Epektibong Pagharong-harong
1 Ngonyan an “maogmang bareta” ihinuhulit sa bilog na daga. (Mat. 24:14) Ginigibo ini enot sa gabos paagi sa ministeryo sa harong-harong.—Gibo 20:20, 21.
2 An satong mga pag-aatubang kaipuhan na iadaptar sa mga tawo na satong nanonompongan. Kaya marahay na magin preparado sa manlaenlaen na Makakasuratan na tema na makaaakit sa mga tawo sa satong teritoryo.
3 Gamiton nin Marhay an mga Brochure: An satong mga brochure kadakol kan laen-laen na tema na nakaaakit sa mga tawo saen man na lugar. Epektibong mga pantabang an mga ilustrasyon. Nakatatabang an mga brochure sa mga tawo na maheling an pangangaipo na liwaton an saindang mga paniniwala, paggawe, asin paagi nin pamumuhay. An pagigin pamilyar na gayo sa mga laog kan mga brochure magpapangyari sato na epektibong makapakipag-olay sa mga tawo sa dakol na laen-laen na topiko.
4 Tanganing magin epektibo sa ministeryo, maninigo na kita magpaheling nin tunay na personal na interes. (Fil. 2:4) Pagmaigotan na isentro an pag-orolay sa tema kan Kahadean na kalabot an tawo asin an saiyang mga pangangaipo. Hingoahon na masabotan an kaisipan kan tawo paagi sa paghapot saiya nin angay na mga hapot. Magdangog nin atentibo sa saiyang mga simbag. An saiyang mga komento puwedeng makatabang saindo na masabotan kun anong tema an makaiinteres sa saiya. Boot niatong tabangan an mga tawo na maheling an kahalagahan kan mensahe kan Kahadean asin ipaheling sainda kun paano makanonood nin dakol pa dapit dian. Ipinaliwanag nin sarong mag-agom na nag-ako sinda nin pag-aadal sa Biblia huli ta an tugang na lalaki na nagsongko sainda nagpaheling nin odok sa boot na personal na interes sa sainda.
5 Sa Teritoryong Parateng Nagigibo: Espesyalmenteng mahalaga an pagpatalubo nin pagigin epektibo sa teritoryo na parateng nagigibo. An mas epektibong ministeryo nakatatabang sa sato na mapahiwas an satong teritoryo. Imbes na magsagin dai pa lamang kita nakasosongko sa harong na iyan kaidto, puwede niatong sambiton an satong enot na pagdalaw dangan sumpayan an sinabi kan panahon na idto. Puwedeng iangay an mga pag-aatubang na isinuherir sa nakaaging mga luwas kan An Satong Ministeryo sa Kahadean asin sa librong Reasoning sa mga pangangaipo kan teritoryo.
6 Mapasensiang pinagdadanay ni Jehova na bukas an pinto tanganing dakol pang tawo an makinabang sa mga bendisyon kan Kahadean. Epektibo an ministeryo ni Jesus huli kan saiyang pagkamoot sa mga tawo. (Mar. 6:34) Ginigibo daw niato an satong bilog na makakaya na sunodon an saiyang halimbawa? (1 Ped. 2:21) Dai logod kita pumondo sa lubos asin epektibong pakikikabtang sa ministeryo sa harong-harong.—2 Tim. 4:5.