Ekspertong Gamiton an Tataramon nin Katotoohan
1 An satong abilidad sa paggamit kan Tataramon nin Dios puwedeng makaapektar sa pag-ako nin mga tawo sa satong mensahe. Kaya, sinabi ni Pablo: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasopog, na ginagamit an tataramon kan katotoohan sa tamang paagi.”—2 Tim. 2:15.
2 Kaipuhan na pataluboon an abilidad sa paggamit kan Biblia. Mahalaga an personal na pag-adal asin pag-atender sa mga pagtiripon. Pero, maninigo na isagibo niato an satong nanonodan paagi sa regular na paggamit kan Biblia sa ministeryo. Kaipuhan man na hagadon niato an tabang asin paggiya nin Dios.—1 Juan 3:22.
3 Isentro an Atension sa Tataramon nin Dios: Mahalaga para sa mga tawo na masabotan na an mensaheng dinadara niato bakong sato kundi gikan sa nasusurat na Tataramon nin Dios. (Juan 7:18) Puwedeng magkaigwa nin dakulang epekto an pagpaheling sa tawo kan sinasabi nin Dios sa Biblia. Naaakit an matanos an pusong mga tawo sa makapangyarihan na mensahe kan Biblia.
4 Kadaklan sa katawohan bakong pamilyar sa Biblia. Kun ginagamit iyan, kaipuhan na bako sanang basahon an mga teksto. Maninigo na isipon niato kun paano iiintrodusir an kasuratan. Puwedeng gumamit nin mga hapot o sarong problema tanganing pukawon an interes. Siring man, pakabasaha kan kasuratan, kaipuhan na idoon liwat niato an pangenot na mga tataramon asin iaplikar iyan tanganing makatanom an mga ideya.—Helingon an School Guidebook, leksion 24 asin 25.
5 An Alok: Sa Disyembre iaalok niato sa interesadong mga tawo an New World Translation of the Holy Scriptures kaiba an The Bible—God’s Word or Man’s? Paano niato puwedeng dolokon an mga tawo na dara an alok na ini? Pakapamidbid kan sadiri puwede niatong sabihon: “Ngonyan, kadakol kan nagdodolok sa mga indibiduwal o publikasyon para sa paggiya. Ano sa paghona nindo an pinakamarahay na gikanan nin praktikal na paggiya? [Pasimbagon.] Helinga an sinasabi kan Biblia manongod sa tunay na gikanan nin kadonongan. [Basahon an Talinhaga 2:6, 7.] Makamomondo ta kulang an kadonongan nin tawo. Pero, an kadonongan nin Dios perming masasarigan asin kapakipakinabang. [Basahon an Isaias 48:17, 18.] Kaya, kaipuhan kitang dumolok sa Dios, na nagtatao nin paggiya tanganing makapanggana sa satong mga problema.” Dangan puwede niatong buksan an kapitulo 12 kan librong God’s Word asin basahon an parapo 2.
6 Pakagamit kan Talinhaga 2:6, 7 tanganing idoon an kadonongan nin Dios, iintrodusir an New World Translation asin ipaliwanag sa kagharong kun taano ta iginagalang asin pinahahalagahan nindo an Biblia. Ipaaram saiya na an mga katokdoan kaiyan makatatao saiya nin mapusog na paglaom para sa ngapit. Puwede man na magkaigwa kamo nin oportunidad na itokdo an iba sa madonong na sadol kan Biblia manongod sa pan-aroaldaw na mga problema, na puwedeng gumiya sa pag-adal kan Biblia.
7 Perming ginagamit ni Jesus an mga Kasuratan tanganing tabangan an sadiosan na mga tawo asin simbagon an mga nagkokontra saiya. Kaugalean ni Pablo na ‘ipaliwanag asin patunayan paagi sa mga reperensia’ an mga bagay na saiyang itinokdo. (Gibo 17:2, 3) Mag-ooswag an satong kompiansa asin kagayagayahan sa ministeryo mantang maigot kitang naghihingoa na magin mas eksperto sa paggamit kan Tataramon nin katotoohan.