Bilang Kongregasyon, Tabangan an mga Tinutukduan sa Bibliya na Umuswag Sagkod na Mabawtismuhan

1-2. Sairisay an puwedeng tumabang sa mga tinutukduan sa Bibliya na umuswag sagkod na mabawtismuhan?

“GUSTONG-GUSTO ko an mga nanunudan ko pag nagba-Bible study,” an sabi ni Amy, na taga Fiji. “Aram ko na iyan an katotoohan. Pero saka lang ako naggibo kan kinakaipuhan na mga pagbabago tapos nag-uswag sagkod na magpabawtismo kan nakikiiba-iba na ako sa mga tugang.” Itinutukdo sato kan eksperyensiya ni Amy an mahalagang katotoohan na ini: Mas dakula an posibilidad na umuswag sagkod na mabawtismuhan an sarong tinutukduan sa Bibliya kun yaon an tabang kan iba sa laog kan kongregasyon.

² An lambang parahayag makakatabang na dumakula an kongregasyon. (Efe. 4:16) An payunir na si Leilani, na taga Vanuatu, nagsabi: “Sinasabi na kaipuhan an tabang kan bilog na baryo para mapadakula an sarong aki. Sa hiling ko, totoo man iyan sa paggibo nin mga disipulo; sa parati, kaipuhan an tabang kan bilog na kongregasyon para madara sa katotoohan an saro.” An mga kapamilya, amigo, saka mga titser gabos nakakatabang sa aki na magin adulto. Ginigibo ninda ini paagi sa pagpakusog kan buot kan aki asin pagtukdo saiya nin mahahalagang leksiyon. Kaagid kaiyan, puwedeng tawan nin sadol kan mga parahayag an mga tinutukduan sa Bibliya, pakusugon an buot ninda, asin magin marahay na halimbawa sainda. Paagi kaiyan, matatabangan ninda an mga tinutukduan na umuswag sagkod na mabawtismuhan.—Tal. 15:22.

3. Ano an manunudan mo sa sinabi ni Ana, Dorin, saka Leilani?

³ Taano ta ikakaugma kan nagkokondukta nin pag-adal sa Bibliya pag tinatabangan kan ibang mga parahayag an saiyang tinutukduan? Mangnuhon an sinabi ni Ana na sarong espesyal payunir sa Moldova: “Masakiton kun saro sana an nagtatabang sa sarong tinutukduan sa Bibliya pag nagpupuon na ining mag-uswag.” Sinabi ni Dorin na sarong espesyal payunir sa nasyon man sanang iyan, “Sa parati, may sinasabi an ibang mga parahayag na nakakapahiro sa puso kan tinutukduan, na siguro kun ako sana dai ko lamang maiisip.” May sinambit pang sarong dahilan si Leilani, “An pagkamuot saka pagpadangat na ipinapahiling ta sa tinutukduan puwedeng makatabang saiya na marealisar na kita talaga an mga lingkod ni Jehova.”—Juan 13:35.

4. Ano an pag-uulayan ta sa artikulong ini?

⁴ Tibaad maihapot mo, ‘Ano an maitatabang ko para umuswag an sarong tinutukduan sa Bibliya dawa bako man ako an nagkokondukta saiya?’ Pag-ulayan ta an puwede tang gibuhon pag inimbitaran kitang umiba sa pag-adal sa Bibliya asin an puwede tang gibuhon pag nagpuon na siyang mag-atender sa mga pagtiripon. Pag-uulayan ta man kun paano matatabangan kan mga elder an tinutukduan sa Bibliya na umuswag sagkod na mabawtismuhan.

PAG IINIBA KA SA PAG-ADAL SA BIBLIYA

5. Ano an papel mo pag inimbitaran kang umiba sa pag-adal sa Bibliya?

⁵ Sa pag-adal sa Bibliya, an paratukdo an may panginot na paninimbagan na tabangan an tinutukduan na masabutan an Tataramon nin Diyos. Kun imbitaran ka kan nagtutukdo, dapat mong isipon na kapartner ka niya. An papel mo iyo na suportaran siya. (Par. 4:9, 10) Ano an puwede mong gibuhon para magin marahay na kapartner kan nagkokondukta sa pag-adal sa Bibliya?

6. Pag maiba ka sa pag-adal sa Bibliya, paano mo iaaplikar an prinsipyo na nasa Talinhaga 20:18?

⁶ Mag-andam. Inot, maghagad sa nagtutukdo nin pirang impormasyon manungod sa tinutukduan. (Basahon an Talinhaga 20:18, NWT.) Puwede mong ihapot: “Puwede tabing mag-istorya ka manungod sa Bible study mo? Sain na kamo sa pinag-aadalan nindo? Ano an buot mong iduon sa pag-adal nindo? Ano an mga puwede saka dai ko puwedeng gibuhon o sabihon mantang nag-aadal? Ano an puwede kong gibuhon para mapahiro an tinutukduan na umuswag?” Siyempre, dai sasabihon kan nagtutukdo an ano man na kumpidensiyal na impormasyon, pero sasabihon niya an ano man na puwedeng makatabang. Ginigibo ini kan misyonerang si Joy sa mga nag-iiba saiya sa pag-Bible study. Sinabi niya: “An pag-uulay na ini nakakatabang sa kaiba ko na magin interesado sa tinutukduan saka maaraman kun ano an maitatabang niya sa pag-adal.”

7. Taano ta kaipuhan mong mag-andam kun maiba ka sa pag-adal sa Bibliya?

⁷ Kun inimbitaran ka sa pag-adal, magayon kun pag-aandaman mo an materyal na pag-aadalan. (Esd. 7:10) Si Dorin, na sinambit kasubago, nagsabi: “Naaapresyar ko pag nag-aandam para sa pag-adal an kaiba ko. Dahil diyan nakakatao siya nin kapaki-pakinabang na mga komento.” Apuwera kaiyan, posibleng marhay na maririsa kan tinutukduan na pareho kamong andam na marhay, asin magigin marahay na halimbawa iyan saiya. Dawa kun dai mo gayong mapag-aandaman an materyal, hinguwahon na kisiyera aramon an panginot na mga punto.

8. Paano mo masisiguradong makahulugan an pamibi na itatao mo sa pag-adal sa Bibliya?

⁸ An pamibi mahalagang parte kan sesyon sa pag-adal sa Bibliya, kaya patiinot na pag-isipan an sasabihon mo kun pakiulayan kang manginot sa pamibi. Paagi kaiyan, makakatao ka nin mas makahulugan na pamibi. (Sal. 141:2) Nagigirumduman pa ni Hanae, na nakaistar sa Japan, an mga pamibi kan sister na nag-iiba sa nagtutukdo sa saiya sa Bibliya. Sinabi niya: “Talagang namatian ko na dayupot siya ki Jehova, kaya gusto kong magin arog niya. Namatian ko man na namumutan niya ako pag iniiba niya sa mga pamibi niya an pangaran ko.”

9. Sigun sa Santiago 1:19, ano an puwede mong gibuhon para magin maaasahan na kapartner sa pag-adal sa Bibliya?

⁹ Alalayan an nagtutukdo mantang nagkokondukta siya. “An sarong maaasahan na kapartner nagsusubaybay sa pinag-aadalan,” an sabi ni Omamuyovbi, na sarong espesyal payunir sa Nigeria. “Nagtatao siya nin makahulugan na mga komento pero dai siya nagpaparataram na marhay dahil nasasabutan niyang an nagtutukdo an nanginginot.” Paano mo maaaraman kun nuarin asin kun paano makomento durante kan pag-adal? (Tal. 25:11) Magdangog na marhay mantang nagtataram an nagtutukdo saka an tinutukduan. (Basahon an Santiago 1:19.) Kun gigibuhon mo iyan, magigin andam kang umalalay kun angay. Siyempre, kaipuhan mo ngunang pag-isipan na marhay an sasabihon mo. Halimbawa, lilikayan mong magparataram nin sobra, magsaliot mantang nagpapaliwanag an nagtutukdo, o magbukas nin ibang tema. Pero paagi sa halipot na komento, ilustrasyon, o hapot, makakatabang ka na magin malinaw an punto na pigtutukar. Kun minsan, garo baga mayo ka na man maikokomento sa pag-adal. Pero kun kokomendaran mo an tinutukduan asin mapahiling nin personal na interes saiya, dakula an maitatabang mo na umuswag siya.

10. Paano puwedeng makatabang sa tinutukduan sa Bibliya an saimong eksperyensiya?

¹⁰ Iistorya an eksperyensiya mo. Kun angay, puwede mong iistorya sa halipot sa tinutukduan kun paano mo naaraman an katotoohan, kun paano mo napangganahan an sarong kadipisilan, o kun paano mo nahiling sa buhay mo an tabang ni Jehova. (Sal. 78:4, 7) Tibaad iyan mismo an kaipuhan niyang madangog. Puwede iyan makapakusog sa pagtubod niya o makadagka saiya na padagos na umuswag pasiring sa bawtismo. Asin tibaad makatabang iyan saiya kun paano aatubangon an pagbalong inaagihan niya. (1 Ped. 5:9) Nagigirumduman ni Gabriel, na nakaistar sa Brazil na naglilingkod na ngunyan bilang payunir, kun paano siya nakinabang kan Bible study pa siya. Sinabi niya: “Kan madangog ko an mga eksperyensiya kan mga tugang, nanudan ko na aram ni Jehova an mga problemang inaagihan ta. Asin kun nakayanan ngani ninda iyan, makakayanan ko man iyan.”

PAG NAG-ATENDER SA MGA PAGTIRIPON AN TINUTUKDUAN SA BIBLIYA

11-12. Taano ta dapat na maugma tang akuon an tinutukduan sa Bibliya na nag-aatender sa mga pagtiripon?

¹¹ Para umuswag an sarong tinutukduan sa Bibliya sagkod na mabawtismuhan, kaipuhan niyang regular na umatender sa mga pagtiripon sa kongregasyon dahil makakatabang iyan saiya. (Heb. 10:24, 25) Posibleng marhay na an nagtutukdo an maimbitar saiya sa inot niyang pag-atender sa pagtiripon. Pag nag-atender siya, gabos kita puwedeng makadagka saiya na padagos na mag-atender sa mga pagtiripon. Paano ta magigibo iyan?

¹² Maugmang akuon an tinutukduan. (Roma 15:7) Kun ipinapamati ta sa tinutukduan na welcome siya sa mga pagtiripon, posibleng marhay na lalo niyang gugustuhon na padagos na bumalik. Maugma siyang akuon sa paaging dai man siya maaalangan, tapos ipabisto siya sa iba. Dai pag-isipon na may nag-aasikaso na man saiya ta tibaad mayo pa su nagtutukdo saiya o may ginigibo pang ibang paninimbagan. Maghinanyog na marhay sa sinasabi kan tinutukduan, asin magpahiling saiya nin personal na interes. Ano an puwedeng magin epekto kaiyan? Mangnuhon an sinabi ni Dmitrii, na nabawtismuhan pirang taon pa sana an nakaagi asin ministeryal na lingkod na ngunyan. Manungod sa inot na pag-atender niya sa pagtiripon, sinabi niya: “Narisa nin sarong brother na pigninerbiyos ako mantang naghahalat sa luwas kan Kingdom Hall kaya mabuot niya akong inibanan palaog. Dakul an nagbati sako. Nasurpresa talaga ako. Gustong-gusto ko idto. Kun puwede lang nganing aroaldaw may pagtiripon. Naeksperyensiyahan ko duman an sarong bagay na dai ko pa lamang naeksperyensiyahan sain man.”

13. Ano an puwedeng magin epekto kan paggawi mo sa tinutukduan sa Bibliya?

¹³ Magin marahay na halimbawa. Makakatabang an paggawi mo na makumbinsir an tinutukduan sa Bibliya na nahanap niya na an katotoohan. (Mat. 5:16) Si Vitalii, na payunir na ngunyan sa Moldova, nagsabi: “Naobserbaran ko an pamumuhay kan mga nasa kongregasyon, an kaisipan ninda, saka paggawi. Nakakumbinsir iyan sako na talagang naglalakaw kaiba nin Diyos an mga Saksi ni Jehova.”

14. Paano puwedeng makatabang an saimong halimbawa na umuswag an tinutukduan?

¹⁴ Para makuwalipikar sa bawtismo, kaipuhan na iaplikar kan tinutukduan an mga nanunudan niya. Bako iyan pirming madali. Pero pag nahihiling kan tinutukduan kun paano ka nakikinabang sa pag-aplikar kan mga prinsipyo sa Bibliya, puwede siya kaiyan na mapahiro na arugon ka. (1 Cor. 11:1) Pag-isipan an eksperyensiya ni Hanae, na sinambit kasubago. Sinabi niya: “Buhay na halimbawa an mga tugang sa kun ano an mga nanunudan ko. Nahiling ko sainda kun paano ako magigin nakakapakusog asin mapagpatawad saka kun paano ako makakapahiling nin pagkamuot. Pirming marahay an sinasabi ninda manungod sa iba. Gusto kong arugon sinda.”

15. Paano ta maiaaplikar an Talinhaga 27:17 kun manungod sa satong tinutukduan sa Bibliya?

¹⁵ Amiguhon an tinutukduan. Mantang padagos na nag-aatender sa mga pagtiripon an tinutukduan, padagos siyang pahilingan nin personal na interes. (Fil. 2:4) Makipag-ulay saiya. Sa paaging bako man sobra kapersonal, komendaran siya sa ano man na marahay na pagbabago na ginibo niya asin kumustahon an pag-adal niya sa Bibliya, an pamilya niya, saka an trabaho niya. An arog kaiyan na mga pag-uulay puwedeng mas makapadayupot saindong duwa. Kun aamiguhon mo an tinutukduan, matatabangan mo siyang umuswag sagkod na mabawtismuhan. (Basahon an Talinhaga 27:17, NWT.) Regular payunir na ngunyan si Hanae. Manungod sa inot niyang pag-atender sa mga pagtiripon, sinabi niya: “Kan nagkakaigwa na ako nin mga amiga sa kongregasyon, lalo ko nang inaabangan an sunod na pagtiripon, saka nag-aatender pa ngani ako dawa pag pagal ako. Gustong-gusto kong kaibanan an mga bagong amiga ko. Nakatabang iyan sako na tapuson an pakikiamigo ko sa mga bako kong kapareho an mga paniniwala. Gusto kong mas maparani ki Jehova saka sa mga tugang kaya nagdesisyon akong magpabawtismo.”

16. Ano pa an puwede mong gibuhon para mamatian kan tinutukduan sa Bibliya na parte siya kan kongregasyon?

¹⁶ Mantang padagos na nag-uuswag asin naggigibo nin mga pagbabago an tinutukduan, tabangan siyang mamatian na parte siya kan kongregasyon. Magin mapag-istimar. (Heb. 13:2) Nagigirumduman ni Denis, na nakaistar sa Moldova, kaidtong Bible study pa siya: “Nagkapirang beses kami ni agom na inimbitaran kan mga tugang sa mga pagtiripon-tipon. Iniistorya ninda kun paano sinda tinabangan ni Jehova. Nakapakusog iyan samo. Dahil sa mga pagtiripon-tipon na iyan, nagin sigurado na kami na gusto ming maglingkod ki Jehova asin na magayunon na buhay an naghahalat samo.” Pag nakuwalipikar na bilang parahayag an tinutukduan sa Bibliya, puwede mo man siyang imbitaran na ibanan ka sa ministeryo. Si Diego, na sarong parahayag sa Brazil, nagsabi: “Dakul na brother an nag-imbitar sako na ibanan sinda sa ministeryo. Iyan an pinakamarahay na paagi na mas mabisto ko sinda. Mantang ginigibo ko iyan, dakul an nanudan ko, saka nagin mas harani ako ki Jehova saka ki Jesus.”

PAANO MAKAKATABANG AN MGA ELDER?

17. Paano makakatabang an mga elder sa mga tinutukduan sa Bibliya?

¹⁷ Magtao nin panahon sa mga tinutukduan sa Bibliya. Mga elder, kun papahilingan nindo nin mamumuton na interes an mga tinutukduan, makakatabang iyan na umuswag sinda sagkod na mabawtismuhan. Sa kada pagtiripon, hinguwahon na makipag-ulay sa mga tinutukduan sa Bibliya. Mamamatian ninda na interesado ka sainda kun natandaan mo an pangaran ninda, lalo na pag nagpupuon na sindang magkomento. Puwede mo daw na ilaag sa iskedyul mo paminsan-minsan na ibanan an sarong parahayag sa pagkondukta niya nin pag-adal sa Bibliya? An hinuhuna mong sadit na tabang, puwedeng dakulang tabang palan sa tinutukduan. Si Jackie na sarong payunir na taga Nigeria, nagsabi: “Dakul na tinutukduan an napapangalas pag naaraman ninda na an brother na kaiba ko elder palan. Sinabi nin sarong tinutukduan sa Bibliya: ‘Dai lamang iyan gigibuhon kan pastor mi. Su mayayaman sana an dinadalaw niya saka kun babayadan sana ninda siya!’” Nag-aatender na sa mga pagtiripon an tinutukduan na iyan.

18. Paano magigibo kan mga elder an paninimbagan na ipinagkatiwala sainda na mababasa sa Gibo 20:28?

¹⁸ Sanayon asin pakusugon an mga paratukdo sa Bibliya. Mga elder, igwa kamo nin mahalagang paninimbagan na tabangan an mga parahayag na magin epektibo sa saindang ministeryo, kaiba na an pagtutukdo ninda sa Bibliya. (Basahon an Gibo 20:28.) Kun an saro nasusupog na magkondukta pag yaon ka, mag-alok na ika an makondukta nin pag-adal. Si Jackie, na sinambit kasubago, nagsabi: “Parati akong hinahapot kan mga elder manungod sa mga tinutukduan ko sa Bibliya. Pag nadidipisilan ako sa pagkondukta nin pag-adal sa Bibliya, tinatawan ninda ako nin kapaki-pakinabang na mga sadol.” Dakula an maitatabang kan mga elder para pakusugon an mga paratukdo. (1 Tes. 5:11) Sinabi pa ni Jackie: “Gustong-gusto ko pag pinapakusog ako kan mga elder saka pag inaapresyar ninda an pagmamaigot ko. An mga tataramon ninda garo sarong baso nin malipot na tubig sa mainit na aldaw. Dahil sa komendasyon ninda, mas nagkaigwa ako nin kumpiyansa saka nagin mas maugma man ako sa pag-Bible study.”—Tal. 25:25.

19. Anong kaugmahan an puwede tang mamatian?

¹⁹ Dawa kun mayo kitang tinutukduan ngunyan, puwede pa man giraray kitang makatabang sa tinutukduan kan iba na umuswag sa espirituwal. Sa paaging dai man sobrang nagpaparataram, puwede kitang makapagtao nin pinag-andaman na marhay na mga komento para alalayan an nagtutukdo sa pagkondukta niya. Puwede tang amiguhon an mga tinutukduan pag-abot ninda sa Kingdom Hall, saka puwede kitang magin marahay na halimbawa sainda. Mapapakusog kan mga elder an mga tinutukduan paagi sa pagtao sainda nin panahon. Asin matatabangan man ninda an mga paratukdo paagi sa pagsasanay saka pagkomendar sainda. Iyo, nakakaugma nanggad na maaraman na nakakatabang kita, dawa sa diit na paagi, na mamutan asin paglingkudan nin saro an satong Ama, si Jehova!