Itogdok an Pundasyon sa Saindong Enot na Pagdalaw
1 Nagigin mas pasil an paggibo nin epektibong mga pagdalaw liwat kun itinotogdok niato an pundasyon sa enot na pagdalaw. Makatatabang sato an librong Reasoning na gibohon iyan.
2 An minasunod na pag-aatubang basado sa ikaduwang introduksion sa pahina 10 kan librong Reasoning, sa temang “Bible/God.”
Pakatapos nin makikatood na pataratara, magsabing:
◼ “Naheling mi na padakol nang padakol ngonyan an nakamamate na dai segurado kun saen sinda makanonompong nin praktikal na mga simbag sa nagdadakol na problema sa aroaldaw. Naheling daw nindo iyan na totoo? [Pasimbagon.] Dati an mga tawo nagdodolok sa Biblia para sa tabang. Ano an opinyon nindo dapit sa Biblia?” Kun an kagharong nagpapahayag nin pagduda dapit sa pagkamasasarigan kaiyan, iluwas an tract na Why You Can Trust the Bible asin basahon an ikaduwa asin ikatolong parapo sa pahina 2. Kun mag-oyon an kagharong na an Biblia Tataramon nin Dios, buksan asin basahon an mga kasuratan na sinitar sa ikaduwang parapo sa pahina 2 kan tract, asin ipakipag-olay saiya sa halipot an mga ini.
3 Kun kadakol sa saindong teritoryo an nagpapahayag na dai nagtutubod, probaran na gamiton an ikalimang introduksion sa pahina 10 kan librong Reasoning.
Puwede nindong sabihon:
◼ “Huli sa gabos na dai pagkasinabotan sa kinaban ngonyan, kadakol an nasasakitan na tumubod sa Dios. Ano an reaksion nindo? [Pasimbagon.] Mangnoha an sinasabi kan tract na ini manongod sa mga tawo, siensia, asin sa Biblia.” Dangan ponan na basahon an ikalimang parapo sa pahina 3 kan tract na Why You Can Trust the Bible.
4 Magpalataw nin mga Hapot sa Tract Tanganing Andamon an Masunod Nindong Pagdalaw: Iplano na an saindong enot na pagdalaw magigin kapinonan sana kan masurunod na pagsongko. Dai idetalyeng marhay, alagad ipaheling sa kagharong na kamo tunay na interesado sa saiya. Pakabasaha kan duwa o tolong parapo sa tract, magpalataw nin hapot na puwedeng pag-olayan sa pagdalaw sa ngapit.
5 Halimbawa, puwede nindong darahon an atension sa ikatolong parapo sa pahina 4 asin maghapot: “Sa paghona daw nindo an Biblia nagtatao nin bastanteng ebidensia na manarig sa sinasabi kaiyan dapit sa ngapit?” Itotogdok kaini an pundasyon para sa pagdalaw liwat, na sa panahon na iyan mapag-oolayan nindo an kapitulo 9 asin 10 kan The Bible—God’s Word or Man’s?
6 Kun tunay na interesado an kagharong puwede niang kuanon an librong God’s Word asin an New World Translation sa enot na pagdalaw. Kun siring, puwede nindong darahon an atension sa mga punto sa Kapitulo 10 kan libro asin magpalataw nin mga hapot na sisimbagon sa saindong sunod na pagsongko. Kun ibibilang niato an kada kagharong na potensial na disipulo, magmamaigot kitang gamiton an pantapos na mga tataramon tanganing itogdok an pundasyon para sa pagdalaw liwat.