Taano ta Dapat na Magkaigwa nin Rekord kan mga Mayo sa Harong?
1 Sarong mag-agom na Saksi an nagluwas sa langtad nin amay pa. Paghaloyhaloy kan aldaw man sanang iyan, nagbalik sinda tanganing songkoon an nasa lista nindang mga mayo sa harong sa teritoryong iyan. Sarong lalaki an inagda sinda na dumagos asin naghinanyog na marhay. Kinua nia an librong Mabuhay Sagkod Lamang asin hinapot an mga Saksi kun mabalik. Nungka siang nakapakipag-olay sa mga Saksi ni Jehova kaidto asin kadakol kan hapot nia na boot niang masimbag; naponan an pag-adal sa Biblia. Labi-labi an kagayagayahan kan mag-agom na ini sa pakanompong sa siring na arog karnerong indibiduwal. Boot daw nindong magkaigwa nin eksperyensia na siring kaiyan? An pagkaigwa nin marahay na rekord kan mga mayo sa harong asin pagbalik tolos puwedeng gibohon na posible para saindo na maeksperyensiahan iyan.
2 Dinadagka kita nin paorootro na magkaigwa nin tamang rekord kan mga mayo sa harong asin sumongko giraray sa dai mahaloy. Siring sa ipinaheheling kan eksperyensia sa enotan, an saro pang pagsongko sa iyo man sanang aldaw puwedeng magtao nin ekselenteng mga resulta. Minsan naghihingoa kitang matapos an asignadong teritoryo, tibaad bako kitang mahigos na gayo sa pagkaigwa nin rekord kan mga mayo sa harong. An iba nagsasabi: ‘Hinuhulitan niamo an samong teritoryo kada duwa o tolong semana; dai na kaipuhan na magkaigwa nin siring na rekord huli ta mabalik man sana kami sa dai mahahaloy.’ Pero nagtatao iyan sa sato nin orog pa nganing rason na magkaigwa nin rekord. Kun an teritoryo parateng nahuhulitan, an pagbalik sa mga mayo sa harong pinangyayari kita na magin mas sirot an paghanap sa mga angay. Paano iyan?
3 Sa ibang lugar, dakol sa mga residente an mayo sa harong durante kan aldaw. Kun siring, an totoo, nakakagibo kita nin mas dakol na teritoryo paagi sa pagkonsentrar nin orog sa satong lista nin mga mayo sa harong. Dawa kun an teritoryo bihirang mahulitan, puwede tang mapaoswag an mga resulta kun ginigibo an paghihingoa na maabot an gabos bago markahan an teritoryo na nagibo na.
4 An pagsongko sa mga mayo sa harong sa parate puwedeng areglohon para sa ibang aldaw, mas marahay kun bago matapos an semana. Dakol an nakanonompong na mas marahay na bumalik sa aldaw asin oras na laen kisa kan ginibong enot na pagsongko. Tibaad gusto nindong gamiton an ibang oras sa Sabado o Domingo sa pagsongko sa mga mayo sa harong na ilinista sa laog kan semana. Bilang saro pang posibilidad, dakol na kongregasyon an nanompongan na nagin mabunga an siring na mga pagsongko sa amay na mga oras sa banggi. Puwede nindang manompongan sa harong an labi sa kabanga kan mga residente.
5 Maninigo nindong ilista sa sarong separadong rekord an mga pagdalaw liwat. Kun dai nindo mababalikan an saro na mayo sa harong, an saindong rekord kan mga mayo sa harong maninigong itao sa tugang na nangengenot sa grupo, para magamit kan masunod na grupo na maduman sa teritoryong iyan.
6 An pagtao nin orog na atension sa kabtang na ini kan satong ministeryo puwedeng magpaoswag kan satong pagigin mabunga siring man kan satong kagayagayahan. Magtatao iyan sa sato kan pagkakontento na bunga nin pakaaram na sirot an paghanap asin pag-asikaso niato sa mga arog-karnero.—Ezeq. 34:11-14.