Pagparigon nin Pagtubod sa Kaglalang kan Katawohan
1 Dakol na tawo an naimpluwensiahan nin sala na maniwala sa ebolusyon imbes na sa paglalang bilang an ginikanan nin buhay. An librong Creation inaanalisar an duwang lado kan isyu asin nagtatao nin kadakoldakol na patotoo sa pagsuportar sa Biblia. Paano niato matatabangan an sinserong mga tawo na nagpaheling nin pagigin andam na maghinanyog? Paagi sa paggibo nin mga pagdalaw liwat. Sa pagbalik niato, perming marahay na magkaigwa sa isip nin depinidong bagay na sasabihon na magpaparigon sa pagtubod ki Jehova bilang satong Kaglalang.
2 Kun an saro nagpaheling nin paniniwala sa Biblia, an pag-atubang na ini puwedeng magin epektibo para sa pagpoon sa saindong pag-orolay:
◼ “An Isaias 45:18 nagsasabi nin mapuwersang kapahayagan dapit sa ginikanan kan uniberso; boot kong maaraman kun ano an paghona nindo dapit dian. [Basahon asin pakomentohon.] Digdi inaapod si Jehova na Kaglalang kan kalangitan asin kan daga. Kumusta man an buhay digdi sa daga? An Isaias 42:5 nagtatao man saiya kan gabos na kredito para dian. [Basahon.] Kun totoo an sinasabi kan Biblia, siertong sala an ebolusyon. Sa paghona daw nindo puwede kamong magtiwala sa Biblia?” Buksan an kapitulo 17 kan librong Creation, asin itokdo an dugang pang mga dahelan sa pagtubod ki Jehova bilang an Kaglalang.
3 Puwede nindong ponan an saindong pakipag-olay nin siring kaini:
◼ “Kan nakaagi kong pagdalaw, pinalataw ko an hapot na, Ano an ngapit kan tawo asin kan daga? Mangnoha kun paano minasimbag sa hapot na iyan an librong iwinalat ko saindo.” Buksan sa pahina 234-5 kan librong Creation asin dagkahon sia na basahon an parapo 6 asin 7. Kun ipinaheheling an orog pang interes, puwede nindong ihapot: “Anong mga pagbabago, sa paghona nindo, an mangyayari digdi sa daga?” Kun angay, an puntong ini puwedeng ipakipag-olay sa panahon na iyan o sa saindong masunod na pagdalaw paagi sa pagpapadagos sa iba pang parapo kan iyo man sanang kapitulo kan librong Creation.
4 An saro pang paagi na puwede nindong ponan an pagdalaw liwat iyo an pagsabing:
◼ “An katawohan nagtios nin grabeng kolog asin pagmondo huli sa karompotan asin karatan. Si Jehova, an Kaglalang kan dagang ini, nanuga na ini matatapos. [Buksan sa pahina 196, asin basahon an Talinhaga 2:21, 22.] An mga nagmimidbid sa saiya bilang saindang Kaggibo asin naggigibo kan saiyang kabotan makakalaom sa makangangalas na mga bendisyon.” Kun angay sa panahon na iyan, idagos na ipakipag-olay an Kapahayagan 21:4, 5 sa pahina 197-8.
5 An eksperyensiadong mga parahayag naaraman na pinakamarahay na mag-iskedyul nin itinalagang mga panahon para sa mga pagdalaw liwat. An pagkaigwa nin depinidong mga areglo para sa gibohon na ini matabang sa sato na kultibaron tolos-tolos an interes. Determinaran an panahon na pinakamarahay para sa saindo asin para sa teritoryo. Paagi sa saindong regular na pakikikabtang sa gibohon na ini, makakanompong kamo nin kagayagayahan sa pag-otob kan pagboot na ‘gumibo nin mga disipulo.’—Mat. 28:19, 20.