An mga Pagdalaw Liwat Nagbubunga nin mga Pag-adal sa Biblia
1. Taano ta mahalagang marhay an pagdalaw liwat?
1 Pinagbotan ni Jesus an mga parasunod nia na bako sanang maghulit kundi ‘gumibo man nin mga disipulo, na tokdoan sinda.’ (Mat. 28:19, 20) An parahulit nagbabalangibog, alagad an paratokdo mas dakol an ginigibo. Sia nagtotokdo, nagpapaliwanag, asin nagtataong prueba. An sarong paagi nin pagtokdo niato sa iba iyo an pagdalaw liwat sa mga interesado sa katuyohan na maponan sinda nin mga pag-adal sa Biblia.
2. Sairisay an maninigo niatong balikan?
2 Sairisay an maninigo nindong dalawon liwat? Seguradohon na balikan an gabos na nag-aako nin mga babasahon o nagpapaheling nin dawa dikit na interes sa maogmang bareta. Kun makanompong kamo nin interesado kun naghuhulit sa pampublikong lugar, hingoahon na kuanon an adres o numero nin telepono kan tawong iyan tanganing makultibar an interes. Magin positibo manongod sa pagpoon nin mga pag-adal sa Biblia. Padagos na hanapon an mga maako nin alok na pag-adal sa Biblia, asin posibleng marhay na manonompongan nindo sinda.—Mat. 10:11.
3, 4. Ano an kalabot sa epektibong mga pagdalaw liwat?
3 Magpaheling nin Personal na Interes: An pag-andam para sa epektibong pagdalaw liwat nagpopoon sa enot na pagsongko. An mapangganang mga ebanghelisador inoobserbaran kun ano an pinagkakainteresan kan kagharong, asin ginagamit ninda iyan bilang basehan para sa dugang pang pag-orolay. Nanonompongan nin iba na may bentaha an paghapot sa katapusan kan pagsongko tanganing enganyaron an kagharong para sa masunod na pagdalaw. An satong sinserong interes sa mga tawo nagpapangyari sa sato na pirme sindang isipon dawa paghale niato sa pinto, asin pinahihiro kita kaiyan na sumongko giraray na dai nin pag-atraso. Kun posible, pagmaigotan na dumalaw liwat mientras na bago pa an interes—tibaad sa laog nin saro o duwang aldaw.
4 Kun nagdadalaw liwat, hingoahon na gamiton na basehan an nakaagi nindong pag-oolay. Gibohon na pasohan nindo na kada pagdalaw magtao nin kisuerra sarong nakapakokosog na punto sa Kasuratan, asin magin andam na maghinanyog. Orog pang midbidon an kagharong. Dangan sa masunod na mga pagdalaw, ihiras an mga katotoohan sa Tataramon nin Dios na direktamente nanggad na may labot sa saiyang mga problema.
5. Anong simpleng paagi an magagamit sa pagpoon nin mga pag-adal sa Biblia?
5 Magin Listo na Makapoon nin mga Pag-adal sa Biblia: Dumalaw liwat na an katuyohan makapoon nin pag-adal sa Biblia. Paano ini magigibo? Sambiton na gusto nindong ihiras an sarong interesanteng punto, asin buksan nindo sa librong Kaaraman o brosyur na Kahagadan an sarong parapo na sa paghona nindo magugustohan kan tawo. Basahon an parapo, pag-olayan an hapot, asin tokaron an saro o duwang sitadong teksto. Magigibo ini sa mismong pinto sa laog nin lima sagkod sampulong minuto. Taposon paagi sa paghapot kan masunod na hapot asin pag-areglo na ipagpadagos an pag-oolay sa ibang panahon.
6. Paano niato ikapaheheling na nasasabotan niato an importansia nin mga pagdalaw liwat?
6 An pagkultibar sa gabos na interes na nanonompongan niato sarong mahalagang marhay na aspekto kan satong ministeryo. Kun siring, magtagama nin oras sa saindong semanal na iskedyul para sa mga pagdalaw liwat. An paggibo kaiyan makadadagdag sa pagigin epektibo kan saindong ministeryo asin magtatao nin tunay na kagayagayahan.