Pagpoon nin mga Pag-adal sa Biblia Ngonyan na Enero
1 Pinagbotan ni Jesus an saiyang mga disipulo na magin mga paratokdo kan maogmang bareta. (Mat. 28:19, 20) An pagtotokdong iyan pangenot na ginigibo paagi sa pagkondukta nin mga pag-adal sa Biblia. Nakikikabtang daw kamo sa gibohon na ini? Kun dai, paano kamo makapopoon nin pag-adal tanganing magkamit kamo nin mas dakulang kabtang sa pagtotokdo sa iba?
2 Tibaad tinawan ta an kagharong nin kopya kan tract na An Kinaban daw na Ini Magdadanay? asin nangako na madalaw liwat tanganing pag-olayan an mga laog kaiyan.
Kun minadalaw liwat sa kagharong na winalatan ta kan tract, puwede kitang magsabi:
■ “Kan yaon ako digdi pirang aldaw na an nakaagi, pinag-olayan niato kun paano ihinula ni Jesus an mga kamugtakan na nag-eeksister sa satong aldaw. Gusto kong ipakipag-olay sa halipot an pirang impormasyon gikan sa tract na iwinalat ko saindo. Mangnoha an sinasabi sa irarom kan subtemang ‘An “Tanda.”’ Buksan an pahina 3 kan tract, asin ipakipag-olay an enot na duwa o tolong parapo sa irarom kan subtemang iyan, na binabasa an sitadong mga teksto. Iareglo na dumalaw liwat asin pag-olayan an sunod na pirang parapo. Dagkahon an kagharong na basahon an mga ini bago kamo bumalik.
3 O puwede nindong sabihon an arog kaini:
■ “Kan huring magkaolay kita, iwinalat ko saindo an tract na An Kinaban daw na Ini Magdadanay? Kaidto binasa ta an mga tataramon ni Jesus sa Juan 17:3. [Basahon] Mantang kaipuhan niato na manodan an dapit sa Dios asin ki Jesus kun gusto niato nin buhay na daing katapusan, kapakipakinabang na kumua nin siring na kaaraman. Kan si Jesus yaon pa digdi sa daga, ipinabanaag nia an dakol na makangangalas na kuwalidad nin Dios. Kaya mantang orog kitang nakanonood dapit ki Jesus asin sa saiyang ministeryo, orog man kitang nakanonood dapit sa saiyang Ama. Mangnoha an sinasabi kan librong ini na The Greatest Man Who Ever Lived.” Basahon an enot asin ikaduwang parapo sa ikasampulong pahina kan kapitulo 116. Itokdo an mga titulo kan kapitulo, ilustrasyon, asin an mapa sa kapinonan kan libro. Dangan ialok an libro o, kun kinua na kan kagharong an libro, iareglo na bumalik tanganing ipagpadagos an saindong pag-orolay.
4 Pakataratara sa kagharong na nag-ako kan librong “Greatest Man,” puwede niatong sabihon:
■ “Arog kan sinabi ko kan nakaagi kong pagsongko, an librong Greatest Man dinisenyo para sa pag-adal sa Biblia. Boot ko na idemonstrar sa halipot kun paano iyan pinakaepektibong magagamit.” Buksan an libro sa kapitulo 1, “Messages From Heaven.” Basahon an enot na hapot, dangan pag-olayan an pambukas na mga parapo. Helingon an ilustrasyon sa ikaduwang pahina. Ipakipag-olay an natatadang mga hapot, asin idoon an mga simbag mantang itinotogot nin panahon. Bago tapuson an pagsongko, iareglo na dumalaw liwat asin ipagpadagos an pag-orolay.
5 Paagi sa pagpapadanay nin positibong kaisipan, pag-aandam nin marhay, asin pag-aprobetsar sa lambang oportunidad, masasangkapan kitang marhay na makapoon nin pag-adal sa Biblia ngonyan na Enero.