Simple Asin Epektibong mga Pagdalaw Liwat
1 Kamo daw regular na naggigibo nin mga pagdalaw liwat, o nadedepisilan daw kamo huli ta dai nindo aram an sasabihon? Tolong bagay an makatatabang saindo na magin mapanggana: (1) marahay na pag-andam; (2) abilidad na ipakipag-olay an saro o duwang punto manongod sa pirang simpleng tema sa Biblia; asin (3) pagigin andam na maghinanyog sa punto-de-vista kan kagharong.
2 Sa pag-andam na gumibo nin pagdalaw liwat, konsideraron kun ano an tema na pinakamarahay na ipakipag-olay sa kagharong. Kamo daw nagpalataw nin hapot sa katapusan kan saindong nakaaging pagdalaw, o nagpaheling daw nin interes an kagharong sa sarong partikular na tema? Repasohon an saindong mga nota, asin gamiton an librong Reasoning sa paghanap nin impormasyon na kakaipuhanon nindo tanganing makagibo nin epektibong pagdalaw liwat. Sa pagdalaw nindo, taratarahon an kagharong paagi sa ngaran.
3 Kun nakapasakamot kamo sa kagharong nin An Torrengbantayan asin Awake!, an saindong pagdalaw liwat puwedeng basado sa saro o duwang simpleng punto na pinili nindo sa magasin. Kun nakapasakamot kamo nin tract sa enot na pagdalaw, puwede kamong magkomento magsalang sa tract mismo o basahon an angay na punto sa magasin o sa brochure.
4 Kun nakapasakamot kamo nin “Life in a Peaceful New World,” magsabi sanang:
◼ “Kan huri kong pagdalaw, nag-olay kita manongod sa panuga nin Dios na sarong matoninong na bagong kinaban. Arog kan napag-olayan niato, maabot an mas marahay na mga kamugtakan paagi sa Kahadean nin Dios. Ano sa paghona nindo an kahagadan sato tanganing magin kabtang kan matoninong na bagong kinaban na iyan?” Togotan an kagharong na magkomento, dangan basahon an mga punto sa Salmo 37:9, 11, 29.
5 Kun nakapasakamot kamo nin “What Hope for Dead Loved Ones?,” an halipot na mga komentong ini puwedeng makapoon nin pag-orolay:
◼ “Pakalihis kan satuyang huring pag-orolay, winalatan ko kamo nin sarong tract na may titulong What Hope for Dead Loved Ones? An ikatolong parapo nagpapalataw nin nagkapirang interesanteng hapot: ‘Taano ta nagagadan an mga tawo? Haen an mga gadan? Asin paano niato masisierto na puwede sindang mabuhay giraray?’ An minasunod na subtema, na may titulong ‘Death, and What Happens When We Die,’ sinisimbag an kada hapot. Mangnoha an sinasabi kaiyan sa ikaapat na parapo.” Basahon an parapo, na iiniiba an duwang kasuratan, asin hagadon an opinyon kan kagharong.
6 Durante kan pag-orolay, an kagharong tibaad magpahayag nin pirang opinyon na bakong tama. Dai kinakaipuhan na patunayan na sala an gabos na bagay na saiyang sinasabi. Imbes, magdanay sa topiko na pinag-oolayan. An ano man na bakong makakasuratan na mga ideya nia puwedeng ikatanos sa ngapit na mga pagdalaw liwat.
7 Sa gabos na paagi planohon na papagdanayon an ano man na interes paagi sa paggibo nin simple asin epektibong mga pagdalaw liwat durante sa Mayo.