honaon nin Kristianong mga magurang na an saindang mga aki natural sana na magigin mga Kristiano man. Si Daniel, sarong magurang sa kongregasyon asin ama nin lima, nagkomento: “Dapat na magtao nin panahon an mga magurang na tumabang na mahale an mga pagduda na dai malilikayan na napupurot kan saindang mga aki sa eskuelahan asin iba pang lugar. Dapat na mapasensia nindang tabangan an saindang mga aki na makua an simbag sa mga hapot na arog kan: ‘Totoo daw na kita nabubuhay sa panahon kan katapusan? Talaga daw na saro sana an tunay na relihion? Taano ta bakong marahay na kaibaiba an sarong garo maboot man na kaklase? Pirme daw na sala na magdorog bago kasalon?’” Mga magurang, maaasahan nindo si Jehova na bendisyonan an saindong mga paghihingoa, ta sia interesado man sa ikararahay kan saindong mga aki.
19. Taano ta pinakamarahay na an mga magurang mismo an makipag-adal sa saindang mga aki?
19 An nagkapirang magurang tibaad maghona na kulang an kakayahan ninda pag-abot sa pakikipag-adal sa saindang mga aki. Minsan siring, dai nindo dapat na honaon an arog kaini, ta mayo nin nasa mas marahay na kamugtakan na tokdoan an saindong mga aki kisa saindo. (Efeso 6:4) An pakikipag-adal sa saindong mga aki matogot na maaraman mismo nindo kun ano an nasa saindang puso asin isip. An sainda daw na mga pananaram odok sa puso o mekanikal? Talaga daw na tinutubod ninda an saindang nanonodan? Tunay daw si Jehova para sa sainda? Maaaraman sana nindo an simbag digdi asin sa iba pang mahalagang marhay na mga hapot kun kamo personal na makikipag-adal sa saindong mga aki.—2 Timoteo 1:5.
20. Paano magigibo nin mga magurang na nakagagayagaya asin kapakipakinabang an pampamilyang pag-adal?
20 Paano nindo mapagdadanay an saindong programa nin pampamilyang pag-adal oras na maponan nindo iyan? Si Joseph, sarong magurang sa kongregasyon asin ama nin aki pang lalaki saka babae, nagsasabi: “Kapareho nin gabos na pag-adal sa Biblia, an pampamilyang pag-adal maninigo na magin nakagagayagaya, bagay na inaantisipar nin gabos. Tangani na magibo iyan sa samong pamilya, dai kami puedeng magin sobra kaestrikto mapadapit sa oras. An pag-adal mi puedeng magsarong oras, alagad dawa kun may beses na dies minutos sana an panahon mi, nag-aadal pa man giraray kami. An sarong bagay na nagpapangyari na an samong pag-adal magin tampok na kabtang kan semana para sa mga aki iyo na iinaakto niamo an mga eksena sa My Book of Bible Stories.a An ibinubungang rarom nin pagkatudok sa isip asin pakasabot mas mahalagang marhay kisa kun pirang parapo an matapos niamo.”
21. Noarin matotokdoan nin mga magurang an saindang mga aki?
21 Siempre, an pagtotokdo sa saindong mga aki bako sanang sa pormal na mga panahon nin pag-adal. (Deuteronomio 6:5-7) An Saksi sa Tailandia na nasambitan sa kapinonan nagsasabi: “Nagigirumdoman ko nin buhay na buhay kun paano ako ipinag-iiba kaidto ni Tatay sa paghuhulit, sakay sa samong mga bisikleta, sagkod sa hararayong lugar kan teritoryo kan samong kongregasyon. Totoo nanggad na an marahay na halimbawa kan samong mga magurang asin an pagtotokdo ninda sa samo sa irarom nin gabos na kamugtakan an nakatabang sa samo na magdesisyon na lumaog sa bilog na panahon na ministeryo. Asin seguradong nagdanay sa sako an mga leksion na idto ta sagkod ngonyan naghuhulit pa ako sa hararayong lugar kan langtad!”
22. Ano an ibubunga kan saimong ‘pag-atender sa saimo man sana asin sa saimong pagtotokdo’?
22 Dai na mahahaloy, sa tamang-tamang panahon, si Jesus madatong sa paggibo kan paghokom nin Dios sa sistemang ini. Dangan an dakulang pangyayaring iyan mapapaiba sa kasaysayan kan uniberso, alagad an fiel na mga lingkod ni Jehova magpapadagos sa paglilingkod sa saiya na tinatanaw an daing sagkod na kaligtasan. Naglalaom daw kamo na mapabilang sa sainda, kaiba an saindong mga aki asin inaadalan sa Biblia? Kun siring girumdoma: “Pirme mong atenderan an saimo man sana asin an saimong pagtotokdo. Magdanay ka sa mga bagay na ini, huli ta sa paggibo mo kaini ililigtas mo an saimo man sana sagkod idtong naghihinanyog sa saimo.”—1 Timoteo 4:16.
[Nota sa Ibaba]
a Ipinublikar kan Watchtower Bible and Tract Society of New York, Inc.
Ikapaliliwanag daw Nindo?
• Ano an maninigong magin aktitud niato, mantang dai niato aram an eksaktong panahon kan paghokom nin Dios?
• Sa anong mga paagi na satong ‘maaatenderan an satong pagtotokdo’?
• Paano nindo matatabangan an sarong inaadalan na magin katood ni Jehova?
• Taano ta mahalaga na an mga magurang magtao nin panahon sa pagtotokdo sa saindang mga aki?
[Ritrato sa pahina 15]
An pakanood nadadagdagan nin may dignidad alagad makikatood na kamugtakan
[Ritrato sa pahina 18]
An pag-akto kan mga estorya sa Biblia, arog baga kan paghokom ni Salomon sa duwang patotot, ginigibong nakagagayagaya an mga pampamilyang pag-adal