Pag-aatubang kan Maogmang Bareta—Na Dara an Librong Creation
1 Kadakol kan ebidensia na nag-eeksister an Kaglalang asin na sia interesado sa saiyang linalang. (Roma 1:20, 21; Kap. 4:11) Durante kan Setyembre igwa kita nin oportunidad na iatubang an katotoohan manongod sa paglalang mantang iinaalok niato an librong Life—How Did It Get Here? By Evolution or by Creation?
2 Apuwera sa satong ministeryo sa harong-harong, ikaaalok niato an librong Creation sa paghulit sa tinampo asin mantang nagpatotoo nin impormal. Ini sarong nakadadagkang libro na maakit sa mga ahente, negosyante, asin iba pa na satong nakaaatubang. Dangan yaon idtong satong mga ruta sa magasin, o idtong regular niatong nakakaolay alagad mayo pa kan librong ini. Bako daw na sinda man maggagayagaya sa pagbasa kan marahay na librong ini?
3 Kamong mga hobenes sa kongregasyon, igwa kamo nin sadiri nindong teritoryo, asin an teritoryong iyan iyo an eskuwelahan. Naprobaran na daw nindo na magdara nin kopya kan librong Creation sa eskuwelahan? An mga tawong mausyoso tibaad maghapot saindo manongod kaiyan. Kun iwinawalat nindo an sarong kopya na naheheling sa saindong tukawan o binabasa ini kun odto, tibaad manompongan nindo an iba na naghahapot kun paano sinda makakukua nin kopya.
4 Kita gabos puwedeng magin puka sa mga oportunidad na mag-alok kan publikasyon na ini sa mga hobenes na nanonompongan niato sa ministeryo. Kun mga magurang an manompongan niato sa harong, pagkatapos na konsideraron an Topikong Mapag-oolayan, ikaaatubang niato an libro asin ipaliwanag kun paano ini makatatabang sa saindang mga aki. Mantang parate na itinotokdo sa eskuwelahan an ebolusyon, makatatabang an libro sa saindang mga aki na masabotan kun ano an sinasabi kan Biblia asin kan tunay na siensia manongod sa paglalang.
5 An iba tibaad dai nagtutubod sa ebolusyon asin tibaad bako man interesado sa temang iyan. Alagad parate na sinda nahahadit manongod sa kasakitan sa kinaban asin manongod sa ngapit. Para sa sainda, ikatatampok niato an kapitulo 16 o 19.
6 Kun may pagduwaduwa an kagharong manongod sa pagtubod sa Biblia, puwede niatong itokdo sia sa kapitulo 17 asin 18 sa “Can You Trust the Bible?” asin “The Bible—Is It Really Inspired by God?”
7 Mawot niato na an pinakadakol na tawo kun posible magpahalaga na si Jehova an Kaglalang. (Gibo 17:24-28) Kaya ipaabot niato sa gabos an oportunidad na magbasa kan librong Creation sa Setyembre.