An Angat sa Paggibo nin mga Pagdalaw Liwat
1 Bilang mga ministro kan maogmang bareta, pinagbotan kitang gumibo nin mga disipulo. (Mat. 28:19, 20) Kalabot digdi an paggibo nin mga pagdalaw liwat. An pagigin eksperto sa mga pagdalaw liwat puwedeng sarong nakapupukaw na angat.—Tal. 22:29.
2 Kaipuhan na mamatean kan kada nagdusay na Kristiano an paninimbagan na makikabtang sa paggibo nin mga disipulo. Puwedeng mangaipo ini na isakripisyo niato an iba sa personal na kagianan tanganing ikahiras sa iba an paglaom sa Kahadean.
3 Kultibaron an Gabos na Interes: Kaipuhan na gibohon an mga pagdalaw liwat sa gabos na nagpapahayag nin interes sa mensahe kan Kahadean, minsan ngani tibaad sinasayumahan ninda an satong mga publikasyon. Ipinaheling ni Jesus asin kan saiyang mga apostol kun paano an interes sa mensahe kan Kahadean puwedeng makultibar paagi sa pagdolok sa mga tawo na direktang ipinakikipag-olay an Kasuratan.—Mar. 10:21; Gibo 2:37-41.
4 An satong katuyohan sa pagdalaw liwat maninigo na tanganing makapoon nin pag-adal sa Biblia. Tibaad puwede niatong idemonstrar sa kagharong kun paano ginigibo an pag-adal sa Biblia sa harong. Makasisierto kamo na sisimbagon ni Jehova an saindong pamibi na tabangan na makanompong nin sadiosan na tawo na matotokdoan. Taano ta dai arangon an tabang ni Jehova asin gibohon na pasohan na makapoon nin pag-adal sa Biblia?
5 Gamiton nin Marhay an mga Tract: Puwedeng gamiton nin epektibo an mga tract sa pagpopoon nin mga pag-adal sa Biblia. Kadakol kan nakapoon nin pakikipag-olay paagi sana sa pagpaliwanag kan retrato na nasa tutob. Basahon saro-saro an parapo kaiba kan kagharong. Kun naghahapot, pumondo asin imbitaran an kagharong na ipahayag an saiyang sadiri. Basahon an mga kasuratan asin ipaheling kun paano an mga iyan minaaplikar. Dangan puwede nang giyahan an pag-orolay sa publikasyon na mapag-aadalan.
6 Gamiton an Librong Reasoning: Puwedeng makagibo nin epektibong mga pagdalaw liwat paagi sa librong Reasoning. Makatatabang sa saindo an pagrepaso sa pangenot na mga tema o sa indese na pumili nin mga punto na ikapakikipag-olay. An kabtang na “Scriptures Often Misapplied” makatatabang sa pag-atubang sa mga pagkontra na tibaad lumataw. Nagreport an mga payunir nin mapangganang pagpopoon nin mga pag-adal sa Biblia paagi sa paggamit kan mga punto sa librong Reasoning sa pahina 204 sa temang “How do Jehovah’s Witnesses arrive at their explanation of the Bible?” Ipinaheheling ninda sa interesadong tawo kun paano niato tinotogotan an Biblia na magtao nin sadiring paliwanag. Ini nagbunga na makapoon nin nagkapirang pag-adal sa Biblia.
7 Arog ni Jesus asin kan mga apostol, kaipuhan kitang magpaheling nin odok sa boot na interes sa karnero ni Jehova. (Luc. 9:11; 2 Cor. 2:17) Kun ibinubugtak niato an mas dakulang importansia sa pagtao kan satong sadiri para sa espirituwal na kapakanan kan iba, naaatubang niato an angat kan paggibo nin mga pagdalaw liwat.