Tabangan an Saimong Tinutukduan sa Bibliya na Magin Bawtisadong Disipulo

1. Ano an ipinagibo sa sarong dakulang grupo kan inot na siglo?

NAGTIRIPON an sarong dakulang grupo nin mga lalaki saka babayi hali sa manlain-lain na nasyon asin lengguwahe. May pambihirang nangyari kan aldaw na iyan. Sarong grupo nin ordinaryong mga Judio an bigla na sanang nakakataram na kan kinagimatan na mga lengguwahe kan mga bisita! Makangangalas talaga iyan, pero mas makangangalas an sinasabi sa sainda kan mga Judiong idto asin an sinabi ni apostol Pedro sa gabos. Kaiba diyan an mensaheng makakaligtas sinda paagi sa pagpahiling nin pagtubod ki Jesu-Cristo. Dakula an nagin epekto kan mensaheng iyan sa grupong idto. Napahiro sinda kaiyan na marhay kaya naghapot sinda: “Ano an gigibuhon mi?” Nagsimbag si Pedro: “Magpabawtismo an lambang saro sa saindo.”—Gibo 2:37, 38.

2. Ano an pag-uulayan ta sa artikulong ini? (Hilingon an ritrato sa cover.)

² Makangangalas an sunod na nangyari. Mga 3,000 katawo an nagpabawtismo kan aldaw na idto asin nagin mga disipulo ni Cristo. Iyan an kapinunan kan sarong dakulang gibuhon na ipinagbuot ni Jesus sa mga parasunod niya—an paggibo nin mga disipulo. Ginigibo iyan kan mga parasunod niya sagkod ngunyan. Sa panahon ta, mayo nin tawong nagigin andam nang magpabawtismo pagkatapos lang nin mga pirang oras na pakikipag-ulay saiya. Tibaad mangaipo nin mga pirang bulan o sarong taon o labi pa ngani para maabot nin sarong tinutukduan an pasuhan na iyan. Kaipuhan nin pagmamaigot sa paggibo nin mga disipulo—siguradong aram mo iyan kun may tinutukduan ka ngunyan sa Bibliya. Sa artikulong ini, pag-uulayan ta kun ano an puwede mong gibuhon para tabangan an tinutukduan mo sa Bibliya na magin bawtisadong disipulo.

TABANGAN AN TINUTUKDUAN MO SA BIBLIYA NA IAPLIKAR AN MGA NANUNUDAN NIYA

3. Arog kan ipinapahiling sa Mateo 28:19, 20, ano an dapat na gibuhon kan tinutukduan para umuswag siya sagkod na magpabawtismo?

³ Bago magpabawtismo, dapat na iaplikar kan Bible study an mga itinutukdo kan Bibliya. (Basahon an Mateo 28:19, 20.) Pag inaaplikar kan tinutukduan an mga nanunudan niya, nagigin arog siya kan “mapagmansay na lalaki” sa ilustrasyon ni Jesus na nagkalot nin hararom para itugdok an harong niya sa ibabaw nin gapo. (Mat. 7:24, 25; Luc. 6:47, 48) Paano ta matatabangan an tinutukduan na iaplikar an mga nanunudan niya? Pag-ulayan ta an tulong suhestiyon.

4. Paano ta matatabangan an tinutukduan na dagos-dagos na umuswag sagkod na mabawtismuhan? (Hilingon man an kahon na “Tabangan an Saimong Tinutukduan na Magkaigwa nin mga Pasuhan Asin Abuton Iyan.”)

⁴ Tabangan an saimong tinutukduan na magkaigwa nin mga pasuhan. Taano? Pag-isipan an ilustrasyon na ini: Kun mabiyahe ka nin halawig, tibaad maisipan mo na marahay na maghapit sa interesanteng mga lugar. Paagi kaiyan, dai mo mamatian na harayuon an destinasyon mo. Sa kaagid na paagi, pag an tinutukduan mo igwa nin mga pasuhan na maaabot niya sa halipot na panahon, posibleng marhay na mamamatian niyang kayang-kaya niyang abuton an pasuhan na magpabawtismo. Gamiton an feature na “Gibuhon Ini” sa librong Mabuhay nin Maugma Sagkod Pa Man! para tabangan an saimong tinutukduan na umuswag. Sa katapusan kan lambang leksiyon, pag-ulayan kun paano konektado an pasuhan sa nanudan pa sana kan saimong tinutukduan. Kun may naiisip kang ibang pasuhan para sa tinutukduan mo, isurat iyan sa blangko na may label na “Iba pa.” Regular na gamiton an porsiyon na ini kan pag-adal para repasuhon sa saimong tinutukduan an mga pasuhan na maaabot niya sa halipot na panahon asin idtong mga haloy bago niya maabot.

5. Arog kan mababasa sa Marcos 10:17-22, ano an ipinagibo ni Jesus sa sarong mayaman na lalaki, asin taano?

⁵ Tabangan an saimong tinutukduan na gumibo nin mga pagbabago sa saiyang buhay. (Basahon an Marcos 10:17-22.) Aram ni Jesus na magigin dipisil sa sarong mayaman na lalaki na ipabakal an gabos niyang pagsadiri. (Mar. 10:23) Alagad, sinabi ni Jesus sa lalaki na gibuhon an dakulang pagbabagong iyan sa saiyang buhay. Taano? Dahil namumutan siya ni Jesus. Kun minsan, tibaad mag-alangan kitang dagkahon an sarong tinutukduan na iaplikar an mga nanunudan niya dahil ta para sato dai pa siya andam na gibuhon an sarong kinakaipuhan na pagbabago. Tibaad mangaipo nin panahon para magibo nin saro an mga pagbabagong iyan asin isulot an bagong personalidad. (Col. 3:9, 10) Pero kun mas amay mong ipapakipag-ulay iyan saiya, mas amay man siyang mapuon na gumibo nin mga pagbabago. Paagi sa pakikipag-ulay saiya manungod diyan, ipinapahiling mong nagmamalasakit ka saiya.—Sal. 141:5; Tal. 27:17.

6. Taano ta dapat kitang maggamit nin punto de-vistang mga hapot?

⁶ Paagi sa punto de-vistang hapot, maaaraman ta an opinyon o iniisip kan tinutukduan manungod sa sarong tema. Gamiton an hapot na iyan para maaraman kun ano an nasasabutan asin pinaniniwalaan kan saimong tinutukduan. Kun regular mong gigibuhon iyan, magigin mas pasil saimo na ipakipag-ulay saiya an sensitibong mga tema pag-abot nin panahon. Dakul nin punto de-vistang hapot sa librong Mabuhay nin Maugma Sagkod Pa Man! Halimbawa, sa leksiyon 04 yaon an hapot na: “Sa hiling mo, ano an mamamatian ni Jehova pag inapod mo siya sa saiyang pangaran?” Sa leksiyon 09 yaon an hapot na: “Ano an pira sa mga gusto mong ipamibi?” Sa primero, tibaad madipisilan an tinutukduan mo na masimbag an mga punto de-vistang hapot. Matatabangan mo siya paagi sa pagsanay saiya na mangatanusan gamit an konektadong mga teksto pati man an mga ritrato.

7. Paano ta epektibong magagamit an mga eksperyensiya?

⁷ Pag nasasabutan na kan tinutukduan mo an kaipuhan niyang gibuhon, gumamit nin mga eksperyensiya para dagkahon siya na gibuhon iyan. Halimbawa, kun dai siya regular na nag-aatender sa mga pagtiripon, puwede mong ipahiling saiya an videong Nagmamalasakit Sako si Jehova na nasa seksiyon na “Hilingon Man” kan leksiyon 14. Sa dakul sa mga leksiyon sa librong Mabuhay nin Maugma Sagkod Pa Man!, makakahiling ka nin mga eksperyensiya sa seksiyon na “Aramon Pa” o sa “Hilingon Man.”b Likayan na ikumparar sa iba an saimong tinutukduan paagi sa pagsabing, “Kun kaya niya ’yan, di kaya mo man ’yan.” Pabayaing an tinutukduan an makarealisar kaiyan. Imbes, pag-ulayan an espesipikong mga punto na nakatabang sa tugang na nasa video na iaplikar an mga tukdo kan Bibliya. Puwede kang magsambit nin sarong mahalagang teksto o sarong praktikal na lakdang na ginibo. Nuarin man posible, iduon kun paano tinabangan ni Jehova an tugang na nasa video.

8. Paano ta matatabangan an satong tinutukduan na mamutan si Jehova?

⁸ Tabangan an saimong tinutukduan na mamutan si Jehova. Paano? Maghanap nin mga oportunidad na matabangan mo siyang makanuod pa manungod sa mga kuwalidad ni Jehova. Tabangan siyang mansayon si Jehova bilang sarong maugmang Diyos na sinusuportaran an mga namumuot Saiya. (1 Tim. 1:11; Heb. 11:6) Ipahiling sa tinutukduan na makikinabang siya sa mga nanunudan niya, asin ipaliwanag na an mga pakinabang na iyan nagpapahiling na namumutan siya ni Jehova. (Isa. 48:17, 18) Magigin mas determinado siyang gibuhon an ano man na kinakaipuhan na mga pagbabago mantang nagkukusog an pagkamuot niya ki Jehova.—1 Juan 5:3.

IPABISTO AN TINUTUKDUAN MO SA SAIMONG MGA KAPWA PARASAMBA

9. Kauyon kan Marcos 10:29, 30, ano an makakatabang sa saro na gibuhon an kinakaipuhan na mga pagsasakripisyo para magin bawtisadong disipulo?

⁹ Tanganing umuswag sagkod na magpabawtismo, kaipuhan kan tinutukduan na gumibo nin mga pagsasakripisyo. Arog kan mayaman na lalaki na sinambit kasubago, may mga tinutukduan na tibaad kaipuhan na isakripisyo an materyal na mga bagay. Kun an trabaho ninda kontra sa mga prinsipyo sa Bibliya, tibaad kaipuhanon pa ngani nindang magribay nin trabaho. Dakul na tinutukduan an tibaad kaipuhan na bayaan an mga amigo ninda na dai namumuot ki Jehova. An iba tibaad bayaan kan saindang mga kapamilya na habo sa mga Saksi ni Jehova. Sinabi ni Jesus na tibaad madipisilan an iba na gibuhon an mga pagsasakripisyong iyan. Pero nanuga siya sa mga parasunod niya na dai masasayang an gabos na ginibo nindang iyan. Tatawan sinda nin abundang balos—sarong mamumuton na pamilya sa espirituwal. (Basahon an Marcos 10:29, 30.) Paano mo matatabangan an saimong tinutukduan na makinabang sa magayunon na regalong ini?

10. Ano an nanudan mo sa eksperyensiya ni Manuel?

¹⁰ Amiguhon an saimong tinutukduan. Mahalaga na ipahiling mo sa saimong tinutukduan na nagmamalasakit ka saiya. Taano? Mangnuhon an sinabi ni Manuel, na taga Mexico. Nagigirumduman niya kaidtong Bible study pa sana siya: “Bago an kada sesyon nin pag-adal mi, kinukumusta nguna ako kan nagtutukdo sako. Tinatabangan niya akong magin relaks tapos maski anong nasa isip ko puwede kong iistorya saiya. Mati-mati kong nagmamalasakit siya sako.”

11. Paano puwedeng makinabang an satong mga tinutukduan pag tinatawan ta sinda nin panahon?

¹¹ Magtao nin panahon sa mga tinutukduan mo, arog kaidto ni Jesus sa mga parasunod niya. (Juan 3:22) Kun naggigibo na nin mga pagbabago sa saiyang buhay an tinutukduan mo sa Bibliya, tibaad nasa kamugtakan kang imbitaran siya sa harong nindo para magkape-kape o magkakan o maghiling nin saro sa mga bulanan na video sa JW Broadcasting^®. Posibleng lalo nang maaapresyar kan tinutukduan mo an imbitasyon na iyan pag nagseselebrar an mga amigo saka kapamilya niya nin mga piyesta opisyal na sa panahon na iyan posibleng namamatian niyang nagsosolo siya. “Nakanuod ako manungod ki Jehova bako lang pag nagba-Bible study kami kan nagtutukdo sako kundi pati man pag magkaibanan kami sa ibang panahon,” an sabi ni Kazibwe, na nakaistar sa Uganda. “Nahiling ko kun gurano nagmamalasakit si Jehova sa mga lingkod niya saka kun gurano sinda kaugma. Arog kaiyan na buhay an gusto ko.”

12. Taano ta dapat na mag-iba kita nin manlain-lain na parahayag sa pag-Bible study?

¹² Imbitaran an manlain-lain na parahayag sa pag-Bible study. Kun minsan, tibaad para saimo mas madali kun ika lang o kun kamo lang kan iyo man sanang parahayag an pirming magkaibanan sa pagkondukta. Puwedeng mas kumbenyente iyan, pero posibleng marhay na makakatabang sa tinutukduan kun sa pana-panahon maiba ka nin manlain-lain na parahayag. “May ibang paagi nin pagpaliwanag sa mga bagay-bagay an lambang parahayag na nag-iiba sa pag-Bible study sako,” an sabi ni Dmitrii, na taga Moldova. “Nakatabang iyan sako na hilingon sa iba-ibang anggulo an pinag-aadalan mi. Tapos dai ako gayong nasupog kan primerong beses akong mag-atender sa pagtiripon ta dakul na akong bistong tugang.”

13. Taano ta dapat tang tabangan an satong tinutukduan na umatender sa mga pagtiripon?

¹³ Tabangan an saimong tinutukduan na umatender sa mga pagtiripon kan kongregasyon. Taano? Dahil ipinagbuot ni Jehova sa saiyang mga parasamba na magtiripon; parte iyan kan satong pagsamba. (Heb. 10:24, 25) Dugang pa, pamilya ta sa espirituwal an satong mga tugang. Pag nasa mga pagtiripon kita kaiba ninda, garo man sana kita magkairibanan sa harong asin nagkakakan nin masiramon na mga kakanon. Pag tinatabangan mo an tinutukduan mo sa Bibliya na umatender sa mga pagtiripon, tinatabangan mo siyang gibuhon an saro sa pinakamahalagang lakdang pasiring sa bawtismo. Pero tibaad masakitan siyang gibuhon iyan. Paano makakatabang an publikasyon na Mabuhay nin Maugma Sagkod Pa Man! na malampasan kan tinutukduan mo an ano man na kadipisilan na tibaad mapaatubang saiya?

14. Paano ta mapapahiro an satong tinutukduan na umatender sa mga pagtiripon?

¹⁴ Gamiton an leksiyon 10 kan librong Mabuhay nin Maugma Sagkod Pa Man! para mapahiro an saimong tinutukduan. An eksperyensiyadong mga parahayag na pinakiulayan na testingon an leksiyon na ini bago iluwas an libro nagin epektibong marhay sa pagtabang sa mga tinutukduan ninda na umatender sa mga pagtiripon. Siyempre, dai mo na paghalaton na makaabot sa leksiyon 10 bago mo imbitaran an tinutukduan mo sa Bibliya na umatender sa satong mga pagtiripon. Imbitaran siya sa lalong madaling panahon saka regular na gibuhon iyan. An lambang tinutukduan sa Bibliya may magkakalain na problema. Kaya aramon an mga pangangaipo kan saimong tinutukduan, asin hilingon kun makakatao ka nin praktikal na tabang. Dai madisganar kun medyo nahahaloy bago siya umatender. Magin mapasensiya pero padagos siyang imbitaran.

TABANGAN AN SAIMONG TINUTUKDUAN NA DAI MATAKOT

15. Ano an posibleng mga ikinakatakot kan satong tinutukduan?

¹⁵ Medyo natakot ka daw kaidto na magin saro sa mga Saksi ni Jehova? Tibaad namatian mong dai mo lamang makakayang maghulit sa publiko. O siguro natakot ka na tibaad kontrahon ka kan mga kapamilya o amigo mo. Kun iyo, masasabutan mo an namamatian kan tinutukduan mo sa Bibliya. Sinabi ni Jesus na puwedeng magkaigwa nin arog kaiyan na takot an mga tawo. Dawa arog kaiyan, dinagka niya an mga parasunod niya na dai pagtugutan an takot na papunduhon sinda sa paglilingkod ki Jehova. (Mat. 10:16, 17, 27, 28) Paano tinabangan ni Jesus an mga parasunod niya na dai matakot? Asin paano mo siya maaarog?

16. Paano ta sasanayon an satong tinutukduan na sabihon sa iba an mga nanunudan niya?

¹⁶ Luway-luway na tabangan an saimong tinutukduan na sabihon sa iba an mga nanunudan niya. Posibleng ninerbiyos an mga disipulo ni Jesus kan isugo niya sinda na maghulit. Pero tinabangan sinda ni Jesus paagi sa pagsabi kun sain sinda mahulit saka kun anong mensahe an ihuhulit ninda. (Mat. 10:5-7) Paano mo maaarog si Jesus? Tabangan an saimong tinutukduan kun sain siya puwedeng maghulit. Halimbawa, haputon siya kun may bisto siyang puwedeng makinabang sa sarong partikular na katotoohan sa Bibliya. Tapos tabangan siya sa paghanda kan sasabihon niya paagi sa pagpahiling saiya nin simpleng paagi kun paano sasabihon sa iba an katotoohan na iyan. Pag angay, puwede kamong magpraktis gamit an feature na “May mga Nagsasabi” asin “Tibaad May Maghapot,” na nasa librong Mabuhay nin Maugma Sagkod Pa Man! Mantang ginigibo mo iyan, magpokus sa pagsasanay sa tinutukduan mo na gamiton an Bibliya para magtao nin simple asin mataktikang simbag.

17. Paano ta puwedeng gamiton an Mateo 10:19, 20, 29-31 para tabangan an satong tinutukduan na magtiwala ki Jehova?

¹⁷ Tabangan an saimong tinutukduan na magtiwala ki Jehova. Inasigurar ni Jesus an mga disipulo niya na tatabangan sinda ni Jehova dahil namumutan Niya sinda. (Basahon an Mateo 10:19, 20, 29-31.) Ipagirumdom sa tinutukduan na tatabangan man siya ni Jehova. Matatabangan mo siyang magtiwala ki Jehova paagi sa pagpamibi kaiba siya manungod sa mga pasuhan niya. “Pag namimibi an nagtutukdo sako, parati niyang iniiba an mga pasuhan ko,” an sabi ni Franciszek, na taga Poland. “Kan mahiling ko kun paano sinimbag ni Jehova an mga pamibi kan nagtutukdo sako, tulos na man akong nagpuon na mamibi. Namatian ko an tabang ni Jehova kan kinaipuhan kong maghagad nin day-off sa bago kong trabaho para makaatender sa mga pagtiripon saka kumbensiyon.”

18. Ano an namamatian ni Jehova manungod sa gibuhon na pagtutukdo kan mga Kristiyano?

¹⁸ Nagmamakulog na marhay si Jehova sa mga tinutukduan ta sa Bibliya. Aram niya kun gurano kasakit para sa mga nagkokondukta nin mga pag-adal sa Bibliya na tabangan an mga tawo na magin mas harani saiya, asin namumutan niya sinda dahil kaiyan. (Isa. 52:7) Kun mayo kang tinutukduan sa Bibliya ngunyan, makakatabang ka pa man giraray sa mga tinutukduan sa Bibliya na umuswag sagkod na mabawtismuhan paagi sa pag-iba sa ibang mga parahayag sa pag-Bible study ninda.