Tabangan an Tinutukduan sa Bibliya na Mag-uswag Asin Magpabawtismo—Ikaduwang Kabtang

1. Paano niyato naaraman na sarong nagliligtas-buhay na gibuhon an paggibo nin disipulo?

AN PAGGIBO nin disipulo sarong nagliligtas-buhay nanggad na gibuhon! Paano niyato naaraman iyan? Kan itao ni Jesus an pagbuot na nasa Mateo 28:19, 20, sinabi niya: “Padumán kamo asin gumibo kamo nin mga disipulo . . . na binabawtismuhan sinda.” Gurano kahalaga na magpabawtismo? Kahagadan iyan para sa mga gustong makaligtas. An kandidato sa bawtismo dapat na nagtutubod na nagin posible sana an kaligtasan na iyan huling nagadan si Jesus bilang atang asin binuhay liwat. Iyan an dahilan kaya sinabi ni apostol Pedro sa mga kapwa Kristiyano: “[An] bawtismo iyo man ngunyan an nagliligtas sa saindo . . . paagi sa pagkabuhay liwat ni Jesu-Cristo.” (1 Ped. 3:21) Kaya pag may bagong disipulo na nagpabawtismo, nagkakaigwa siya nin paglaom na makamtan an buhay na daing katapusan.

2. Ano an dinadagka sa sato kan 2 Timoteo 4:1, 2 bilang mga paratukdo?

² Para makagibo nin mga disipulo, kaipuhan niyatong manudan an “mahusay na paagi nin pagtutukdo.” (Basahon an 2 Timoteo 4:1, 2.) Taano? Huling ipinagbuot sa sato ni Jesus: “Padumán kamo asin gumibo kamo nin mga disipulo . . . na tinutukduan sinda.” Sinabi ni apostol Pablo na “magin matiyaga” sa gibuhon na iyan, “huling sa paggibo mo kaini maililigtas mo an saimong sadiri pati na idtong mga nagdadangog sa saimo.” Kaya may marahay na dahilan si Pablo kan sabihon niya: “Danay mong tawan nin atensiyon . . . an saimong itinutukdo.” (1 Tim. 4:16) Huling an pagtutukdo konektado sa paggibo nin disipulo, gusto niyatong magin mahusay sa satong pagtutukdo.

3. Sa artikulong ini, ano an pag-uulayan ta manungod sa pagkondukta nin mga pag-adal sa Bibliya?

³ Regular niyatong itinutukdo sa minilyon na tawo an mga katotoohan na nasa Bibliya. Pero arog kan sinabi sa sinundan na artikulo, gusto niyatong maaraman kun paano ta matatabangan an dakul pa sa sainda na magin bawtisadong mga disipulo ni Jesu-Cristo. Sa artikulong ini, pag-uulayan ta an lima pang bagay na dapat gibuhon kan lambang paratukdo para tabangan an tinutukduan na umuswag asin magpabawtismo.

TUGUTAN AN BIBLIYA NA IYO AN MAGTUKDO

4. Taano ta dapat na magpugol sa sadiri an paratukdo pag nagkokondukta nin pag-adal sa Bibliya? (Hilingon an nota sa ibaba.)

⁴ Gustong-gusto ta an mga itinutukdo ta hali sa Tataramon nin Diyos. Kaya tibaad may tendensiya kita na magparataram nin dakul na bagay manungod diyan. Dawa arog kaiyan, pag nagkokondukta nin Pag-adal sa Torrengbantayan, Pag-adal sa Bibliya kan Kongregasyon, o nin pag-adal sa Bibliya, an konduktor dai dapat na magparataram na marhay. Para tugutan an Bibliya na iyo an magtukdo, kaipuhan kan paratukdo na magpugol sa sadiri asin dai pagpurbaran na sabihon an gabos na aram niya manungod sa partikular na teksto o tema.b (Juan 16:12) Ikumparar an kaaraman mo sa Bibliya kan bawtismuhan ka asin ngunyan. Posibleng marhay na kaidto panginot na mga doktrina pa sana an nasasabutan mo. (Heb. 6:1) Kinaipuhan mo nin mga taon para manudan an mga aram mo na ngunyan, kaya dai pagpurbaran na itukdo nin sararuan sa bagong tinutukduan an gabos na aram mo.

5. (a) Kauyon kan 1 Tesalonica 2:13, ano an gusto niyatong masabutan kan satong tinutukduan sa saiyang pag-adal? (b) Paano niyato dadagkahon an sarong tinutukduan na iistorya an manungod sa mga nanunudan niya?

⁵ Gusto niyatong masabutan kan satong tinutukduan na an nanunudan niya hali sa ipinasabong na Tataramon nin Diyos. (Basahon an 1 Tesalonica 2:13.) Paano ta magigibo iyan? Dagkahon an tinutukduan na ipahayag an saiyang sabuot manungod sa mga nanunudan niya. Imbes na pirming ika an magpaliwanag kan mga teksto, sabihon sa tinutukduan na siya an magpaliwanag kan pira kaiyan. Tabangan an tinutukduan na mahiling kun paano aplikado sa saiya an Tataramon nin Diyos. Gumamit nin naggigiya asin punto de vistang mga hapot para maaraman kun ano an iniisip asin namamatian niya manungod sa mga tekstong binabasa niya. (Luc. 10:25-28) Halimbawa, haputon siya: “Paano nakatabang sa saimo an tekstong ini na mahiling an saro sa mga kuwalidad ni Jehova?” “Paano ka makikinabang sa katotoohan na ini sa Bibliya?” “Ano an namamatian mo manungod sa nanudan mo pa sana?” (Tal. 20:5) An pinakamahalaga bako kun gurano kadakul an aram kan tinutukduan, kundi kun gurano niya pinapahalagahan asin inaaplikar an mga aram niya.

6. Taano ta marahay na iiba sa pagkondukta nin pag-adal sa Bibliya an sarong eksperyensiyadong paratukdo?

⁶ Pag nagkokondukta nin pag-adal sa Bibliya, iniiba mo daw an mga parahayag na eksperyensiyadong paratukdo? Kun iyo, puwede mo sindang haputon kan obserbasyon ninda sa paagi mo nin pagkondukta nin pag-adal asin kun baga nagagamit mong marhay an Bibliya sa pagtukdo. Kaipuhan mong magin mapakumbaba para mapauswag an mga kakayahan mo sa pagtukdo. (Ikumparar an Gibo 18:24-26.) Pagkatapos, haputon an eksperyensiyadong parahayag kun sa hiling niya nasasabutan kan tinutukduan an katotoohan na nanunudan kaini. Puwede mo man na pakiulayan an parahayag na iyan na iyo nguna an magkondukta nin pag-adal kun mahali ka nin saro o labi pang semana. Paagi kaiyan, magdadanay na regular an pag-adal niya asin maiduduon kaiyan sa tinutukduan an kahalagahan kan pag-adal niya. Dai nanggad pag-isipon na Bible study “mo” siya asin mayo nin iba na puwedeng magkondukta saiya. Tutal, an gusto mo iyo an pinakaikakarahay kan tinutukduan mo tanganing padagos niyang manudan nin urog pa an katotoohan.

MAGTUKDO NIN MAY ENTUSIYASMO ASIN KUMBIKSIYON

7. Ano an makakatabang sa sarong tinutukduan na magin mas interesado sa nanunudan niya?

⁷ Kaipuhan na mahiling kan tinutukduan an saimong entusiyasmo asin madangog an saimong kumbiksiyon manungod sa mga katotoohan na yaon sa Bibliya. (1 Tes. 1:5) Paagi kaiyan, posibleng marhay na magigin mas interesado siya sa nanunudan niya. Kun angay, iistorya saiya kun paano personal na nakatabang sa saimo an pamumuhay kauyon kan mga prinsipyo sa Bibliya. Paagi kaiyan, mahihiling niya na an Bibliya igwa nin praktikal na mga giya na makakatabang man saiya.

8. Ano pa an puwede mong gibuhon para matabangan an saimong tinutukduan, asin ano an pakinabang kaiyan?

⁸ Durante kan saindong pag-adal, isaysay sa tinutukduan mo an halimbawa kan iba na napaatubang sa mga problemang kaagid kan sa saiya asin napangganahan iyan. Puwede mong iiba sa pag-adal an sarong tugang sa kongregasyon na an halimbawa puwedeng magin kapaki-pakinabang sa tinutukduan. O puwede kang maghanap nin nakakapakusog na mga eksperyensiya sa jw.org/bcl sa seryeng “Binago kan Bibliya an Saindang Buhay.”c An siring na mga artikulo asin video makakatabang sa tinutukduan mo na mahiling na madunong nanggad kun isasabuhay niya an mga prinsipyo sa Bibliya.

9. Paano mo dadagkahon an sarong tinutukduan na ihiras sa saiyang pamilya asin mga amigo an mga nanunudan niya?

⁹ Kun an tinutukduan may agom, nakikipag-adal man daw an agom niya? Kun dai, imbitaran ini na mag-iba sa pag-adal. Dagkahon an saimong tinutukduan na ihiras sa saiyang mga kapamilya asin amigo an mga nanunudan niya. (Juan 1:40-45) Paano? Puwede mo siyang haputon: “Paano mo ipapaliwanag sa pamilya mo an katotoohan na ini?” o “Anong teksto an gagamiton mo para patunayan ini sa saimong amigo?” Paagi kaiyan, masasanay mo an tinutukduan na magin paratukdo. Dangan pag nagin kuwalipikado siya, puwede na siyang makikabtang sa ministeryo bilang bakong bawtisadong parahayag. Puwede mong haputon an tinutukduan kun may aram siyang siisay man na gustong mag-adal nin Bibliya. Kun igwa, kontakon tulos an tawong iyan asin alukan nin pag-adal. Ipahiling saiya an video na Paano Ginigibo an Pag-adal sa Bibliya?d

DAGKAHON AN TINUTUKDUAN NA MAGKAIGWA NIN MGA AMIGO SA KONGREGASYON

10. Arog kan ilinadawan sa 1 Tesalonica 2:7, 8, paano maaarog nin sarong paratukdo si Pablo?

¹⁰ Dapat na magpahiling an mga paratukdo nin tunay na personal na interes sa saindang mga tinutukduan. Isipon na magigin tugang mo sinda sa espirituwal. (Basahon an 1 Tesalonica 2:7, 8.) Bakong madali para sa sainda na bayaan an mga amigo ninda sa kinaban asin na gibuhon an gabos na kinakaipuhan na pagbabago para maglingkod ki Jehova. Kaipuhan niyatong tabangan sinda na makahanap nin tunay na mga amigo sa kongregasyon. Magin amigo sa saimong tinutukduan paagi sa pagtao saiya nin panahon bako sana sa pag-adal nindo nin Bibliya kundi pati man sa iba pang mga pagkakataon. An pag-apod saiya, pag-text, o halipot na pagdalaw dawa pag bako nindong iskedyul sa pag-adal nagpapahiling na nagmamalasakit ka talaga sa saiya.

11. Ano an gusto niyatong mahanap kan satong mga tinutukduan sa laog kan kongregasyon, asin taano?

¹¹ Uyon sa sarong kasabihan sa Aprika: “Kaipuhan an bilog na baryo para padakulaon an sarong aki.” Sa kaagid na paagi, masasabi ta man: “Kaipuhan an bilog na kongregasyon para makagibo nin sarong disipulo.” Iyan an dahilan kaya an epektibong mga paratukdo nin Bibliya ipinapabisto an saindang mga tinutukduan sa iba pang mga tugang sa kongregasyon na puwedeng magkaigwa nin marahay na impluwensiya sa sainda. Paagi kaiyan makakaiba-iba kan mga tinutukduan an mga lingkod nin Diyos, na makakatao sa sainda nin espirituwal na tabang asin pampakusog nin buot pag may problema sinda. Gusto niyatong mamatian kan lambang tinutukduan na parte siya kan kongregasyon asin kan satong espirituwal na pamilya. Gusto niyatong maparani siya sa satong mamumuton na Kristiyanong kasararuan nin magturugang. Dangan magigin mas pasil na sa saiya na ipundo an pakikiamigo sa mga tawong dai nakakatabang sa saiya na mamutan si Jehova. (Tal. 13:20) Kun habuan siya kan mga dati niyang amigo, aram niya na makakahanap siya nin tunay na mga amigo sa organisasyon ni Jehova.—Mar. 10:29, 30; 1 Ped. 4:4.

IDUON AN PASUHAN NA MAGDUSAY ASIN MAGPABAWTISMO

12. Taano ta dapat niyatong ipakipag-ulay sa satong tinutukduan an manungod sa Kristiyanong pagdusay asin bawtismo?

¹² Kaipuhan na parati mong ipakipag-ulay kun gurano kahalaga sa saro na idusay an saiyang buhay ki Jehova asin magpabawtismo. Tutal, an pasuhan ta sa pagkondukta nin pag-adal sa Bibliya iyo na tabangan an sarong tawo na magin bawtisadong disipulo. Sa laog nin pirang bulan nin regular na pag-adal sa Bibliya asin lalo na pag nagpuon nang mag-atender sa mga pagtiripon an tinutukduan, dapat niyang masabutan na an katuyuhan kan pag-adal sa Bibliya iyo na tabangan siyang magpuon na maglingkod ki Jehova bilang saro sa mga Saksi Niya.

13. Anong mga lakdang an ginigibo nin sarong tinutukduan mantang nag-uuswag siya pasiring sa bawtismo?

¹³ Paagi sa paggibo nin nagkapirang lakdang, maaabot nanggad nin sarong sinserong tinutukduan sa Bibliya an pasuhan na magpabawtismo! Inot, an tinutukduan mamimidbid asin mamumutan si Jehova asin matubod sa Saiya. (Juan 3:16; 17:3) Dangan an tinutukduan magkakaigwa nin personal na relasyon ki Jehova asin makikiasosyar na sa mga tugang sa kongregasyon. (Heb. 10:24, 25; Sant. 4:8) Pag-abot nin panahon, ipupundo na kan tinutukduan an maraot niyang mga gibo asin pagsusulsulan an saiyang mga kasalan. (Gibo 3:19) Kasabay kaiyan, papahiruon siya kan saiyang pagtubod na sabihon sa iba an katotoohan. (2 Cor. 4:13) Dangan idudusay niya an saiyang sadiri ki Jehova asin sisimbolisaran iyan paagi sa pagpabawtismo. (1 Ped. 3:21; 4:2) Asin magigin nakakaugmang aldaw nanggad iyan para sa gabos! Mantang ginigibo kan tinutukduan an lambang lakdang pasiring sa saiyang pasuhan, parati siyang tawan nin sinserong komendasyon asin dagkahon siya na ipadagos an paggibo kaiyan.

REGULAR NA EBALWARON AN PAG-USWAG KAN TINUTUKDUAN

14. Paano eebalwaron nin sarong paratukdo an pag-uswag kan tinutukduan?

¹⁴ Kaipuhan niyatong magin mapasensiya sa pagtabang sa sarong tinutukduan na umuswag sagkod na siya magdusay asin magpabawtismo. Alagad kaipuhan niyatong aramon kun igwa siya kan pagmawot na maglingkod sa Diyos na Jehova. May nahihiling ka daw na mga senyales na hinihinguwa kan tinutukduan na sunudon an mga pagbuot ni Jesus? O gusto niya lang makanuod nin mga impormasyon hali sa Bibliya?

15. Anong mga indikasyon an dapat na estudyaran kan paratukdo para maaraman kun nag-uuswag an sarong tinutukduan?

¹⁵ Regular na analisaron an pag-uswag kan tinutukduan. Halimbawa, ipinapahayag niya daw an mga namamatian niya manungod ki Jehova? Namimibi daw siya ki Jehova? (Sal. 116:1, 2) Gustong-gusto niya daw an pagbasa sa Bibliya? (Sal. 119:97) Regular daw siyang nag-aatender sa mga pagtiripon? (Sal. 22:22) Naggibo na daw siya nin ano man na kinakaipuhan na mga pagbabago sa saiyang istilo nin pamumuhay? (Sal. 119:112) Ihinihiras niya na daw sa saiyang pamilya asin mga amigo an mga nanunudan niya? (Sal. 9:1) An pinakamahalaga, gusto niya daw na magin saro sa mga Saksi ni Jehova? (Sal. 40:8) Kun an tinutukduan dai nag-uuswag sa arin man sa mga bagay na ini, mataktikang aramon kun taano dangan ipakipag-ulay iyan sa saiya sa mabuot pero prangkang paagi.e

16. Ano an puwedeng magparisa na dapat nang ipundo an pag-Bible study sa sarong tinutukduan?

¹⁶ Regular na ebalwaron kun baga dapat mong ipagpadagos an pakikipag-adal sa saro. Haputon an sadiri: ‘Nagpepreparar daw an tinutukduan para sa pag-adal? Interesado daw siyang mag-atender sa mga pagtiripon? Ipinundo niya na daw an mga bisyo niya? Naghali na daw siya sa palsong relihiyon?’ Kun an simbag diyan dai, an pagpadagos kan pagtukdo sa saiya garo man sana pagtukdong maglangoy sa saro na habo man mabasâ! Kun dai talaga pinapahalagahan kan tinutukduan an mga nanunudan niya asin dai siya andam na gumibo nin mga pagbabago, ano ta ipagpapadagos mo pa an pakikipag-adal saiya?

17. Tanganing danay tang matawan nin atensiyon an satong pagtutukdo arog kan sinasabi sa 1 Timoteo 4:16, ano an dapat na gibuhon kan gabos na paratukdo sa Bibliya?

¹⁷ Sineseryoso niyato an satong responsabilidad na gumibo nin mga disipulo, asin gusto niyatong tabangan an satong mga tinutukduan sa Bibliya na umuswag asin magpabawtismo. Iyan an dahilan kaya tutugutan niyato an Bibliya na iyo an magtukdo asin matukdo kita nin may entusiyasmo asin kumbiksiyon. Dadagkahon niyato an tinutukduan na magkaigwa nin mga amigo sa laog kan kongregasyon. Asin iduduon niyato an pasuhan na magdusay asin magpabawtismo, saka regular niyatong eebalwaron an pag-uswag kan tinutukduan. (Hilingon an kahon na “Kun Ano an Kaipuhan na Gibuhon kan mga Paratukdo Para Giyahan an mga Tinutukduan Pasiring sa Bawtismo.”) Ikinakaugma nanggad niyato na puwede kitang makikabtang sa nagliligtas-buhay na gibuhon na ini! Lugod na magin determinado kita na gibuhon an satong pinakamakakaya para tabangan an satong mga tinutukduan sa Bibliya na makuwalipikar sa bawtismo.