Tabangan an Iba na Apresyaron an Satong Kaharohalangkaweng Kaglalang
1 Mantang pinagmamasdan niato an mga linalang sa palibot niato, dai kita nin pagduda na may Kaglalang asin na sia interesadong gayo sa satong ngapit. (Roma 1:20) An librong Life—How Did It Get Here? By Evolution or by Creation? nagpararom kan satong pag-apresyar sa Kaglalang. Iyan nakatabang man sato na ipaliwanag sa iba kun paano nagkaigwa nin buhay.
2 An sarong tawo na may inadalan sa siensia nagsabi na an librong Creation iyo an pinakamagayon na librong nabasa nia para sa pagpakosog sa apresasyon sa buhay. An sarong propesor sa kolehiyo nagsabi: “Dai pa ako nakaheling nin siring karahay an pagkaatubang na argumento apabor sa paglalang.” Malinaw na an librong Creation nakatabang sa dakol na apresyaron an satong kaharohalangkaweng Kaglalang, si Jehova.
APROBETSARAN AN GABOS NA OPORTUNIDAD
3 Ngonyan na Setyembre, iaalok niato liwat an librong ini sa ministeryo sa langtad. Apuwera sa regular na pagharongharong, ikaaalok niato an librong Creation sa paghuhulit sa tinampo asin kun nagpapatotoo nin impormal. Ikaaalok niato iyan sa mga katrabaho, kaklase, paryentes, asin kaamigo. May kopya na daw an saindong mga inaadalan sa Biblia? Igwa daw kamo nin ruta sa magasin? Tibaad gusto nindang magkaigwa nin kopya. Aprobetsaran an gabos na oportunidad na ialok an librong Creation ngonyan na bulan.
4 An dakol na hobenes nagin mapanggana sa pagwaras kan librong Creation sa eskuwelahan. Prinobaran na daw nindong magdara nin sarong kopya kaiyan sa eskuwelahan? Kun naghahapot an mga mapag-usyoso, puwede kamong magpatotoo sa sainda. An ibang parahayag nagin mapanggana sa paghuhulit sa tinampo sa luwas nin mga kolehiyo asin pag-alok kan libro sa mga estudyante.
GAMITON AN TOPIKONG MAPAG-OOLAYAN
5 An alok bagay na bagay sa satong Topikong Mapag-oolayan, “Sambahon an Kagtao nin Buhay.” Sa pag-alok kan libro, puwede nindong sabihon: “An dakol na tawo interesado sa pakaaram kun paano nagpoon an buhay. Napag-isip-isip na daw nindo iyan? [Pasimbagon.] Laen-laen an opinyon, pero konsideraron niato an paliwanag kan Biblia. [Basahon an Hebreo 3:4.] Siyempre an gabos na edipisyong naheheling niato ngonyan may kagdisenyo asin kagtogdok. Malinaw na an mas komplikadong uniberso seguradong may kaglalang. Sono sa Hebreo 3:4, an Kaglalang iyo an Dios. Alagad paano ini maninigong makaapektar sato? [Basahon an Kapahayagan 4:11.] Kaya an madonong na gibohon mantang may panahon pa pag-adalan an kabotan kan Kaglalang asin ioyon dian an satong buhay.” Dangan ialok an libro, na sinasabi na ipinaliliwanag kaiyan kun paano namugtak digdi an tawo asin kun paano an pagkuyog sa satong Kaglalang magbubunga nin buhay na daing sagkod.
6 Kanigoan an kaogmahan niato na magkaigwa kan may magagayon na ilustrasyon, 256-pahinas na libro na nagpapaliwanag kan katotoohan manongod sa ebolusyon asin paglalang! Alagad, sa pangenot, an librong ini nagtatao nin onra sa satong Kaharohalangkaweng Kaglalang. Iyan paagi sa pagsabi sato kun paano nagkaigwa nin buhay, kan makangangalas na katuyohan ni Jehova na pakangbanalon an saiyang ngaran, asin kan saiyang panuga na bendisyonan an katawohan paagi sa Kahadean.