Dumalaw Liwat Tanganing Tabangan an mga Tawo na Makanood kun Paano Sinda Puwedeng Mabuhay Sagkod Lamang
1 Magpoon kan iluwas an librong Mabuhay Sagkod Lamang, labing 65 milyones na kopya an ipinublikar na sa 115 tataramon. An dakol ngonyan na lingkod ni Jehova nanodan an pundamental na mga katotoohan kan Biblia paagi kaining magayon na instrumento. Ngonyan na bulan asin man sa Nobyembre, igwa kitang oportunidad na ipasakamot ining pantabang sa pag-adal sa Biblia.
2 Pagdalaw Liwat sa mga Igwa na kan Libro: An ibang parahayag nagkamit nin marahay na mga resulta sa pagdara kan atension sa lista kan mga laog asin sa paghapot sa interesadong tawo kun arin na tema an naheheling niang partikular na interesante. Kun an kagharong nagpili nin tema, isuherir na basahon nia an bilog na kapitulo sa libro bago an sunod na pagdalaw.
3 Kun talagang posible, maninigo kitang gumibo nin depinidong orolay sa pagdalaw liwat. Bago an pagdalaw liwat boot niato na mag-andam na ipakipag-olay an pirang parapo kan kapitulo na pinili kan kagharong. Kun mayo siang pinili, puwede tang ponan an pag-orolay sa kapitulo 1. Pakapag-orolay sa pirang parapo, maninigo kitang magpalataw nin hapot na pag-oolayan sa masunod na pirang parapo. Iyan magseserbing pundasyon sa saro pang pagdalaw liwat, kun puwede ta nang ipadagos an pag-adal sa librong Mabuhay Sagkod Lamang.
4 Siyempre, kun an kagharong may mga hapot, pinakamarahay na pag-orolayan nguna iyan. Posible na an saiyang mga hapot sinisimbag sa libro. Paagi sa pagigin pamilyar niato sa mga laog kan libro, puwede tang buksan an angay na mga parapo asin gamiton an materyal na iyan sa pagsimbag sa pinalataw na mga hapot.
5 Pagdalaw Liwat sa mga Nawalatan Niato nin Tract: Tibaad nawalatan ta an kagharong nin kopya kan tract na Peaceful New World. Sa pagdalaw liwat, puwede tang ipakipag-olay an pambukas na mga parapo kan tract.
Kun an kagharong nagpapaheling nin tunay na interes, pag-abot niato sa poro kan primerong parapo sa pahina 3, na dian kinotar an Salmo 37:29, puwede tang sabihon:
◼ “An mga tataramon na iyan nagtatampok kan ipinaliliwanag sa publikasyon na ini, an Puwede Kamong Mabuhay Sagkod Lamang sa Paraiso Digdi sa Daga. Mangnoha an punto digdi sa parapo 3 kan kapitulo 1 sa irarom kan temang ‘Kun Taano ta Makatutubod Kita.’” Dangan puwede tang basahon an parapo 3, ihapot an nakasurat na hapot dian, asin magpadagos sa parapo 4 asin 5 sa iyo man sanang paagi. Dangan puwede tang sabihon: “Taano an mga kamugtakan ta bako nanggad kaoyon kan mga katuyohan nin Dios ngonyan? An sunod na pirang parapo ipinaliliwanag iyan, asin boot kong bumuwelta sa sunod na semana sa arog kaining oras asin simbagon saindo an hapot na iyan.” Kun an kagharong nagpaheling nin tunay na interes, tibaad booton niato na ialok an libro sa oras na iyan. O tibaad magdesisyon kita na gibohon iyan sa katapusan kan sunod niatong pag-orolay.
6 Sa pag-alok kan librong “Mabuhay Sagkod Lamang,” puwede tang sabihon:
◼ “Sierto ko na maoogma kamong magkaigwa nin sadiri nindong kopya kaining publikasyon. Dangan puwede nindong basahon nin patienot asin kun siring orog na makinabang sa sunod niatong pag-orolay.” Kun an kagharong mag-oyon na kuanon an libro, dangan ialok niato iyan sa tamang kontribusyon.
7 Pinagbotan ni Jesus an saiyang mga parasunod na itokdo sa iba an itinokdo sainda. Ipinapamibi niato ki Jehova na magsugo nin dakol pang trabahador. Kaya kun siring, gibohon niato an satong kabtang sa paghanap sa mga interesado asin pagtokdo sainda na magin mga katabang sa pag-ani.—Mat. 9:37; 28:19, 20.