Pag-aatubang kan Maogmang Bareta—Sa Teritoryong Parateng Mahulitan
1 Sarong angat an paghuhulit sa teritoryong parateng mahulitan. Paano nindong pinapagdadanay na presko asin nakaaakit an mensahe? Ano an maninigong gibohon sa iba na nagdesisyon nang sinda talagang bakong interesado? Ano an masasabi niato sa mga nagsasabi na kita sobra kaparateng dumalaw?
MAGIN POSITIBO
2 An teritoryo na parateng hinuhulitan sa kadaklan nagpapaluwas nin mas marahay na mga bunga kisa duman sa daing gayo niato nahuhulitan. Kaya enot kaipuhan na haleon niato an ano man na negatibong kaisipan manongod sa parateng pagsongko sa iyo man sanang mga harong. An mga tawo kaipuhan na tawan kan gabos na oportunidad na makadangog kan mensahe. Sala na isipon na hinokoman na ni Jehova na dai maninigo an mga dai naghimate sa ibong nin parateng pagsongko.
3 An pagpaheling nin empatiya nangorognang mahalaga sa teritoryong parateng hulitan. An pagkaigwa nin espisipikong mensahe na nakaaapektar sa mga tawo sa saindang lokal na lugar posibleng magbunga nin positibong reaksion kan iba na dai kutana maghihinanyog. Aram daw nindo an presenteng mga pangyayari, asin andam daw kamong ipaliwanag kun paano makatatabang an Biblia na maatubang an mga problema ninda?
LIWAT-LIWATON AN PAGDOLOK
4 Liwat-liwaton an saindong pagdolok sa teritoryong parateng hulitan. Sarong beses tibaad gumamit kamo nin tract sa saindong introduksion. Sa saro na naman na okasyon an saro sa labing 40 introduksion sa pahina 9-15 kan librong Reasoning puwedeng iangay sa lokal na mga problema. Tibaad gusto pa ngani nindong sambiton an nakaagi nindong pagsongko, sa siring hinahale na ini bilang pagtumang. An sarong makahulogan na komento kan kagharong kaidtong huri nindong pagsongko puwedeng gamiton tanganing lumawig an orolay.
5 Magin kapareho kan pagheling ni Jehova an magin pagheling niato sa mga tawo, asin padagos na magpaheling nin pagmakolog sa mga nagsabi sato na dai sinda interesado. Si Jehova paorootrong nakiolay sa saiyang suanoy na banwaan sa ibong kan saindang pagkaindiperente. (2 Cron. 36:15; Jer. 7:13) An dakol na kaidto naghona na dai sinda interesado mga tugang na niato ngonyan. Pati mapait na mga paratumang naakit sa katotoohan. An mga ini nagpapasalamat na may mapasensiang nagpadagos na songkoon sinda dara an maogmang bareta.
MAGKAIGWA NINMARAHAY NA REKORD
6 Mahalaga na magkaigwa nin marahay na house-to-house record. An pagbuwelta sa mga mayo sa harong magsisierto na biyong natapos an teritoryo asin palalawigon an panahon sa pag-oltanan kan satong mga pagsongko. An iba nakibalyo kan rekord nin mga dai naabotan sa harong sa tahaw nin semana sa mga naghuhulit kun Sabado asin Domingo. Liniliwatliwat kaini an oras nin pagsongko sa mga harong asin nakatatabang na matagbuan an mga naghahale sa espisipikong mga oras asin aldaw sa laog kan semana.
7 Aram ni Jehova kun nagibo na an bastanteng paghihingoa na maabot an gabos na magdadangog. Makasasarig kita na mahahaman an gibohon sa laog kan itinaong panahon.—Ezeq. 9:11.