An Puwersa kan Tataramon nin Dios
1 An Tataramon nin Dios mapuwersa. (Heb. 4:12) Ngonyan, maheheling an ebidensia kaini mantang an minilyon na buhay nabago na mientras na personal na iinaaplikar nin mga tawo an saindang nanonodan sa Biblia.—Roma 12:2.
2 Tanganing makinabang an mga tawo sa mga tokdo kan Biblia, kaipuhan na midbidon ninda an Biblia bilang Tataramon nin Dios. (1 Tes. 2:13) Sa Disyembre matatabangan niato an mga tawo na makanood nin dakol pa dapit sa halaga kan Biblia paagi sa pag-alok kan New World Translation of the Holy Scriptures asin kan librong The Bible—God’s Word or Man’s? sa satong paglilingkod sa langtad.
3 Taano ta dai repasohon an nagkapirang interesanteng kabtang kan librong God’s Word? Itotokdo kamo kan mga laog sa mga kapitulo na naglalaman nin mga milagro, ipinamugtak na pagkorontrahan, sientipikong pagkaoroyon, hula, asin iba pang tema. Igwa nin dakol na retrato asin ilustrasyon. Matabang an mga kabtang na ini na ikaalok niato an libro na may tunay na entusiasmo.
4 Paano niato gagamiton an librong ini sa mga kagharong na dati nang nagtutubod na an Biblia Tataramon nin Dios? Puwedeng makultibar an interes paagi sa pagtampok magsala kan kapitulo 2, na nag-eestorya kan kasaysayan nin pakikilaban kan Biblia tanganing magdanay, o kan kapitulo 14, na dinadagka an parabasa na umako nin tabang tanganing masabotan nin marhay an kahulogan kan Biblia para sa sato ngonyan. An pagbasa kan mga kasuratan na nakasurat sa kapitulo 14 magarantiya sa kagharong na an saindong pakikipag-olay basado sa Biblia.
5 Kadakol an nagsasayuma na akoon an Biblia bilang tataramon nin Dios huli sa gawe kan Kakristianohan. An Kapitulo 3, “The Bible’s False Friend,” puwedeng gamiton nin epektibo sa situwasyon na ini.
6 Kun kita nagbabasa sa satong Biblia, puwedeng magkomento an kagharong manongod sa pagigin klaro kan lenguahe na ginamit sa New World Translation. O puwede niatong maheling na an kagharong nagpapaheling nin interes sa satong mensahe pero dai nin Biblia. Sa mga situwasyon na ini puwede niatong ipaheling an napalalaen na mga tampok kan Biblia na ginagamit niato asin an mga dahelan kun taano ta pinili ta iyan kisa iba. Kabilang sa ibang bagay, puwede niatong itokdo an listang “Bible Words Indexed” na nakatatabang na hanapon an pamilyar na mga kasuratan. Makatatabang man an “Bible Topics for Discussion” sa likod kan Biblia na hanapon an mga simbag sa kadakol na permi nang ihinahapot.
7 Paagi sa Biblia, ipinamidbid sato ni Jehova an saiyang makangangalas na personalidad. Gamiton logod niato an New World Translation asin an librong God’s Word sa pagtabang sa iba na manodan an manongod sa puwersa kan saiyang Tataramon!—2 Cor. 10:4.