Omawon an Dios nin Paglalang

¹ Magagayon na tanawon, makolor na mga pagsolnop kan aldaw, mabitoon na langit kun banggi, magagayon an tono na awit nin mga gamgam​—siisay an tatawan nindo nin kredito para sa magagayon na bagay na ini? Iyo, napahihiro kita na omawon an Dios nin paglalang. Bilog na puso kitang minaoyon sa ipinahahayag kan Kapahayagan 4:11. Huli sa saiyang paglalang sa gabos na bagay, si Jehova Dios angay sa satong pag-omaw.

² Sa ibong kan ebidensia kan mga paglalang nin Dios, pinalakop nin mga tawo an ideya na nagkaigwa nin buhay paagi sa aksidente o paagi sa daing isip na ebolusyon. An dakulaon na kaputikan na ini nakapababa asin nakapaluya sa boot kan mga tawo, asin ini paglanghad nanggad sa satong Dakulang Kaglalang.​—Ecl. 12:​1; Roma 1:​20, 25.

³ Sa Hunyo, bilang maimbod na mga lingkod ni Jehova, igwa kitang oportunidad na ipresentar an katotoohan dapit sa satong Kaglalang asin sa saiyang makangangalas na mga gibo. An librong Life​—How Did It Get Here? By Evolution or by Creation? iaalok sa gabos na nagpapaheling nin interes na makanood sa mga katunayan mapadapit sa pinaghalean asin katuyohan nin buhay. An publikasyon na ini sinasangkapan kita na mapusong idepensa an katotoohan mapadapit sa pinaghalean nin buhay.

⁴ Espesyal na mga Teritoryo: Apuwera sa pagpapatotoo sa harong-harong, puwede pa kitang gumibo nin espesyal na paghihingoa na makipag-olay sa mga tawo na may partikular na interes sa ebolusyon o paglalang, na kaolayon sinda baga man sa saindang pinagtatrabawohan o sa eskuwelahan. Halimbawa, an hoben na mga Saksi ipinaheling ini sa saindang mga maestro. An sarong hoben na Saksi nagtao nin librong Creation sa saiyang maestro asin sia napangalas kan marisa na dai sana ini inadalan na marhay kan maestro kundi ginamit man ining reperensia sa pagtotokdo sa klase. (w90-BI 9/1 p. 32 [w90-E 9/1 p. 32]; w86-E 10/1 p. 32) Taano ta dai dolokon an kada saro sa saindong mga maestro asin kaeskuwela na hinohona nindong maoogma sa pagbasa kaining publikasyon?

⁵ Puwedeng gumibo nin espesyal na paghihingoa na makaolay an mga estudyante sa kolehiyo asin mga paratokdo na nag-iistar o nagtatrabaho sa saindong teritoryo. An mga propesyonal arog nin mga abogado asin doktor inapresyar an maigot na pagsiyasat asin dokumentadong mga ebidensia na yaon sa librong Creation. (yb87 p. 54) An mga makakaolay nindo tibaad gusto man na magkaigwa kan magayon an pagkailustrar na publikasyon na ini bilang reperensia.

⁶ Madonong na ialok an librong Creation sa gabos na manonompongan niato sa Hunyo. Sierto na mantang ipinakikipag-olay nindo an saro o labi pang espisipikong punto sa libro na nakapagtotokdo asin nakaparirigon nin pagtubod sa Kaglalang, dakol kamong manonompongan na magugustong makanood nin orog pa asin andam na akoon an libro.

⁷ An magayon na instrumentong ini logod bako sanang makatabang sa dakol na maheling kun gurano kadaing kamanungdanan an teoriya nin ebolusyon kundi makatabang man sainda na maparigon an pag-apresyar sa “Kaggibo kan langit asin daga.”​—Sal. 146:6.