Tabangan an Tinutukduan sa Bibliya na Mag-uswag Asin Magpabawtismo—Inot na Kabtang

1. Paano ipinapahiling kan 2 Corinto 3:1-3 na sarong pribilehiyo an pagtabang sa tinutukduan sa Bibliya na mabawtismuhan? (Hilingon an ritrato sa cover.)

ANO an namamatian mo pag nahihiling mong binabawtismuhan an sarong tinutukduan sa Bibliya na hali sa teritoryo kan saindong kongregasyon? Siguradong ikinakaugma mo iyan. (Mat. 28:19) Asin kun ika an nagtukdo sa bagong disipulong iyan, nakakaugma nanggad na mahiling siyang binabawtismuhan! (1 Tes. 2:19, 20) An bagong bawtisadong mga disipulo marahayon na “mga surat nin rekomendasyon,” bako lang sa mga nagtukdo sa sainda kundi pati man sa bilog na kongregasyon.—Basahon an 2 Corinto 3:1-3.

2. (a) Anong mahalagang hapot an kaipuhan niyatong pag-isipan, asin taano? (b) Ano an pag-adal sa Bibliya? (Hilingon an nota sa ibaba.)

² Nakakaugmang mahiling na sa nakaaging apat na taon, may average na mga 10,000,000 na pag-adal sa Bibliyab an irinereport kada bulan sa bilog na kinaban. Asin sa mga taon man sanang iyan, may average na labing 280,000 an nababawtismuhan kada taon bilang mga Saksi ni Jehova asin bagong mga disipulo ni Jesu-Cristo. Paano niyato matatabangan na mabawtismuhan an dakul pa sa minilyon na tinutukduan sa Bibliya na iyan? Sagkod na mapasensiyang tinatawan ni Jehova nin panahon asin oportunidad an mga tawo na magin mga disipulo ni Cristo, gusto tang gibuhon an satong gabos na makakaya para tabangan sindang umuswag asin magpabawtismo sa pinakahalipot na panahon na posible. Marikas nanggad na nauubos an panahon!—1 Cor. 7:29a; 1 Ped. 4:7.

3. Ano an pag-uulayan ta sa artikulong ini kun manungod sa pagkondukta nin mga pag-adal sa Bibliya?

³ Tanganing matawan nin atensiyon an apuradong pangangaipo na gumibo nin mga disipulo, may ginibong surbey sa mga sangang opisina para maaraman kun paano ta matatabangan an dakul sa satong mga tinutukduan sa Bibliya na umuswag asin magpabawtismo. Sa artikulong ini asin sa masunod, aaramon niyato kun ano an manunudan ta sa eksperyensiyadong mga payunir, misyonero, asin paraataman nin sirkito.c (Tal. 11:14; 15:22) Ipinaliwanag ninda kun ano an puwedeng gibuhon kan mga paratukdo sa Bibliya asin kan saindang mga tinutukduan tanganing magin mas kapaki-pakinabang an pag-adal sa Bibliya. Sa artikulong ini, pag-uulayan ta an limang bagay na kaipuhan na magibo kan lambang tinutukduan tanganing padagos na umuswag pasiring sa bawtismo.

MAGKONDUKTA NIN PAG-ADAL KADA SEMANA

4. Ano an dapat na marealisar niyato manungod sa pag-adal sa Bibliya sa may pinto?

⁴ Dakul sa satong mga tugang an nagkokondukta nin pag-adal sa Bibliya sa may pinto mismo kan kagharong. Dawa ngani magayon na pagpupuon ini para mapatalubo an interes sa Bibliya, sa parati an mga pag-uulay na ini halipot sana asin tibaad ngani dai maisagibo kada semana. Para mas mapatalubo an interes, may mga tugang na hinahagad an contact information kan tawong interesado dangan inaapudan ini o pigte-text sa pag-ultanan kan mga pagdalaw para tawan nin halipot na punto hali sa Kasuratan. An haralipot na pag-uulay na iyan puwedeng magpadagos nin mga bulan na dai nagigin produktibong pag-adal sa Bibliya. Mag-uuswag daw talaga pasiring sa pagdusay asin bawtismo an sarong tinutukduan kun arog lang kaiyan na panahon asin paghihinguwa an itinatao niya sa pag-adal kan Tataramon nin Diyos? Posibleng marhay na dai.

5. Sigun sa Lucas 14:27-33, ano an idinuon ni Jesus na makakatabang sa sato sa gibuhon niyato na paggibo nin mga disipulo?

⁵ Sa sarong pagkakataon, inilustrar ni Jesus kun ano an kaipuhan na gibuhon nin saro kun gusto kaining magin disipulo niya. Nagtaram si Jesus manungod sa saro na gustong magpatindog nin tore asin sa sarong hadi na gustong makigiyera. Sinabi ni Jesus na an mapatindog nin tore dapat na ‘magtukaw nguna asin kuwentahon an gastos’ tanganing matapos niya iyan asin na an hadi dapat na ‘magtukaw nguna asin magkonsulta sa iba’ para maaraman kun baga kaya kan hukbo niya na magibo an katuyuhan ninda. (Basahon an Lucas 14:27-33.) Kaagid kaiyan, aram ni Jesus na dapat na pakaisipon na marhay nin saro na gustong magin disipulo niya an kahulugan kan pagsunod sa saiya. Huli kaiyan, kaipuhan niyatong dagkahon an potensiyal na mga disipulo na makipag-adal sa sato kada semana. Paano niyato magigibo iyan?

6. Ano an puwede tang hinguwahon na gibuhon tanganing magin progresibo an pag-adal nindo kan saimong tinutukduan?

⁶ Magpuon paagi sa paghihinguwang palawigon an pag-adal sa Bibliya sa may pinto. Tibaad puwede mong ipakipag-ulay an sarong dagdag na punto sa Kasuratan sa lambang pagdalaw mo. Pag komportable na an kagharong sa mas halawig na pagdalaw, haputon siya kun may lugar na diyan puwede kamong tumukaw asin maipadagos an pag-uulay. Mahihiling sa simbag kan kagharong kun gurano siya kaseryoso sa pag-adal nin Bibliya. Pag-abot nin panahon, tanganing maparikas an pag-uswag nin sarong tinutukduan, puwede mo pa ngani siyang haputon kun baga andam siyang mag-adal duwang beses kada semana. Pero bako lang pag-adal nin saro o duwang beses kada semana an kaipuhan.

MAGPREPARAR PARA SA LAMBANG SESYON NIN PAG-ADAL

7. Paano mapreparar na marhay an sarong paratukdo para sa lambang sesyon nin pag-adal sa Bibliya?

⁷ Bilang paratukdo, kaipuhan mong magpreparar na marhay para sa lambang sesyon nin pag-adal sa Bibliya. Puwede kang magpuon paagi sa pagbasa kan materyal na pag-aadalan kaiba na an mga teksto. Hinguwahon na magin malinaw sa isip an panginot na mga punto. Pag-isipan an titulo kan leksiyon, mga subtema, mga hapot para sa pag-adal, mga tekstong minarkahan na “basahon,” mga ritrato, asin an ano man na video na puwedeng makatabang sa pagpaliwanag kan tema. Dangan mantang isinasaisip an saimong estudyante, hurop-hurupon nin patiinot kun paano mo ipapaliwanag sa simple asin malinaw na paagi an impormasyon tanganing madali iyan na masabutan asin maiaplikar kan saimong tinutukduan.—Neh. 8:8; Tal. 15:28a.

8. Ano an itinutukdo sa sato kan sinabi ni apostol Pablo sa Colosas 1:9, 10 mapadapit sa pagpamibi manungod sa satong mga tinutukduan sa Bibliya?

⁸ Sa pagpreparar mo, ipamibi ki Jehova an manungod sa saimong tinutukduan asin sa mga pangangaipo niya. Hagadon ki Jehova na tabangan kang magtukdo gamit an Bibliya sa paaging maaabot an puso kan saimong tinutukduan. (Basahon an Colosas 1:9, 10.) Hinguwahon na pag-isipan kun igwa nin ano man na bagay na tibaad madipisilan an saimong tinutukduan na masabutan o akuon. Isaisip na an pasuhan mo iyo na tabangan siyang umuswag asin magpabawtismo.

9. Paano matatabangan kan paratukdo an saiyang tinutukduan na magpreparar para sa pag-adal? Ipaliwanag.

⁹ Naglalaom kita na paagi sa regular na pag-adal sa Bibliya, mapapahalagahan kan tinutukduan kun ano an ginibo ni Jehova asin ni Jesus asin na magugustuhan niyang makanuod pa. (Mat. 5:3, 6) Tanganing lubos siyang makinabang sa pag-adal, kaipuhan kan tinutukduan na magpokus sa nanunudan niya. Para matabangan siyang magibo iyan, iduon sa saiya kun gurano kahalaga na magpreparar siya para sa lambang sesyon nin pag-adal paagi sa patiinot na pagbasa kan materyal asin paghurop-hurop kun paano iyan aplikado sa saiya. Paano mo siya matatabangan kun paano magpreparar? Magkaibanan nindong ipreparar an sarong leksiyon para ipahiling sa saimong tinutukduan kun paano iyan ginigibo.d Ipaliwanag kun paano hahanapon an direktang simbag sa mga hapot para sa pag-adal, asin kun paanong an pagmarka sa panginot sanang mga tataramon o frase makakatabang saiya na magirumduman an simbag. Dangan sabihon sa saiya na magsimbag sa sadiri niyang mga tataramon. Pag ginigibo niya iyan, maaaraman mo kun gurano niya nasabutan an materyal. Pero may saro pang bagay na puwede mong dagkahon an saimong tinutukduan na gibuhon.

TUKDUAN SIYA NA MAKIKOMUNIKAR KI JEHOVA AROALDAW

10. Taano ta mahalaga na aroaldaw na basahon an Bibliya, asin ano an kaipuhan para lubos na makinabang sa pagbasa kaiyan an tinutukduan sa Bibliya?

¹⁰ Apuwera sa pag-adal kada semana kaiba kan saiyang paratukdo, makikinabang man an tinutukduan kun ginigibo niya aroaldaw an nagkapirang bagay. Halimbawa, kaipuhan niyang makikomunikar ki Jehova. Paano? Paagi sa pagdangog asin pagkaulay ki Jehova. Puwede siyang magdangog sa Diyos paagi sa aroaldaw na pagbasa sa Bibliya. (Jos. 1:8; Sal. 1:1-3) Ipahiling sa saiya kun paano gagamiton an puwedeng i-print na “Iskedyul sa Pagbasa sa Bibliya” na nasa jw.org/bcl.e Siyempre, para matabangan siyang lubos na makinabang sa saiyang pagbasa sa Bibliya, dagkahon siya na hurop-hurupon an itinutukdo sa saiya kan Bibliya manungod ki Jehova asin kun paano niya isasabuhay an mga nanunudan niya.—Gibo 17:11; Sant. 1:25.

11. Paano makakanuod an sarong tinutukduan na mamibi sa tamang paagi, asin taano ta mahalaga na parati siyang mamibi ki Jehova?

¹¹ Dagkahon an saimong tinutukduan na makipag-ulay ki Jehova paagi sa pagpamibi aroaldaw. Mamibi nin udok sa puso sa kapinunan asin sa katapusan kan lambang sesyon nin pag-adal, na sinasambit an saimong tinutukduan sa mga pamibing iyan. Mantang nagdadangog siya sa mga pamibi mo, manunudan niya kun paano mamibi nin hali sa puso asin manunudan niya man na sa Diyos na Jehova siya dapat sinserong mamibi sa pangaran ni Jesu-Cristo. (Mat. 6:9; Juan 15:16) Isipa na sana kun paano an aroaldaw na pagbasa sa Bibliya (pagdangog ki Jehova) asin pagpamibi (pagkaulay ki Jehova) makakatabang na marhay sa saimong tinutukduan na mas lalong magin harani sa Diyos! (Sant. 4:8) Kun gigibuhon niya ini, magkakaigwa siya nin sarong bagay na makakatabang saiya na umuswag pasiring sa pagdusay asin bawtismo.

TABANGAN SIYA NA MAGKAIGWA NIN PERSONAL NA RELASYON KI JEHOVA

12. Paano matatabangan nin sarong paratukdo an saiyang tinutukduan na magkaigwa nin personal na relasyon ki Jehova?

¹² An mga nanunudan nin sarong tinutukduan sa saiyang pag-Bible study dai lang dapat na maabot an saiyang isip kundi pati man an saiyang puso. Taano? Huling an satong puso—na diyan kaiba an satong mga pagmawot, emosyon, asin namamatian—an nagpapahiro sa sato na gibuhon kun ano an nanunudan ta. Naggamit si Jesus nin lohikal na pangangatanusan na nakapukaw sa isip kan mga tawo. Pero nagsunod saiya an mga tawo huling naabot man niya an puso ninda. (Luc. 24:15, 27, 32) Kaipuhan kan saimong tinutukduan na mahiling si Jehova bilang sarong tunay na Persona, saro na puwede siyang magkaigwa nin personal na relasyon, asin na mahiling Siya bilang saiyang Ama, saiyang Diyos, asin saiyang Amigo. (Sal. 25:4, 5) Sa pag-adal nindo nin Bibliya, gibuhon na buhay na buhay an personalidad kan satong Diyos. (Ex. 34:5, 6; 1 Ped. 5:6, 7) Ano man na tema an pinag-uulayan nindo, magpokus sa kun anong klaseng Persona si Jehova. Tabangan an tinutukduan na pahalagahan an magagayon na kuwalidad ni Jehova—an saiyang pagkamuot, kabuutan, asin pagmalasakit. Sinabi ni Jesus na “an pinakaimportante asin panginot na tugon” iyo na “kamutan mo si Jehova na saimong Diyos.” (Mat. 22:37, 38) Tabangan an saimong tinutukduan na magkaigwa nin hararom na pagkamuot sa Diyos.

13. Magtao nin halimbawa kun paano tatabangan an sarong tinutukduan na makanuod manungod sa personalidad ni Jehova.

¹³ Pag nakikipag-ulay ka sa saimong tinutukduan, ipahayag mo an saimong hararom na pagkamuot ki Jehova. Puwede ining makatabang sa saiya na marealisar na kaipuhan niya man mismong magkaigwa nin dayupot asin personal na relasyon sa Diyos. (Sal. 73:28) Halimbawa, igwa daw nin sarong frase sa publikasyon na ginagamit nindo sa pag-adal o sa sarong teksto na naghahayag nin sarong bagay manungod ki Jehova—an saiyang pagkamuot, kadunungan, hustisya, o kapangyarihan—na nakataros sa saimong puso? Sambiton iyan sa saimong tinutukduan, asin sabihon saiya na saro ini sa dakul na dahilan kaya namumutan mo an satong Ama sa langit. May saro pang bagay na kaipuhan na gibuhon kan lambang tinutukduan sa Bibliya tanganing umuswag siya pasiring sa bawtismo.

DAGKAHON SIYA NA MAG-ATENDER SA MGA PAGTIRIPON KAN KONGREGASYON

14. Ano an sinasabi sa sato kan Hebreo 10:24, 25 manungod sa mga pagtiripon kan kongregasyon na makakatabang sa sarong tinutukduan sa Bibliya na umuswag?

¹⁴ Gabos kita gustong umuswag an satong mga tinutukduan pasiring sa bawtismo. An sarong mahalagang paagi na matatabangan ta sinda iyo an pagdagka sa sainda na umatender sa mga pagtiripon kan kongregasyon. Sinasabi kan eksperyensiyadong mga paratukdo na an mga tinutukduan na nag-aatender tulos sa mga pagtiripon mas marikas na nag-uuswag. (Sal. 111:1) May mga paratukdo na ipinapaliwanag sa saindang mga tinutukduan na an kabanga kan manunudan ninda sa Bibliya makukua sa pag-Bible study asin an kabanga makukua sa mga pagtiripon. Basahon an Hebreo 10:24, 25 sa saimong tinutukduan, asin ipaliwanag sa saiya an mga pakinabang na makukua niya kun maatender siya sa mga pagtiripon. Ipahiling sa saiya an videong Paano Ginigibo an Pagtiripon sa Kingdom Hall?f Tabangan an saimong tinutukduan na magin parte kan saiyang buhay an pag-atender sa mga pagtiripon kada semana.

15. Ano an puwede niyatong gibuhon para dagkahon an sarong tinutukduan na regular na umatender sa mga pagtiripon?

¹⁵ Ano an puwede mong gibuhon kun an saimong tinutukduan dai pa nakaatender sa pagtiripon o dai pa siya regular na nag-aatender? Entusiyastikong iistorya sa saiya an sarong bagay na nanudan mo sa dai pa sana nahahaloy na pagtiripon. Mas nakakadagka iyan kisa sa basta pag-imbitar sa saiya na umatender. Tawan siya kan An Torrengbantayan o kan Workbook sa Pagtiripon na Pamumuhay Asin Ministeryo na iyo an pag-aadalan sa pagtiripon. Ipahiling saiya kun ano an pag-uulayan sa sunod na pagtiripon, asin haputon siya kun sa anong parte siya diyan pinakainteresado. An maeeksperyensiyahan kan saimong tinutukduan sa inot niyang pag-atender sa satong pagtiripon magigin mas marahay nanggad kisa sa ano man na naeksperyensiyahan niya sa ano man na pagtiripon sa ibang relihiyon. (1 Cor. 14:24, 25) May mga mabibisto siya na marahay na halimbawa sa saiya asin tatabangan siyang umuswag pasiring sa bawtismo.

16. Ano an kaipuhan para matabangan an mga tinutukduan sa Bibliya na umuswag asin magpabawtismo, asin ano an manunudan ta sa sunod na artikulo?

¹⁶ Paano ta matatabangan an satong mga tinutukduan sa Bibliya na umuswag asin magpabawtismo? Matatabangan ta an lambang tinutukduan na seryosuhon an pag-adal paagi sa pagdagka sa saiya na makipag-adal sa sato kada semana asin magpreparar para sa lambang sesyon nin pag-adal. Gusto man niyatong dagkahon siya na makikomunikar ki Jehova aroaldaw asin magkaigwa nin personal na relasyon sa Saiya. Gusto niyatong motibaron an tinutukduan na mag-atender sa mga pagtiripon kan kongregasyon. (Hilingon an kahon na “Kun Ano an Kaipuhan na Magibo kan mga Tinutukduan Para Umuswag Pasiring sa Bawtismo.”) Pero, arog kan ipapaliwanag sa sunod na artikulo, igwa pang limang bagay na puwedeng gibuhon kan mga paratukdo sa Bibliya para tabangan an mga tinutukduan na magpabawtismo.