Pag-aatubang kan Maogmang Bareta—Sa Teritoryong Parateng Nagigibo
1 Gurano nindo kaparateng ginigibo an saindong teritoryo? Kun iyan parateng natatapos, kamo mapalad nanggad. Taano? Huli ta an mga kongregasyon na parateng ginigibo an saindang teritoryo parateng marikas na nagdadakol. Halimbawa, sa Metro Manila, na an kadaklan na teritoryo nagigibo nin dayaday, igwa na ngonyan nin labing 130 kongregasyon.
2 Kan naghuhulit sa sarong teritoryo na nagigibo serosemana, an sarong tugang nakanompong nin babae na an sabi dai pa sia noarin man nakaolay. Galaga siang nagkua nin babasahon asin ogmahon na may nakanompong sa saiya. Kaya igwa pa nin mga tawo sa siring na teritoryo na dai pa nagkakaoportunidad na madangog an maogmang bareta. (Ikomparar an 2 Pedro 3:9b.) An lubos na pagtrabaho sa teritoryo mahalaga tanganing mahanap an mga arog-karnero.—Mat. 10:11.
PAG-ATUBANG SA ANGAT
3 Kun parateng nagigibo an teritoryo, kaipuhan na magkaigwa nin tamang house-to-house record. Puwedeng gamiton an listahan nin mga harong na daing tawo tanganing may magibo sa langtad an mga grupo kun mayo nin ibang teritoryo. Taano ta dai gamiton an paghuhulit sa banggi sa pagprobar na makaolay an mga dai nanompongan sa harong sa aldaw?
4 Kun nagigibo nindo nin makapira an saindong teritoryo na ginagamit an sarong Topikong Mapag-oolayan, marahay na liwat-liwaton an saindong introduksion. Makakaheling kamo nin angay na mga introduksion sa pahina 9-15 kan librong Reasoning.
5 An saro pang paagi na maliwat an saindong introduksion iyo an pag-alok nin tract. Ikonektar an tema kan tract sa Topikong Mapag-oolayan. Gamiton man an presenteng mga bareta, na naghahapot manongod digdi tanganing mapukaw an isip kan kagharong asin may basihan sa pakikipag-olay.
MAGPATOTOO SA GABOS
6 Ginagamit daw nindo an mga 50 porsiento kan saindong oras sa paglilingkod sa pagdalaw liwat asin pag-adal sa Biblia? Kun kamo may separadong rekord kan mga nagpapaheling nin interes, listo nindong mababalikan an gabos na nag-ako nin babasahon.
7 Makakaolay niato an mas dakol pa kun kita alisto sa gabos na oportunidad na makapagpatotoo. Halimbawa, sa paghulit sa satong teritoryo, parate kitang nakakaheling nin mga pahale sa harong o apartment. Kun angay, taano ta dai ialok sa halipot an mga magasin o tract?
8 Dawa kun an teritoryo nagigibo serosemana, posible na may mga may sadiosan an puso na dai pa nanompongan. Asin minsan pa nakapaghulit na kamo sa harong na iyan, tibaad iba man na tawo an manompongan nindo ngonyan. Kun siring, kapareho kan mga apostol, lubos kitang magpatotoo sa teritoryong itinao sa sato.—Gibo 8:14, 25; 20:20, 21.