Magkaigwa nin Kapusoan na Gumibo nin mga Pagdalaw Liwat
1 Naoogma daw kamong gumibo nin mga pagdalaw liwat? An dakol na parahayag iyo. Tibaad ninenerbios kamo kan primero, nangorogna kun dinadalaw liwat an mga kagharong na nagpaheling nin kadikit sanang interes kan enot sindang makaolay. Alagad mantang ‘nagkakaigwa kamo nin kapusoan paagi sa satong Dios na magtaram kan maogmang bareta’ sa mga pagdalaw liwat, tibaad masorpresa kamo na maheling kun gurano kapasil asin kanakakokontento an gibohon na ini. (1 Tes. 2:2) Paano daw ini?
2 An totoo, igwa nin importanteng kalaenan an pagdalaw liwat asin an enot na pagsongko. An pagdalaw liwat ginigibo sa sarong kamidbid, bakong sa sarong estranghero, asin sa kadaklan mas pasil na makipag-olay sa sarong kamidbid kisa sa sarong estranghero. Kun manongod sa mayaman na mga balos na minagikan sa pakikikabtang sa gibohon na ini, an mga pagdalaw liwat puedeng gumiya sa mabungang mga pag-adal sa Biblia sa harong.
3 Kun kita naghaharongharong, paorootro niatong sinosongko an mga tawo na bakong interesado kan dalawon niato sinda kan nakaagi. Taano, kun siring, ta padagos kitang minasongko? Narerealisar niato na nagbabago an mga kamugtakan nin mga tawo asin na an indibiduwal na garo baga indiperente o nagtutumang pa ngani kan nakaaging pagdalaw tibaad interesado na sa sunod na pagsongko niato. Isinasaisip iyan, nag-aandam kita para sa satong pagdalaw liwat asin namimibi para sa bendisyon ni Jehova tanganing an sinasabi niato magbunga nin marahay na reaksion.
4 Kun, sa satong pagharongharong, gikan sa boot niatong hinuhulitan an mga tawo na dai man lamang nagpaheling nin interes kan nakaagi, bako daw na maninigo pa ngani kitang mas gikan sa boot na dumalaw liwat sa siisay man na nagpapaheling nin interes sa mensahe kan Kahadean?—Gibo 10:34, 35.
5 Dakol sa sato an nasa katotoohan ngonyan huli ta mapasensia kitang dinalaw liwat nin sarong parahayag. Kun saro kamo sa mga ini, puede nindong hapoton an saindong sadiri: ‘Ano an nagin enot na impresyon ko sa parahayag na idto? Tolos-tolos ko daw na inako an mensahe kan Kahadean kan enot kong madangog iyan? Nagin garo indiperente daw ako?’ Imbes, maninigo kitang magin maogma na an parahayag na nagdalaw liwat hinusgaran kita na angay na dalawon liwat asin ‘nagkaigwa nin kapusoan paagi sa saiyang Dios,’ nagsongko, asin padagos na tinokdoan kita kan katotoohan. (1 Tes. 2:2) Kumusta man an mga indibiduwal na nagpapaheling nin interes sa primero alagad sa huri garo baga linilikayan kita? Mahalagang marhay an positibong aktitud, siring kan iiniilustrar kan minasunod na eksperyensia.
6 Mantang nagpapatotoo sa tinampo sarong amay na aga, nanompongan nin duwang parahayag an sarong hoben pang babae na ibinubusol an sarong aki na nasa busol-busol na tukawan. Nag-ako an babae nin sarong magasin asin inimbitaran an mga tugang na babae na dumuman sa saiyang harong sa masunod na Domingo. Uminabot sinda sa itinalaan na panahon, alagad sinabihan sinda kan kagharong na mayo siang panahon tangani na makipag-olay. Minsan siring, talagang nanuga sia na puede siang kaolayon sa masunod na semana. Nagduda an mga tugang na babae na ootobon nia an pakipag-olay, alagad hinahalat sinda kan babae kan sinda dumalaw liwat. Naponan an pag-adal, asin makangangalas an pag-oswag kan babae. Sa laog nin halipot na panahon, nagpoon na siang umatender nin regular sa mga pagtiripon asin makikabtang sa paglilingkod sa langtad. Bautisado na sia ngonyan.
7 Ibugtak an Pundasyon sa Enot na Pagsongko: An pundasyon para sa sarong mapangganang pagdalaw liwat parateng ibinubugtak sa enot na pagsongko. Maingat na hinanyogon an mga komento kan kagharong. Ano an sinasabi kan mga iyan sa saindo? Relihioso daw sia? Nahahadit daw sia dapit sa sosyal na mga isyu? Interesado daw sia sa siensia? kasaysayan? palibot? Sa pagtatapos kan pagsongko, puede kamong magpalataw nin nakapupukaw sa isip na hapot, asin manuga na ipakipag-olay an simbag kan Biblia sa pagdalaw liwat nindo.
8 Halimbawa, kun naghihimate an kagharong sa panuga kan Biblia manongod sa sarong paraisong daga, puedeng magin angay an orog pang pag-orolay sa topiko. Bago kamo humale, puede nindong ihapot: “Paano kita makasisierto na ootobon nin Dios an panugang ini?” Dangan idagdag: “Tibaad puede akong humapit kun nasa harong an ibang miembro kan pamilya, dangan ikapaheheling ko sa saindo an simbag kan Biblia sa hapot na ini.”
9 Kun an kagharong dai nagpaheling nin interes sa ano man na partikular na tema, puede nindong palatawon an saro sa mga hapot na itinatampok sa mga pag-atubang na nasa likod na pahina kan An Satong Ministeryo sa Kahadean asin gamiton iyan bilang basehan para sa saindong masunod na pag-orolay.
10 Magkaigwa nin Tamang Nasusurat na mga Rekord: Maninigo na tama asin kompleto an saindong house-to-house record. Isurat an ngaran asin adres kan kagharong sa pinakamadaling panahon pakahale nindo sa harong. Dai pagtoodan an numero kan harong o an ngaran kan tinampo—ihapot an impormasyon tangani na masierto na tama iyan. Isurat kun anong klase nin tawo an indibiduwal. Inota an topiko na pinag-olayan nindo, an mga tekstong binasa nindo, an ano man na babasahon na iwinalat nindo, asin an hapot na sisimbagon nindo sa saindong pagdalaw liwat. Iiba an aldaw asin oras kan enot na pagsongko asin an panahon na sinabi nindo na madalaw liwat kamo. Ngonyan na kompleto na an saindong rekord, dai iyan pagwaraon! Ibugtak iyan sa seguradong lugar tangani na puede nindong helingon iyan sa huri. Padagos na isip-isipon an indibiduwal asin kun paano nindo gigibohon an pagsongko sa masunod na panahon.
11 Aramon kun Ano an Saindong mga Katuyohan: Enot, paagi sa pagigin mainit asin makikatood, gibohon an bilog nindong makakaya na gibohon na pamugtak an boot kan kagharong. Ipaheling na interesado kamo sa saiya bilang persona, na dai man nagigin sobra kapamilyar. Sunod, ipagirumdom sa saiya an hapot na pinalataw nindo kan nakaaging pagdalaw. Maingat na maghinanyog sa saiyang opinyon, asin ipahayag an sinserong apresasyon sa saiyang mga komento. Dangan, ipaheling kun taano ta praktikal an punto de vista kan Biblia. Kun posible, itokdo sia sa sarong konektadong punto sa librong Kaaraman na Minagiya Pasiring sa Buhay na Daing Katapusan. Isaisip na marhay na an saindong pangenot na katuyohan sa mga pagdalaw liwat iyo na pagmaigotan na makapoon nin pag-adal sa Biblia.
12 An pagigin direkta na ginamit sa librong Kaaraman pinahiro an dakol sa sato na ‘magkaigwa nin kapusoan’ sa mga pag-adal sa Biblia tangani na maenkaminar an mga estudyante na umatender sa mga pagtiripon asin makiasosyar sa organisasyon ni Jehova. Kan nakaagi, may tendensia kitang maghalat sagkod na haloy-haloy nang panahon na nakapag-adal an mga indibiduwal bago sinda imbitaran na makiasosyar sa sato. Ngonyan, dakol na estudyante an nag-aatender sa mga pagtiripon sa pinakamadaling panahon na maponan ninda an pag-adal, asin bilang resulta mas marikas an saindang pag-oswag.
13 Impormal na nagpatotoo an sarong mag-agom sa sarong katrabaho. Kan sia magpahayag nin interes sa katotoohan, inimbitaran ninda sia na magkaigwa nin pag-adal sa Biblia sa librong Kaaraman. Kadungan kaiyan, sinabihan ninda sia na dapat siang umatender sa mga pagtiripon, na dian masisimbag an dakol sa saiyang mga hapot. Bako sanang gikan sa boot na inako kan lalaki an saindang imbitasyon na mag-adal kundi nag-adal man nin duwang beses sa sarong semana asin nagpoon nang regular na umatender sa mga pagtiripon sa Kingdom Hall.
14 Gamiton an Brosyur na Ano an Kahagadan sa Sato nin Dios?: Sa “Mga Mensahero nin Diosnon na Katoninongan” na Pandistritong mga Kombension, naresibi niato an brosyur na Ano an Kahagadan sa Sato nin Dios? Kapakipakinabang an brosyur na ini sa pagpoon nin mga pag-adal sa Biblia sa mga tawong may pagkatakot sa Dios gurano man sinda kaedukado. Igwa iyan nin kompletong kurso sa pag-adal, na kinokobrehan an pundamental na mga katokdoan kan Biblia. Magigin epektibong gayo na kasangkapan an publikasyon sa pagpaabot kan kaaraman nin Dios. Ipinaliliwanag kaiyan an katotoohan nin malinaw na marhay asin simple na haros an kada saro sa sato magagamit iyan sa pagtokdo sa iba kan mga kahagadan nin Dios. Posible na dakol na parahayag an magkakapribilehio na magkondukta nin pag-adal sa Biblia sa brosyur na ini.
15 An nagkapirang indibiduwal na naghohona na mayo sindang panahon na mag-adal kan librong Kaaraman tibaad andam na magkaigwa nin haralipot na sesyon sa pag-adal kan brosyur na Kahagadan. Maoogma sinda sa saindang manonodan! Sa duwa o tolo sanang pahina, manonompongan ninda an simbag sa mga hapot na hinorophorop nin mga tawo sa laog nin dakol na siglo: Siisay an Dios? Siisay an Diablo? Ano an katuyohan nin Dios para sa daga? Ano an Kahadean nin Dios? Paano nindo manonompongan an tunay na relihion? Minsan ngani iinaatubang kan brosyur an katotoohan sa simpleng mga termino, mapuersang marhay an mensahe kaiyan. Kinokobrehan kaiyan an pangenot na mga punto na rerepasohon kan kamagurangan sa mga kandidato para sa bautismo asin puedeng magserbing tangga pasiring sa mas lubos na pag-adal sa librong Kaaraman.
16 Sa pag-alok nin pag-adal sa sarong dinadalaw liwat, puede sana nindong sabihon: “Aram daw nindo na paagi sana sa pagkaigwa nin pirang minuto, makukua nindo an simbag sa sarong importanteng hapot sa Biblia?” Dangan, iatubang an sarong hapot na yaon sa kapinonan kan saro sa mga leksion sa brosyur. Halimbawa, kun nagsosongko kamo sa sarong gurang, puede nindong sabihon: “Aram po niato na kan nakaagi pinarahay ni Jesus an mga tawo. Alagad sa ngapit ano po an gigibohon ni Jesus sa mga naghehelang? mga gurang? mga gadan?” Makukua an mga simbag sa leksion 5. An sarong relihiosong tawo tibaad magngalas sa hapot na: “Hinihinanyog daw nin Dios an gabos na pamibi?” Sinisimbag iyan sa leksion 7. Boot na maaraman kan mga miembro nin pamilya: “Ano an kahagadan nin Dios sa mga magurang asin mga aki?” Maaaraman ninda iyan mantang pinag-aadalan ninda an leksion 8. An iba pang hapot iyo ini: “An mga gadan daw may magigibong maraot sa mga nabubuhay?” na ipinaliwanag sa leksion 11; “Taano ta kadakol kan relihion na naghihingakong Kristiano?” na ipinaliwanag sa leksion 13; asin “Ano an dapat nindong gibohon tanganing magin katood nin Dios?” na kinobrehan sa leksion 16.
17 Tabangan an mga Nagtataram nin Ibang Lenguahe: Kumusta man an mga kagharong na nagtataram nin ibang lenguahe? Kun posible, maninigo sindang tokdoan sa lenguahe na kabisado nindang marhay. (1 Cor. 14:9) Kun igwang haraning kongregasyon o grupo na naggagamit kan lenguaheng iyan, puedeng ipadara an saindang ngaran sa kamagurangan duman. Kun mayo nin haraning mga kongregasyon o grupo asin mayong lokal na mga parahayag na nakatataram kan lenguahe kan kagharong, puedeng probaran kan parahayag na makipag-adal sa kagharong, na ginagamit an brosyur na Kahagadan sa duwang lenguahe.
18 An sarong parahayag na nagtataram nin Ingles pinonan an pakipag-adal sa sarong lalaki na nagtataram nin Vietnames asin kaiba an agom kaini, na nagtataram nin Thai. Ginamit an mga publikasyon asin Biblia na Ingles, Vietnames, asin Thai durante kan pag-adal. Maski ngani masakit iyan sa primero, nagsurat an parahayag: “An espirituwal na pag-oswag kan mag-agom nagin marikas. Nasabotan ninda an pangangaipo na pumoon na umatender sa mga pagtiripon kaiba an duwa nindang aki, asin binabasa ninda an Biblia barobanggi bilang pamilya. An saindang sais anyos na aking babae igwa nin sadiri niang pag-adal sa Biblia.”
19 Kun nakikipag-adal sa mga tawo na nagtataram nin ibang lenguahe, magtaram nin luway-luway, magpaliwanag nin malinaw, asin gumamit nin simpleng mga tataramon asin frase. Minsan siring, isaisip na an mga tawong nagtataram nin ibang lenguahe maninigong trataron na may dignidad. Dai sinda maninigong trataron na garo baga sinda mga omboy.
20 Gamiton nin marhay an magayon na mga ilustrasyon sa brosyur na Kahagadan. Imbitaran siang basahon an mga teksto sa saiya mismong Biblia. Kun puedeng magkondukta nin pag-adal sa panahon na an sarong miembro nin pamilya puedeng makapag-interpretar, daing duwa-duwa na iyan magigin kapakipakinabang.
21 Dai Mag-atraso sa Paggibo nin mga Pagdalaw Liwat: Gurano kahaloy na kamo maninigong maghalat bago gumibo nin pagdalaw liwat? May mga parahayag na minadalaw liwat sa laog nin saro o duwang aldaw pakalihis kan enot na pakipag-olay. An iba minadalaw liwat paghaloyhaloy sa aldaw man sanang iyan! Iyan daw madalion na gayo? Sa pankagabsan, garo dai man minasayuma an mga kagharong. Sa parate an parahayag na nagsosongko an nangangaipo na magkultibar nin orog na positibong aktitud, kaiba an dikit pang kapusoan. Konsideraron an minasunod na mga eksperyensia.
22 An sarong 13 anyos na parahayag naghaharongharong sarong aldaw kan maheling nia an duwang babae na magkaibang naglalakaw. Nasa isip an pamparigon sa boot na maghulit sa mga tawo saen man sinda manompongan niato, dinolok nia an mga babae sa tinampo. Nagpaheling sinda nin interes sa mensahe kan Kahadean asin nag-ako an kada saro nin librong Kaaraman. Kinua kan tugang na solterito an saindang mga adres, duminalaw liwat pakalihis nin duwang aldaw, asin pinonan an pag-adal sa Biblia sa kada saro sa sainda.
23 An sarong tugang na babae nakikipag-areglo na madalaw liwat sa masunod na semana. Alagad saro o duwang aldaw pakalihis kan enot na pagsongko minahapit sia tangani na tawan nin sarong magasin an kagharong sa temang pinag-olayan ninda kan nakaagi. Sinasabihan nia an kagharong: “Naheling ko an artikulong ini asin inisip ko na magugustohan nindong basahon iyan. Dai ako puedeng humapit tangani na makipag-olay ngonyan, alagad mabalik ako sa Mierkoles na hapon siring sa plinano. Puede pa daw kamo sa oras na iyan?”
24 Kun an indibiduwal nagpapaheling nin interes sa katotoohan, makasisierto kita na mapaaatubang sia sa gabos na klase nin pagtumang. An satong pagdalaw liwat pakalihis tolos kan enot na pakipag-olay mapakosog sa saiya na makapanindogan sa ano man na pangigipit na inaatubang nia sa mga paryente, dayupot na katood, asin sa iba.
25 Kultibaron an Interes kan mga Nanonompongan sa Pampublikong mga Lugar: Dakol sa sato an naoogmang maghulit sa mga tinampo, paradahan, pampublikong mga sasakyan, pamakalan, parke, asin iba pa. Bilang dagdag sa pagpasakamot nin babasahon, kaipuhan niatong kultibaron an interes. Sa katuyohan na iyan, maninigong gumibo nin paghihingoa na kuanon an ngaran, adres asin, kun posible, an numero nin telepono kan gabos na interesadong tawo na nakakaolay niato. An pagkua kan impormasyon na ini bakong arog kadepisil kan tibaad hinohona nindo. Mantang patapos an pag-orolay, iluwas an saindong notebook asin ihapot: “Igwa daw nin paagi na ikapadagos niato an pag-orolay na ini sa ibang panahon?” O magsabi: “Boot kong ipabasa sa saindo an sarong artikulo na segurado akong magigin interesante sa saindo. Puede daw na darahon ko iyan sa saindong harong o opisina?” An sarong tugang na lalaki naghahapot sana: “Sa anong numero nin telepono puede kamong apodan?” Nagbareta sia na sa tolong bulan an gabos apuera sa tolong tawo maogmang nagtao sa saiya kan saindang numero nin telepono.
26 Gamiton an Telepono Tangani na Hanapon Asin Pataluboon an Interes: Ginagamit nin sarong tugang na babaeng payunir an telepono tangani na maabot an mga tawo na nag-iistar sa guardiadong marhay na mga edipisyo. Naggigibo man sia nin mga pagdalaw liwat sa iyo man sanang paagi. Sa enot na pagsongko, nagsasabi sia: “Aram ko na dai nindo ako midbid. Naggigibo ako nin espesyal na paghihingoa na makaolay an mga tawo sa saindong lugar tangani na ihiras an sarong ideya hale sa Biblia. Kun may panahon kamo, boot kong basahon an panuga na makukua sa . . .” Pakabasaha kan teksto, sia nagsasabi: “Bako daw na makangangalas kun maheling niato an pagdatong kan panahon na iyan? Naogma ako sa pagbasa kaini sa saindo. Kun ikinaogma man nindo iyan, boot kong umapod giraray asin ipakipag-olay an saro pang teksto.”
27 Sa pag-apod giraray sa telepono, ipinagigirumdom nia sa kagharong an saindang enot na pag-orolay asin nagsasabi na boot niang basahon sa Biblia kun ano an magigin kamugtakan kun haleon na an karatan. Dangan nagkakaigwa sia nin halipot na pakipag-olay sa Biblia sa kagharong. Pakalihis nin kadakol na pakipag-olay paagi sa telepono, 35 katawo an nag-imbitar sa saiya sa saindang harong asin naponan an pitong pag-adal sa Biblia sa harong! Depisil daw para sa saindo kun beses na gumibo nin mga pagdalaw liwat sa interesadong mga tawo durante kan mga bulan nin tiglipot huli sa dai maagihan na mga tinampo, grabeng lipot, o helang? Kun iyo, taano ta dai sinda kaolayon paagi sa telepono?
28 Kultibaron an Interes na Nanonompongan sa mga Lugar nin Negosyo: Kadakol pa an kalabot sa paghuhulit sa mga tindahan kisa sa pag-alok sana nin mga magasin. Dakol na namamahala sa tindahan an igwang sinserong interes sa katotoohan, asin dapat na kultibaron an interes na iyan. Sa nagkapirang situwasyon, tibaad posibleng magkaigwa nin pag-orolay sa Biblia o pag-adal pa ngani sa sainda mismong lugar nin negosyo. Sa ibang situwasyon, kamo asin an interesadong tawo puedeng mag-olay durante kan pahingalo sa odto o sa ibang kombenyenteng panahon.
29 An sarong nagbibiaheng paraataman nagsongko sa kagsadiri nin sarong sadit na groseriya asin nag-alok na idemonstrar an pag-adal sa Biblia. Kan hapoton kun gurano kalawig an demonstrasyon, nagsabi an nagbibiaheng paraataman na 15 minutos sana iyan. Huli kaiyan, an namamahala sa tindahan nagsabit nin sarong karatula sa pinto: “Mabuelta Pakalihis nin 20 Minutos,” binutong an duwang silya, asin pinag-olayan nindang duwa an enot na limang parapo kan librong Kaaraman. An sinserong lalaking ini naghangang marhay sa nanodan nia kaya nag-atender sia sa Pampublikong Pagtiripon asin Pag-adal sa Torrengbantayan kan Domingong idto saka uminoyon na ipadagos an pag-adal sa masunod na semana.
30 Tangani na makapag-alok nin pag-adal sa lugar nin negosyo, puede nindong sabihon ini: “Kinse minutos sana an kaipuhan tangani na idemonstrar an samong programa sa pag-adal sa Biblia. Kun kombenyente, maoogma akong ipaheling sa saindo kun paano iyan ginigibo.” Dangan, otobon an oras na itinalaan. Kun bakong posible na magkaigwa nin halawig na pag-orolay sa lugar nin negosyo, tibaad mas angay na songkoon an namamahala sa negosyo sa saiyang harong.
31 Dumalaw Liwat Dawa Pa Mayo Ni Sarong Babasahon na Ikinapasakamot: An gabos na napukaw na interes nangangaipong dalawon liwat, baga man nakapasakamot nin babasahon o dai. Siempre, kun malinaw na talagang bakong interesado an kagharong sa mensahe kan Kahadean, pinakamarahay na ibaling an saindong mga paghihingoa sa ibang lugar.
32 Sa pagpatotoo sa pinto, nanompongan nin sarong tugang na babae an sarong babae na makikatood na marhay alagad marigon na sinayumahan an alok na mga magasin. Nagsurat an parahayag: “Sa laog nin dakol na aldaw pinagparaisip ko sia asin nagdesisyon ako na boot ko liwat siang makaolay.” Sa katapustapusi, namibi an tugang na babae, nagkaigwa nin kapusoan, asin nagtoktok sa pinto kan babae. Sa kaogmahan kaini pinadagos sia kan kagharong. Naponan an pag-adal sa Biblia, asin kinonduktahan liwat iyan kan suminunod na aldaw. Pag-abot nin panahon, nasa katotoohan na an kagharong.
33 Magplano nin Patienot Tangani na Magibo an Pinakadakol: Irinerekomendar na gumamit nin panahon kada semana sa mga pagdalaw liwat. Dakol an magigibo paagi sa marahay na pagplano. Iareglo na gumibo nin pagdalaw liwat sa iyo man sanang lugar na maharongharong kamo tanganing malikayan an pagsayang nin dakol na panahon sa pagbiahe.
34 An mga mapanggana sa paggibo nin mga pagdalaw liwat asin pagpoon nin mga pag-adal sa Biblia sa harong nagsasabi na mahalagang marhay na magpaheling nin odok sa boot na personal na interes sa mga tawo asin padagos na isip-isipon sinda dawa pakatapos kan pagsongko. Kaipuhan man na magkaigwa nin interesanteng tema sa Biblia na ipakikipag-olay asin magbugtak nin pundasyon para sa pagdalaw liwat bago humale sa enot na pagsongko. Dugang pa, importante na dumalaw liwat tolos-tolos tangani na makultibar an interes. An katuyohan na makapoon nin pag-adal sa Biblia dapat na perming isaisip na marhay.
35 An sarong mahalagang marhay na kualidad para sa kapangganahan sa pagdalaw liwat iyo an kapusoan. Paano magkakaigwa kaiyan? Minasimbag si apostol Pablo paagi sa pagsabi na kita ‘magkaigwa nin kapusoan’ na ipahayag an maogmang bareta sa iba ‘paagi sa satong Dios.’ (1 Tes. 2:2) Kun boot nindong umoswag sa kabtang na ini, mamibi ki Jehova para sa tabang. Dangan, kaoyon sa saindong mga pamibi, kultibaron an gabos na interes. Siertong bebendisyonan ni Jehova an saindong mga paghihingoa!
[Kahon sa pahina 3]
Kun Paano Magigin Mapanggana sa Paggibo nin mga Pagdalaw Liwat
■ Magpaheling nin odok sa boot na personal na interes sa mga tawo.
■ Pumili nin interesanteng tema sa Biblia na mapag-oolayan.
■ Ibugtak an pundasyon sa kada saro kan sunod-sunod na pagdalaw.
■ Padagos na isip-isipon an tawo pakahale nindo.
■ Dumalaw liwat pakalihis nin saro o duwang aldaw tangani na kultibaron an interes.
■ Padagos na isaisip an saindong katuyohan na makapoon nin pag-adal sa Biblia.
■ Mamibi para sa tabang na magkaigwa nin kapusoan para sa gibohon na ini.