Maghulit nin Pagkabutas sa mga Bihag
1 An saro na may inadalan sa siensia na nakabasa kan Life—How Did It Get Here? By Evolution or by Creation? nagsabi: “Namungnan ako huli sa pagkaklaro asin puwersa kan bagong librong ini. Sa paghona ko iyan an pinakamarahay na libro sa siensia na nabasa ko para sa pagpatalubo sa pag-apresyar sa buhay. Iyan komplikado kun dapit sa siensia, pero sa grado na masasabotan minsan niisay.” Arog man daw kaiyan an pagmate nindo?
2 Si Satanas naggagamit nin dakol na pakana saka nin “mga katokdoan nin mga demonyo” tanganing butahon an isip nin mga tawo. (1 Tim. 4:1; 2 Cor. 4:4) An saro sa mga katokdoan na iyan iyo an ebolusyon, asin an librong Creation makatatabang sato na “maghulit nin pagkabutas” sa mga nabibihag kan teoriyang ini. (Luc. 4:18) Ngonyan na Setyembre iaalok niato nin mahiwas an librong Creation sa satong ministeryo.
PAGTUMBA SA “MGA BAGAY NA MARIGONON AN PUNDASYON”
3 An teoriya nin ebolusyon saro sa “mga bagay na marigonon an pundasyon,” iyo, “halangkaw na bagay na pinatitindog tumang sa kaaraman nin Dios.” (2 Cor. 10:4, 5) Pero si Jehova nagtao sato nin mapuwersang espirituwal na mga armas sa pagtumba sa siring na mga pangangatanosan. Pakabasaha kan librong Creation, an sarong propesor sa kolehiyo na nagsasabing sia ateista nag-admitir: “Dai pa ako nakaheling nin arog kaini karahay an pagkaatubang na argumento para sa paglalang.” May mga maestro asin estudyante sa kolehiyo na nag-ako kan librong Creation minsan ngani nagsasayuma sa iba niatong babasahon. Taano ta dai pagmaigotan na maabot kan alok na ini an siring na mga tawo sa saindong teritoryo?
PAKAALOK KAN LIBRONG CREATION SA GABOS
4 Kamo daw na mga parahayag na nag-eeskuwela ikinaalok na an librong Creation sa saindong mga maestro asin kaklase? Taano ta dai iyan gibohon ngonyan na Setyembre? Pakaako kan libro, an sarong maestro nagsabi: “Dai na kaipuhan na pag-olayan an ebolusyon. Nabasa ko na an librong Creation asin ngonyan malinaw na an gabos. Sa katapustapusi nanompongan ko na an mga simbag na hinahanap ko.”
5 Iinalok na daw nindo an librong Creation sa saindong inaadalan sa Biblia? An sarong babae nagsurat: “Bago pa sana akong pumoon na makipag-adal sa mga Saksi. Kaipuhan na isabi ko saindo kun gurano an paghanga ko sa libro nindong Life—How Did It Get Here?” Dangan idinugang nia: “Ginibo nindo an hararomon na temang ini na magayonon an pagkasimple tanganing masabotan—pambihira nanggad, kun iisipon an intelektuwal na gayong pagsiyasat na ginibo para sa librong ini.”
6 An librong Creation tamang-tama sa satong Topikong Mapag-oolayan na “An Gobyerno na Magtatao nin Paraiso.” Pakabasaha kan Isaias 11:6-9, puwede nindong bukasan sa pahina 243 asin ipaheling an ilustrasyon dian nin sarong aki na nakikikawat sa mga tigre. Makatatao kamo nin ideya kun ano an magigin kamugtakan sa paraiso paagi sana sa pagbasa sa mga subtema sa bilog na kapitulo 19 kan libro. Idoon na an teoriya nin ebolusyon mayo nin itinataong paglaom na lihis pa sa presenteng buhay, mantang an Biblia nagtatao kan panuga na buhay na daing katapusan sa paraiso.
7 Tumabang kita na makabutas an mga nabibihag nin falsong mga katokdoan paagi sa paggamit nin igo sa librong Creation ngonyan na Setyembre.