Pag-aatubang kan Maogmang Bareta—Na Ginagamit an House-to-House Record
1 “Ako naghulit nin lubos kan maogmang bareta.” (Roma 15:19) An mga tataramon na ini ni Pablo nagpapaheling kun gurano sia kaigot sa paghuhulit, pagtotokdo, asin paggibo nin mga disipulo.
2 Boot niato na magin arog man kaiyan kalubos sa satong teritoryo. Natataya an mga buhay sa delikadong mga panahon na ini. An dai pakatao nin patanid sa mga tawo mangangahulogan nin kasalan sa dugo. (Ezeq. 3:18, 19) Kapareho ni Pablo, boot niatong makasabi na kita ‘malinig sa dugo kan gabos na tawo.’ (Gibo 20:26) Paano daw niato mas lubos na magigibo an satong teritoryo? Makatatabang an tamang paggamit sa pormang House-to-House Record.
KUN MAYO NIN TAWO SA HARONG
3 Kaipuhan an kompletong rekord nin mga mayo sa harong sa epektibong pagtapos sa satong teritoryo. Kaipuhan na kita desidido sa paghihingoa na may maabotan sa kada harong. Kun mayo nin tawo, maninigo na isurat niato iyan sa house-to-house record. Dangan maninigo kitang bumuwelta asin pagmaigotan na makapagpatotoo sa sarong miembro kan pamilya.
4 Tanganing makaolay an mga mayo sa harong sa enot na pagsongko, an iba ginamit an saindang house-to-house record, na nagbuwelta sa iyo man sanang aldaw. O pinoprobaran nindang magduman sa ibang aldaw o ibang oras. Narisa nin dakol na an pagsongko sa banggi nagtatao nin marahay na resulta. An iba nag-apod sa telepono o nagpadara nin surat kan mayo nin nangyari sa paorootrong pagsongko.
KUN MAY NANOMPONGAN NA INTERESADO
5 Kun may nanompongan kamong interesado, isurat iyan. Isurat an ngaran kan tawo, adres, asin ano pa man na ibang nakatatabang na impormasyon. Kun dai nindo giraray nanompongan an tawong interesado pakalihis nin pirang pagbuwelta, tibaad makatabang an pagliwat nin aldaw o oras. Dai magin madaling sumuko sa saro na nagpaheling nin interes.
6 Si apostol Pablo nagtao nin marahay na halimbawa sato. Sia ‘lubos na nagpatotoo’ sa saiyang teritoryo. An tamang paggamit sa house-to-house record makatatabang sato na magibo man iyan. Asin dakulang kagayagayahan an kakamtan niato mantang dakol pa an nagigin mga disipulo ni Jesu-Cristo! Sa siring, masasabi niato, arog ni Pablo: “Malinig ako sa dugo kan gabos na tawo.”—Gibo 20:21, 26.