Pagtabang sa Iba na Tawan nin Onra an Satong Kaggibo
1 Nakakamate daw kita siring kan salmista kan sia magsabing: “O Jehova, . . . sa saimo an gikanan nin buhay”? (Sal. 36:5, 9) Paano kita makakatabang sa iba na tawan nin onra an satong Kaglalang? Paagi sa pag-alok ngonyan na Hunyo kan Life—How Did It Get Here? By Evolution or by Creation? An librong ini nagtatao nin makosog na ebidensia sa pag-eksister nin Dios asin malinaw na nagpapaheling kun taano an ebolusyon ta dai puwedeng magin totoo.
2 Uya an simple, direktang pag-atubang.
Pakataratara sa kagharong, ipaheling an retrato sa pahina 6 asin maghapot:
◼ “Paano nagpoon an buhay sa dagang ini? An iba nagsasabi na iyan aksidente sana. An Biblia itinatao an gabos na kredito sa Dios. Ano sa paghona nindo? [Pasimbagon.] Nagtatao an librong ini kan mga simbag na biyong kaoyon kan Biblia asin sientipikong mga katunayan. Boot kong magkaigwa kamo kaiyan tanganing marepaso nindo an gabos na ebidensia asin makadesisyon kamo para sa saindong sadiri.”
3 Pakapamidbid kan saindong sadiri, puwede nindong sabihon:
◼ “Sa sientipikong kinaban na ini, praktikal daw na maniwala sa paglalang, o sa paghona daw nindo aksidente sanang naglataw kita? [Pasimbagon.] Mangnoha an pangangatanosan kan Biblia manongod sa bagay na ini. [Basahon an Hebreo 3:4.] Dai daw kamo maoyon na an lambang edipisyo igwa nin kagtogdok? Kun siring, nagsadiri daw na lumataw an uniberso?” Ipaheling an ilustrasyon sa pahina 114 kan librong Creation, dangan sambiton an punto sa parapo 2 sa pahina 115. Kun kuanon kan kagharong an libro, sabihon saiya na sa sunod na pagdalaw nindo ipakikipag-olay nindo an hapot na, Ano an ngapit kan tawo asin kan daga?
4 O pakataratara sa kagharong, puwede kamong magsabi:
◼ “Ano daw sa paghona nindo an itsura kan enot niatong mga apoon? [Pasimbagon.] Sinda daw siring kaining ‘tawong-kabalang’? [Buksan sa pahina 83 kan librong Creation.] Mangnoha an sinasabi kan Biblia sa Gibo 17:26. [Basahon.] Kaya sa ano basado an mga drowing na ‘mga tawong-kabalang?’” Darahon an atension sa kapsion sa irarom kan drowing sa pahina 89.
5 An saro pang pag-atubang puwede na itokdo an tutob kan librong “Creation” asin magsabing:
◼ “Ngonyan hinahapot mi an satong mga kataed, Naglataw daw an tawo paagi sa ebolusyon o paagi sa paglalang? Ano sa paghona nindo? [Pasimbagon.] Dawa ngani dakol na edukadong tawo an naniniwala sa ebolusyon, mangnoha an sinabi nin sarong dating astronaut. [Ipaheling an p. 122, par. 14.] Kaipuhan na personal niatong siyasaton an ebidensia tanganing masabotan kun arin an maninigo niatong paniwalaan—an ebolusyon o paglalang.”
6 Minamawot daw nindong tabangan an iba na makanood kan katotoohan dapit sa satong Kaglalang asin sa saiyang mamomoton na mga katuyohan? An librong Creation makakatabang saindo na gibohon iyan. Iyan nagtataong onra sa satong Dakulang Kaglalang paagi sa pagpalakop kan saiyang makangangalas na katuyohan na bendisyonan an katawohan paagi sa Kahadean ni Cristo.