Lubos na Otobon an Saindong Ministeryo
1 Sinabihan ni Jesus an saiyang mga disipulo: “Kaya paduman kamo asin gumibo kamo nin mga disipulo . . . , na tokdoan nindo sinda na otobon an gabos na bagay na ipinagboot ko sa saindo.” (Mat. 28:19, 20) An tunay na mga disipulo ni Jesus ngonyan entusiastikong nag-ootob sa nagliligtas nin buhay na gibohon na ini. An halimbawa ninda na nagpapakosog sa pagtubod nakadadagka sa sato gabos na lubos na otobon an satong ministeryo.—2 Tim. 4:5; Heb. 13:7.
2 Minsan siring, sa nagkapirang teritoryo dakol an mayo sa harong kun kita minasongko. Saro pa, an ibang kongregasyon mahiwason an teritoryo. Huli kaini depisil na tapuson nin parate an teritoryo, lubos na maataman an mga interesado, o bumalik tanganing manompongan an mga mayo sa harong. Ano daw an magigibo nindo tanganing mas lubos na maotob an saindong ministeryo? Prinobaran na daw nindong ikonsentrar an saindong mga paghihingoa sa mas mabungang mga lugar sa saindong teritoryo? Pagmaigotan na gibohon an mga ini nin pirang beses kada taon, mantang sinisierto na magibo an bilog na teritoryo na iinasignar saindo kisuerra sarong beses kada taon.
TAMANG PAGGAMIT SA HOUSE-TO-HOUSE RECORDS
3 Kaipuhan na magkaigwa kita nin marahay na house-to-house record asin gamiton iyan nin marahay pagkatapos. Paano niato lubos na maootob an satong ministeryo kun dai niato babalikan an mga harong na mayo nin tawo? Masasabi daw niato na natatapos niato an satong teritoryo kun dai niato nadadalaw liwat an mga interesado asin pinagmamaigotan na maponan an pakipag-adal sa sainda? Ini nagdodoon kan pangangaipo na gamiton nin tama an house-to-house record. Pinakamarahay na magkaigwa nin duwang record, an saro para sa nanompongan na interesado asin an saro man para sa mga adres nin mga harong na mayong tawo.
4 An ibang parahayag naheling na praktikal na balikan an mga harong na mayong tawo bago humale sa teritoryo. An pagbuwelta mga saro o duwang oras pakalihis kan enot na pagdalaw tibaad magbunga kan pakanompong nin tawo asin pakapasakamot nin babasahon o pakapoon nin pag-adal sa Biblia.
5 An mga parahayag na dai tolos makakabalik puwedeng itao an record nin mga harong na mayong tawo sa nangengenot sa saindang pag-adal tanganing itao sa ibang parahayag. An iba tibaad gustong dumalaw kun pasiring sa asin papuli hale sa eskuwelahan, trabaho, o pananaod.
6 An mga nasa satong teritoryo nagkakaipo pang tawan kan oportunidad na ‘mag-apod sa ngaran ni Jehova.’ (Roma 10:11-13) Maghingoang gayo kita asin hanapon niato an gabos na oportunidad na lubos na maotob an satong ministeryo.