Ekspertong Gamiton an Biblia

1. Taano ta kapakipakinabang na marhay an Biblia?

¹ An ekspertong paggamit sa ipinasabong na Tataramon, nakakatabang sa sato na malinaw na ibalangibog asin itokdo an katotoohan saka ibuyagyag an falsong mga katokdoan asin tradisyon nin mga tawo.—2 Tim. 2:15; 1 Ped. 3:15.

2. Ano an matabang sa sato tanganing mas madaling mahanap an mga teksto?

² Magin Mas Pamilyar: Siring sa paggamit nin ano man na kasangkapan, an saro nagigin eksperto sa sarong bagay kun sia mas pamilyar dian. An pagbasa kan bilog na Biblia nakakatabang na maaraman nindo an kabilogan na tema kaiyan. Ini nakakatabang man sa saindo na magirumdoman an mga teksto asin mas madaling hanapon iyan. Mantang kamo nagigin mas pamilyar sa Kasuratan, makakapagtaram kamo nin may orog na kaigotan asin kombiksion kun nagpapatotoo sa iba sa impormal asin sa ministeryo sa langtad.—1 Tes. 1:5.

3, 4. (a) Ano an nagkapirang paagi tanganing magin mas pamilyar kita sa Biblia? (b) Igwa daw kamong ginibong iba pang paagi tanganing magin mas pamilyar sa Kasuratan?

³ Ugaleon na bukasan an saindong Biblia asin subaybayan an pagbasa kaiyan sa mga pagtiripon kan kongregasyon. Sa personal na pag-adal asin pag-andam nindo para sa mga pagtiripon kan kongregasyon, helingon an sitadong mga teksto asin horophoropon an aplikasyon kaiyan. Naririsa nin dakol na an pagbasa nin direkta sa Biblia imbes na sa komputer o sa papel nakakatabang na mas madaling mahanap an teksto kun kaipuhan iyan sa ministeryo.—Juan 14:26.

⁴ An nagkapirang pamilya nag-iiskedyul nin panahon tanganing magtuom nin mga teksto sa Biblia. Puede ining gibohon paagi sa paggamit nin mga flash card, na may nakalaag na sitadong teksto sa atubangan asin nakasurat sa likod an mismong laog kan teksto. Nagsasarosaralida sinda sa paggamit kaini tanganing maheling kun masasabi ninda an laog kan teksto o kun magigirumdoman ninda kun anong teksto iyan. Nagigin mas eksperto man kita paagi sa pagpraktis nin mga sasabihon sa ministeryo asin sa pagsimbag paagi sa Biblia nin sarong pagkontra o hapot.

5. Taano ta gusto niatong magin mas eksperto sa paggamit kan Biblia?

⁵ Mayo nin ibang libro na makakapantay sa Biblia. Yaon dian an solamenteng mga isinurat na ‘makakapagpadonong sa mga tawo para sa kaligtasan.’ (2 Tim. 3:15) Huling an kadaklan na tawo sa satong teritoryo bakong pamilyar sa mahalagang marhay na kayamanan na yaon sa Biblia, may marahay kitang dahelan na maghingoang magin mas eksperto sa pagpaheling sa sainda kun ano an talagang iinaalok kan Biblia.—Tal. 2:1-5.